نص كلمة الرئيس السيسي خلال تفقده مركز التحكم المركزي للشبكة الوطنية الموحدة لخدمات الطوارئ 6/10/2023

1:01

السيسي: أولًا أنا سعيد إن أنا، يعني أطمئن على إن الغرفة جاهزة إنها تدير أي أزمة، وطبعا أكيد الـ.. يعني.. قائد الغرفة على مدار الـ24 ساعة بيبقى قادر إن هو يدير الأزمة ديت.

طبعا (كلمة غير واضحة) بيتم إخطاركم عشان طبقًا لحجم الأزمة، لكن اللي أنا يهمني في الموضوع إن إحنا كدا عندنا غرف في جميع المحافظات، هذه الغرف مربوطة على الـ، يعني بشكل متكامل مع الغرفة المركزية بتاعة إدارة أزمات الدولة اللي موجود في القيادة الاستراتيجية.

بالتالي ها يبقى إحنا النهار ده ولأول مرة عندنا آآ أطقم إدارة أزمة على مستوى كل محافظة، إنت بتقول عليه حدث، وهو حدث أو أزمة يعني، وبالتالي إحنا نبقى قادرين من خلال الغرف اللي اتعملت ديت، وضبط الـ.. الاتصال المؤمن، بينها وبين مركز إدارة الأزمات بتاعة الدولة، عشان يتعامل مع آآ أي أحداث أو أي أزمات بشكل يعكس قدرة دولة.

ما نبقاش إحنا كل الـ.. الـ.. شاشات الكمبيوتر اللي قدامي دي عليها بيانات خاصة بالمحافظة، بتاعة مرافق الصرف الصحي موجود، بتاع الكهربا موجود، بتاع الغاز موجود إذا كنت أنا.. فـ.. وبتاع الصحة، وبتاع التـ.. كل من هو له دور في الدولة، في المحافظة، في كل المحافظات في الدولة، فهو موجود معاك وقاعد وعنده بيانات، وقادر على إن هو يوفر البيانات ديت، وقادر على إن هو يحرك الأدوات اللي محتاجها في هذا الموضوع.

أنا بقى ها أكلمكم جميعًا في حاجة تانية. أنا بطمن على إن الغرف اللي إحنا آآ نسقنا على شغلها من أكتر من 3 سنين، الحمد لله خرجت دلوقتي بقت موجودة تقريبا في كل المحافظات، كل المحافظات، آه، فـ.. اللي إحنا بنعمله اللي أنا بكلمكو منه ده دلوقتي، دي غرفة إدارة أزمة متحركة، يعني ممكن المحافظ كمان تبقى العربية دي بترافقه أثناء تفقده لأزمة على الأرض، ويستطيع من خلالها إن هو يتكلم ويتصل مع غرفته.

يعني، سعيد بالتطور اللي إحنا عملناه ده، وسعيد بإن إحنا قادرين بفضل الله سبحانه وتعالى على إن إحنا ننظم آآ إدارة بهذا المستوى وبهذا التطور.

وأنا كنت ها أكلمكم في حاجة تانية جميعًا يعني. أنا عايز أكلمكم في الأدوات المتاحة لديكم فيما يخص الإغاثة، فيما يخص أعمال المحافظة اللي بتقوم بيها الأعمال اليومية. وأنا بعلن ده عليكو إن أنا، إن شاء الله، خلال شهر أو شهرين، بديكو شهرين أهو فرصة، وبعد كدا ها أطلب منكم تجميع عناصركم الهندسية عشان آآ أتفقدها معاكم، بمعنى، إنت عندك في المحافظة معدات مثلًا 400 معدة 500 معدة، أنواع بين عربية وبين عربية كسح وبين لودر وبلدوزر وحاجات أخرى.. الحاجات ديت أنا بديكم شهرين، عشان ما أظلمكمش.. بعد شهرين أنا ها أطلع لجنة تتفقد ده بدقة، وكل محافظ ها يبقى مسؤول على إن هو يرفع كفائتها بشكل، بشكل، وانتبهوا وإحنا بنقول الكلام دوت.. إنت عندك أدوات في المحافظة، وعندك شركات في المحافظة، فكل محافظة حسب ظروفها، هي قادرة على إن هي تعمل التأمين الفني ده، بالإضافة للعناصر الفنية اللي موجودة في كل محافظة.

تاني.. إذا كنتو عايزين تديروا أعمالكم في، على الميدان بكفاءة عالية، لازم هذه العناصر تبقى كفائتها مرتفعة. عندي 100 معدة، يبقى الـ100 معدة صالحين.

مش بس كدا، إنت عندك في قطاعك آآ محطات ميه، وعندك في قطاعك محطات آآ ري، وعندك في قطاعك، أنا بكلم كل السادة المحافظين، وعندك في قطاعك كدا، إنت النهار ده عندك في المديرية، مديرية الري ومديرية الزراعة ومديرية الإسكان، موجودة عندك في المحافظة، وبالتالي، أنا ها أطالب حضراتكم بإن إنتم في بعد الشهرين دول أطمن تمامًا على إن المحطات ديت، طرمباتها اللي موجودة في محطات فنية، جاهزة وبأعلى كفاءة ممكنة، بمعنى، أنا عندي في قطاع أو في نطاق محافظتي 20 محطة معالجة بتشتغل بـ50 آآ طرمبة رفع وصرف وكلام من هذا القبيل، حضرتك مسؤول قدام مني من دلوقتي ولبعد شهرين، ده الحد الأقصى لحضراتكم جميعا، وبالتالي إحنا لازم نمارس الدور ده، أنا بكلم كل السادة المحافظين اللي بيسمعوني.

مرة تانية أنا سعيد جدًا بالتجربة، وسعيد إن أنا أشوف مباشر حي من عربية في مكان يعني زي ما إحنا عايزين، نشوف آآ، يعني أقدر النهار ده بالعربية دي أشوف المحافظة، وحضرتك تشوف عناصرك، وكمان تتابع الموقف على الأرض. وأنا العربية دي معايا هنا تخليني أشوف كل المحافظين، يعني حاجة.. الحمد لله تطور كويس قوي.

معلش جبتكو يوم الجمعة، بس طبعًا يعني كان، كان هدفنا إن إحنا في يوم تبقى الأمور فيه هادية نشوف بعض ونتكلم، ونطمن عليكو.

مرة تانية أنا بشكركم وصباح الخير عليكم جميعًا. شكرًا جزيلًا. معادنا بعد شهرين. معادنا بعد شهرين. كل عناصرك الفنية، وكل ما هو داخل نطاق محافظتك، إنت مسؤول قدام مني وقدام الدولة عنها. شكرًا جزيلًا. سلامو عليكو.

ألقيت الكلمة في القاهرة، من داخل إحدى غرف إدارة أزمة متحركة، حيث تفقد الرئيس المراكز المتحركة للشبكة الوطنية للطوارئ والسلامة العامة، بما تشمله من مراكز متحركة، وغرف لإدارة الأزمات والطوارئ والإغاثة بجميع المحافظات على مستوى الجمهورية، وذلك بحضور عدد من السادة المحافظين عبر تقنية الفيديو كونفرانس.