نص لقاء الرئيس السيسي بأهالي قرية "سدس الأمراء" ببني سويف 16/9/2023

https://www.youtube.com/live/-dIY46wRm68?feature=shared

السيسي: السلام عليكو.. كل سنة وإنتو طيبين، متشكرين جدًا جدًا، أتأخرت عليكو شوية مش كدا؟ أتأخرت بس أنا الحقيقة..

الأهالي: تحيا مصر.. تحيا مصر.. تحيا مصر..

السيسي: طب أنا عايز أقول لكو على حاجة بس.. خلي بالكو إن حياة كريمة ديت، شوفوا إنتو واقفين في وسط إيه هنا في الـ، في القرية بتاعة أهالينا اللي موجودين.. شوفوا عاملين إيه؟ ده بيكو إنتو، ده بيكو إنتو والله. متشكر جدًا

(هتافات من الحضور)

السيسي: ده أنا اللي بشكركو (يضحك الرئيس) متشكرين، متشكرين، بشكركو جميعًا.. تعالي تعالي البنت ديت، تعالي تعالي تعالي، تعالي البنت ديت تعالي، تعالي.. ليه ليه بتعيطتي ليه؟ ليه ليه؟ هه؟ طب واللي بيبقى فرحان يعيط؟ (يضحك الرئيس) ليه كدا (يضحك الرئيس) طب نسقف لها كلنا بقى، نسقف لها لو سمحتو.. خلاص؟ خلاص؟ أبوسك؟ هه؟ أبوسك ممكن؟ براحتي خالص؟ طيب. (يقبلها الرئيس) متشكرين.. على مهلك.. متشكرين جدًا، متشكرين جدًا على كل حاجة بتعملوها.. شكرًا جزيلًا، شكرًا جزيلًا.. متشكرين.. متشكرين..

متشكر والله وكل مرة إنتو اللي منورين، كتر خيركو، في كل مرة أقابل الشباب والشابات المتطوعين، وأشوف الحاجات الجميلة اللي هم بيعملوها، أقول ما حدش أبدًا رغم كل الظروف الصعبة اللي إحنا فيها ها يوقفنا أبدًا عن الطريق اللي إحنا ماشيين فيه، نغير حياة أهالينا، نغير حياة أهالينا.. بيكو إنتو، لا، لا بيكو إنتو. متشكرين، متشكرين.

(هتافات من الأهالي)

السيسي: وأنا معاكو إن شاء الله، متشكر، متشكر، متشكرين، شكرًا جزيلًا.

3:52

(الرئيس يزور أسرة في بيتها)

الأب: أهلًا وسهلًا، شرفت الدنيا كلها يا ريس

السيسي: (للابن الأصغر) إزيك، اسمك إيه؟

الابن: زياد.

السيسي: ازيك يا زياد؟ ازيك يا زياد؟

الابن: الحمد لله.

الأب: أهلًا وسهلًا.

السيسي: وإنتي اسمك إيه؟

الأب: اللهم صلي على حضرة النبي، اللهم صلي على حضرة النبي.

الابنة: رحمة..

السيسي: رحمة جميلة. كل سنة وإنتو طيبين.

الأب: عبد الله ابني يا ريس، لا أهلًا وسهلًا، نورت بني سويف يا ريس، نورت الدنيا كلها، والله العظيم ده شرف عظيم لينا، اتفضل يا ريس، اتفضل، اتفضل يا ريس، اقعد يا زياد، يا مرحب يا ريس ده إحنا لينا عظيم الشرف، والله العظيم النهار ده الدنيا كلها نورت، وربنا يجعل الخير دايمًا قدامك كدا وتحت أقدامك. والله.

الأم: آه والله نورتنا..أنا مش مصدقة والله.

الأب: والله يا ريس، والله البلد دي شافت خير على إيد سعادتك، مش هنا، مش القرية دي..

الأم: آه والله..

الأب: والله العظيم مركز بيبا بأكمله بيتنقل نقلة حضارية، لو قلنا دي خطة خمسية، لا، والله دي خطة ألفية..

السيسي: ربنا يكرمك.

الأب: والله خطة ألفية يا ريس.

السيسي: المهم تكونوا إنتو مبسوطين.

الأب: والله الحمد لله بفضل من ربنا..

الأم: آه الحمد لله بوجودك..

الأب: والله يا ريس طول ما حضرتك موجود.

السيسي: (للابن الأكبر) كتر خيرك يا عبد الله متشكر.

الأب: يا باشا ده إنت نورت النهارده ونورت بني سويف كلها، ونيابة عن أهلي قرية سدس الأمراء، إحنا بنرحب بسعادتك، بنرحب يعني، يعني مهما نقول كلمات يعجز اللسان والله عن ترحيبنا

السيسي: ربنا يبارك فيك.

الأب: والله ربنا يسترها عليك يا ريس..

الأم: شكرًا على زيارتك الجميلة دي، والله ده حلم والله..

السيسي: لا لا لا..

الأب: ربنا يقويك ده شرف لينا يا ريس، والله يوم تاريخي لينا، يوم تاريخي لينا والله يا ريس، يوم تاريخي لينا.

السيسي: طب ما إحنا ها تتغدوا معانا؟

الأب: يا باشا ده حضرتك اللي ها تتغدى معانا النهار ده.. يا باشا والله هدية بسيطة، هدية بسيطة مني يا ريس.. يا ريس، لا لا، حضرتك ها تتغدى معانا يا ريس.. حضرتك اللي تتغدى معانا، لقمة على ما قسم والله..

السيسي: لا الموضوع مش كدا والله..

الأب: هدية بسيطة يا ريس مني، (يعطيه سبحة هدية) والله لو عاملين حسابنا كنا جيبنا لك حاجة تليق بمقام سعادتك، ربنا يسترها عليك يا رب، ربنا يسترها عليك يا ريس.. (يقبله الرجل على كتفه) ربنا يسترها عليك يا ريس، تشريفة عظيم لينا والله.

الأم: حضرتك شرفتنا خالص.. حضرتك شرفتنا ونورتنا

السيسي: متشكر، متشكرين.. طب أسلم على الناس؟

الأب: اتفضل يا ريس، اتفضل يا ريس، اتفضل.

الأم: اتفضل.

السيسي: (من شرفة المنزل إلى الأهالي بالشوارع) سلامو عليكو.. سلامو عليكو.. سلامو عليكو.. كل سنة وإنتو طيبين.. (هتاف عال من أحد الأهالي) طب على مهلك بس على مهلك (يبتسم الرئيس).. سلامو عليكو..

(الرئيس ينزل من العمارة)

الأب: نورت الدنيا والله يا ريس، نورت الدنيا.

السيسي: سلامو عليكو..

الأب: نورت الدنيا يا ريس..

الأب: شرفتنا يا ريس..

السيسي: سلامو عليكو..

الأب: عليكم السلام ورحمة الله وبركاته.

الأم: شرفتنا يا ريس..

الأب: والله العظيم كتر خيرك..

الأم: شرفتنا.. ألف شكر على الزيارة الجميلة دي.. يا رب يخليك..

السيسي: متشكرين..

الأم: ألف شكر والله على الزيارة الحلوة دي..

السيسي: متشكر جدًا..

الأب: شرفتنا يا ريس.. ما تقلقش يا باشا إحنا مع سعادتك أهو، مع سيداتك أهو.

الأم: إحنا لينا الشرف يا ريس.

الأب: لينا الشرف يا ريس.

الأم: إن إحنا نتغدى مع حضرتك.

السيسي: أهلًا وسهلًا.. أهلًا وسهلًا..

(الرئيس يصل إلى الشارع)

أحد الأهالي: نورت محافظة بني سويف كلها.. أقسم بالله نورت محافظة بني سويف كلها، وربنا ما يحرمنا منك أبدًا..

السيسي: متشكر..

أحد الأهالي: إنت البركة بتاعتنا.

السيسي: ربنا يبارك فيك.

أحد الأهالي: بتاع الدولة دي، إنت اللي حييتها، إنت اللي حييتها..

السيسي: ربنا يكرمك، ربنا يكرمك، متشكر.

أحد الأهالي: وما نتحرمش منك أبدًا يا سعادة الريس.. شرف كبير قوي ليا..

السيسي: تعالى.. ماتيجي بقى (يأخذان صورة معًا)

إحدى الأهالي: (من إحدى الشرف بالأعلى) يا ريس! يا ريس! يا ريس!

السيسي: (ينظر لها الرئيس) طب حاضر.. فين؟ حاضر، أنزل لك ولا أطلع لك؟

إحدى الأهالي: لا احنا ننزل لك.

السيسي: طب تعالي... (لأحد الأهالي بشرفة أخرى) بتقول إيه؟ خلي بالك بس، خلي بالك.. خلي بالك منه، امسكه كويس.. بتقول إيه؟

السيسي: (يسلم على عدد من الأهالي) أهلًا وسهلًا، أهلًا وسهلًا، متشكر، نتصور، تعالى إنت كمان، تعالى، تعالي، تعالى.. (لأحد الأطفال) تعالى ماتتكسفش، تعالى يا حبيبي، تعالى،  مبسوط؟

(دعوات من الأهالي للرئيس)

(هتافات من الأهالي)

---

(افتتاح المرحلة الأولى لمبادرة حياة كريمة ببني سويف)

السيسي: سلامو عليكو.. سلامو عليكو..

اسمحوا لي بس قبل ما نبدأ إن إحنا، من فضلكم يعني، نقف دقيقة حداد على أبناءنا و.. اللي فقدوا في ليبيا.. فنقف دقيقة حداد لو سمحتو...

اتفضلوا استريحوا.. اتفضلوا استريحوا.. (تصفيق)

---

تم اللقاء  بأهالي قرية سدس الأمراء، إحدى قرى حياة كريمة، بمحافظة بني سويف، حيث التقى الرئيس بالأهالي، وشاركهم مأدبة الغداء، وحضر افتتاح المرحلة الأولى لمبادرة حياة كريمة لتطوير محافظة بني سويف.