فيما يخص حقوق الإنسان، انا معني بالإجابة عنه، لأن إحنا في مصر.. ودا أمر مهم قوي إن إنتوا تسمعوه مننا واحنا هنا في باريس. إحنا حريصين على حقوق الإنسان في مصر. بس أنا عايز أقولكوا تحطوا في الاعتبار النقاط اللي انا هتكلم عنها دي.
نحن في مصر في منطقة مضطربة جدًا، وهذا الاضطراب كاد أن ينهي على هذه المنطقة ويحولها إلى بؤرة لتصدير الارهاب والتطرف والفوضى في العالم كله، ودا يمس أمن المنطقة وأمن أوروبا كمان، وأمن العالم لو ماكناش ناخد بالنا.
النقطة التانية اللي لازم تكونوا حريصين، يعني، تاخدوها مننا إحنا كمصريين وكرئيس للدولة المصرية، أنا حريص على إقامة دولة مدنية ديمقراطية حديثة في مصر، دا أمر.. دي إرادة سياسية، وبالمناسبة لازم تكونوا عارفين إن الشعب المصري لن يقبل إنه يكون فيه أي شكل من أشكال الممارسة العنيفة او الدكتاتورية او عدم احترام حقوق الانسان، ولكن، خلي بالك، أنا مسؤول عن 100 مليون مواطن مصري، في هذه الظروف المضطربة اللي أنا بتكلم عليها، وهذا الفكر المتطرف الذي لا يقبل أن يتعايش مع الآخرين بسلام. لكن مهم قوي إنك تعرف إن إحنا لا نقوم بممارسات للتعذيب، وأرجو إن إحنا نتحسب جدًا من كل المعلومات التي يمكن أن تنشر بواسطة منظمات حقوقية.
فخامة الرئيس بيتكلم على منظمات المجتمع المدني في مصر. نحن لدينا أكثر من 40000 منظمة تعمل في خدمة المجتمع المصري، وتعمل بسلام، وتقوم بخدمة جليلة ورائعة في تنمية المجتمع وتطويره. لكن مهم قوي إن انتوا تبقوا حذرين وانتوا بتتعاملوا مع كل المعلومات التي تخرج، لأن فيه تنظيم موجود، وفيه.. هذا التنظيم مناوئ لمصر، ومناوئ للاستقرار في مصر. التنظيم دا هو الجماعات والفكر المتطرف اللي بينشر أفكار غير حقيقية عما يحدث في مصر.
أنا.. مهم قوي إن انتوا تنزلوا مصر وتيجوا. اللي بيتكلم عن حقوق الإنسان في مصر ييجي يتعامل مع الشعب المصري في الشارع المصري. بنتكلم عن المواطن البسيط، هل يرى شكل من أشكال العنف أو القسوة في التعامل معاه ولا لأ؟ لأن اللي بيوصل لكم قد لا يكون كله صائب الحقيقة.
النقطة التانية، أنا عايز أقولك زي ما بتتكلم عن حقوق الانسان، ماذا.. ما هو الإجابة عن حقوق الإنسان للشهداء وأسرهم، والمصابين وأسرهم في مصر؟ الناس اللي بتفقد الاستقرار، ماذا عن حقوق الانسان لـ 3 مليون بيعملوا في السياحة وتضرروا نتيجة الارهاب والتطرف؟ مين يصرف عليهم؟ مين يعيّش الناس دي في مصر؟ إنت بتتكلم على بلد فيها 100 مليون عايزين يعيشوا ويستقروا. يتم دا إزاي؟
النقطة التانية، هو، إوعوا نكون بس هنُقصِر، وانا الكلام دا أنا اتكلمت فيه قبل كدا، إن إحنا نُقصِر حقوق الإنسان في الحقوق السياسية فقط، لكن عايز أقولك، ما بتسألنيش ليه عن حق الإنسان في مصر في التعليم الجيد؟ ما عندناش تعليم جيد، أنا بقولك. ما بتسألنيش ليه عن حق العلاج الجيد في مصر؟ ما عندناش علاج جيد في مصر. ما بتكلمنيش ليه عن حق التوظيف وحق التشغيل للمواطن في مصر؟ ما عندناش توظيف جيد في مصر. ما بتكلمنيش ليه عن الإسكان الجيد؟ مابتكلمنيش ليه عن الوعي الحقيقي اللي المفروض ان احنا نحطه ونرسخه في وجدان المصريين حتى تستقيم الدولة وتستمر؟
أنا عايز أقول إن الموضوع بالنسبة لنا كحقوق إنسان، إحنا ما بنهربش من الإجابة عنه، بس أرجو إن إحنا نفهمه في سياقه الحقيقي لدولة في ظروف مصر.
نحن لسنا في أوروبا، بتقدمها الفكري والثقافي والحضاري والإنساني. نحن في منطقة أخرى.
شكرًا.