نص كلمة الرئيس السيسي خلال تفقده مدينة مصر الدولية للألعاب الأولمبية 6/1/2024
8:36
السيسي: سلامو عليكو..
المنتخب المصري: وعليكم السلام ورحمة الله وبركاته
السيسي: صباح الخير جميعًا..
المنتخب المصري: صباح الخير يا فندم.
السيسي: سعيد إن أنا بشوفكم والله.. طبعا آآ.. (كلمة غير واضحة) برحب بيكم و.. سعيد إن أنا أشوفكو.. وبتمنى لكو كل التوفيق.. بس خلوني الأول أقول لكو إحنا عملنا في مصر إيه قبل ما، ما نتكلم على المنتخب والأماني اللي إحنا بنتمناها.
إحنا في مصر (كلمة غير واضحة) من 2014 لغاية انهاردة عملنا جهد كبير قوي في بناء حاجتين: بنية رياضية ضخمة، (جملة غير واضحة) لكل محافظة من محافظات مصر. مش بس على قد المدينة اللي إنتو بتشوفوها هنا إحنا في كل محافظة على الأقل في منشأة رياضية كويسة زي دي، تساعد شباب المحافظة على اللعب، بالإضافة لحوالي 4500 مركز شباب إحنا كنا، كانوا موجودين قبل كدا بصراحة، بس إحنا عملنا برنامج لهم وخلصنا 70% رفع كفاءة لهذه الـ.. مراكز الشباب ديت، على مستوى الجمهورية. منهم بس في موضوع حياة كريمة اللي فات ده المرحلة الأولى حوالي 1070 مركز شباب تم رفع كفاءته داخل الـ 70%.
ثم طبعا آآ المنشآت الرياضية زي المدينة الأولومبية اللي موجودة هنا، ودي فيها 22 منشأة، فيها 22 منشأة طبقا لمعايير الاتحادات أو الاتحاد الأولومبي أو المعايير الأولومبية في كل لعبة، اتكلمنا عن السباحة يبقى فيها المعايير الأولومبية لحمامات السباحة، اتكلمنا عن التنس يبقى المعايير الأولومبية لملاعب التنس، والاسكواش، وكل شيء هنا.
إحنا بدأنا هنا في المدينة اللي إنتو موجودين فيها ديت من حوالي 6 سنين، وخلصنا تقريبًا عدا ده بس، عدا الاستاد ده، خلصناه يمكن من.. لسه ما بقالوش 4، 5 شهور، هو ده آخر حاجة كانت(كلمة غير واضحة).
طب أنا بقولك وده ليه؟ بقول لك وده لأن ده معناه إن إحنا في مصر مهتمين قوي بشبابنا، ومهتمين قوي بأبنائنا، ومهتمين قوي بشعبنا، إن إحنا نوفرله زي ما قلت كدا اتحركنا على محورين، محور توفير بنية رياضية، يعني، تليق.. ثم أيضا المحور التاني بقى هو موضوع إن إحنا.. الـ.. الناس.. إحنا اتكلمنا عن المنشآت، لكن بنتكلم عن إزاي نجهز الناس ونقدمه ونقعده ويمثلوا مصر بشكل يليق بمصر اللي دايمًا كانت من السباقين في الرياضة العالمية، في العصر اللي إحنا، الحديث اللي إحنا فيه.
طيب.. بقول كدا لكم ليه؟ عشان أولًا أكيد كل اللي موجودين قدامي هنا دول آآ شباب موهوب.. شباب إيه؟ موهوب.. يعني ربنا سبحانه وتعالى أعطى له موهبة وميزه عن بقية الـ.. بقية الـ.. بقية الشباب أو بقية الناس.. والموهبة مسؤولية.. الموهبة مسؤولية.. مسؤولية ليك كشخص، كإنسان، وأيضًا لبلدك، إنت بتمثلها، سواء أنا عارف إن هنا في حوالي 7 لاعبين دلوقتي محترفين، محترفين في الأندية الأوروبية، وده أمر يسعدنا، وأتمنى يبقى عدد ضخم، لأن ده بيعكس إمكانيات شبابنا.
فـ.. تفرد الـ.. (جملة غير واضحة) والتميز ده، زي ما قلت مسؤولية كبيرة. إنتو في النهاية بتمثلوا بلدكم، وبتمثلوا نفسكم طبعًا. فـ.. عالمستوى الشخصي إنت طبعًا يهمك إنك إنت دايمًا تتطور و.. وتتقدم، وده أمر بردو يسعدنا جدا، وبنتمنى كل التوفيق.. وده لن يترتب يتأتى أبدًا إلا إن موهبتك اللي موجودة دي تبذل أقصى جهد... هي لعبة فردية صحيح.. جماعية يعني.. لكن هي مبنية على إن كل فرد مننا داخل الفريق، المجموعة، بيبذل جهد كبير قوي، وبعدين في الآخر إيه، بيدي لزميله، ويبقى محصلنا كله، نجحنا كلنا كفريق، نمثل بلدنا ونمثل نفسينا ونمثل الفريق نفسه.
فـ.. هنا طبعا يعني.. بردو مسؤولية تانية إن إحنا نبقى مع بعضنا.. النجاح دايمًا بييجي مش بالموهبة بس، بالموهبة وبالإرادة.. إخلاص للفكرة، إخلاص للعبة، إخلاص للفريق، إخلاص للدولة (كلمة غير واضحة)، اللي في النهاية إنتو بتبقوا المنتخب المصري هو، قوة نعمة كبيرة قوي في بلدنا، وزي ما إنتو شوفتوا تأثيركو قد إيه على، مش على المصريين بس، ده عى العالم كله.. كرة القدم هي أكتر لعبة في العالم لها جماهيريتها، ولها مشجعيها ومحبيها، وليها تأثير كبير جدًا.
فـ.. هي دي المسؤولية اللي موجودة للمنتخب المصري دلوقتي.. إنتو رايحين.. إحنا خدنا البطولة دي 7 مرات.. مصر تستحق أكتر.. تقدروا نبقى 8 و9 و10. فـ.. بتمنى لكو كل التوفيق. مش ها أنسى أبدًا أشكركوا، المحترفين واللي موجودين في... برة مصر.. في النوادي المختلفة أوروبية وغيره. وإن شاء الله توفقوا في رحلتكم، وتوفقوا في (كلمة غير واضحة) وإن شاء الله ربنا يوفقكوا وتيجوا إن شاء الله بنتيجة تفرحنا كلنا.
كل سنة وإنتو طيبين. عام سعيد عليكم، وعلى أسركم، وخلوا بالكو من نفسكم، و.. دايمًا تحبوا بعضكو، وأنا قلت الإخلاص، والإخلاص هنا معناه إن إحنا نبقى دايمًا، يعني، إحنا بشر في النهاية، لكن ممكن نبقى دايما مع بعض كدا.. ولما نبقى كدا مع بعض ربنا سبحانه وتعالى يوفقنا.. فـ.. مبسوط إن أنا شوفتكو.. وبتمنى لكو كل التوفيق، مش أنا بس، كل المصريين بيتابعوا كويس قوي، وكل، كل لاعب فيكم (كلمة غير واضحة) ربنا يا رب يوفقكو.. ويا رب ربنا يوفقكو.. وتسعدونا بالنتيجة.. إن شاء الله..
محمد صلاح: بشكر طبعًا سيادتك على الدعم ده ودايمًا واصل لنا من الوزارة سيادة الوزير دايمًا بيوصل لنا الدعم (كلمة غير واضحة) حضرتك، وحضرتك بردو اتحاد الكورة، والصراحة الحمد لله يعني في تحسن كبير قوي في المنظومة كلها، ودايمًا بيساعدونا على كل حاجة إحنا عايزينها، وزي ما قلت قبل كدا اللاعيبة كل اللي إحنا بنقدر نوعد حضرتك بيه إن اللاعيبة ها تبذل كل مجهودها إن إحنا نكسب البطولة إن شاء الله، زي البطولة اللي فاتت ما كوناش محظوظين شوية، عملنا كل اللي علينا والتوفيق بتاع ربنا.
السيسي: طبعًا.
محمد صلاح: فـ.. أنا مبسوط جدا بأداء البطولة اللي فاتت، وإن شاء الله ها نعمل قد كدا وأكتر بإذن الله، تاني بنشكر حضرك على الدعم الدائم ده والوزارة واتحاد الكورة، وطبعا أهم حاجة المنظومة كلها، في اللاعيبة، فإن شاء الله نقدر نعمل حاجة كويسة ونرجع مبسوطين إن شاء الله.
السيسي: إن شاء الله ترجعوا منصورين موفقين، و.. عايز أقول لكو على حاجة يعني... إنتو ليكو تأثير كبير جدًا على كل اللي بيتفرجوا.. وده موضوع تاني بغض النظر عن المكسب والخسارة يعني.. وأنا، أنا بقول ليكو كلكو..حجم التزامنا وسلوكياتنا الطيبة، بتبقى ليها تأثير جدًا على كل اللي بيتفرج علينا. جوة مصر وبرة مصر. يمكن دي آخر حاجة أقولهالكم من فضلكم إنتم.. يعني بتصدروا صورة جميلة لكل اللي بيتفرج عليكو، شباب، كبار، صغير.. فحافظوا على النقطة دي وإنت في حماس الـ.. اللعب، إنك تحافظ على، على إن الصورة دي تبقى صورة جميلة وراقية، تعكس مصر وحضارتها. مصر عمرها، أو حضارتها عمرها آلاف السنين، وبالتالي ده كله في رقبتنا. مش عايز أطول عليكو، وربنا يوفقكو.. اتفضل...
ألقيت الكلمة أمام فريق منتخب مصر الوطني لكرة القدم، وذلك في استاد مدينة مصر للألعاب الأولمبية، حيث تفقد الرئيس عبد الفتاح السيسي المدينة، بحضور الدكتور أشرف صبحي، وزير الشباب والرياضة.