نص تعليقات الرئيس السيسي خلال تفقده لأعمال تطوير عدد من الطرق والمحاور بالقاهرة الكبرى 16/6/2023

https://www.youtube.com/watch?v=K7w6MtJU1sA

0:59

السيسي: ده عمل كبير قوي وعظيم.

مهندس 1: تمام سيادتك يا فندم.

السيسي: هه، طمني أنا جيت قبل كدا من شهر، فقالوا لي شهر 8، قلت معقول؟

مهندس 1: تمام يا فندم.

السيسي: ها؟

مهندس 1: إحنا يا فندم سيادتك مشرفنا في كوبري، كوبري طه حسين يا فندم.

السيسي: آه.

مهندس 1: يربط كوبري طه حسين يا فندم محور ياسر رزق مع اللواء صلاح الشاذلي يا فندم والأوتوستراد. طول الكوبري يا فندم 900 متر، يتراوح عرض الكوبري يا فندم 29 متر حتى 32 متر في أماكن الربط يا فندم. 4 حارة مرورية في كل اتجاه. ارتفاع الكوبري يا فندم 50 متر. سيادتك يا فندم إحنا عندنا هنا في الكوبري 4 تحديات. أول تحدي يا فندم تنفيذ الأساسات العميقة، فنفذنا بأكبر مكن لتنفيذ الأساسات العميقة في المقاولين العرب، 4 مكنات أكبر المكن يا فندم لتتنفيذ الأساسات العميقة. تاني تحدي يا فندم واجهنا الأعمدة، ارتفاع العمود يا فندم يصل لـ50 متر، فاستخدمنا الشدادات الخاصة لتنفيذه. تالت تحدي يا فندم الفريم، تنفيذ الفريمات، استخدمنا الفريم يا فندم على ارتفاع 50 متر، استخدمنا الشدة الطايرة. رابع تحدي يا فندم وده الأخير، رفع الكمر الخرسانة والكمر المعدني يا فندم. طبعا يا فندم هنا وزن الكمرة يتراوح ما بين 100 طن، من 100 لـ120 طن يا فندم. فرفعناها هنا على ارتفاع 50 متر، فاستخدمنا يا فندم أوناش كبيرة جدًا زي الونش اللي موجود في الموقع يا فندم بيتفك..

السيسي: ويتركب.

مهندس 1: أيوة تمام يا فندم. ونش 800، عشان نقدر نرفع الكمرة..

السيسي: عشان عالـ50 متر.

مهندس 1: عشان نقدر نرفع يا فندم على الـ50 متر يا فندم. عندنا يا فندم هنا الموقف التنفيذي للمشروع. إحنا يا فندم نفذنا نسبة التنفيذ للمشروع 92%، فإحنا يا فندم ملتزمين بأعلى معايير ضبط الجودة لتنفيذ المشروع ونخرجه إن شاء الله يعني على أعلى ما يكون يا فندم.

السيسي: طب إنتو التحميل ها تحطوا تحميل وزنه قد إيه هنا؟ يعني إنتو ها تعملوا تجربة التحميل تجربتين...

مهندسة 2: تم عمل تجارب التحميل بناء على تعليمات سيادتك. إحنا عندنا جبنا جامعتين، جامعة القاهرة وجامعة عين شمس، أكبر الجامعات اللي بتقوم بضبط الجودة والتشيك، عمل تشيك على الكوبري. وإن شاء الله بإذن الله طبقًا لضبط الجودة اللي إحنا شغالين عليها، حضرتك إحنا عاملين تعاقد مع 3 معامل خارجيين بالإضافة للمعامل الرئيسية بتاعة المقاولين العرب، لأن ده عمل فريد وعمل عظيم وما نقدرش إن إحنا ما نديلوش أكتر من كدا حقه في المعايير. فإحنا متعاقدين مع 3 معامل بالإضافة للمعامل الرئيسية بتاعتنا. كل عربيات الخرسانة بيتم عمل عليها مراقبة جودة من قبل ما تخرج من المعمل لأن الارتفاع شديد في درجات الحرارة، بيتم قياس درجة الحرارة قبل الصب، الحديد بيتعمل اختبارات على كل عربية حديد بتيجي بناخد عينات من كل باتشة وبنعمل اختبارات الحديد، الباكية المعدني اللي هي أكبر باكية متنفذه دلوقتي أخدنا منها عينات من كل الصاج بتاعها من كل ممبر، عملنا عليه اختبارات...

السيسي: طيب.. إحنا على كل حال يعني أنا مطمن، لكن إحنا بنعمل ده لينا وللـ، يعني، بدل ما نخلي الناس تتحرك وتبقى حـ.. طبعا هنا ها يبقى في بيتحرك عربيات كتير وتريلات وكلام من ده..

مهندسة 2: تمام.

مهندس 1: طبعًا يا فندم تمام يا فندم.

السيسي: فما دام اتطمنا إن الـ، الـ، التحميل اللي إحنا عملناه، التجربتين...

مهندسة 2: تمام.

مهندس 1: تمام سيادتك، تجربة إن شاء الله يا فندم قبل عيد الأضحى، وتجربة بعد عيد الأضحى يا فندم.

السيسي: تجربتين مش تجربة واحدة.. زي ما اتفقنا يعني.. طب إحنا عايزين نتحرك نروح نعدي على كوبري كوبري.

...

السيسي: إنتو مرتبين موضوع التجربة ده؟

مهندس 3: آه يا فندم مع جامعتين، جامعتين مصريتين جامعة عين شمس وجامعة القاهرة، ها نعمل باكية، تجربة تحميل على أكبر باكية عندنا الباكية المعدنية اللي هي الـ65 متر، وعندنا ها نعمل تجربة تحميل على باكية خرسانية، عشان يبقى كدا عملنا تجارب على نوعين من الخرسانات.

السيسي: طيب.. طيب السؤال ده أنا بسأله دايما يا إيهاب ليكو كلكو يعني.. يخلص بخير.. إحنا إيه اللي ممكن نعمله تاني.. إحنا هنا خلينا المقطم رابط مواصلات مصر، هه؟

مهندس 4: أيوة يا فندم.. أيوة يا فندم.

السيسي: لا صحيح؟

مهندس 4: أيوة والله يا فندم القاهرة الكبرى بالكامل واللي جاي من محافظات كمان كله ها يبقى في الاتجاه ده عشان يوصل لأي مكان في القاهرة الكبرى.

السيسي: النهار ده الناس كانت مستغربة قوي إحنا ليه بنعمل مجموعة المحاور الكبيرة زي آآ ياسر رزق، عبد المجيد محمود، شارع 9.. مش كدا؟

مهندس 4: عبد المجيد محمود يا فندم، هو كان المقطم يا فندم الأول فيه شارع 9 بس. دلوقتي في المقطم في 4 محاور. عبد المجيد محمود سيادتك واصل من شارع 9، بيوصل لمحور ياسر رزق، ويوصل لطريق صلاح سالم، وبيوصل للطريق الدايري، وبييجي هنا يا فندم عشان نعدي بيه أعلى طريق الأوتوستراد، وبنوصل بيه سيادتك للمرحلة اللي بعدها اللي سيادتك يعني بتسألنا فيها دلوقتي، إنه كوبري العاشر نفسه والمنطقة التقاطع هناك مع النيل ها تطور بالكامل، كوبري العاشر ها يتوسع، وها يبقى في رامب نازل في اتجاه التحرير واتجاه وسط البلد، ماكانش الكلام ده موجود قبل كدا، وها يتعمل كوبري في التقاطع اللي هو جنب بنزينة التعاون هناك سيادتك عشان الحتة العقدة هناك اللي هي كانت زحمة جدًا، حتة مقفولة، تمام يا فندم ديت. سيادتك أمرت يا فندم إحنا كوبري عاشر ما نشتغلش فيه إلا بعد امتحانات الثانوية العامة عشان ما نعملش مشكلة بالتنسيق مع الإدارة العامة للمرور، إن إحنا عاملين محاور تبادلية بعد كدا كمان، بس عشان بعد الثانوية العامة ها نبدأ نشتغل فيه سيادتك. فاللي ها يتعمل بقى ده يا فندم اللي هو المنطقة اللي بعدها على طول، كوبري العاشر، ها يوصل لغاية كورنيش النيل، ها يتوسع الكوبري لغاية كورنيش النيل كدا. سيادتك المحور التاني اللي هو شارع 9 تم تطويره بالكامل يا فندم، واتعمل امتداد ليه يربط مع محور ياسر رزق ويوصل لهنا، ومنه بردو لطريق صلاح سالم والاوتوستراد والطريق الدايري ومحور حسب الله الكفراوي ومن حسب الله الكفراوي سيادتك ها يوصل لغاية طريق الأوتوستراد وسيادتك أمرت إن إحنا حاليًا بدأنا ننفذ استكمال المحور، ها يمشي لغاية المعادي وأعلى المعادي بكوبري يوصل لغرب النيل، وبعدين في مرحلة تانية بندرسها ونعرضها على سيادتك نوصل لغاية الطريق السياحي سيادتك للطريق الدايري. سيادتك المحور اللي بعده اللي هو المحور التالت، اللي هو محور الكورنيش، اللي هو موجود فوق يا فندم، فوق هناك باين سيادتك اللي هو فوق ده، ده محور قديم وكان موجود وكان متهالك وكان فيه مشاكل كبيرة جدًا، الأرض كانت بيتعمل فيها أعمال صناعية سيادتك أمرت بيها مهولة جدًا. بقى محور تالت. المحور الرابع محور ياسر رزق اللي هو تحت سيادتك. فالكلام ده كله ما كانش موجود في المطقم، هو كان طريق واحد، الكلام ده فك العقدة اللي موجودة في المقطم، وخلى اللي جاي من الصعيد، اللي جاي من القاهرة الجديدة، اللي جاي من العاصمة الإدارية الجديدة، اللي جاي من منطقة المعادي، اللي جاي من بعد كدا لما نعمل الكوبري الجديد اللي في منطقة المعادي الي أعلى النيل، اللي جاي من طرق الصعيد كلها واللي جاي من الطريق السياحي وبيخدم على المتحف المصري الكبير.. كل الكلام ده يقدر يوصل من هنا لهناك بدون المرور الطرق اللي هي القديمة كلها، والطريق الدايري خفينا الحمل عنه تمامًا في المناطق دي كلها. فسيادتك دي مشروع متكامل مع الناس كلها. واتعمل على الطريق الدايري يا فندم بالتعاون مع وزارة الإسكان ووزارة النقل طبقًا للدراسة اللي كانت معروضة على سيادتك متكاملة عدة محاور، بتعدي الدايري نفسه بحيث أحل المرور عالدايري، زي محور عمرو بن العاص، محور الفريق كمال عامر، محور السكة الحديد أو طريق السكة الحديد اللي هو موازي لطريق الأوتوستراد اللي موجود هنا. دي كلها يا فندم شبكة طرق متكاملة، الدولة كلها بتشتغل فيها، الهيئة الهندسية مع وزارة النقل مع وزارة الإسكان، حلت المشكلة للقاهرة الكبرى، مش القاهرة الكبرى لوحدها، واللي جاي من خارج القاهرة الكبرى سواء الوجه البحري أو مدن القناة أو الصعيد إن هو يوصل...

السيسي: يعني المحافظات.. المحافظات..

مهندس 4: المحافظات بالكامل، الدولة بالكامل يا فندم.

السيسي: طيب بردو السؤال لسه قائم: إيه اللي إنتو شايفينه ممكن يتعمل هنا وإحنا ما عملناهوش، يا أحمد؟

مهندس 3: هو يا فندم إحنا كل اللي درسناه هنا عرضناه على سيادتك وابتدينا فعلًا نشتغل فيه..

السيسي: آه..

مهندس 3: يعني سواء كان كوبري العاشر أو اليوتيرن الرابط مع محور الجزائر، أو كل المناطق ديت، سيادتك صدقت لنا بيها واشتغلنا بيها على طول يا فندم.

السيسي: مصطفى..

مهندس 1: تمام يا فندم..

السيسي: ها؟

مهندس 1: يا فندم إحنا عملنا هنا في المنطقة كل اللازم يا فندم بداية من محور الحضارات سيادتك، حتى انتهاءً بكوبري طه حسين يا فندم.

السيسي: طب السؤال ما زال قائم، والسؤال ما زال قائم يا إيهاب.

مهندس 4: أوامر يا فندم

السيسي: لو إنتو في حاجة تانية ها تخلي الحركة داخل القاهرة وبين القاهرة والمحافظات للي اتعمل هنا.. الناس كانت مستغربة قوي إن إحنا، يعني، عشان كدا إحنا سميناه طه حسين..

مهندس 4: تمام يا فندم.

السيسي: عشان الناس تعرف إن إحنا مقدرين جدًا جدًا..

مهندس 4: أيوة يا فندم.

السيسي: لناس يعني عظماءنا يعني..

مهندس 4: طبعًا يا فندم.

السيسي: فإحنا سميناه عشان المقبرة إنتو حطيتوها تحت الكوبري، مش كدا؟

مهندس 3: آه يا فندم وعملنا لها رفع كفاءة و...

السيسي: آه.. فإحنا ها نسميه، أو نسميه طه حسين، الدكتور طه حسين، الكوبري دوت..

مهندس 4: أيوة يا فندم كوبري الدكتور طه حسين.

السيسي: آه.. كدا يعني.. لكن أنا بقول لكو تاني، وإحنا بنعمل ده، إنتو في دراسة مستمرة، ونفس الكلام يا مهندسة هبة.

مهندسة 2: تمام يا فندم.

السيسي: آه المقاولين العرب لو في حاجة إنتو شايفينها إحنا في النهاية بنعمل إيه؟ الناس اللي بتشتغل ديت، إحنا بنغير حياة الناس في مصر، إنتو، إنتو.. مين اللي بيعمل؟ (يشير إلى العمال) إنتو.. أنا بشكركو..

أحد العمال: إحنا اللي بنشكرك بالزيارة اللي حضرتك نورتنا بيها النهارده.

السيسي: ده إنتو اللي منورينا، بس إحنا جايبينكو الجمعة يعني مش كدا؟ (يضحك الرئيس)

مهندس 4: الشغل يوم الجمعة بيصلوا وبيشتغلوا، شغل 24 ساعة يا فندم.

السيسي: بس خلي بالكو، ده نفع كبير للناس، أنا عارف أنا جيت مرة قبل كدا هنا، وبعدين كان لسه رئيس آآ ما كنتش لسه صبيت البلاطات يعني.. أنا عايز أقول لكو على حاجة.. أكتر حاجة ترضي ربنا إنك تعمل حاجة تسعد بيها الناس، وتريح بيها الناس. فإنتو آه بتشتغلوا طول ما.. بناخد أجر يعني على كدا، آه ماشي، ما إنت ممكن تاخد أجر وتئذي يعني، ممكن نديك أجر وإيه؟ وتخرب يعني. مش كدا يا إيهاب؟

مهندس 4: ايوة يا فندم.

السيسي: ده أجر إيه، أجر نفع، هه؟

أحد العمال: بنشوف حضرتك دايما بتلف كل يوم جمعة في مشاريع مختلفة في الشوارع دي حاجة تبسطنا، ده يخلينا نشتغل بروح عالية، ماشي، وحاجة بجد يعني شرف لينا وحاجة تبسطنا والله يا فندم.

السيسي: ربنا يديكو الصحة.

أحد العمال: الله يخليك معالي الريس.

السيسي: مش عايزين حاجة؟ (أصوات متداخلة) صحيح؟ (أصوات متداخلة) ما إحنا متصورين آهو.. تعالوا..

 ...

10:56

مهندس 5: سياتك صدقت يا فندم على تطوير منطقة كورنيش النيل وتطوير كوبري العاشر لربط لنقل لنقل السكان مناطق المعادي وزهراء مصر القديمة ومنطقة مصر القديمة إلى مناطق من المقطم ومدينة نصر، وده ها يكون من خلال شارع الفسطاط، ثم كوبري الدكتور صلاح الشاذلي، ثم كوبري الدكتور طه حسين، وصولًا إلى محور ياسر رزق إلى منطقة الأسمرات ومنطقة المقطم، أو استكمالًا بمحور سميرة موسى وصولًا إلى مناطق القاهرة الجديدة ومدينة نصر. التطوير ده يا فندم ها يكون عبارة عن تطوير أعمال الطرق وإجمالي الأعمال يا فندم ها يكون إجمالي أعمال بطول 6 كيلو 350، الأعمال الصناعية كباري كيلو 600 والطرق السطحية 4 كيلو 750. بالإضافة لكدة يا فندم ها يتم تطوير طريق كورنيش النيل بعرض 5 حارة مرورية لكل اتجاه، بدءًا من منزله عالدايري وحتى قسم مصر القديمة بطول كيلو و100، وها يتم تطوير طريق دار السلام بعرض 4 حارة مرورية لكل اتجاه بدلًا من 2 بطول 2 كيلو 400.

السيسي: يعني إحنا ها نشتغل كام ساعة في اليوم؟

مهندس 4:  24 ساعة في اليوم.. 24 يا فندم..

السيسي: علشان نخلص بسرعة يعني.

مهندس 5: تمام يا فندم.

السيسي: بصوا على المكان اللي إنتو فيه، إحنا موجودين دلوقتي هنا، ها نحاول نحسن ما أمكن، ما تترددش أبدًا في إنك تقول إيه، طب الوصلة دي نعملها. متشكرين.

...

12:22

مهندس 6:  (...) أعمال إنشاء وتطوير محاور جنوب القاهرة، سيادتك صدقت على إنشاء محور حسب الله الكفراوي، مرحلة أولى بطول 6 كيلو متر، وابتداءً من تقاطعه مع محور حسب الله الكفراوي ومحور محمد عزت عادل بمنطقة زهراء المعادي، وانتهاءً بتقاطعه مع طريق أسوان الزراعي الغربي نهاية المرحلة الأولى يا فندم. المحور يا فندم يتضمن إنشاء عدد 5 كوبري لتحرير الحركة المرورية بإجمالي أطوال 3.8 كيلو متر، الكوبري الأول يا فندم بالتقاطع مع محور حسب الله الكفراوي ومحور محمد عزت عادل بطول 500 متر وبعرض 4 حارة مرورية لكل اتجاه. الكوبري تقطاع مع طرق الاوتوستراد، كوبري مرور أعلى مسار المترو بطول 800 متر وبعرض 4 حارة مرورية لكل اتجاه...

بعض الأطفال: سيسي.. سيسي.. سيسي (يشير لهم الرئيس بيده)

مهندس 6: كوبري بطول 1500 متر وطول مجرى نهر النيل، وبعرض 6 حارة مرورية لكل اتجاه، كوبري تقاطع مع طريق أسوان الزراعي الغربي بطول 500 متر وبعرض 5 حارة مرورية لكل اتجاه. المحور يا فندم بيربط القادم من مناطق غرب النيل وجميع محافظات الصعيد بجميع مناطق القاهرة...

السيسي: هنا بقى.. ده المجرى السيل مش كدا؟

مهندس 4: ده مقر السيل يا فندم. المنطقة دي بالكامل ها تتكسى وها يستغل الكلام المجرى ده لازم نحافظ عليه عشان كان..

السيسي: يعني ها تبطنوه، ولا إيه؟

مهندس 4: ها يتبطن، أيوة يا فندم، ها يترفع كفاءته على وضع التبطين، ورفع كفاءته على وضعه، واستغلال الأجناب بتاعته.

السيسي: يبقى إحنا قلنا الأجناب دي ها تبقى ممشى. خلاص يبقى المنظر بقى...

مهندس 4: تمام سيادتك..

السيسي: مش كدا؟

مهندس 4: تمام يا فندم.

السيسي: يبقى كدا ولا كدا إنتو ها تبطنوا المجرى ده يبقى إحنا ها نحافظ عليه لإن هو ده في الآخر بيرمي في النيل.

مهندس 4: بيرمي في النيل يا فندم وبيحمي مناطق كتير، لو حصل...

السيسي: بس.. فإحنا ها نبطنه..

مهندس 4: تمام أيوة يا فندم.

السيسي: يعني ها نحترمه أقصد.

مهندس 4: تمام يا فندم أيوة.

السيسي: لكن خلينا نـ إيه، نستفيد منه بقى لأن هو، آآ..

مهندس 4: (كلمة غير واضحة) حاضر يا فندم.

السيسي: آه، كدا يعني.. ممشى هنا..

مهندس 4: ممشى هنا وممشى الجنب التاني..

السيسي: وممشى هنا.

مهندس 4: تمام سيادتك.

السيسي: متشكرين يا علي.

مهندس 6: العفو يا فندم.

...

ألقيت الكلمة في القاهرة، حيث تفقد الرئيس أعمال تطوير عدد من الطرق والمحاور بالقاهرة الكبرى، من بينها محور المستشار عبد المجيد محمود، وكوبري طه حسين، وذلك أمام المهندسين المشرفين على المشروعات وعدد من العمال.

...