نص كلمة السيسي خلال تفقده الأكاديمية العسكرية المصرية 14/3/2024

السيسي: بسم الله الرحمن الرحيم،

السلام عليكم ورحمة الله وبركاته.

الطلاب: وعليكم السلام ورحمة الله وبركاته يا فندم.

السيسي: أبدأ كلامي بإن أنا أوجه لكم جميعا التحية وأهنيكم بمناسبة شهر رمضان، كل عام وإنتو طيبين.

الحقيقة إحنا كنا متعودين دايما مع قدوم كل دفعة جديدة من الطلبة المستجدين، يبقى في زيارة لينا للأكاديمية، ولقاء مع الدفعة. أنا طبعا متابع التدريب ومتابع الموقف، ومتطمن عليكم. لكن ما كنتش عايز أبدا إن يفوتني إن أنا ألتقي بيكم لقاء مباشر كدا قبل ما تنزلوا إن شاء الله بعد نهاية الفترة، فترة التدريب المركز، للكلية بقى أو للأكاديمية كلها بالكامل.

فـ.. اسمحوا لي إن أنا، يعني، أقول لكم إن أنا متطمن جدا على الجهد اللي بيتعمل والأسلوب اللي بيتعمل.

 وخليني هنا أتوقف قدام أمر مهم قوي.. إحنا عملنا في مصر جهد كبير جدا في تأهيل البنية الأساسية، وحاجات كتير قوي تخلي الدولة ممكن تنطلق بفضل الله سبحانه وتعالى إلى آفاق أفضل من كل الوجوه.

إن ما كناش نقدر نعمل صياغة حقيقية وتطوير حقيقي للإنسان، يبقى الجهد اللي إحنا بذلناه في بقية الموضوعات منقوص

لكن كمان كان من ضمن المنظومة اللي إحنا بنفكر فيها وبنجري وبنكثف جهدنا فيها، هو الإنسان، اللي هو العامل البشري في المنظومة، واسمحوا لي أقول لكم إن هو أهم، أهم ما في الموضوع. إن إحنا مهما عملنا، ومهما بنينا، إن ما كانش في بناء حقيقي من أول التعليم، لبقية مؤسسات الدولة.

إن ما كناش نقدر نعمل صياغة حقيقية وتطوير حقيقي للإنسان، إحنا ها يبقى الجهد اللي إحنا بذلناه في بقية الموضوعات ها يبقى منقوص، ها يبقى مش كفاية. فعشان كدا إحنا مهتمين قوي بالجهد اللي بيتبذل وبالبرامج اللي بتتحط، والمتابعة الدقيقة للي إحنا بنعمله، يا ترى نتايجه وصالة لفين؟

وبالمناسبة، إحنا اتكلمنا في الموضوع ده قبل كدا وقلنا إن عملية التطوير هي عملية مستمرة لا تتوقف، وبالتالي إحنا لو توقفنا عن التطوير يبقى إحنا بنخالف الواقع اللي ممكن يبقى موجود حوالين مننا.

موجود قطاعات كتير جدا دلوقتي جوة الأكاديمية، وإن شاء الله في المكان الجديد ها يبقى في عندنا طاقة استيعاب أكبر من كدا بكتير. الهدف منه هو إن إحنا ننتقي أفضل ما هو موجود لدينا، وأيضا القطاعات المدنية المختلفة اللي إحنا حرصنا على إن هي تبقى موجودة معاناه هنا.

هو الفكرة كلها زي ما قلت مرة: إحنا عايزين إنسان مصري قادر على إن هو يواجه تحدي وقادر على إن هو يقود الدولة دي إلى آفاق أفضل وأرحب، وبالتالي ما فيش عندنا غير إن إحنا يبقى عندنا إدارة جيدة جدا جدا واستفادة من الموارد، كل الموارد، بما فيها الموارد البشرية، إن إحنا عايزين، مستهدفين أفضل، أفضل بناء للشخصية، والشخصية دي اللي إحنا بنتكلم عليها هي شخصية متوازنة جدا.

مش عايز أطول عليكم، كل سنة وإنتو طيبين، وإن شاء الله تنزلوا الأجازة، وخلي بالكو من نفسكو. بلغو تحياتي وتحيات القوات المسلحة لأسركم، واشكروهم على، يعني، كل ما فعلوه معكم، وإحنا متشكرين لهم أيضا، وإن شاء الله تقضوا اجازة طيبة، ونرجع مرة تانية نستأنف إن شاء الله أعمالنا. كل سنة وإنتو طيبين، شكرا جزيلا.

ألقيت الكلمة في الأكاديمية العسكرية المصرية، وذلك بحضور الفريق أول محمد زكي، القائد العام للقوات المسلحة، وزير الدفاع والإنتاج الحربي، والفريق أسامة عسكر، رئيس أركان حرب القوات المسلحة، وعدد من قادة القوات المسلحة.