![](/sites/default/files/styles/lead_image_small/public/photobank/cc_0.jpg.webp?itok=HohNnhAt)
نص كلمة السيسي خلال افتتاح المشروعات التنموية في جنوب الوادي 25/5/2024
1:16:31
السيسي: خلصت كدا يا محمد؟
محمد جمال: تمام يا فندم.
السيسي: طيب، أنا بشكرك الأول على.. وأنا قصدت إن أنا أتكلم معاك إنت بالذات عشان حاجتين: إنك إنت طبعًا المزرعة دي كانت آآ يعني كانت بتقابل مشاكل زي ما إنت ذكرت كدا، و.. وكل الجهود اللي اتعملت سابقًا ما نجحتش إنها تحل المسألة بشكل حاسم يعني.. لكن إنت بفضل الله سبحانه وتعالى قدرت تعمل ده. وهنا أنا بتكلم على نقطتين مهمين: إنت التكلفة اللي بتتكلم عليها تكلفة كبيرة، وبالتالي إنت اقتصاديًا، اقتصاديات المشروع ليها عائد معاك جيد عشان، مش عشان إنت أكيد مش ها تعمل حاجة من غير ما تكون ما تطمن إنها بتجيب لك، لكن عشان الناس اللي شغال في المجال تعرف إنه قد يكون أحيانًا بتحتاج إنك إنت تعمل استثمارات كبيرة، لكن العائد أكيد جاي.
أنا بتوقف عند نقطة تانية اللي هي 25 أردب...
محمد جمال: تمام يا فندم.
السيسي: فـ.. فده رقم آآ يعني كبير.
محمد جمال: تمام.
السيسي: فـ.. وأنا بقول هنا ليك يا جمال، ما تبصش في الورق، دي تجربتك، يعني ما.. بص وكلمني في ال.. في تجربتك اللي إنت عملتها.. يعني عايز أقول لك إيه، وبقول لكل مهتم.. النهار ده لو كان السايد 18 لـ 20 أردب، بنفس كمية الميه، بنفس المساحة.. لما تـ. ال.. ال.. الكمية تزيد فوق الـ 20، أنا متصور إحنا محتاجين نتوقف كلنا عندها، لأن حتى في ال.. في الشغل اللي بيتعمل آآ داخل ال.. مشروعات الخدمة الوطنية سواء كان هنا أو في مستقبل مصر، إحنا ما وصلناش لـ 25 أردب خالص لل.. لل.. للفدان، فإذا كانا لرقم ده نجح على ال.. على الأرض دي، وتقريبا نفس الظروف المناخية اللي موجودة، مساحة 2000 فدان إنت بتقول مش كدا؟
محمد جمال: أيوة يا فندم.
السيسي: 2000 فدان، يعني إذا كنت أنا قدرت تنجح في 2000 فدان، وإن المتوسط يصل لـ 25 أردب، الـ 5 أردب في نص مليون فدان يعملوا 2.5 مليون أردب يا دكتور مصطفى، يعني مليون طن، مش كدا؟ مش كدا ولا؟ أنا.. يعني لو قسمنا ده، أي كمية ها تطلع فوق الـ 20 أردب، إحنا إيه؟ لأن هي هي الميه، وهي هي الأرض، وهو هو الجهد، ولا أنا؟
محمد جمال: تمام يا فندم.
السيسي: وبالتالي أنا بقول التجربة مش عشان فقط أهنيك عليها وأقول لك متشكرين، لكن كمان عشان نسمع كل من يهتم في ال.. المزارعين المصريين في الدلتا وفي الصعيد لما يسمعوا الكلام دوت، مهم أوي إن هم يعرفوا إزاي يصلوا بالكمية ديت، لأن هي أكيد موضوع مش بس على، يعني استخدام ميكنة، لكن أكيد استخدام وسائل علمية تضيف الكمية دي، والكمية دي أكيد متعوضة لو كان ليها تكلفة زيادة.
محمد جمال: طبعًا.
السيسي: لو كان ليها تكلفة زيادة، أكيد متعوضة بالإنتاج الكبير دوت.
محمد جمال: الحمد لله.
السيسي: طبعًا الحمد لله. أنا عايز أقول لك إن إحنا في مزرعة بتاعة بني سويف والمنيا، وطبيعة الأرض فيها قاسية شوية، ما أعرفش إنت شوفتها ولا لأ.
محمد جمال: شوفتها يا فندم.
السيسي: شوفتها. إحنا لو كان النهار ده. خلي بالك، لما إحنا، يعني مهم قوي إن إنا وإحنا بنتكلم في المشاريع ديت الناس تقول يعني طب الأرقام اللي بتقولوها تكلفتها كتير، تكلفتها كتير قوي، وده صحيح، بس هي تكلفتها كتير لأنك إنت بتعمل كل حاجة مرة واحدة. الدلتا مثلًا والشبكة، اتعملت على مدى 150، 200 سنة، شقيت طريق، دخلت كهربا..
محمد جمال: ترع.
السيسي: شديت، عملت شبكة ترع، مصارف.. فخدت منك سنين طويلة جدًا جدًا، فإنت بتعمل ده كله مرة واحدة، عشان تبقى المشروع آآ بتتكلم في، بتدخل الكهربا، بتدخل الميه، محطات الرفع.. كله يعني على كل حال يعني.
فأنا بقول النهار ده لما بنيجي نعمل ده، حق المشروع علينا، قبل حق بلدنا علينا، إن إحنا نطلع أكبر حجم من الإنتاج لأنه مش معقول يكون أنا بزرع مثلا مليون فدان، وأقدر أزودهم بدل ما يطلعوا لي 2.5 مليون طن قمح، مش كدا يا دكتور؟ 3؟ 3.5؟ 4؟ أنا ما أعرفش، باللي إنت بتقول عليه ده قد نصل لـ 3.5 ولا حاجة للمليون فدان. يبقى أنا زودت كمية القمح من غير ما أزود أرض أو أزود ميه أو أزود آآ طاقة عمل زيادة، ده هي هي المساحة، وهي هي الميه، وهو هو الوقت، بس بدل ما ها أنتج مليون طن، ها أزود 200 ألف مثلا آآ طن قمح زيادة على نفس الكمية، وبالتالي التجربة بتاعتك مهم أوي إن هي يتم آآ الحديث معها، وأكيد وزارة الزراعة معنية بالكلام ده و.. ومتابعاه، لأن هو ده الرقم لفت نظري.
أنا بقول لك بص على الموضوع بتاع بني سويف والمنيا، وبص على الـ 400 ألف فدان أو الـ 450 ألف فان بتوع سينا.
محمد جمال: إن شاء الله يا فندم.
السيسي: بص عليهم إنت وزمايلك والمجموعة اللي معاك، لأن المستثمر ليه طريقة، يعني.. ها أقول أشطر مننا، آه أشطر مننا..
محمد جمال: العفو يا فندم.
السيسي: ليه العفو ليه؟ ده حاجة كويسة.
محمد جمال: ربنا يبارك في حضرتك.
السيسي: آه طبعا حاجة كويسة، وكل المستثمرين مدعوين إن هم يبقوا موجودن معانا، لأن هم ها يقدروا يعملوا اللي إحنا محتاجينه أكتر في إدارة المشروع وإنتاجية أكبر و.. وإحنا محتاجين إن كمية الميه اللي ما بتتغيرش نستفيد منها بإن إحنا نزرع أكبر حجم وأكبر إنتاجية تيجي بيها، بدل ما أطلع 18 أردب أطلع 20 أطلع 25، ده حاجة عظيمة جدًا.
وأقول لك على حاجة كنت بدردش فيها مع الزملا وأقول لهم التين الشوكي، الريات، بياخد كام رية؟ وهي ممكن يبقى في رية بينية بنفس كمية الميه المخصصة لك في الـ 1000 فدان أو الـ 2000 فدان تعمل رية منهم بكمية أقل للتين الشوكي؟
وخلي بالك، وأنا بقول الكلام ده عشان كل اللي بيسمعني إيه، ياخد باله من الكلام اللي بقول عليه.. أنا عايز بأقل كمية ميه أطلع أكبر إنتاج لمحاصيل، وبالتالي لازم نفكر بالطريقة اللي أنا بتكلم فيها دي.
عارفين مثلًا نبات زي النبات دي بيحتاج كميات شحيحة جدًا من الميه وبيجود، وعنده قدرة على تحمل درجات الحرارة، والملوحة، وحتى طبيعة الأرض الصعبة. لكن قد يسأل البعض يقول لك الجوجوبا اللي إنت اتكلمت عليها، وحاجة زي التين الشوكي ده، هو مصلحته إيه.. لو هو زراعة كدا بس، لو إنت زرعته كدا بس، مش ها يجيب لك كتير، لأنه مش للأكل يعني، إنما ده بيتزرع، وبيتعصر، وبيـ.. بيطلع منه علف، فلو إنت زرعت، والكلام ده اتكلمنا فيه، والدكتور أو وزير الزراعة يعني يرد عليا فيه، إنك ممكن بنفس كمية الميه المزروعة للـ 250 ألف فدان تضيف كمية أكبر على الـ 250 ألف فدان لصالح إنتاج هذا الموضوع، ولكن مش ها تستفيد منه إلا إذا كنت تعمل الصناعات..
محمد جمال: التكميلية.
السيسي: التكميلية بتاعته، اللي هي إذا كنت ها تعمل مصانع للعصر بتاعته، إذا كنت ها تعمل اللي هي المشتقات اللي بتخرج منه، واللي هي النهار ده ليها قيمة مالية كبيرة جدا إنها بتخش في صناعات كثيرة.
انا بقول لك كدا ليه، لأن النقطة دي في نقطة إن إحنا نستفيد من حجم الميه اللي موجودة، وأنا الكلام ده كررته قبل كدا وبكرره تاني، ولما دخلنا في محطات المعالجة الزراعية، سواء كانت المحسمة أو بحر البقر أو المحطة اللي إحنا قلنا سموها اسم جديد في ال.. الدلتا الجديدة دكتور مصطفى بيقول لي، الهدف منها إن إنت ما فيش ميه تفقدها يعني.
طب وأنا بعمل ده، لو النباتات والتكنولوجيا والعلم يخليني إن أنا أصنع كميات كبيرة، أصب ممكن وزارة الزراعة في محطات البحوث بتاعتها ليها نجاحات كبيرة جدًا جدًا، البذور ولكام من هذا القبيل، ولكن أنا بتكلم بفرق إنك إنت تتكلم على نطاق 100 فدان و 1000 فدان ونطاق 200، 300 ألف فدان. اتفضل، اتفضل..
وزير الزراعة: شكرًا يا فندم، طبعا زي ما سيادتك أشرت كدا موضوع القمح فعلًا إحنا يمكن تجربة المهندس محمد إحنا متعاونين معاه، والأصناف إحنا يمكن محصول القمح بالنسبة لنا يمكن واخدين ترتيب على مستوى العالم في متوسط إنتاجية وحدة المساحة، إحنا يمكن رقم 1 على مستوى العالم في إنتاجية وحدة المساحة بالنسبة للقمح الربيعي، ورقم 4 على مستوى العالم بالنسبة للقمح الشتوي، رغم إن القمح الشتوي في دول العالم بياخد من 10 شهور، 7، 8 شهور إلى 10 شهور عشان الجو البارد، إحنا عندنا بياخد 150 يوم. فاحنا عندنا تقدم كبير في مسألة الزراعة وبنساعد ال.. يمكن إحنا على علاقة وثيقة مع كل زملاءنا في القطاع الخاص، وعاملين 21 ألف حقل إرشادي عشان نعلم الناس الممارسات الجديدة، لأن الإنتاجية لما بتزيد بتزيد نتيجة إنه بيزرع في التوقيت المناسب، بيستخدم البذور الجيدة والنوعيات المناسبة للتربة وفقا للخريطة الصنفية، فدي كلها زي ما سيادتك قلت لو أنا زدت 3 أردب في الفدان مع المساحة المزروعة، بتكلم على 3 مليون فدان، يعني بتكلم على مليون، مليون آآ 3 مليون حوالي 3 مليون يعني 9 مليون يعني بتكلم في مليون و 200 ألف طن يعني بتكلم في 400 ألف فدان زيادة بدون زيادة مساحة التربة، بنفس الميه ونفس الجهد ونفس الإنتاج. دي حاجة.
الحاجة التانية المحاصيل الاستراتيجية زي ما سيادتك أشرت قليلة الاحتياج للميه، بتتحمل الإجهادات، بتتحمل الظروف البيئية، زي موضوع التين الشوكي، إحنا يمكن التين الشوكي تحدثنا فيه من فترة وعملنا فيه دراسة، واتكلمنا مع زملاءنا في جهاز المشروعات ومع مستقبل مصر، وكمان بنفكر في الفترة المسافات ما بين البيفوت، البيفوت بيبقى دائري فبيبقى فيه مسافات، التين الشوكي نبات صحراوي ما بيحتاجش ميه، ممكن يقعد بدون ميه فترة طويلة جدًا وإنتاجه عالي جدًا، وبعدين استخداماته عالية سواء في الأعلاف سواء في المستحضرات، في حاجات كتير، في الأكل، حاجات كتير جدًا.. وبالتالي هو محتاج زيادة في التصنيع.
أما وإن توسعنا زي ما قال المهندس محمد في مسألة التصنيع، ها يبقى عندنا فائض كتير عندنا، عندنا أراضي هامشية والفراغات ما بين البيفوت تقدر تستخدم وبالتالي أنا بعظم العائد من وجدة المساحة.
بالنسبة لنبات الجوجوبا طبعًا نبات من حتى يمكن ال، ال.. كل الدول دلوقتي والاتحاد الأوروبي متجه نحو الوقود الحيوي، وبالتالي عنـ.. 20 – 30 لا بد يبقى إحنا متجهين إلى مسألة الوقود الحيوي، والجوجوبا من الناباتات اللي فيها وقود حي، وبالتالي إنتاجياتها كويسة، بيتحمل درجة ملوحة تصل إلى 7000 BPM وأكتر من كدا كمان، في أراضي هامشية.
فإحنا إن شاء الله عندنا 7 أصناف مسجلة في وزارة الزراعة، وزملاءنا في مراكز البحوث الزراعية مقدمين سلالات جديدة حوالي 3 أو 4 أصناف عملوا تجربة عليهم في سيناء، وإن شاء الله ها نتوسع في هذا الأمر لأن دي محاصيل استراتيجية بتستخدم أرض هامشية، ما بتأثرش على المحاصيل الاستراتيجية الأخرى وبالتالي بتعظم العائد من وحدة المساحة وإن شاء الله ها نتوسع في هذا الأمر بالتنسيق مع كل زملاءنا في الجهات المختلفة.
السيسي: شكرًا جزيلًا. أنا بس عايز أضيف لكلام السيد وزير الزراعة نقطة مهمة، وإحنا بنتكلم إحنا بنطرح طرح، كلام، لكن لما نيجي ننزل تحت على ال.. على الأرض، بتجد تفاصيل محتاجين إن إحنا نتصدى لها. وأنا ها أقول هنا كلام قلته مرات وبقوله تاني.. إحنا عندنا 300 ألف 350 ألف فدان، مش كدا؟ بيتزرعوا قصب.. قصب.. في الصعيد.. إنت ما تقدرش تقول للناس في الصعيد ما تزرعش ده، لأن بنفس كمية الميه ديت، أو بنصها بالظبط، ممكن يتزرع بنجر، مش كدا؟ صح كدا؟ ولكن وإحنا بنطرح الطرح ده وبنتكلم على وبنقوله للناس دلوقتي، صعب جدًا إنك إنت تيجي تقول للناس اللي زارع قصب المنتج بيقعد 4، 5 سنين في الأرض وخدمته بالنسبة له كعمالة وكلام من هذا القبيل أقل، لكن كمية الميه اللي بنتكلم فيها بنفس الكمية دي يتزرع 700 ألف فدان، مش كدا؟
طب إزاي نعملها؟ عشان كدا بقول، في فرق كبير جدًا بإن إحنا نطرح طرح بالدراسات وكدا ممكن يتعمل، وإن إحنا نقوم بتجربة او نقوم بإجراءات عملية لتنفيذه. أنا قلت الكلام ده من 3، 4 سنين على موضوع القصب، وأنا بقول لوزير الزراعة وبقول لنفسي، وبقول للناس اللي موجودة في المحافظات اللي فيها القصب، غيرتوا.. إنت مستني لما مشكلة الميه تبقى مشكلة كبيرة عندك وتضطر، تضطر إنك إنت تحرم آآ ال.. من كمية الميه دي آآ نفس الحجم؟
أنا بتكلم مش بخوف الناس من حاجة.. انا ما حبش عن إ؛نا نتعامل مع الموضوع على إن هي آآ أزمة قد تكون محتملة، لأ، بما إنها أزمة محتملة لازم أواجهها وأشتغل عليها لغاية لما أخلصها. إنتو في وزارة الزراعة مع وزارة الري مع المحافظة مع إخوانا الفلاحين اللي موجودين أو المزارعين إن يا جماعة القصب ده، القصب ده، بياخد كميات ميه إنت مانتاش حاسس بيها لأنك إنت بتاخدها من نظم الري اللي موجودة، لكن هي في النهاية على مستوى ال.. على مستوى ما لدينا من ميه، إحنا محتاجين إن إحنا نزرع بنص الكمية، بنص كمية الميه ديت، أرضك ديت، بنجر لو إحنا عايزين سكر، أو أي محاصيل أخرى. طب إزاي ها تعملوها؟
لو أنا النهار ده عايز أطلع كمية الميه بتاعة الـ 350 ألف فدان دول وأعمل لها تحلية، أو حتى معالجة آآ معالجة ميه صرف زراعي، طب ما هي المحطة دي بتتكلف مليارات، ثم تشغيلها هيتكلف مليارات، مش كدا ولا؟ عشان الميه دي أعيد استخدامها، وساعتها مش ها أقدر أستخدم الميه دي لكل المحاصيل لأن درجة ملوحتها بتبقى زيادة شوية.
أنا بقول الكلام دوت، يعني إحنا بنقعد في الإعلام وحتى في جلساتنا وفي المسلسلات بتاعتنا، ما بنتكلمش على القضايا بتاعتنا وإزاي هذه القضايا تتحول إلى آآ أفكار ونتكلم فيها ونقنع الناس بيها، أنا بقول تاني على موضوع زي ال.. ال.. الـ 350 ألف فدان دول، مش بس كدا، طب والأراضي اللي بتتري بالري ال.. بالغمر.. من غير نظم ري حديثة. إحنا هنا مكلفين فلوس كتير قوي، طب ليه؟ عشان محاولين إن إحنا بما إن إحنا بنزرع الأراضي ديت، يبقى من الأول كدا نحط كل النظم اللي تخلينا نستخدم آآ أقل حجم من الميه في الإنتاج.
طب ما هو ممكن آآ أنا آسف أقول يعني، بالـ 11 مليون متر ميه في اليوم دول يكون في الدلتا بيتزرع بيهم أقل من كدا، أقل من الكمية ديت، ليه لأنه نظم ري مش كلها حديثة يعني.
إذن مرة تانية، وإحنا بنتكلم على إجراء ل.. في الزراعة اللي إحنا بنتكلم فيه، إحنا بنتكلم على 4 مليون فدان، كتير ها يسأل لاميه دي جايبنها منين، فبنقوله بنجيبها من الآبار، والنهار ده لما كان اللوا توفيق بيتكلم عن عين دالة، إحنا بنتكلم عن طبيعة أرض وطبيعة ميه، أكتر من ملوحتها مش مساعدة، وطبيعة الأرض مش مساعدة، فبيتزرع فيها الجوجوبا، والجوجوبا بتتزرع على كل الأراضي ومياه الصرف حتى الصرف الصحي.
طب إحنا كل ميه الصرف الصحي اللي ما بيستخدمش اتزرعت عليها جوجوبا؟ أنا بكلم نفسي يعني.. لأ.. طب لأ ليه؟ هي في النهاية المشاريع دي لما ها تطلع وتطلع الإنتاج بتاعها، وتتاخد البذور بتاعة الجوجوبا ديت، مش ها تستخدم كوقود حيوي العالم عايزها وإحنا عايزينها؟ آه طب ما ها تشغل ناس؟ أيوة. عوايدها ها تبقى مناسبة؟ أيوة. طب ما نعمل بقى، ما نديش فرصة أبدا إن إحنا يكون عندنا ميه صرف صحي تكون موجودة إلا لما نحط عليها جنب منها إن أمكن عدد من الأفدنة تطلع الجوجوبا ديت على ميه هي أساسًا صالحة لها، صالحة لها ومافيش إن هي بتستخدم في ال.. لا بتتاكل ولا حاجة دي بتتعصر تبقى زيت وقود يعني فمافيش فيها مشكلة.
إذن النهار ده لما نتكلم على موضوع زي موضوع اللي انا اتكلمت فيه بتاع قصب السكر، واتكلمت على طبيعة زي ما قال المهندس محمد جمال على موضوع الإنتاج في أراضي صعبة بكميات أكتر من المعدلات.. بصراحة ده مش على قد نموذج لمزرعة وادي الشيح، ده لازم يكون نموذج عندنا في مصر نتيجة ظروفنا.
وأنا بتكلم في المواضيع أكن، يعني حد يقول لي هو في عندك أزمة؟ في أزمة ميه ولا حاجة؟ هو أنا لازم أستنى لما تيجي لي الأزمة أتعامل معاها؟ هو الشغل اللي إحنا عملناه في الدولة في ما يخص البنية الأساسية، هو ده كان ضروري ولا كان زيادة؟ ده كان ضروري، واضطرينا ندفع فيه أرقام ضخم جدا لو كانت اتعملت على مدى 20 ، 25 سنة كان تكلفتها أكيد ها تبقى أقل من اللي إحنا بنعمله دلوقتي.
فـ.. انا بس بشير تاني مرة للميه وإن شاء الله المرة الجاية يا بشمهندس محمد عايزين نشوف سينا، ونشوف جهد.. وإحنا مستعدين نساعدك ونساعد كل.. اتفضل استريح، اتفضل استريح.. ونساعد كل مستثمر مسعدت يخوض معانا التجربة ومع نفسه زي ال.. المهندس محمد، إحنا محتاجين ده.
والله أنا مش بجامل والكلام ده قلته قبل كدا، إحنا محتاجين إن كل إيد مصرية، وكل خبرات وكل طاقة عمل وكل جهد مخلص يشتغل معانا عشان نتجاوز ما نحن فيه.
ما تنسوش إن إحنا من 2011 لدلوقتي زدنا 25 مليون.. زدنا 25 مليون.. يا ترى إنتاجنا الزراعي زاد حتى لل.. ما يساوي الزيادة السكانية الـ 25 مليون؟ وأتوقف قدام التجربة اللي إنت قلتها في ما يخص القمح المخلوط بالدرة. لما حد يتكلم في الموضوع ده يقول لك إيه، درة إيه.. إحنا ما بنقولش، ما بنغيرش كتير في المواصفات طعم وشكل، بنقول حاجة معقولة كدا، بنقول حاجة معقولة في ال.. إذا كنت أنا فاهم، إذا كنت أنا فاهم.. يعني ما بيغيرش في طمعه ولا في شكله، ولكن في النهاية إنت بتتكلم في 20%؟
محمد جمال: 20% يا فندم.
السيسي: مش كدا.. فلو كان النهار ده إحنا بنستخدم يعني حوالي 17 مليون طن، مش كدا ولا؟ هه؟ 18 مليون الدكتور مصطفى بينكد عليا أكتر يعني (يضحك الرئيس) ماشي.
يعني على كل حال، كلهم طبعا ما بيتعملوش عيش يعني لكن بيخشوا في إنتاجات أخرى مكرونة وكلام من هذا القبيل، ولكن ها نقول عالأقل لو قلنا مثلا 10، 12 مليون طن للخبز، فإنت لما تيجي تقول 20% منهم، يعني 2 مليون طن.. 2 مليون طن، إنت بتضطر لأن إحنا لغاية دلوقتي ومهما عملنا لن نستطيع إن إحنا إنتاجنا من القمح يغطي احتياجاتنا، فبنضطر نجيب من برة، لكن الدرة ممكن، لأن هو حتى ليه توقيت مختلف شوية.
محمد جمال: الصيف يا فندم.
السيسي: إذا كنت أنا فاهم، مش كدا يا محمد، مختلف عن القمح فممكن أوي يغطي لك آآ جزء منه، جزء من ال.. من ال.. بديل للقمح يعني أو مع خلطة القمح ال 2 مليون طن.
حد يقول لي طب إنت ها تعمل كدا؟ أنا بقول لكو عشان، أنا راجل صريح، لو أنا آه أعمله، 2 مليون طن قمح تمنهم كام؟ 600 مليون دولار؟ مش كدا؟ 600 مليون دولار.. طب.. أو أكتر، حسب سعر طن القمح.. ممكن السنة اللي فاتت في الأزمة وصل أكتر من كدا، أكتر من 400، 500 مليون دولار للطن.. للمليون طن.. إذن لو النهار ده أقدر أعملهم هنا، أعملهم ولا ما أعملهمش؟
محمد جمال: أكيد نعملهم يا فندم.
السيسي: نعملهم لأن تكلفته ها تقل علينا وها يوفر عليا مثلا 400، 500 مليون دولار، 600 مليون دولار في ال.. في استيراد ال إيه، اللي هو اللي هم ال 20% اللي انا بتكلم عليهم.
طب حد يقول لي طب ما ده ها يبقى موجود وده ها يبقى موجود. حد عارف رغيف العيش بيتكلف كام دلوقتي؟ حد عارف؟ طب أنا ها أقول لكو.. جنيه وربع.. جنيه وربع.. أصل في ناس ما بتحبش تتكلم يعني.. في ناس ما بتحبش تتكلم، ليه ما بتتكلمش، ليه ما بتقولش؟ هو عيب ولا حرام؟ لا عيب ولا حرام.. أبو شلن ده بيتكلف جنيه وربع.. بعد ما كانت الدولة بتـ.. بتحط 20، 30 مليار جنيه دعم للخبز، بقى دلوقتي 120، 130 مليار.. مش كدا يا دكتور معيط؟ الرغيف ده، أبو خمسة ساغ ده، تمنه جنيه وربع، بيكلفني 130 مليار جنيه دعم.
يبقى لما آجي أقول عندي فرصة إن أنا أزود آآ بدرة 20% منه ألاقي حد ما يقفش جنب مننا ويقول لك لأ، طب أنا موافق، أنا موافق، بس إنت النهار ده مش عايز تيجي تمس حاجة الغلبان، فعايز تساعد من غير ما تئذيه، لكن طب ما هو ممكن النهار ده الرغيف ده لو بـ 3 جنيه و4 جنيه و 5 جنيه في ناس تقدر تشتريه، بس كل الناس تقدر تشتريه؟ مش كل الناس تقدر تشتري كدا، فلازم نكون متفهمين لأن الدولة في النهاية موازنة، هي طاقتها الملية كدا.
فمعرفش الدكتور معيط ما بيتكلمش ووزير التموين ما بيتكلمش، وكدا.. ووزير الكهربا ما بيتكلمش، خير في إيه؟ ما تتكلموا تقولوا حاجة، ما تقولوا الحكاية إيه للناس، ما تقولوا ليه الكهربا ما بتتعملش.. ما تقولوا ليه؟ لو أنا خدت تمن الكهربا الحقيقية، ها أضاعف تمنها مرتين.. طب الغلبان ها يروح مني فين؟ أقطع الكهربا، ولا أغليها؟ أغليها قد إيه؟ اللي بيدفع جنيه ها يدفع اتنين وتلاتة.. الل بيدفع جنيه ها يدفع الجنيه اتنين وتلاتة.
أنا بتكلم ال.. لو أنا النهار ده مواطن بدفع 100 جنيه في الشهر، لو أنا عايز أبيع له الكهربا بسعرها اللي بيكلفوني دلوقتي ها آخد منه 300 جنيه. طب إحنا بنعمل كدا؟ لأ. طب بنعمل إيه؟ بردو بشرحها من باب إيه، أنا بتحمل المسؤولية أمام الله قدامكم، عشان الكهربا دي تستخدم على مدار ال 24 ساعة، ما فيش قطع كهربا خالص، لازم أخلي تمن الكهربا لوزير الكهربا قد تمنها ده مرتين تلاتة.
بقول تاني، ليه ما بزودش كدا (كلمة غير واضحة) مديونية وزارة الكهربا لوزارة البترول قد كدا، طب ما بتدفعش ليه؟ أصل أنا اللي باخده أقل من التمن، وبالتالي أنا مديون لوزارة البترول. طب وزارةا لبترول إنت عندك مشكلة في إيه؟ يقول لك أنا بدي له الحاجة بأقل من تمنها، فأنا عندي مشكلة إن أنا أجيب البترول والطاقة أديها له بالتمن دوت، وبقية الشركات اللي شغالة معانا بقت يعني ليها فلوس عندنا، وأنا بقيت مدين. طب ده مدين وده مدين، الكلام ده مش وليد النهار ده، ده وليد ممارسات إحنا ماشيين بيها بقالنا سنين، وكنا عملنا خطة في 2016 عشان نخلي تمن الحاجة قد تمن تكلفتها، لكن لازم تحطوا في الاعتبار التحديات اللي بتقابلنا في ال.. الأزمة بتاعة كورونا والأزمة العالمية اللي موجودة والحروب اللي حوالين مننا وتأثيراتها علينا... الأمور مش ماشية كدا يعني، وإحنا مواردنا مش كتير تسمح إن إحنا نقابل التحديات ديت من غير جهد، لأ، ومن غيرتحمل، لأ.
أنا، أنا بعيب على إيه، على المعنيين حتى في ال.. في التقارير الصحفية والكلام ده، والمقالات اللي بتتكتب والناس اللي التناول اللي بيجيبوه، ما حدش بيتناول المسألة بشكل موضوعي خالص يا جماعة. إيه ده؟ يا إنتو مش عارفين، يا إحنا مخبيين عليكم. وأنا بكلمكم بمنتهى الصراحة، الدول ما بتدارش كدا، الدول بتدار بال.. بالجدية والمسؤولية والفهم، ولو الناس فهمت ها تيجي معاك.. الناس لو فهمت إنت بتعمل كدا ليه ها ييجي معاك، ما هو أنا بقول لك البديل أهو.. ممكن الكهربا تشتغل ال 24 ساعة؟ طبعًا.. المحطات موجودة ونستطيع.. لكن النهار ده الدكتور شاكر عشان ياخد الوقود اللازم ليها لازم يدفع فاتورته، ده حتى إيه بعد دعم وزارة المالية ليه، ولا أنا مش واخد بالي يا دكتور معيط، كمان، طب ها يجيب منين؟ فيضطر إن هو حجم الوقود اللي بيجي له على قد يعني مع الدعم اللي بيجي له تمشي كدا، طب ممكن نشغلها 24 ساعة؟ آييييوة.. و 48 ساعة كمان.. بس بكام؟ وأنا بقول، لو ما حطتوش إيديكو في إيدين بعض، كلكو يا مصريين، وتفهمتوا حجم التحديات اللي موجودة في البلد ديت وجريتوا عليها.. تقول لي الله، ياعم إنت النهار ده في مشاريع جميلة بنفتتحها، بتنكد علينا ليه؟ طب والله العظيم تلاتة على عيني يعني، والله صحيح، بس إزاي؟ بس إزاي؟ ال.. وبردو الناس تفتكر أنا بقول كدا زيادة ولا مش زيادات، لا والله، ده أنا بدردش معاكو، عشان دي بلدنا كلنا مش بتاعة حد لوحده.
الوقود اللي في السيارات إنت بتدفع 50% منه، ولا إيه يا دكتور؟ 50% يعني إيه؟ يعني لو عندي 150 مليار لتر وقود، سولار، أدفع لهم 150 مليار جنيه، ولا.. مش كدا؟ يعني، يعني.. (يتكلم مع رئيس الوزراء بصوت غير مسموع) في السنة ولا في ال.. يعني 170، يبقى مش كدا خالص، كل حاجة ليها أسبابها وقدرات دولة، فيها 106 مليون، فيها 9 مليون ناس موجودين عندنا، يعني رغم الضغوط الكبيرة جدًا على لموازنة، والدكتور معيط يعني في ظروف صعبة جدًا، لكن بنحاول بقدر الإمكان إن الأمور تبقى تمشي، فيها قسوة شوية، صحيح، بس البدايل صعبة يعني. شكرا جزيلًا. (تصفيق)
1:57:20
السيسي: أستأذنك بس دقيقة واحدة أوجه الشكر لل، عشان يبقى، أنا بشكر كل القائمين على المشروع وعلى أجهزة الدولة المختلفة اللي هي كانت شاركت في عن إحنا، إحنا ماروحناش توشكى الحقيقة يعني، كان ممكن أوي إن إحنا نطلع المشوار دوت لكن لقينا إن إحنا ها نبقى إداريات كتير قوي ويمكن تكون تكلفتها كتير فقلنا خلينا إن إحنا نتفرج على ال.. الحصاد من هنا، ولكن ده ما يمنعش إن إحنا ممكن أوي نعمل رحلات يعني يا محمد، مع لل.. لرجال الإعلام ولشباب الجامعة وال.. اللي هم شبابنا يعني، يطلع يشوف الكلام دوت على، على الأرض يعني.
لكن مرة تانية أنا بشكر كل ال.. الجهات والقائمين على المشروع، أو المشروعات اللي إحنا بنفتتحها وبنقول لهم من فضلكم أكتر، ونستمر بمعدلات عمل أكبر من كدا عشان كل فدان بيخش، الإنتاج ده لصالحنا، لما نبقى ننتج النهار ده ندخل السنة دي مثلا نص مليون فدان، أحسن ما يبقوا 400 ألف فدان، وهلم جرا. وبالتالي نجيب الحد الأقصى اللي ممكن آآ الدولة تحققه وتوفره، فيما ربنا سبحانه وتعالى أتاحه لينا.
إن شاء الله المرة الجاية في الجلسة ديت تكون الأراضي اللي في سينا اللي إحنا بنتكلم على زراعتها نكون، نكون بنحتفل بإن إحنا إنتاجها طالع وبنـ.. بنحصده يعني.
أنا بس عايز أقول على حاجة هنا، الاستثمارات اللي اتحطت في مجال الزراعة عشان يعني الدولة مش مجال واحد، الدولة كل المجالات، تعليم وصحة وزراعة وصناعة كل المجالات، فلما نيجي نتكلم على دولة قوامها 106 مليون وكدا، وعايز تتكلم في كل المجالات تحقق فيها طفرة كويسة، ده عايز أعباء ضخمة مالية وعايز جهود كمان بشر ضخمة جدًا جدًا.
إن شاء الله في المرة الجاية يكون ال، ال.. البنية الأساسية اللي بتتعمل في سينا لصالح 400 ألف 450 ألف فدان يكون خلصوا والميه موجودة ميه محطة بحر البقر، صرف زراعي تم معالجتها، ويبقى بننتج مياه إنتاج يخش في الاقتصاد المصري.
فأنا بشكر كل القائمين على، على المشاريع ديت، وبتمنى لهم التوفيق، ومزيد من الجهد، (تصفيق وهتاف) متشكر آآ بس أنا حبيت إن أقول إن إحنا محتاجين نتكلم مع الناس عشان ما نسيبش الناس كدا تبقى محتارة في حاجة يعني، لازم نتكلم. شكرًا جزيلًا. (تصفيق)
ألقيت الكلمة في القاهرة، بمركز المنارة للمؤتمرات، بحضور الدكتور مصفى مدبولي، رئيس مجلس الوزراء، والسيد القصير، وزير الزراعة واستصلاح الأراضي، وعدد من الوزراء.