نص كلمة السيسي خلال فعاليات الجلسة الثانية من "حكاية وطن" 26/9/2023
السيسي: أنا بس ها أقول، أنا بشكركو طبعا الدكتورة نيفين والدكتور أشرف على العرض بتاعكم. لكن أنا عايز أقول لكم على حاجة إنتو محتاجين تبذلوا فيها جهد أكتر. هو إن الجهد اللي إنتو عاملين هده كله ما بيتمش تسويقه وإهاره وتقديمه للناس بشكل، في تقديري يعني، عشان الناس مش عشان تحس بيه، لأ، مش عشان تستفيد بيه، لأ، لأن ده جهد بيأكد بإن إحنا كل القطاعات اللي موجودة في الدولة محل اهتمام ومحل دعم عشان تحقق الأهداف لهذا القطاع.
وبالتالي يعني أنا ها أقول لك على حاجة يا دكتور أشرف، يعني كنت أتمنى إنك إنت تقول لي مثلا وإحنا بنتكلم دلوقتي، خلال، شوف إنت بتتكلم يعني اتكلمتو في حاجات كتير، واتكلمتو على الدعم اللي إنتو بتقدموه وعلى الإنفاق اللي إنتو بتعملوه، لكن خليني أقول لك، لما ييجي النهار ده شاب يتقال إن في شاب من عندنا أو شابين ساب مصر وراح.. لو أنا النهارده كوزير لل.. للشباب، أو كحكومة، ما أتكلمتش في الموضوع ده بجلاء وبوضوح، وبشكل آآ يعني مباشر لكل الناس، ده ها يـ.. ها يـ.. يعني، ها يقدح كتير في كل الجهد اللي إنت بتتكلم عليه ده.
إحنا كنا بنتكلم في أكتر من 4000 مركز شباب كان محتاج رفع كفاءة وتأهيل
وأنا خليني أقول لك، إنت اتكلمت عن حجم العمل اللي اتبذل في وزارة الشباب خلال الفترة اللي فاتت، والدكتورة نيفين نفس الكلام، لكن مثلا على سبيل المثال لما اتكلمنا في بداية ال.. الفترة الأولانية خالص، أنا كنت، كلامنا كان يا جماعة الأفكار بتاعة إدارة مراكز الشباب والنوادي بالأسلوب اللي إنتو ماشيين بيه، إحنا لا قبل لنا بيه، صح كدا؟ وقلت لكو لازم تشوفوا صيغة مالية أخرى يا دكتور مصطفى تتعاملوا بيها مع الموضوع عشان تقدروا العدد..
إحنا كنا بنتكلم في أكتر من 4000 مركز شباب كان محتاج رفع كفاءة وتأهيل. وكان بدأ البرنامج ده مع المهندس خالد، وبدانا بيه عشان نرفع كفاءة المراكز اللي غنت جبت صورها، واللي إحنا قلنا إن المراكز دي لو ما كانتش ها تقدر تغطي إنفاقها، ها ترجع مرة تاني، لأن الدولة مش ها تقدر كل شوية تدخل تعمل تكلفة مالية ضخمة جدا لهذا العدد بـ.. لاستعادة كفاءته مرة تانية، صح كدا؟
وزير الشباب والرياضة: مظبوط.
السيسي: طيب، يبقى أنا عايز منك دقولتي تقول لي إيه، تقول لي الناس اللي بيسمعونا، طب إحنا بنـ، بنرعى أبطالنا إزاي؟
وزير الشباب والرياضة: تمام يا فندم.
السيسي: حاضر.. ما أنا عارف.. أنا عارف، بس أنا عايز الناس تعرف، عشان الناس بتسمع الجانب اللي هو إيه إن ابننا مشي وسابنا عشان إحنا ما.. ما.. ما دعمناهوش، أو مش مهتمين بيه. لأ، فإنت، هنا، حتى في ال.. وده مش من، لأن أنا أتمنى إن ك ولادنا وبناتنا يبقوا أحسن حاجة في كل حاجة.
وزير الشباب والرياضة: طبعا.
السيسي: ما فيش كلام يعني. لكن أنا بحب أقول النقطة ديت لأن طبعا آآ المواضيع دي بتبقى بتمثل نقطة مش طيبة في نسيج الجهد اللي إنتو بتبذلوه.
أتصور إن إحنا في الجلسة اللي إحنا موجودين فيها، وكل الناس في مصر بتسمعنا، مهم قوي يعرفوا إن إحنا مهتمين بولادنا وبناتنا
شوف.. ما إحنا كنا في كل آآ مش عارف الكلام ده مناسب ولا لأ، أنا مش ها أذكر أرقام، أنا مش ها أذكر أرقام.. لكن ها أقول إيه، إن إحنا في كل الجوايز اللي كانت بتقدم لكل أبطالنا اللي حاصلين على بطولات، ده رقم ما، يعني، لا يعبر عن تقديرنا ليه، هم يستحقوا أكتر من كدا بكتير. لكن الرقم بردو رقم مش متواضع قوي، مش كدا ولا أنا..
وزير الشباب والرياضة: طبعا.
السيسي: واللي بعد كدا.. فأنا بس عايز دلوقتي، عشان حصل الموضوع ده أكتر من مرة، وما حدش ممكن يطلع بيان من عندك من وزارة الشباب، ممكن تطلع تعليق فيه، لكن أنا أتصور إن إحنا في الجلسة اللي إحنا موجودين فيها، وكل الناس في مصر بتسمعنا، مهم قوي يعرفوا إن إحنا مهتمين بولادنا وبناتنا، وحريصين عليهم (تصفيق) صحيح، فـ.. فـ.. لو حصل إن حد من، من عندنا ما حسش بالتقدير، أو بحجم التقدير معجبوش أو ما كفهوش، آآ، يعني، نقول إحنا بقى.. اتفضل.
...
1:07:23
السيسي: يا أشرف.
وزير الشباب والرياضة: اتفضل يا فندم.
السيسي: أنا مش بقول لك عشان تدافع..
وزير الشباب والرياضة: لأ أنا بقول بوصف (يضحك)
السيسي: استنى بس.. أنا بقول لك عشان تقول إيه.. تقول إيه.. تقول إيه، أنا، أنا ها أقول لكو على حجم الإنفاق لمستويات البطولات المختلفة.
وزير الشباب والرياضة: تمام يا فندم.
السيسي: يعني الأبطال اللي حاصلين على بطولة محلية، بنقدم له ده، بطولة دولية قارية، بنقدم له ده. بنقدم له قبل، وبنقدم له أثناء، وبنقدم له بعد. لو الرقم حاضر، قول. الرقم مش لحد بعينه، مش لحد.. إنت قلت 1.3 مليار، وقلت 600 مليون، وقلت كلام كتير كويس، علاوة على طبعا الدعم اللي بتقدمه كتير من، من الشركات وكلام من هذا القبيل.
لا أنا بتكلم على وزارة الشباب. بتكلم عليك إنت شخصيا. وبالمناسبة يا أشرف، وأنا بقولها، ولو إنت محتاج دعم في هذا المجال إحنا ما عندناش مشكلة، ما عندناش مشكلة، (تصفيق) ليه بقول كدا؟ ليه بقول كدا؟ أصل ما يصحش إن يتقال عن حد من عندنا مشي عشان إحنا..
وزير الشباب والرياضة: مش قادرين.
السيسي: مش قادرين، كويس، أو ما راعيناهوش، أو وقع مننا غصب عننا. طب.. طب ها أقول كلمة صعبة شوية، طب هو عشمان شوية، مش ها أقول طماح، ها أقول عشمان شوية.. أعمل إيه؟ ها أسيبه يعني؟
وزير الشباب والرياضة: لأ معاك.
السيسي: طيب ما إنت شايف الناس بتعمل إيه في كل حتة.
وزير الشباب والرياضة: حاضر.
السيسي: فـ.. يعني لو الأرقام عندك.. أنا بس عشان أقولها لمين، مش ليا يا أشرف، أنا بقولها للناس اللي معانا هنا والناس اللي بتسمعنا في مصر عشان تعرف إن الدولة مش.. يعني العملية مش ماشية كدا، ده في نظام وفي أرقام وفي ميزانيات محطوطة تعالج ده وتـ.. وتنفق عليه، وبالمناسبة، ما حدش بينفق زي ما دايما بقول الكلمة دي منين يا دكتور؟ من جيبنا، إحنا بننفق من جيب مصر. لكن نقول للناس بس عشان الناس تبقى عارفة إن البطل ده إنفاقه علينا، سواء كان بشكل مباشر أو شكل غير مباشر... تحب تقول؟
وزير الشباب والرياضة: آه يا فندم، إحنا مثلا ها ناخد الحد الأقصى. حد أقصى هو الحلم بتاعنا الأوليمبي، كان اللاعب لما بيجيب ميدالية أولومبية مليون جنيه، خليناها مليون ونص، خليناها 2 مليون جنيه، وبياخد معاش مدى الحياة، يعني اللاعب خلص فبياخد المعاش بتاعه مدى الحياة.
بننزل تحت شوية بطولات العالم، يعني إحنا عملين لها بردو منهج، يعني لا يقل اللاعب على حسب التدرج بتاعه يعني لما بيكسب 500 ألف جنيه، وده في أعداد، إحنا أعدادنا مش قليلة يعني، بتساوي أرقام كتير، والبطولات الأفريقية يعني من 200 ل 300 ألف جنيه.
دي لايحة على طول بيخلص اللاعب الحقيق بيبقى المكافآت بتاعته.. آآ بعض الألعاب بيبقى عندها ده كله متسلسل، فاللاعب الواحد ناتج المكافآت ديت بيبقى رقم مش قليل، رقم كبير جدا، وإحنا بنوفره وبنديه للاعبين. وده في المتوسط العام للألعاب الفردية كويس ومتوسطه كويس جدا.
الألعاب الجماعية ليها شأن خاص يعني، بصفة خاصة إحنا فاصلين كرة القدم ليها نظام احترافي مختلف. ده الواقع اللي إحنا موجودين فيه دلوقتي يا فندم.
السيسي: يعني عايز دعم ولا مش عايز؟
وزير الشباب والرياضة: عايز دعم (يضحك) أنا ها أقول لأ.
السيسي: (يضحك) مش كدا؟ طب أنا ها أقولك على حاجة عشان بردو تفكر، وادرس لنا في إنك إنت مستويات معينة نخلي المكافأة بتاعتها يا دكتور مصطفى أكبر من كدا، نضاعفها. (تصفيق)
وزير الشباب والرياضة: يا ريت يا فندم. متشكرين جدا.
السيسي: بس قول لي الرقم ها يبقى كام (يضحك) يعني الدكتور مصطفى قعده معانا هنا بغرامة كبيرة يعني (يضحك) لكن إحنا ما نسيبش أبدا، أبدا..
وزير الشباب والرياضة: ولادنا.
السيسي: آه طبعا..
وزير الشباب والرياضة: حاضر.
السيسي: ما يصحش.
وزير الشباب والرياضة: حاضر يا فندم.
السيسي: شكرا جزيلا.
وزير الشباب والرياضة: شكرا يا فندم، متشكرين.
...
ألقيت الكلمة في مدينة الإسماعيلية، بجامعة قناة السويس، ضمن فعاليات الجلسة الثانية بعنوان "حكاية وطن"، على هامش احتفالية يوم تفوق جامعات مصر، وذلك بحضور الدكتور مصطفى مدبولي، رئيس مجلس الوزراء، والدكتور أشرف صبحي، وزير الشباب والرياضة، والدكتورة نيفين الكيلاني، وزيرة الثقافة، وعدد من الوزراء.
...