نص كلمة وتعقيبات الرئيس السيسي في جلسة "الزراعة والاتصالات" في إطار مؤتمر "حكاية وطن" 1/10/2023
13:38
السيسي: قبل ما تـ.. قبل ما ترجع، ارجع تاني نتكلم في الـ، في الكميات. أنا كاتب الكميات دلوقتي قدامي. في حاجات إنت مش حاطتها، ليه؟ يعني في، يعني، الـ60 ألف فدان ما بيتحسبوش عندك؟ لأ صحيح؟ ما بيتحسبوش يا دكتور؟ يعني ده الـ، إنت قلت توشكى وشرق العوينات و.. وسينا..
وزير الزراعة: وسيوة أهي...
السيسي: طيب، فين بقى كوم أمبو وفين آآ...
وزير الزراعة: آآ.. هو ما أنا.. ما أنا سيادتك قلت إن في مشروعات اللي هي زي كوم أمبو...
السيسي: طب أنا بس عايز أقول، معلش عشان قبل ما تسيب ده، لأن إنت في الأرقام اللي ذكرتها في التكلفة بتاعة الاستصلاح، إنت بتقول الفدان بيتكلف 250 ألف، وإنت بتتكلم في 4 مليون فدان، يعني كام؟ تريليون؟
وزير الزراعة: آه.
السيسي: يعني تريليون جنيه.
وزير الزراعة: صح.
السيسي: طب إنت كاتبهم ليه قليل كدا؟ (تصفيق) صحيح؟ أنا بكلمك بجد. طب، يعني، ارجع كدا.. معلش.. يعني إنت النهار ده ها نشيل الـ200 وها نشيل الـ1، 2 و3، 3ونص، مش كدا؟
وزير الزراعة: صح.
السيسي: مش كدا؟ دول فقط هنا. طب، في في اللاهون، وفي بني سويف وإلمنيا.. مش كدا؟
وزير الزراعة: كوم أمبو.
السيسي: وفي في كوم أمبو..
وزير الزراعة: و1.1...
السيسي: خلينا، خلينا يعني، إنت بتتكلم في 4 مليون فدان..( تصفيق)
وزير الزراعة: صح.
السيسي: أنا بقول الكلام ده لينا ليه؟ لا لا، ما هو معالي الوزير عارف كويس قوي حاجته، بصراحة يعني، بس هو يمكن بيتكلم على إن هو اللي ها يدخل حيز الإنتاج خلال العام الزراعي ده، هو اللي عايز يتكلم عليه، أنا بقول كلام مظبوط؟
وزير الزراعة: مظبوط.
السيسي: لكن إحنا بنتكلم على، مش بس كدا، على اللي إحنا مخططينه خلال، بالكتير..
وزير الزراعة: سنة ونص..
السيسي: سنة ونص، سنتين. لما إنت تتكلم على إن إنت تضيف 4 مليون فدان في أرض ظروف مصر فيها، إحنا ما عندناش آآ غابات، اسمه إيه ده، يعني مياه ممطرة على مدار العام 8، 9 أشهر فأي حتة ها نصلحها تزرع، لأ. زي ما إنت ذكرت دلوقتي إن إحنا عشان نعمل في توشكى المشروع الفرعة الرابعة ديت، إنت بتقول حائط صخري، مش كدا؟
وزير الزراعة: صح.. آه.
السيسي: مش كدا؟ الـ7 كيلو دول.
وزير الزراعة: الـ7 كيلو.
السيسي: وفضلوا موقفين الـ..
وزير الزراعة: المشروع.
السيسي: المشروع الـ20 سنة اللي فاتو، مش كدا يا دكتور؟ طيب، فإنت ليه ما تقولش تريليون جنيه؟ وبالمناسبة، إحنا ما بنقولش حاجة أبدًا مش صادقة.
وزير الزراعة: صح.
السيسي: بس، فإنت الرقم اللي قلته في الأول أنا اتخضيت، قلت هو مش عايز يقول الفلوس ليه؟
وزير الزراعة: لأ هو اسمح لي سيادتك إن أنا زي ما سيادتك قلت دلوقتي إحنا بنتكلم على اللي استصلح، إحنا عندنا منطقة أخرى فيها 600 ألف فدان، اللي هي اللي موجودة دي، وعندنا مليون و1 من عشرة مستقبل مصر بيشتغل فيهم في طريق الواحات، الداخلة، وشرق العوينات، وعندنا حوالي أكثر من 250 ألف فدان في كوم أمبو...
السيسي: أنا ما حطتش بالمناسبة الهيكلة بتاعة المليون ونص فدان في الشغلانة، لأن أنا اعتبرت إن القطاع اللي بيقوم بيهم هو القطاع الخاص يا دكتور، وبالتالي استثماراته هو اللي بيـ إيه؟
وزير الزراعة: بيدفعها.
السيسي: بيدفعها. لكن أنا بتكلم على إن الدولة بتعمل ده دلوقتي، وبنتكلم على أرقام ضخمة جدًا جدًا، قد تصل لتريليون جنيه.
وزير الزراعة: صح.
السيسي: ولو إنت النهار ده جبت الأفلام بتاعة شق الترع والمصارف، أو شق الترع ومحطات المعالجة بتاعة الـ.. الميه، ومحطات الرفع اللي بتتعمل، وحطيتها جنب بعضها هنا، إنت ها تبقى العرض بتاعك ده في حتة تانية خالص.. (تصفيق) حتة تانية خاااالص.
اسمع، عارف أنا بقول لك كدا ليه؟ لأن إحنا بنقول للناس ثقوا في أنفسكو، مش فينا، وبنقول للناس في أمل، ومش إحنا أصحاب الأمل، إنتو أصحاب الأمل، فبنقول لهم ده اللي اتعمل في خلال الـ.. الـ.. بالمناسبة، ده خلال الـ4 سنين الأخرانيين بالكتير، مش من أول ما بدأنا.
وزير الزراعة: صح.
السيسي: مش كدا؟
وزير الزراعة: آه.
السيسي: فـ.. طب إحنا بنقول للناس إن إحنا بنتكلم في 4 مليون فدان خلال آآ ها نقول 4 سنين. ممكن؟ آه طبعا ممكن. وآآ وأنا كنت دايما أقول لزمايلنا وبقول لكم وبقول لدولة الرئيس إن مشكلتنا في إن إحنا، يعني، عملية تسويق القدرات ديت اللي الدولة بتقوم بيها، ومش عشان تقولوا إن إنتو آآ يعني وزير الزراعة بيشتغل كويس أو الحكومة بتشتغل كويس، لأ، عشان نقول للناس اللي موجودة في مصر، لأ بصوا.. هو النهار ده الـ4 مليون دول يشغلوا قد إيه؟
وزير الزراعة: يعني غير يشغلوا كمان، ده إحنا لو افترضنا إن كل فدان بياخد 3 أو فردين..
السيسي: لا خليه واحد بس..
وزير الزراعة: لا لا.. اتنين أو واحد، يعني، اتنين، يجيب له 8 مليون.
السيسي: 8 مليون أسرة.
وزير الزراعة: آه.
السيسي: أنا بس..
وزير الزراعة: آه.. آه.
السيسي: طب وزارة الـ.. النهار ده القطاع بتاع التعليم في كليات الزراعة تطلع إيه هنا بقى عشان الناس دي كلها تبقى جاهزة وحتى المدارس الزراعية اللي بتـ.. مش عايز أقطع، بس أنا اتخضيت لما لقيت الرقم اللي بتقوله، يعني، إنت بتتكلم في تريليون جنيه، ألف مليار..
وزير الزراعة: صح.
السيسي: اتفضل.
22:34
السيسي: إنت عندك فرصة، اتكلم في الموضوع بتاع القصب كويس. عندك فرصة، في عندك 350 ألف فدان بيتزرعوا.. (تصفيق) بكميات مية ضخمة جدًا، وإنت عامل برنامج، عشان البرنامج ده تاخد منه وتشتل، وتخلي الميه اللي بتستخدم فيها أقل ما يمكن. إنت عندك فرصة تقول للناس في الصعيد الـ350 فدان اللي إنتو بتزرعوهم بالطريقة بتاعتنا ده بيستهلكه كمية ميه ممكن تزرع 800 ألف فدان و مليون فدان يا دكتور، أنا بقول كلام مظبوط؟
وزير الزراعة: مظبوط طبعا.
السيسي: طب انا النهار ده عملت البرنامج ده اللي الهدف منه إن أنا أشتل وأعمل ري تنقيط كدا بردو..
وزير الزراعة: صح.
السيسي: عشان في النهاية أزرع ال 350 ألف فدان، يجيبوا كميات تساوي 600، 700 ألف فدان، أنا بقول كلام مظبوط؟ ثم أوفر الميه.
طب إنت ها تلاقي منصة أحلى من اللي إحنا فيها دي إيه؟ الدنيا كلها بتسمعك. (قطع في الفيديو) (تصفيق)
35:17
السيسي: معلش أنا، ها.. ها.. يعني ها أقول لـ.. للحضور، والشكل اللي قبل دا. إحنا كنا بنتكلم على 250 ألف فدان. مش كدا؟ كانوا بالطريقة اللي هو، كدا. والمنزلة وكان بيتم فيهم إلقاء صرف آآ، يعني زراعي وكدا، و.. وبالتالي كانت ده الحال، وحتى الثروة السمكية اللي كان ممكن تتزرع بالـ250 ألف فدان أو تنتج في البحيرة ديت يعني تراجعت بشكل كبير.
فـ.. هات بقى اللي فاتت دي، الأخيرة خالص كدا.. دي مش صور إحنا جايبينها لكم عشان.. لا.. إنت بتتكلم في 250 ألف فدان، كدا، بقالنا 5 سنين شغالين، نكرك ونشيل تعديات تكونت على مدار.. هي ما كانتش تعديات بس.. كان هنا في بؤر آآ كلام مش مظبوط يعني.. لكن عشان تبقى بالتالي كدا وتبقى تعود مرة تانية المزارع السمكية أو تعود مرة تانية مش المزارع، تعود مرة تانية الحياة للبحيرة وتنتج أصناف كانت تلاشت منها خلال السنين اللي فاتت عشان تدخل الإنتاج للـ250 ألف فدان.
أنا عايز أقول لكم وللناس اللي بتسمعني هناك، ولأي حد بيشتغل في الموضوع، الـ250 ألف فدان دول هو عبارة عن، عن آآ مزرعة صناعية طبيعية.
وزير الزراعة: صح.
السيسي: لو إنتم أحسنتم استخدامها ونظمتم بقوة ال آآ الصيد فيها، هي والبردويل و..
وزير الزراعة: والبرولوس.
السيسي: والبرولوس وإدكو وبحيرة ناصر، إنتاجك ها يزيد عن كدا قد كدا مرتين تلاتة أربعة؟ آه. تبقى بتكفي وبزيادة؟ وبزيادة. طب ها ندي فرص عمل للناس تكسب منها؟ ممكن.
شوفو.. في النقطة دي بتاعة الميه، وبتاعة البحيرات يا دكتور مصطفى، أنا بقولها لينا وحتى للناس اللي موجودة هناك.. إذا ما كناش نتفهم يعني إيه بحيرة نقية، بحيرة متنظم الصيد فيها، ولا يُسمح باستخدام وسائل ممنوعة في الصيد، ثم إن إحنا فترة الإيقاف الـ3، 4 شهور اللي بيتموا، نلتزم بيهم، وأنا قلت لكو مرة، قولوا للناس اللي بتصطاد إحنا، هم كام؟ كام واحد؟ 50 ألف؟ طب 100 ألف؟ طب يعني لو إدينا أثناء فترة التوقف لهم دعم مؤقت، أو دعم آآ زي ما كنا بتكلمنا وقلنا ندي ألف ولا ألفين كل شهر لمدة 4 شهور عشان إحنا ها نعمل إغلاق كامل للبحيرة عشان الإنتاج والاستزراع اللي بيتم، أو موضوع الـ.. يعني الراحة البيولوجية اللي بيقولوا عليها تكون حققت النتيجة.
إنتو ها تجدوا، وهم ها يجدوا، بدل ما بيطلع له 10، 12 كيلو في الـ.. في اليوم، ممكن الرقم ده يتضاعف مرة واتنين وتلاتة. وبالتالي هو العائد بتاعه مش ها يبقى على قد الـ10، 12 كيلو.
فـ.. ده مش موجود. وهيئة الـ.. (كلمة غير واضحة) البحيرات اللي إحنا كنا قلنا أيام المهندس إبراهيم محلب إن إحنا نعمل هيئة ونعمل كيان قوي، قوي ها يكلفنا كتير، لأن ها يبقى ليه آليات وليه أدوات يستخدمها في ضبط الموضوع.
بعد اللي اتعمل هنا واتكلف، طب إنتو دفعتوه؟
وزير الزراعة: دفعنا آه. إحنا عملنا في فترة التوقف اللي فاتت...
السيسي: دفعت إيه؟
وزير الزراعة: لا دفعنا في البحيرات في التنمية في الـ...
السيسي: في التكريك والكلام ده؟
وزير الزراعة: لا ما دفعناش.
السيسي: طب أومال إيه؟ (يضحك الحضور والرئيس) لأ صحيح؟
وزير الزراعة: لا لا ما دفعناش طبعا.
السيسي: دي.. الموضوع شغال بين الكراكات اللي اشتريناها وبين الهيئة، هيئة قناة السويس يا دكتور مصطفى وإنت عارف ده كويس، عشان نكرك الكلام، لأن إحنا قلنا لو، لو، لو دخلنا شركات أجنبية عايزين لها أكتر من 200، 300 مليار جنيه.
أنا بتكلم صحيح.. صحيح. فجبنا إحنا الكراكات وقلنا إحنا نعمل. والناس بتشتغل. أنا مهم بعد ما عملنا ده ونجحنا بالطريقة ديت، لا إحنا مش ها نفرح كدا دلوقتي وما نكملش الـ، الـ.. الفكرة.. الفكرة بإن البحيرات دي هي عبارة عن مزارع سمكية، أنا بقول عليها طبيعية صناعية، ليه صناعية؟ لأن إحنا ها نتدخل فيها..
وزير الزراعة: ونـ...
السيسي: اسمع.. أنا بقول الكلام ده مش ليك والله. أنا بحلف بالله.. أنا بقول الكلام ده للناس اللي موجودة في البردويل، واللي موجودة في بحيرة ناصر، ويا ريت كنت إنت جبت لي بحيرة ناصر والمصانع اللي كانت موجودة اللي كانت معمولة من 50 سنة وبقت عاملة إزاي دلوقتي... (قطع في الفيديو)
هي العنوان اللي ورا منك حكاية وطن يعني إيه؟ يعني عايز تقول للناس إن بحيرة ناصر اللي كانت بتطلع 60 و70 و80 ألف طن يا دكتور، ما بقتش تطلع كدا، طب ليه؟ رغم إن في نظم حديثة جدا جدا جدا في الاستزراع والإنتاج، طب أومال هي كدا ليه؟ والناس تاخد السمك نصه آآ يعني يتلف منها ولا أنا بقول كلام آآ؟
طيب، طب هي البحيرة دي مش فيها 40 ألف صياد ولا أنا مش واخد بالي؟ مش كدا؟
وزير الزراعة: آه
السيسي: طب هه؟ طب لو النهار دع الإنتاج بتاعهم تمام، أولا لهم ها يبقى عائد مادي، ثانيا لينا إحنا ها يبقى إنتاج بدل ما تقول النهار ده الدواجن أو اللحوم، وده مش بطال بردو لأن إحنا مهتمين بكل شيء، لكن العدد اللي موجود عندنا عدد كبير، وبالتالي إحنا دايما عينينا على إن إحنا نعظم ما لدينا، نعظم ما لدينا يعني إيه؟ ده ها يوجع لك قلبك، لأنك إنت بتتعامل مع بشر أكل عيشهم الشغلانة ديت. اتفضل.
42:48
وزير الزراعة: بردو زي ما سيادتك قلت دلوقتي إن إحنا عايزين ننمي الثروة السمكية في البحيرات أو في المياه العذبة زي بحيرة السد العالي أو نهر النيل أو البحيرات، فإحنا بدرو كان سيادتك وجهت إن إحنا نطور المفرخات اللي عندنا في جنوب الصعيد زي مفرخ صحاري وجرف حسين وتوشكى، وده فعلا بدأنا فيه التطوير بالتنسيق مع جهاز مشروعات الخدمة الوطنية، وأعتقد يمكن 1 أو 2 في مراحلهم النهائية، وإن شاء الله يخشوا الإنتاج، ها يأدوا بقى إلى زيادة الـ، نلقي الزريعة في الـ، بحيرة السد العالي و...
السيسي: الكلام ده كان موجود قبل كدا، الكلام ده ولا أنا بقول آآ؟ دول، كانوا موجودين قبل كدا، ولكن إيد الإهمال خلال السنين اللي فاتت خرجتهم برة ال إيه؟
وزير الزراعة: الخدمة.
السيسي: برة الخدمة. عشان نرجعهم برة الخدمة تاني، مش مهم الفلوس اللي بندفعها، لكن أنا بتكلم قد إيه إن كان في البلد في مقومات كويسة، لو كانت في آآ يعني من جانب المسؤولين متابعة وأيضًا ضخ أموال، وأنا هنا ها أتوقف عند نقطة، يعني كانت، كانت الفكرة بتاعة بحيرة ناصر لو نفتكر إنها كانت دايما بتقدم أنواع من الأسماك بأسعار...
وزير الزراعة: معقولة.
السيسي: معقولة جدا، أو، أو يمكن منخفضة جدا.
وزير الزراعة: صح.
السيسي: طب يا ترى لما اتعمل ده، الفكرة دي، إنها تمشي بالطريقة ديت، نجحت؟ إنه، إنه إديها رخيصة.. طب البعد الاقتصادي في المشروع ما يتحطش في الاعتبار، أو جزء منه يبقى موجود معانا القطاع الخاص فيه عشان ينظم ويدير ويحافظ على كفاءة المنشآت.
النهار ده كل الحاجات اللي كانت موجودة دي خرجت برة الخدمة، وعايزة تتعمل من جديد، إذا كانت مصانع التلج اللي كانت موجودة، أو مصانع التعليب، صح كدا؟
وزير الزراعة: صح.
السيسي: أنا بقول كدا عشان الناس تبقى عارفة إنك إنت لما تفكر إنك إنت تقول إيه، يعني كان دايما المسؤولين وهم بيعرضوا يقول لك إيه، إحنا إن شاء الله يا فندم ها نطلع إنتاج والإنتاج ده تكلفته إيه؟ بسيط يعني. يا سيدي إنت بتقول كدة ليه؟ ما تطلع الموضوع مظبوط وبيعه مظبوط عشان تكمله، بدل ما تخرجه بعد 5، 6 سنين، الحاجة اللي إنتو عملتوها دي بالملايين والمليارات يمكن تخرج برة الخدمة، ونبقى نخسر قدراتنا الذاتية اللي موجودة في الموضوع. اتفضل.
1:12:28
وزير الاتصالات: يمكن يعني أختم بمشروعين في غاية الأهمية، الأول طبعا هو انتقال الحكومة إلى العاصمة الإدارية الجديدة، هذا المشروع آآ استتبع إجراء عملية أرشفة رقمية لأكثر من 250 مليون وثيقة. أكبر مشروع أرشفة في الشرق الأوسط، 250 مليون وثيقة، الآن أصبحت رقمية، كل الملفات الجارية للحكومة المصرية، أصبحت ملفات رقمية لا ورقية. وده كان الرؤية لانتقال الحكومة إلى العاصمة الجديدة أن تنتقل كحكومة لا ورقية، مرقمنة. كذلك آآ كان آآ المجلس الأعلى للاستثمار وجه بضرورة التيسير في تأسيس الشركات بالفعل، وضعنا منظومة بالتعاون مع هيئة الاستثمار لتأسيس الشركات عن بعد، أصبح يمكن لرواد الأعمال والمستثمرين إنه ينشئ شركة بالكامل دون أن يتوجه إلى أي جهة حكومية.
آآآ، زي ما قلت الـ...
السيسي: لا لا لا لا لا، ارجع ارجع..
وزير الاتصالات: حاضر.
السيسي: يعني إنت يا دكتور، جيت على الحكومة، والجهد اللي اتعمل فيها، والبنية الأساسية اللي اتكلفتها، سواء كان البنية الأساسية اللي اتعملت داخل كل وزارة، أو بين الوزارات، ثم الـ.. مراكز البيانات المؤمنة عشان كنت إنت قلت خدمات حوكمة و.. وكنت أنا كتبت قلت إيه؟ طب ومؤمنة بقى ما يقولها. هو ده اتكلف كام؟
وزير الاتصالات: الـ.. المشروعات يا فندم..
السيسي: الأولاني، الأولاني، الانتقال للعاصمة الإدارية الجديدة، كحكومة، الميكنة بتاعتها كاملة، كبنية أساسية، اتكلفت كام؟
وزير الاتصالات: حاضر. الحقيقة المشروع ده ينقسم إلى 3 أقسام، ينقسم إلى...
السيسي: يعني أنا بقوله بس عشان إيه، أديك فرصة إنك تقوله، عشان الناس متصورة، وأنا، كلكو صورتوا، خدتوا الفيلم بتاع المباني من برة، ما حدش دخل جوة وصور لي الناس بتشتغل إزاي وبتعمل إيه؟ مش كدا؟
طب الموضوع ده مهم قوي ليه؟ لأن إحنا عايزين نقول للناس إن البيانات بتاعة الحكومة المصرية، وده مش كتير من الدول عملت ده، صح كدا؟ عملت حاجة مغلقة يا دكتور مصطفى، وده اللي اشتغلنا بقالنا 4 ، 5 سنين عليه، وبقى لا يمكن حد يقدر يدخل على الحكومة يعمل له شلل آآ ولا إيه؟ طيب، ما هو ده، هو ده سر؟ ما نقوله للناس، هو حد ها يقدر يعمل حاجة بعد اللي إحنا عملناه إن شاء الله؟
وزير الاتصالات: إن شاء الله.
السيسي: طب نقول بقى.
وزير الاتصالات: يعني هو الحقيقة الـ، الـ.. انتقال الحكومة إلى العاصمة الإدارية الجديدة آآ كان مشروع انقسم إلى 3 عناصر رئيسية: العنصر الأول كان الأرشفة زي ما حاولت أشرح، العنصر التاني كان بناء منظومات رقمية وتطوير المنظومات الموجودة لدى مختلف الـ، الوزارات، فيما نسميه التطبيقات التخصصية، اللي هي التطبيقات المتعلقة بكل وزارة، ثم الشق الثاني من هذا العنصر هو التطبيقات التشاركية، هي التطبيقات اللي بتميكن أنشطة متماثلة في كل وزارات، زي مثلا الموارد البشرية أو التواصل أو إدارة المشروعات أو غيرها. دي الحقيقة العنصر التاني. العنصر التالت هو مراكز البيانات، وآآ الدولة أنشأت مركزي بيانات مؤمنة على أعلى مستوى تقني وصلت إليه التكنولوجيا، المركز الرئيسي بلغت الاستثمارات فيه 450 مليون دولار، المركز التبادلي بلغت الاستثمارات فيه 350 مليون دولار. يعني 800 مليون...
السيسي: آآ فين تكلفة إنشاؤه؟ إنت بتتكلم عالبنية المعلوماتية يا دكتور. مش كدا ولا إيه؟
وزير الاتصالات: صح.
السيسي: طب بكام؟
وزير الاتصالات: لا أنا الحقيقة يعني أنا اللي عارفه...
السيسي: أنا، عارف أنا بقول الكلام ده لكم هنا، عشان الناس متصورة لما إحنا بنقول دولة بتدار بشكل متقدم، تتجاوز بيه الـ.. الإشكاليات بتاعة الجهاز الإداري للدولة من خلال الـ.. النظم الحديثة، مش كدا؟
كل كلمة بتقولوها هنا، بتتحول لجهد وتكلفة مالية ضخمة جدا. مراكز البيانات ديت أنشئت بشكل محصن، صح كدا؟ على أعماق تصل لـ15 متر، بمليارات الجنيهات. أنا بتكلم في الإنشاء، خرسانة، مش بتكلم في قواعد بيانات ولا السيرفرات اللي إنتو جبتوها، عشان تحقق لكم عمل مغلق، محكم، مؤمن بشكل كامل، لا يستطيع أحد إنه يخش عليكم في أي وقت مهما كان قدراته، لأن إنتو ما قلتوش مثلا من الـ50 ألف حاسب اللي موجودين في الوزارات هو عبارة عن شاشة وكيبورد، لا يمكن لمخلوق يقدر يدخل.. ولا بقول كلام ممكن؟
وزير الاتصالات: بالعكس..
السيسي: لا صحيح؟
وزير الاتصالات: بالعكس، يعني ممكن لو تأذن لي سيداتك يعني أشرحها بشكل أكثر تفصيلا. إحنا راعينا إن كل واحد من زملاءنا ها يكون لديه ما نسميه شاشة صفرية، يعني شاشة يمكن أن يتعامل من خلالها مع قواعد البيانات والأنظمة الموجودة في مركز البيانات الرئيسي. ولكن لا يمكن إنه يدخل عليها بيانات بشكل غير مؤمن أو بشكل عشوائي آآ يعني فج، ولكن لا بد أن يكون من خلال منظومة محوكمة مركزية إذا ما أراد إنه يدخل بيانات إلى المنظومة أو يستخرج بيانات منها، وده بيكون مسجل بحيث يبقى معروف مين اللـ...
السيسي: أرجو إن إحنا البروتوكول الرقمي اللي بينظم الكلام دوت بالأنساق بتاعته نكون خلصناه يا دكتور مصطفى، عشان يبقى ملزم وعلشان ياخد الصبغة القانونية بتاعته في تعامل كل مختص مع النسق بتاعه ومستواه، مش كدا؟
وزير الاتصالات: تمام.
السيسي: اتفضل.
2:02:53
السيسي: أنا بس ها أقول للدكتور عمر يعني أو الدكتور عمرو، إن القطاع اللي عنده فرصة حقيقية للنمو في بلدنا في ظل الظروف اللي بتمر والتحول الجيوسياسي اللي أشرت إليه، محتاج مننا كمجتمع، كـ.. وزارة تعليم عالي ويمكن حتى وزارة التعليم، إنها تهتم، واهتمام يعني إحنا كنا كمجتمع عشان يمكن المحاضرة أو التقديم يعني متخصص قوي، وبالتالي كتير من الـ.. مش كتير ها يـ.. يعني..
لكن أنا بقول لكم، هو ده القطاع اللي لو إحنا كلنا حطينا إيدينا في إيدين بعض، مؤسسات الدولة المختلفة، وأجهزتها، مع رؤية وزارة الاتصالات، إنت بتستهدف 10 مليار في 26، وإحنا اتكلمنا في الموضوع ده.
بالمناسب، كل عرض من اللي حضراتكم شوفتوه ده، إحنا بناخد فيه 3، 4 ساعات مع الدكتور عمرو عشان نبقى بنحلم، في كل مجال (كلمة غير واضحة) بحرية، مش عارف آآ مراكز خطط التدريب.. ده ده..
لكن بقول لكم، أنا النهار ده بيخش عندي شباب وشابات في كليات، بيقعد 4 سنين، لو الـ4 سنين دول هو اقتنع إنه ممكن يقضيهم في المنشآت اللي إحنا بنتكلم عليها، وفي التعليم والتأهيل الي إحنا بنتكلم عليه، ها يخرج منها بفرصة عمل، اللي هو بيتعمله دلوقتي ما بيتيحلوش.
أنا بقول كلام مش واضح؟ طب أوضحه.. يعني إحنا النهار ده بندور على شباب وشابات في المجتمع المصري أو في فئة الشباب المصري، قادر على إن هو يلبي المطالب الـ.. اللي الدكتور عمرو اتكلم فيها.
هل السوق العالمي.. أنا ما بقولش السوق المصري، لأن هو اتكلم قالك المحلي وإحنا ممكن نلبيه. لكن السوق العالمي النهار ده يقدر يلبي أو يستوعب كل اللي ها تقدمه؟ بلا شك. لغاية مليون فرصة في السنة؟ طيب.
بقى أنا عندي، وأنا عندي مشكلة في الخريجين بتوعي اللي بيتخرجو من الـ.. من الجامعة.. ومش عارف يمكن أوفر لهم فرصة عمل، وحياة مناسبة لهم، في ظل الـ.. يعني كتير من المشاكل موجودة عندنا.
وعندي قطاع ممكن ينمو 30%، أنا بقول كلام معقـ.. مناسب؟
وزير الاتصالات: ممكن يا فندم.
السيسي: خلي بالكو من اللي بقوله.. خلي بالكو من اللي بقوله.. يعني المجتمع يبقى، لما بنطرح أي طرح من ده في جلسة زي كدا، إحنا نفضل شايلين الهم، ونفضل متضايقين، ونفضل نفكر، وإزاي نقنع ولادنا وبناتنا إن إنت النهار ده داخل كلية الآداب، وتقديري لها عالي، كلية الحقوق وتقديري لها عالي، كلية التجارة.. وأي كلية أخرى فرص العمل فيها مش كتير. وإنت عندك قطاع مستنيك، لو إنت قضيت الـ4 سنين اللي إنت بتقضيهم في الكلية دول في المجال ده، ها تجد فرصة عمل بأرقام يعني أقول لكو إيه؟ يعني إحنا عندنا فرصة كبيرة جدا في ظل التحول اللي بيحصل، وعندنا فرصة كبيرة جدا في، في، في حالة الطلب، أو في، حجم الطلب المطلوب في المجال، واللي العالم مش قادر يقضيه دلوقتي لأن كله تقريبًا قدم أقصى ما لديه. أنا بقول كلام مناسب ولا؟
وزير الاتصالات: إحنا عندنا يا فندم فجوة مهارية في دولة يعني هي الأشهر في هذا القطاع، الهند، لديها عجز مليون وظيفة. في دولة واحدة.
السيسي: اللي هي فيها.. اللي فيها مليار ونص.. اللي فيها إيه؟
وزير الاتصالات: مليار ونص.
السيسي: مليار ونص، ده العالم كله يبقى قطاع الاتصالات والصادرات الرقمية ده قطاع مش، يعني، أنا عشان أعمل مصنع لـ.. أي مصنع، حديد وصلب أو أي منتجات سيارات أو كلام من هذا القبيل، بخش في منافسة كبيرة جدا جدا، واستثمارات كبيرة قوي قوي، قد لا تكون متوفرة.
وعندي قطاع، بقول لكل أب وأم موجودين، وبقول للدراما في الإعلام، عايزين نسوق الفكرة.. عايزين نبيع للناس.. مش نبيعها يعني، يعني، عايزين نخليها واضحة، يبقى الشباب، يعني الأبهات والأمهات بياخدوا ولادهم يقعدوا بيهم حتى الآن قدام مراكز الـ.. مراكز التعليم يعني، الدروس الخصوصية، لو حد قعد بولاده في الحتت دي، ها يبقى في فرصة عمل بأرقام تغني الشاب والشابة تمامًا، آآ، وكل آآ المطلوب ليه إنه يبقى معاه حاسب، آي باد يعني، مش كدا؟ والشغل إيه؟
وزير الاتصالات: هو المطلوب حاسب.. من أي نوع.
السيسي: لأ أنا بقول الشغل إيه؟
وزير الاتصالات: الشغل مفتوح لكل المتخصصين من مختلف الكليات والخلفيات.
السيسي: أنا اتكلمت في الموضوع دوت في، في.. مؤتمر تنمية الأسرة المصرية، وقلت إن إحنا لما جينا نعمل البرنامج بتاع الماجستير، آآ عملنا اختبارات عشان ناخد الناس، لأن إحنا بنـ.. بنحطهم يعني في.. في برنامج قوي جدا تكلفته كان ساعتها 30 ألف دولار؟
وزير الاتصالات: 30 دولار يا فندم ولا زالت التكلفة..
السيسي: ولا زالت طبعا، وبعدين جه الدكتور قال لي تراجع بقى عن الـ30 ألف دولار دلوقتي وقال لي كتير عليا و.. وإن الديون (كلمة غير واضحة) 9 شهور بعد ما كنا بنتكلم في سنة ونص.
طب.. مش مهم المسار اللي إحنا بنتكلم فيه، قد مهم إن الفكرة تبقى موجودة عند الناس في مصر، بعددنا اللي ما شاء الله كتير، سواء كان في التعليم العام أو حتى في التعليم الـ.. الحكو.. العالي.. يا جماعة، إنتو بتودوا ولادكو فين؟ وقاعدين بتتخانقوا عشان ياخد شهادة ليسانس أو بكالوريوس، وفرصتها في الشغل مش، يعني، قد لا تكون.. وبعدين تشغلوه أي حاجة تانية بعد كدا.. طب ما نعمل حاجة ونقول لهم، ها نديهم الشهادة، ليسانس، بكالوريوس، يعني.. نديهم شهادة (تصفيق) (يضحك الرئيس) ما دام الفكرة فكرة شهادة، وماله؟ طب ما هو فعلا ها يبقى جاهز يعني.
ما تفكر إن إحنا نقول ها ندي في الـ4 سنين اللي يلتحق بده ويطلع بالمستوى ده، سواء كان في آداب أو تجارة أو أي كلية أخرى.. كسورا الحواجز.. كسروا الحواجز.. وأي، أي حاجة تعوق الفكرة، اتعاملوا معاها عشان آآ نقدر نقدم الرقم اللي إنت بتقول عليه.
بالمناسبة، إن تشوف بتحلم ب 10 مليار دولار، أنا مش عايز أجيب أسماء دول تانية يا عمرو.. وبتجيب كام وعددها كام، عددها 1 على 20، مش كدا؟ في حد زيهم؟ لأ. يعني، أنا بتكلم في العدد يعني، في العدد يعني، في حد؟ طب حد الأرقام اللي بيتحصلوا عليها، في حد زيهم؟ بردو بالنسبة لهم وبالنسبالنا، وبالنسبة للشريحة بتاعتنا، لأ هم الأعلى، مش كدا؟ طب ده معناه إيه؟ معناه إن التعليم اللي كان عندهم مكنهم من ده، وإحنا انتبهنا متأخر، الكلام ده كان المفروض نشتغل عليه أفتكر من 20، 30 سنة، بتركيز شديد جدا جدا وفهمنا إن إحنا رايحين لحاجة بالمستوى ده.
آخر حاجة بس أنا عايز أقولها لك، أنا كنت بتكلم مع ال.. الصبح مع المجلس الأعلى للقضاء، وقلنا يا جماعة فكروا مع بعضنا، في موضوع الجرائم الإلكترونية، وأيضا لجنة متخصصة في موضوع الذكاء الاصطناعي، لأن إحنا شايفين إن الموضوع ها يقفز مننا، وقد لا نكون إحنا يا دكتور مصطفى منتبهين بالـ، بانعكاساته علينا، سواء كـ.. كمعرفة وكـ.. آآ تطور، أو كـ.. جرائم، أو جرائم، بحيث إن إحنا نعمل التشريعات اللازمة، فإنتو ليكو (كلمة غير واضحة) في الموضوع يا دكتور عمروا معاهم في الموضوع ده.
وزير الاتصالات: حاضر يا فندم.
السيسي: يبقى أنا في النقطة بتاعة وزارة الاتصالات، إحنا كل ما بيطلبوا مننا الدكتور عمرو ما بنبخلش عليه والدكتور مصطفى بيبقى جاي مع الدكتور عمرو بالذات وقلقان من المطالب، لكن أنا شايف إنها مطالب إيه؟ مشروعة، لأن إحنا، هه، أصرف على ده ولا أصرف على حاجة تانية؟ كل جنيه بصرفه هنا، بيبقى الـ.. تأثيراته ضخمة جدا جدا على مصر وعلى، علينا.
بالمناسبة كان هو بيتكلم على الـ.. بوريكو قد إيه الدولة لو ما انتبهتش، على موضوع الكابلات البحرية اللي إحنا 90% منها بتمر في مصر، وإحنا بنتكلم مع بعض من سنتين تلاتة كدا، فبيقول لي الكابلات وبتتقطع، قلت له بتتقطع؟ بتتقطع إيه؟ فإنت ما، ما تعمل على محور قناة السويس.. قال لي إحنا بقالنا 10 سنين مش قادرين يا دكتور.. إيه؟
وزير الاتصالات: 20 يا فندم.
السيسي: طب، بلاش كدا..
وزير الاتصالات: دي الحقيقة يا فندم. (يضحك بعض الحضور)
السيسي: بلاش كدا.. قال لي إيه؟ يا نهار إسود، قلت له ده بكرة، بكرة يتعمل، وكل الدنيا تعمل إيه يا دكتور؟ وخلصنا وعملناه، وبقول له دلوقتي تاني قدامكم، لو عايز تعمل 10، أنا جاهز. (تصفيق)
ليه جاهز؟ هه، هو أنا جاهز عشان يعني إن إحنا فرد عضلات ولا عشان إن القطاع عنده فرصة؟ وإن المكانة اللي إحنا توصلنا إليها يا دكتور مصطفى حرام إنها تـ إيه؟ نفقدها نتيجة ممارسات آآ كدا..
فـ.. فرصتنا إن إحنا نستفيد من التحولات، وأنا معاكم، و. يعني، في إن إحنا نتحرك ونجري في الـ، في الموضوع، شكرًا جزيلًا. (تصفيق)
ألقيت الكلمة في القاهرة، بقاعة الماسة بالعاصمة الإدارية الجديدة، حيث شهد الرئيس عبد الفتاح السيسي جلسة "الزراعة والاتصالات" في إطار مؤتمر "حكاية وطن"، وذلك بحضور الدكتور مصطفى مدبولي، رئيس مجلس الوزراء، والسيد القصير، وزيروزير الزراعة واستصلاح الأراضي، والدكتور عمرو طلعت، وزير الاتصالات وتكنولوجيا المعلومات، وعدد من الوزراء.