نص كلمة السيسي خلال لقائه رؤساء عدد من كبريات الشركات الدولية المشاركة في المعرض الدولي للصناعات 26/11/2024
بسم الله الرحمن الرحيم،
اسمحوا لي الأول إن أنا أرحب بيكو جميعًا، أهلًا وسهلًا.
سعيد بلقاءكم، وسعيد بوجودكم في المنتدى والمعرض التالت للصناعة في مصر، وأتمنى لكم إقامة طيبة للـ، للضيوف وللشركات الموجودة بالنجاح.
أنا عايز أكلمكم بصراحة إن إحنا في مصر آآ بذلنا جهد كبير قوي خلال الـ10 سنين اللي فاتو دول عشان نوفر بيئة مناسبة لتطوير أو لإن الصناعة تبقى جزء كبير جدًا من الناتج المحلي للدولة المصرية.
وإحنا بالمناسبة سوق كبير قوي، وبالتالي قبل ما نقول فرص تصدير فقط مثلًا، وهو ده أمر مهم بردو، ولكن عايز أقول إن هو السوق في حد ذاته سوق كبير.
ثم إحنا لينا اتفاقيات وعلاقات طيبة جدًا مع الدول الأفريقية ومع الدول العربية وحتى مع الدول الأوروبية وشرق آسيا، علاقتنا طيبة مع الكل، وبالتالي يبقى في فرص تصدير حقيقية لمنتجاتها أو منتجات الشركات اللي شغالة في مصر.. ها تبقى فرص كبيرة.
فأنا قلت إن إحنا خلال الـ10 سنين دور إن إحنا نعمل بنية أساسية مناسبة للصناعة، وما سيبناش مجال إلا لما اشتغلنا فيه: المواني المطارات الـ.. الـ، شبكة الطرق، شبكات القطر، الكهربا، الغاز... كل المجالات اللي محتاجاها الصناعة إحنا اشتغلنا عليها كبنية أساسية.
ثم حتى البنية التشريعية، البنية التشريعية عشان تقدم الحوافز وعشان تؤمن استثمارات الشركات اللي بتشتغل في مصر. ده اللي الدولة عملته، وعملنا استراتجية للاستثمار، وأيضًا عملنا وثيقة اسمها وثيقة ملكية الدولة، لأن إحنا في مصر لينا تجربة مع القطاع العام خلال الـ50 سنة اللي فاتو.
فاللي انا عايز أقوله إن إحنا مهتمين جدًا بالقطاع الخاص، ومهتمين إن إحنا نوفر له مناخ مناسب يشتغل فيه، وإحنا محتاجين إنه يشتغل، ومحتاجين إنه يتطور، ومحتاجين إنه يكبر استثماراته.
وأنا ها أقول لكم على حاجة، في فرق كبير قوي إنك إنت تجمع منتجات، وفرق إنك إنت تنتج الـ.. المنتج بنسب كبيرة. يعني لو اتكلمت على صناعة زي صناعة السيارات، أو حتى صناعة الإزاز زي ما شوفنا، لو كل الإنتاج اللي طالع حاجته بتطلع بتشتغل وبتتصنع في مصر، أمر مختلف كتير جدًا على إنك إنت تدخل في متاهات الـ.. التقلبات اللي إحنا شايفينها.. إحنا شوفنا واقع زي.. يعني كورونا وعملت فينا إيه كلنا، وقفت كل سلاسل الإمداد لمدة أكتر من سنة وشوية.. شوفنا الحرب الروسية عملت إيه في سلاسل الإمداد أيضًا.. شوفنا الحرب بتاعة غزة عاملة إيه.. وبالتالي إن المنتج ده يبقى موجود نسبة كبيرة جدًا منه في مصر، أو كله، أمر ها يبقى آآ ها يبقى ناجح للصناعة.
على كل حال، أنا بس عايز أقول لكو إن إحنا كدولة مهتمين وما عندناش ترف أبدًا إن إحنا نضيع وقت غير في إن إحنا نشجعكم ونساعدكم على إنك إنتم تشتغلو وتطوروا وتستثمروا، و.. و.. وأنا ها أجيب أمثلة، أنا عارف إن في شركات ها تعرض دلوقتي.. الفريق كامل...
لكن أنا ها أجيب مثال.. 2016 و17، أنا كان ليا فرصة إن أنا أزور دول كتير في الوقت دوت عشان أتكلم في الصناعة، روحت اليابان وروحت كوريا، واتكلمت ساعتها عن السيارة الكهربائية، واتكلمت ساعتها عن السيارة الكهربائية إن إحنا في مصر مهتمين بهذا الموضوع، إذا كانت الـ، الـ، صناعة السيارات التقليدية فاتتنا، فقلنا نخش في موضوع، يعني، آآ على العالم كله شغال فيه، الكلام ده كان 2016، وقلنا إن إحنا آآ مستعدين نقدم الحوافز اللي تنجح صناعة السيارات الكهربائية في مصر.
يعني حد يقول لي شركة مثلًا اللي أنا المثال بتاع صناعة السيارات، أنا عايز أعمل، يعني، مقر للشركة، بهناجره بحاله بمحتاله، والشركة ها تجيب الـ.. الـ (كلمة غير واضحة) والمكن وها تدير الأمر. طب الموضوع ده ها يكلف كام؟ وأنا بقولها بوضوح كدا لكل اللي قاعدين، وكل اللي مش موجودين معايا، مرصود لهذا الأمر 100 مليار جنيه، لأن أنا ها أدفعهم في منتجات جوة مصر. 100 مليار جنيه محطوطين من الدولة في إن أنا أقول لك عايز تعمل صناعة سيارة كهربائية في مصر؟ أيوة.
إديني اللاي أوت بتاعك، إحنا مستعدين نخش في ده عشان حضرتك الاستثمارات بتاعتك ما تبقاش عبء عليك، وتقول لي مرحلة تانية وتالتة، لا، أنا بقول لك هات لي اللاي أوت ده، الأرض أنا بخصصها وأعمل ال.. المطلوب مني والرخص والكلام ده ومن هذا القبيل، ويبقى إنت عليك تجيب المعدات المطلوبة للإنتاج وتدير العمل.
طب أنا بعمل ده ليه؟ عشان عايز أشارك حضرتك كدولة.. لا، أنا عايز أشجع حضرتك، عايزك تيجي وتتفضل وما فيش حاجة تعيقك، ما تقوليش النهار ده أنا بعمل إزاز بنسبة 80%، لأ، أنا عايز الإزاز بنسبة 100%، بعمل آآ منتج آآ مثلًا 60% ، 70%، وأقول إن شاء الله ها أعمل حسابي إن خلال 5 سنين يبقى 100%.. أنا ما عنديش 5 سنين، أنا ما عنديش غير بكرة، أو إمبارح.. بكرة أو إمبارح.
طب إيه المطلوب؟ كل منتجات الموضوع دوت تعملها في مصر، وها تبقى آآ يعني، مواصفاتك مواصفات عالمية، ها تبقى متاحة حاجتك لكل الشركات اللي موجودة في مصر، وتنسقوا مع بعضكم.
وبالإضافة طبعا للمدارس الفنية اللي إحنا بنقول لو أي مصنع من المصانع عايز يكون المدرسة اللي موجودة جنب منه هو يشرف على انتقاء، انتقاء وتعليم وتأهيل الطلاب، إحنا مستعدين نوفر له ده، المدرسة والإنفاق على المدرسة بردو، وهو المادة الإشراف اللي هو بقى عايز المنتج بتاعه يفيده في مصنعه، إحنا ما عندناش مشكلة أيضا إن إحنا نقف في هذا الأمر.
ومن جانبنا، زي ما قلت القوانين، وزي ما قلت إن إحنا، إحنا أنشأنا 25 جامعة خلال الـ10 سنين، إحنا ضاعفنا عدد الجامعات في مصر بـ، كلها بـ.. جامعات بعلوم العصر، عشان تقدر تقدم لكم آآ يعني منتج تعليمي للشاب أو الشابة، يقدر يبقى لما تطلبه إن هو يعمل عندكم.
إحنا عايزين ننتج كل حاجة في مصر، على الأقل في الحاجات اللي إحنا يعني التكنولوجيات بتاعتها مش معقدة قوي. برحب بيكو أهلًا وسهلًا.
ألقيت الكلمة في القاهرة، حيث التقى الرئيس عبد الفتاح السيسي برؤساء عدد من كبريات الشركات الدولية العاملة في قطاع الصناعة المشاركين في النسخة الثالثة من الملتقى والمعرض الدولي السنوي للصناعات، وذلك بحضور الدكتور مصطفى مدبولي رئيس مجلس الوزراء، والمهندس كامل الوزير، نائب رئيس مجلس الوزراء للتنمية الصناعية ووزير الصناعة والنقل، والمهندس محمد زكي السويدي رئيس اتحاد الصناعات المصرية.