نص تعقيب السيسي في مؤتمر الاستثمار المصري الأوروبي 29/6/2024
نص تعقيب السيسي في مؤتمر الاستثمار المصري الأوروبي 29/6/2024
هو مش تعقيب، يمكن يكون آآ ترحيب وتقدير كبير جدا للسيدة رئيسة المفوضية، السيدة أورسولا، ولفريق العمل المصاحب ليها، والجهد اللي اتبذل خلال الـ 100 يوم اللي فاتو عشان، مع طبعا وزراءهم المصريين، في الجهد اللي اتعمل من أجل ال.. الوصول إلى عقد هذا المؤتمر الاقتصادي المهم.
فأنا برحب بيها مرة تانية، و.. بشكرها على ال.. الجدية والالتزام و.. و.. الجهد الكبير اللي اتعمل خلال الفترة ديت، وأيضا بشكر الفريق العمل المصري، وبرحب أيضا بالضيوف الوزراء الأوروبيين الموجودين، وأيضا الشركات الأوروبية اللي موجودة.
وأنا ها أقول بالإضافة لكل الكلام اللي إنتو سمعتوه من زملاءنا الضيوف اللي كانوا بيتحدثوا مع الأستاذ أسامة عن الاقتصاد وعن الاستثمار وكدا، وبقول لكم في حاجة مهمة قوي تعرفوها عن مصر... مصر مش بس بتـ.. سوق ضخمة كبير فيه تقريبا أكتر من 120 مليون، باللاجئين اللي موجودين فيهم، أو الضيوف اللي موجودين فيهم أنا بقول كدا دايما، آسف على كلمة لاجئين دي، لكن بتكلم على إن السوق ده سوق ضخم جدا، وزي ما.. ذُكر.. إن في هنا كمان قوة عاملة ضخمة جدا، 70% من شعبنا أقل من 40%، آآ أقل من 40 سنة، وده يعني أمر واعد جدا جدا لأي مستثمر عايز يجد قوة عاملة بتكلفة معتبرة، بتكلفة مالية معتبرة.
لكن الكلمة المهمة اللي أنا عايز أقولها، في، مع كل اللي اتقال النهار ده وها يتقال، إن هنا لازم نبص على إن في شعب، شعب في مصر، بقى له أكتر من 12 سنة صلب، وصامد، ومتطلع إلى مستقبل أفضل، وده يمكن أكتر نقطة اسمحوا لي إن أنا أشير ليها هنا.
التحديات اللي قابلت مصر من 2011 لغاية النهارده تحديات ضخمة جدا، وهي أتصور إن هي اختبار نجح فيه المصريين، وبيؤكد للمستثمرين إن البيئة، بيئة الاستثمار آمنة ومستقرة، مش بقدرة دولة، يعني مؤسسات الدولة، لأ، بإرادة شعب، الشعب المصري شعب قوي، صامد، تحمل تبعات وتحديات ضخمة جدا، في بعضها هو مش مسؤول عنها على الإطلاق، زي ما حصلت في أزمة ال.. كوفيد 19، والحرب الروسية، وحرب غزة، وليها تداعيات اقتصادية على كل الاقتصاديات الناشئة ومنها الاقتصاد المصري بطبيعة الحال، ولكن تحمله لها، واللي أنا بشكره من.. بشكره بوجه الشكر ليه على هذا التحمل، ده أكبر ضمانة للاستثمار، للمستثمرين المصريين والأجانب.
وإحنا، زي ما ذُكر خلال ال 10 سنين اللي فاتو من 2014، لغاية النهار ده، كنا حريصين على إن إحنا نؤهل الدولة المصرية إن يكون فيها بنية أساسية متطورة بشكل يتيح انطلاق استثمار حقيقي وصناعة حقيقية في المجالات المختلفة، سواء كان زي ما ذُكر كدا آآ الاقتصاد قديم أو اقتصاد جديد و.. فأنا بقول لكل اللي شارك معانا في المؤتمر وحتى اللي بيسمعنا: لدينا فرصة كبيرة جدا جدا في الاستثمار في مصر، وإحنا ها نبذل كل الجهود عشان ننجح هذه الاستثمارات، وعشان نوفر لها البيئة الجاذبة لها.
مرة تانية أنا بشكر السيدة رئيسة المفوضية، ومقدر جدا دعمها لينا، شكرا جزيلا، متشكرين.
ألقيت الكلمة في القاهرة بمركز المنارة للمؤتمرات الدولية، وذلك بحضور رئيسة المفوضية الأوروبية أورسولا فون دير لاين، ورئيس مجلس الوزراء الدكتور مصطفى مدبولي، وعدد من الوزراء والمستثمرين.