نص كلمة الرئيس السيسي خلال احتفالية عيد الميلاد المجيد 6/1/2024

4:16

السيسي: بسم الله الرحمن الرحيم، اتفضلوا استريحوا، اتفضلوا من فضلكو، اتفضلو، اتفضلوا... اتفضلوا استريحوا.. (زغرودة إحدى الحاضرات) قداسة البابا، كل عام وإنتم بخير وصحة وسلامة، وعيد سعيد، وسنة إن شاء الله سعيدة علينا كلنا.

كل سنة وإنتو طيبين، ليكو كلكو، (تصفيق) لكل الناس، لكل المصريين، لكل العالم. كل عام وعام سعيد، وعيد سعيد، ونتمنى من الله سبحانه وتعالى.. نتمنى من الله سبحانه وتعالى، وندعوه، إنه يخلي العام ده نهاية لفترة صعبة مرت على العالم كله، تقريبًا من 2020 ويعني.. الظروف صعبة والأزمات صعبة.. ونتمنى حتى الأزمة الكبيرة اللي إحنا بنعيشها دلوقتي في منطقتنا...

 أنا مش عايز أتكلم في مشاكل ولا حاجة.. ده عيد وإحنا جايين عشان نشارككم فرحتكم، ونهنيكم، ونتمنى لكم كل خير.. لكن على كل حال يعني، إن شاء الله، إن السنة دي تبقى سنة سعيدة علينا كلنا، ونتجاوز فيها بفضل الله سبحانه وتعالى الأزمات الكبيرة اللي موجودة، ونتمنى من الله إنها ما تزيدش أكتر من كدا، وما تستمرش أكتر من كدا.

يعني.. أكتر أزمة إحنا بنعيشها كلنا، ومتأثرين بيها كلنا، أتصور، هي.. اللي بيحصل في القطاع، قطاع غزة والضفة الغربية، وإحنا في مصر لينا موقف، موقف محترم إن شاء الله. بنسعى إلى إن إحنا، يعني، عالأقل يبقى في وقف إطلاق النار، وإدخال للمساعدات عشان نخفف عن أشقائنا وأهلنا في، في غزة. ثم بعد كدا يعني يبقى في حل للقضية اللي هي بتتجدد كل كام سنة، وتئلمنا كلنا.

مش ها أطول عليكم.. كل التحية وكل التقدير وكل الاحترام وكل المحبة لكم جميعًا، وتحياتي... (تصفيق) وتحياتي لقداسة البابا.. وتحياتي واحترامي لقداسة البابا اللي أنا بأكن ليه كل احترام وكل تقدير والله، وطبعًا... (تصفيق) المحبة دي ناجمة عن مواقف ما يعملهاش إلا رجال.. مواقف ما يعملهاش إلا رجال.. (تصفيق)

فـ... رجال مخلصين بيحبوا بلدهم، ومؤمنين بيها وحريصين عليها، فعشان كدا أنا عشت الكلام ده.. أنا عشت الكلام ده عمليًا مع قداسة البابا. تقديري ليك يا قداسة البابا. ربنا يديك الصحة وبشكرك جدًا جدًا على اللي فات وعلى اللي جاي.

مرة تانية مش عايز أطول عليكو عشان آآ.. (هتافات) كل سنة وإنتو طيبين.. آخر حاجة ها أقولها لكو.. (هتافات) (يضحك الرئيس) آخر حاجة ها أقولها لكو.. أي أزمة، وأي مشاكل، وأي ظروف صعبة، بفضل الله سبحانه وتعالى، بفضل الله سبحانه وتعالى، طول ما إحنا (هتافات) حاضر.. حاضر.. (يضحك الرئيس) حاضر.. طول ما إحنا مع بعض.. طول ما إحنا مع بعض.. الأمور بفضل الله ها تعدي، والظروف الصعبة ها تنتهي.. المهم تفضل بلدنا بخير وشعبها يفضل بخير.. المهم بلدنا بخير، وشعبها بخير.. (هتافات وتصفيق) كل سنة وإنتو طيبين.. كل سنة وإنتو طيبين.. كل سنة وإنتو طيبين. (هتافات وتصفيق)

ألقيت الكلمة في كاتدرائية ميلاد المسيح، بالعاصمة الإدارية الجديدة، حيث شهد الرئيس عبد الفتاح السيسي احتفالية عيد الميلاد المجيد، وذلك بحضور البابا تواضروس الثاني.