نص تعليق الرئيس السيسي على الطلاب خلال تفقده الجامعة التكنولوجية ببرج العرب 14/6/2023
5:07
أحد الطلاب: أهلا بيك سيادة الريس، أنا الطالب فهد الدين عبد الغني، طالب بكلية التكنولوجيا..
السيسي: مهدي؟
أحد الطلاب: فهد الدين عبد الغني، طالب بكلية التكنولوجيا والمعدات الزراعية، قدرنا بالمقررات بتاعتنا إن إحنا نتعرف على كيفية طرق الري، وكيفية طرق اللاند سكيب وعمل مشاريعها، وكيفية صيانة المسطحات الخضراء، وبالطريقة ديت قدرنا إن إحنا نتعرف على أجزاء المحرك، وعرفنا إن إحنا نفكها ونصين أجزاءها كلها بالكامل. وإن إحنا إن شاء الله نطور حاجة حديثة، ونعرف نتعامل مع أحدث الطرق إن شاء الله في فك وصيانة كل الجرارات لمواكبة سوق العمل بإذن الله.
السيسي: يعني إنتو شغالين في ده وشغالين في ده، مش كدا؟
أحد الطلاب: آه.. والمشاريع دي إحنا اللي قمنا بفكها كلها بـ..
السيسي: ده مهم قوي دلوقتي لأن حجم الـ.. جنب منكو هنا في وادي النطرون ومستقبل مصر، في جنب منكم مئات الآلاف من الأفدنة ها تبقى محتاجة ميكنة زراعية..
أحد الطلاب: بإذن الله.
السيسي: ومحتاجة إن إحنا يبقى في عندنا ورا منها آآ التأمين الفني الخاص بيها، يعني ده، ده فرصة كويسة قوي.
أحد الطلاب: بإذن الله.. تسلم، شكرًا لحضرتك جدًا.
السيسي: (لطالب آخر) نعم؟
أحد الطلاب: (...) باستخدام الطاقة الشمسية عشان نوفر تكلفة توصيل خطوط الكهربا، قدرنا إن إحنا نعمل استهلاك طاقة شمسية.
السيسي: بالنهار بس، مش كدا؟ بالنهار بس.
أحد الطلاب: لا بنشتغل بيها ليها وحدات تخزين بتشتغل كتخزين طاقة في الوقت اللي العملية مش دايرة فيه.
السيسي: بطاريات يعني.
أحد الطلاب: آه.
...
6:36
إحدى الطالبات: برحب بسيادتك.
السيسي: أهلًا وسهلًا.
إحدى الطالبات: أنا (اسم غير واضح) جامعة تكنولوجيا برج العرب، كلية صناعة وطاقة، قسم سكة حديد. بقدم لحضرتك ده المشروع بتاعنا، ده عملنا محاكاة ما بين الواقع اللي إحنا بندرسه، دي بندرس مادة مسارات السكة الحديدية ومسارات منظومة الفرامل، فعشان الطلبة يعني يعرفوا يشتغلوا ما بين النظري والعمل، بدأنا إن الطلبة يبدأوا فعلًا يشتغلوا على منظومة الفرامل إن إحنا نشغلها. وكمان عملنا إن إحنا نعمل نعدل على منظومة الفرامل بالتحكم الإلكتروني، موجود.. موجود هنا.
السيسي: طيب، أنا بس عايز أقول كل الكلام ده، الشق اللي أنا شوفته هنا ده، ده يعني إحنا شغالين في.. برنامج كبير جدًا جدًا مع وزارة النقل، ومع الزراعة، فيعني يا ريت يبقى في تواصل ونشوفوا الـ.. كدا.
...
ألقيت الكلمة في مدينة برج العرب بمحافظة الإسكندرية، حيث قام الرئيس عبد الفتاح السيسي بجولة تفقدية للجامعة التكنولوجية، واستمع لتقديم الطلاب لمشاريعهم.
...