نص كلمة الرئيس السيسي خلال افتتاح المعرض الأفريقي للتجارة البينية 13/11/2023
شكرًا جزيلًا، واسمحوا لي إن أنا في البداية أرحب بيكم جميعا، السادة رؤساء الدول والحكومات، أهلًا وسهلًا.. ملاوي وزيمبابوي.. وكل المشاركين في المؤتمر. واسمحوا لي إن أنا أرحب أيضًا بكل الشركات اللي شاركت معانا في معرض التجارة.
والحقيقة زي ما سمعنا خلال، يعني، الأحاديث اللي تمت النهار ده، قد إيه مهم جدًا تدعيم التجارة البينية بين دول القارة الأفريقية.
بنتكلم على قدرات اقتصادية هائلة. بنتكلم على موارد طبيعية ضخمة جدًا، سواء، في كل المجالات.. لو اتكلمنا في الزراعة، لو اتكلمنا في التعدين.. كل المجالات اللي موجودة.
لا ينقصنا إلا إن ده يتم تنسيقه والتعاون الإيجابي بينا جميعًا، وطبعا بدعم الشركات اللي ممكن تقوم بهذا الموضوع.
مش ها أنسى أبدًا إن أنا أوجه الشكر على مشاركتكم الإيجابية، وأيضًا أوجه الشكر الخاص لرئيس البنك، بنك التجارة، أو رئيس البنك الأفريقي للتجارة، للتصدير والاستيراد، الدكتور بندكت، أشكرك جدًا جدًا على الـ... (تصفيق) على الجهد الـ.. المبذول.
وإحنا في مصر لازم تكونوا متأكدين إن إحنا حريصين جدًا على إن يكون دايمًا دعمنا دعم إيجابي. مصر دايمًا بتحاول إن هي تقوم بدور إيجابي في ما ينفع الناس، مش حاجة تانية. لأن إحنا في أفريقيا، زي ما إنتو شايفين، القدرات موجودة والإمكانيات موجودة، ولكن يمكن تكون في بعض المعوقات والمشاكل اللي بتعوق يعني هذا الأمر. وبالتالي إحنا في مصر دايمًا حريصين على إن إحنا نقوم بالبناء والتنمية والتعمير والتعاون في هذه المجالات، ومش أكتر من كدا.. وإطفاء حرائق لو في حرائق لو كان ممكن نعمل ده.
مرة تانية برحب بيكم، وسعيد بوجودكم معانا في مصر، وأتمنى لكم إن المعرض يقوم بالدور اللي إحنا بنتمناه. شكرًا جزيلًا. (تصفيق)
ألقيت الكلمة في مركز المنارة للمؤتمرات والمعارض الدولية، بالتجمع الخامس في القاهرة، وذلك بحضور رئيس مجلس الوزراء الدكتور مصطفى مدبولي، ووزير التجارة والصناعة المهندس أحمد سمير، وعدد من الوزراء ورجال الدولة. وتأتي النسخة الثالثة من معرض التجارة البينية الإفريقية "IATA 2023" برعاية البنك الإفريقي للاستيراد والتصدير، ومفوضية الاتحاد الإفريقي، وسكرتارية منظمة منطقة التجارة الحرة للقارة الإفريقية.