نص حديث الرئيس السيسي خلال تفقده دار المسنين والوحدة الصحية ومركز الخدمات بقرية الأبعادية 14/6/2023

السيسي: سلامو عليكو.. منورين الدنيا كلها.. خلي حضرتك مستريح.. على مهلك، على مهلك، اتفضل.. عاملين إيه؟ اتفضلوا استريحوا.. عاملين إيه؟ إزيك يا حاجة، وإزاي صحتِك؟ خليكو مستريحين، خليكو زي ما إنتو، عاملين إيه؟ (دعوات من المسنات) ويكرمكوا ويخليكو لينا، ويخليكو لينا، الله يخليكي، إنتو اللي منورين الدنيا، وإحنا عايشين ببركتكو، آه والله، (صوت غير واضح من المسنات) ليه ليه؟ مبسوطين هنا؟ معقول الحياة اللي هنا؟ كل حاجة تمام أنا جاي عشان أطمن عليكو.. إزيك يا حاجة؟ إزاي صحتك؟ دايما بخير وسلام.. طمنوني عليكو.. طمنوني عليكو.. (صوت غير واضح من المسنات) ما شاء الله.. اللهم آمين يا رب، اللهم آمين يا رب.. مش عايزين حاجة؟ تحت أمرك؟

إحدى المسنات: نفسي نزور النبي.

السيسي: عليه الصلاة والسلام.

إحدى المسنات: والله نفسنا نزور النبي.

السيسي: يضحك الرئيس حاضر.. هه؟ أو؟

إحدى المسنات: أو حج.

السيسي: يعني إنتي عمرة أو حج.

إحدى المسنات: يعني اللي يطلع من زمتك.

السيسي: (يضحك الرئيس)

إحدى المسنات: والله العظيم بنشوفك بتعمل حاجات ياما يعني، والله بتطلع حاجات في التلفزيون، أنا بنحب ال.. وكان نفسي والله نسلم عليك ونشوفك..

السيسي: أهلًا وسهلًا، أهلًا وسهلًا.. ربنا يخليكي.. حاضر.. عينينا حاضر.. تحت أمركو.. مش عايزين حاجة تاني؟ طب ما تنسوناش من الدعوات الطيبة.

إحدى المسنات: نعم؟

السيسي: ما تنسوناش من الدعوات الطيبة.

إحدى المسنات: ربنا يكرمك ويديك الصحة... (دعوات من المسنات)

السيسي: (دعوات من المسنات) اللهم آمين.. اللهم آمين يا رب، اللهم آمين.. اللهم آمين يا رب. كل سنة وإنتو طيبين. وعايزين نزور النبي عليه الصلاة والسلام (يضحك الرئيس) هه.. (دعوات من المسنات) آمين يا رب العالمين، آمين يا رب العالمين، إن شاء الله. متشكرين. سلامو عليكو.

...

مدير الوحدة الصحية: في عندنا خدمات طبيب الأسرة، خدمة الأخصائي في تخصصات الباطنة والأطفال، وعندنا كمان بالإضافة لهذه التخصصات عندنا الأشعة والمعامل والتحاليل، وموجود عندنا كمان يا فندم هنا عيادتين متميزتين، عيادة لكبار السن، وعيادة كمان لذوي الهمم، بالإضافة عندنا مكتب خدمة الرعاية الأساسية. عندنا مبادرة تطوير الرعاية الأساسية، موجودة في 251 مركز، محافظة البحيرة منهم 16، الـ16 دول كان مرحلة أولى، ديت أول مكان أخش فيه في المرحلة التانية، واللي إن شاء الله عايزين 3 وحدات في كل إدارة صحية، على أساس إن إحنا نوصل لـ450 مكان موجودين هنا في محافظة البحيرة. إحنا عندنا 173 مكان عندنا ما بين إنشاء جديد، تطوير شامل، رفع كفاءة خفيف. إن شاء الله يا فندم هنا المكان بيخدم 37 ألف مواطن، موجود هنا القرية الأم والوحدات الرئيسية، وإن شاء الله يبقى ده المكان باكورة الدخول في منظومة التأمين الصحي الشامل اللي ها يبقى الحلم وهيبقى هدية سيادة الريس لمحافظة البحيرة إن شاء الله.

السيسي: وإحنا هنا 37 ألف اللي حضرتك ذكرتهم دول، في عندنا بياناتهم ومتحملة على الحواسب، ولا؟ أو حتى على الأقل لينا أرشيف، مأرشفينهم ولا لأ؟

مدير الوحدة الصحية: موجودين هنا يا فندم، إحنا عندنا المواطن لما بيخش هنا بيخش هنا على مكتب إدارة الحالة، دهب يجيب الملف بتاع كل أسرة موجود فيها العدد بتاعها بالأفراد بتوعها، بياخد الملف دوت وبيطلع فيه على العيادة المطلوبة وكلام من ده، الدكتور بيكتب الحاجة اللي موجودة، وبينزل الحاجة دي كمان تتحط في الملف بتاعه، ويبقى موجودين عندنا داتا صحية محدثة لكل الناس. بيبقى عندنا كل وحدة صحية مربوط عليها عدد من الأسر والأفراد، إحنا عندنا عدد الأسر اللي مربوطين هنا على الوحدة إن شاء الله تقريبا 6000 أسرة.

السيسي: بـ37 ألف.

مدير الوحدة الصحية: بـ37 ألف، إن شاء الله يا فندم.

السيسي: وفي صيدلية وكل حاجة..

مدير الوحدة الصحية: عندنا هنا الصيدلية يا فندم وعندنا هنا الأدوية كلها بتبقى متوفرة بشكل جيد، عندنا هنا الصيادلة موجودين...

السيسي: (للصيادلة) صباح الخير، الأدوية متوفرة ولا؟ بصراحة؟

مدير الوحدة الصحية: إيه العجز اللي عندكو في الأدوية؟

السيسي: لأ صحيح؟

مدير الوحدة الصحية: يا فندم أفخر وأقول لحضرتك إن بالفعل ما عندناش عجز في الأدوية ولما بننزل أي مكان أنا ما بقولهمش عندنا أدوية ولا لأ، بقول لهم إيه العجز عندنا؟ ما فيش صنف عندنا مش موجود إلا وموجود نفس الصنف..

السيسي: أو بديل ليه، أو بديل ليه مش كدا؟

مدير الوحدة الصحية: أو نفس البديل بتاعه، آه، لكن صنف مش موجود خالص الحمد لله مش موجود عندنا. وعندنا هنا في قايمة أساسية للأدوية موجودة هنا في الرعاية الأساسية، دي متوفرة بشكل كامل في جميع وحداتنا الحمد لله.

السيسي: وإنتو عاملين إيه؟ إنتو، إنتو نفسكم كـ، يعني كـ.. بتشتغلوا هنا كأطباء أو صيادلة يعني.. عاملين إيه؟

الصيادلة: الحمد لله.

السيسي: ما فيش أي مقترحات؟ هه؟ (أصوات غير واضحة من الصيادلة) لأ قولوا لي الأول إحنا، أصل إحنا عاملين الكلام ده عشان خاطر الناس، عشان يعني بدل ما يبقى المستشفى الضغط عليها كله، وفي حاجات ممكن المركز هنا يقوم بيها، ويبقى لو احتاج إن إحنا نودي المستشفى، نودي.

مدير الوحدة الصحية: زي ما سيادتك بتوجه يا فندم إحنا لو الخدمات الرعاية الأساسية اشتغلت بشكل جيد قدام المبادرة اللي حضرتك أمرت بيها، ها نقلل الضغط عالمستشفيات بنسبة 70%، وده اللي إحنا ناويين فيه إن شاء الله، إن إحنا نستثمر في الصحة، وليس نستثمر في المرض، إن إحنا الوقاية خير من العلاج. إحنا عندنا هنا المكان هنا في جميع المبادرات، سواء كان مبادرة صحة المرأة، مبادرة الأم والجنين، السمعيات والكشف المبكر على الأورام اللي بدأت يوم الحد اللي فات، عندنا الاعتلال الكلوي والأمراض غير السارية.. ده اللي ناويين إن شاء الله زي ما سيادتك وجهت حتى بالحزم التحفيزية اللي حضرتك عملتها في مبادرة الرعاية الأساسية، الحزم دي عشان يجهز مقدم الخدمة ومتلقي الخدمة لمنظومة التأمين الصحي الشامل اللي إن شاء الله ده المكان ها يبقى أول مكان. إحنا بعتنا من حضرتك هنا 15 من المتدربين عندنا على بورسعيد علشان يشوفو منظومة التأمين الصحي الشامل ييجوا ينقلوها هنا، يبقى المكان ده أول مكان يتم اعتماده في هيئة الاعتماد والرقابة، ويبقى استعداد دخول منظومة التأمين الصحي الشامل، ويبقى المكان ده مكان تميز باقي المحافظة نيجي ندربه هنا علشان ننقل موجات التغيير وموجات التطوير لكل أرجاء المحافظة في الـ173 مكان اللي داخلين حياة كريمة عندنا إن شاء الله.

السيسي: ربنا يا رب يوفقكو، متشكرين.. متشكرين..

مدير الوحدة الصحية: شكرًا لحضرتك يا فندم.

السيسي: متشكرين.

مدير الوحدة الصحية: أي تعليمات يا فندم.. شكرًا يا فندم.

...

مدير مركز الخدمات: (...) الشهر العقاري، البريد المصري، والأحوال المدنية، والوحدة المحلية متمثلة في المركز التكنولوجي والتموين، أكتر من 161 خدمة يا فندم منهم بعض الخدمات بتنتهي وتخلص في نفس اليوم، منهم يا فندم خدمات زي طلبات التوثيق والتوكيلات، في خدمات البريد كلها بتقدم في نفس اليوم. في خدمات صورة طبق الأصل وإفادات بناء على تصريح المحكمة بردو بتستخرج في نفس اليوم. في كمان يا فندم بنتعامل بشفافية ومساواة بين الناس كلها، معانا جهاز ترتيب الدور كل واحد بيقدر ياخد الرقم بتاعه وينتظر في أماكن الانتظار هنا، وبنقدم له خدماته بكل شفافية. أي أوامر يا فندم؟

السيسي: متشكرين... أخباركم إيه؟ طب قولوا لي كدا الخدمة أخبارها إيه والناس حجم الرضا مع الـ.. مع الناس اللي بتيجي لكم.. لا صحيح.. (موظف يرد بصوت غير واضح) أيوة..

أحد الموظفين: فكرة الشغل هي الخدمات كلها مميكنة سواء مني أنا كشباك أو من الإدارات الخلفية. قصرت الوقت على المواطن، يعني مثلًا لو رخصة بنى، هي المفروض قانونًا بتاخد 30 يوم.. كشغل مميكن فأقل مدة ممكنة أقدر أطلع رخصة للمواطن، تمام؟ رخص المحل العام نفس الطريقة، في أقل وقت ممكن أقدر أطلع رخصة محل عام للمواطن، فبكدة...

السيسي: وإنتو كـ.. يعني موظفين، كعاملين هنا، راضيين على الـ.. المعدات.. على التكنولوجيا اللي موجودة، والإمكانيات اللي موجودة، بتسهل لكو فعلًا الشغل ده؟ بصراحة.

أحد الموظفين: طبعًا، طبعًا بتسهل.

السيسي: صحيح؟ أصل إحنا موجودين يعني علشان أطمن عليكو وعشان أشكركو على الـ، على يعني المركز ده وعلى الدور اللي بيقوم بيه. هو في النهاية إحنا عاملينه عشان خاطر الناس، وإنتو موجودين هنا عشان (كلمة غير واضحة) وخدمة الناس وتسهيل يعني مصالحهم. أنا بطمن إن الأمور كلها.. ولو في حاجة قولوا لي.. لو في حاجة قولوا لي.. كله تمام؟ اتفضل.

أحد الموظفين: كله تمام يا باشا.

السيسي: (يضحك الرئيس) مش عايزين أي حاجة؟ ربنا يوفقكو.

مدير مركز الخدمات: القرية من القرى الكبيرة جدًا ليها 142 تابع بإجمالي سكان 117 ألف نسمة، دول كلهم كانو بيعانوا إن هم يذهبوا...

السيسي: أنا عارف ليه، بس أنا كنت بتكلم على اللي هو اللي إحنا الـ، المركز اللي إحنا عملناه بالمعدات اللي موجودة فيه، بتدريب الناس اللي موجودة فيه، بالدور.. آه، كل حاجة.. (صوت الموظف غير واضح) لا ما أقصدش يعني، أقصد أقول طالما ده متكامل، كل اللي إحنا عايزينه كمركز في مكانه كتجهيز كمعدات كعناصر شغالة فيه اللي هو حضراتكو يعني بتقوموا بالـ.. لو في جديد، لو في إضافة مع الشغل.. بقالكو قد إيه شغالين؟ بقالكو قد إيه؟ المجموعة اللي موجودة دي، في المركز ده..

أحد الموظفين: 12 سنة..

السيسي: 12.. آه.. بعد تجديده كدا، بقالنا قد إيه؟ هه؟ بعد تجديده كدا... (أصوات غير واضحة) يعني لسه إحنا في بدايته يعني.

...

ألقيت الكلمة في محافظة البحيرة، حيث قام الرئيس عبد الفتاح السيسي بجولة تفقدية إلى دار المسنين، والوحدة الصحية، ومركز الخدمات بقرية الأبعادية، وحاور بعض المواطنين في دار المسنين، كذلك الموظفين العاملين بالوحدة الصحية ومركز الخدمات، وذلك بحضور الدكتور مصطفى مدبولي، رئيس مجلس الوزراء.

...