نص كلمة الرئيس السيسي خلال افتتاح مسجد السيدة نفيسة بعد أعمال التطوير 8/8/2023

بسم الله الرحمن الرحيم،

جلالة السلطان، برحب بيك، برحب بيكو أهلًا وسهلًا، برحب بيكم.. واسمحوا لي بالـ.. بالمناسبة الجميلة ديت، بافتتاح التجديد اللي اتعمل في مسجد السيدة نفيسة وفي المقام الكريم الـ.. وده الحقيقة أولًا لازم نشكركم على.. دائمًا.. تواجدتكم ومساهمتكم في أضرحة آل البيت.

إحنا كنا من شهور قليلة في سيدنا الحسين، والنهار ده في السيدة نفيسة، وإحنا متحركين أيضًا في إن إحنا الـ، نكون أنجزنا السيدة زينب كمان. إحنا فتحناها في رمضان للصلاة، لكن نفس الإجراء اللي بيتعمل هنا بيتعمل هناك.

والحقيقة اللي بيتعمل ده في إطار خطة الدولة المصرية بتعملها للقاهرة التاريخية، عشان نستعيد، يعني، مكانة مصر في هذا المقام الـ، التاريخي العظيم، في القاهرة التاريخية.

 ويمكن إحنا متحركين جايين هنا، شغالين دلوقتي في، في مناطق زي عرب اليسار، ومناطق أخرى، الهدف منها وزي ما عملنا كدا في منطقة مجرى العيون، وغيّرنا الواقع الصعب اللي كان موجود، فإحنا متحركين في إطار خطة نتمنى من الله سبحانه وتعالى إن هو يوفقنا فيها.

لكن النهار ده تحديدًا موجود جلالة السلطان و.. العائلة، والمرافقين ليه.. آآ.. بنتشرف.. بنتشرف إن إحنا موجودين هنا في مقام طيب وكريم، مقام السيدة نفيسة، وزي ما إنتم شايفين، اتعمل المسجد واتعمل المنطقة المحيطة، وأيضًا الضريح الكريم.

فـ.. ربنا يا رب يعينا إن إحنا نكمل ما بدأناه، ويتقبل منا اللي إحنا بنعمله ويعينا عليه.

مرة تانية برحب بيكو وبشكرك دايمًا، وسعيد دايمًا إن أنا ألتقي بجلالتك في زيارتك لمصر، وبشكرك شكر جزيل باسمي وباسم كل المصريين، وباسم كل المسلمين على مساهمتكم الجميلة اللي دايمًا بتبقى عنوان للمحبة والمودة.

 وهنا مش ها أنسى أقول إن إحنا في مصر، يعني طائفة البهرة اللي موجودين، هم عايشين وسط أهلهم في مصر بمنتهى الود ومنتهى الاحترام ومنتهى التقدير، وأتصور الناس اللي موجودين، يعني شايفين ده وحاسين بيه، مش مني أنا، ومش بس كدولة مهتمة بكدا، لكن بوسط الشعب المصري يعني.

مرة تانية برحب بيك، وسعداء جدًا إن إحنا اليوم الكريم ده والجميل ده إن إحنا موجودين هنا في مقام كريم، نتمنى من الله سبحانه وتعالى إنه يفيء علينا وعلى مصر بالخير والبركة ويعينا على كل طيب. شكرًا جزيلًا. السلام عليك ورحمة الله وبركاته.

ألقيت الكلمة في مسجد السيدة نفيسة بالقاهرة، بحضور السلطان مفضل سيف الدين، سلطان طائفة البهرة بالهند، والدكتور مصطفى مدبولي رئيس مجلس الوزراء.