نص كلمة وتعليقات الرئيس السيسي خلال افتتاح موسم حصاد القمح في شرق العوينات 14/5/2023

 

 

34:28

السيسي: قبل آآ قبل ما نفتتح يا توفيق معلش..

اللواء توفيق (رئيس مجلس إدارة الشرطة الوطنية لاستصلاح وزراعة الأراضي الصحراوية): أفندم؟

السيسي: قبل ما نفتتح الافتتاحات بتاعة ال.. الحصاد يعني..

اللواء توفيق: إتفضل يا فندم.

السيسي: إسمح لي بس أتأكد منك على حاجتين. الحاجة الأولانية، وطبعا السيد وزير الري موجود والسيد وزير الزراعة موجود، ويعني أتصور إن إحنا محتاجين نتأكد إن أولًا بالنسبة لشرق العوينات إن إحنا مخزون الميه الجوفي اللي إحنا بنستخدمه في الري هنا، سواء للمنطقة المنزرعة ليكم أو للمستثمرين، دي بيتم التعامل معها طبقا للمعايير اللي تحافظ على هذا المخزون لأكبر فترة ممكنة.

أنا بتكلم هنا على استخدام الميه بشكل رشيد جدًا جدًا، دون هدر في الزراعة.

فأنا عارف إن وزارة الري بتابع ده يا دكتور مصطفى، وعايز أطمن منك، ومن وزير الري، على إن إحنا استخدامنا للميه هنا، سواء لل، للمسؤولين في الشركة، أو لرجال الأعمال اللي، اللي شغالين في آآ منطقة شرق العوينات.. دي واحد.

نفس الكلام بينطبق على منطقة توشكى. إحنا المحطة الميه اللي معمولة هناك من سنة 86، دي معمولة عشان تطلع حجم معين من الميه. إحنا محتاجين إن إحنا هذا الحجم يتم الاستفادة القصوى منه في الزراعة، وبالتالي نظم الري الحديثة اللي إحنا بنتكلم عليها في كل الزراعات اللي إحنا بنتكلم، سواء كان ده للقطاع الخاص اللي شغال، أو ليكم، يبقى بيتم العمل بيها.

ده اللي أنا عايز أسمعه منك دلوقتي يا توفيق.

اللواء توفيق: يا فندم إحنا في الشركة ملتزمين تمامًا بتعليمات وزارة الري. إحنا قدرة الطرمبة حتى اللي موجودة في البير، إحنا ما فيش طرمبة بتعدي 125 حصان. ملتزمين جدا بعدد الساعات بتاعتنا في الري التزام حرفي، ما فيش تهدير، ويمكن عشان كدا يا فندم إحنا في التجارب بتاعتنا كنا حريصين جدًا على نقطة الميه، فإحنا كشركة ملتزمين تمامًا بالميه هنا.

أما بالنسبة لتوشكى، فتوشكى يا فندم لو سيادتك في لوحة اللي هي كانت بنتكلم على توشكى 5، وقلنا بنزرع مساحة أقل من المساحة اللي إحنا، اللي كانت أرض صالحة للزراعة، إحنا عمرنا يا فندم ما نتعدى ميه أبدًا غير حدودنا، الطرمبة، المحطة العملاقة يا فندم بتروي 720 ألف فدان. إحنا ما حصلناش يا فندم المساحة لحد دلوقتي أصلًا، بالإضافة للمستثمرين اللي معانا كمان، حتى لما إختارنا مكان تاني، مكان تاني يا فندم.. بعد إذنك يا فندم الخريطة..

سيادتك المكان ده 287 ألف فدان، إحنا ها نرويه، ها نزرع 150 ألف فدان. إحنا كل اللي عملناه يا فندم نقلنا.. نتيجة إن في جزء من الأراضي لا يصلح للزراعة، لا يصلح زراعة، غيرنا المكان بس. ده كلفنا فلوس، لكن ما خدناش ميه زيادة. سيادتك وجهت تماما، وشددت على كدا: ممنوع حد ياخد ميه خارج ترعة الشيخ زايد. والتزمنا بهذا الكلام.

فإذن يا فندم الميه جنبنا أهي. الميه يا فندم جنبنا أهي، وإحنا جبنا ميه من ترعة الشيخ زايد، وخدناها هنا، مع إن الميه جنبنا هنا. كل اللي حصل يا فندم إن فرع رقم 2 ما عليهوش زراعة.

السيسي: طيب.. يعني اللي إحنا عايزين نـ.. نأكده هنا، أو نقوله لنفسنا ونقوله لحتى، يعني، اللي بيشاهد هذا الأمر، يبقى متأكد إن إحنا حجم الميه اللي اتعملت على أساسها المحطة، إحنا حريصين على إن إحنا، في شغلنا، أولا نستفيد منه كله.

اللواء توفيق: تمام.

السيسي: ثانيا نستفيد منه بزراعات آآ بنظم ري حديثة وبزراعات حديثة. أنا بقول لل، لل، لينا كلنا دلوقتي، إحنا بنتكلم على الأقل في منطقة توشكى بنتكلم في حوالي 700 ألف فدان. وده اللي كان مستهدف، 750 ألف، مش كدا؟ كان مستهدف لما الفكرة اتعملت.

اللواء توفيق: تمام.

السيسي: في التمانينات، على إن توشكى تطلع 700 الف فدان. ومهم قوي وإحنا بنتكلم في النقطة دي نقول إيه، إنتو عارفين 700 ألف فدان دول يساووا 2 محافظة، ولا أنا...؟ ال 700 ألف فدان يساووا 2 محافظة. يعني تقريبا المليون فدان اللي إحنا بنتكلم عليهم في شرق العوينات وفي توشكى، إحنا بنتكلم على 3 محافظات.

يتبقى حاجة..

اللواء توفيق: تمام.

السيسي: إزاي نعمل ونجذب، سواء كان للمستثمرين، عشان يبقوا موجودين معانا هنا، أو حتى عشان الكثافة السكانية اللي تبقى موجودة تبقى تستفيد من الشغل اللي موجود دوت؟

إحنا خلاص، عملنا الجهد أو المشوار الأصعب، خلاص، بقينا النهار ده قادرين على إن إحنا في فرص عمل لحوالي مليون فدان تقريبا.

اللواء توفيق: تمام.

السيسي: لما نحط عليهم التصنيع الزراعي اللي بيتعمل لهم، أتصور إن العدد ده يزيد أكتر من كدا. وإحنا بالمناسبة حريصين على إن إحنا في في في هذا المجال كدولة، إن إحنا كل ال، تعظيم ما لدينا من منتجات زراعية.. يعني ال.. مشروع إنتاج الخشب اللي بيتكلم عليه، إحنا بنتكلم في 400 متر آآ مكعب خشب، طبقا للمواصفات والمعايير الأوروبية، اللي هو السوق المصري محتاج منها في الصناعة ديت خلال شغله.

الكلام ده إحنا بقالنا أكتر من سنتين ونص شغالين عليه في دراسات اتاخدت آآ يعني الجريد بتاع النخل ده وراح سافر، وتم دراسته واتبحث، ثم اتعملت عليه التجارب، ثم أنتجوا لنا ده وقالوا ده المواصفة اللي إحنا نقبلها وده اللي إحنا، آآ وده اللي ها يطلع بالفعل، مش كدا؟

اللواء توفيق: تمام يا فندم.

السيسي: وبالتالي أنا بتكلم إن دي ها تبقى في مدينة توشكى، اللي هي المدينة ال، السكنية اللي موجودة هناك اللي إحنا كنا عملناها من 6 سنين ولا 7 سنين قبل كدا.

أنا بقول الكلام ده دلوقتي ليه؟ بقول الكلام ده عشان إحنا دايما أقول يا جماعة وإحنا بنتكلم في موضوع، بنقول عناوين يعني، بنقول عايزين إيه نهتم مثلًا بالتصنيع الزراعي، لكن مشوار الوصول إنك إنت تطلع منتج تصنيع زراعي، ما بيتعملش آآ كدا يعني، لأنك إنت، وإلا يبقى ما يحققش الهدف بتاعه، لازم تعمل دراسات وتعمل أبحاث ثم تتأكد إن المنتج اللي إنت ها تعمله ده ها يبقى أولا يلبي طلبات السوق عندك، وطبقا للمعايير المستخدمة.

نفس الكلام لبقية المنتجات الأخرى زي موضوع التصنيع الزراعي أو ال، في افتتاح المصنع اللي بنفتتحه النهارده. ما حدش كان يفتكر أبدًا إن إحنا جنب الأرض اللي بتطلع المنتجات ديت، المنتج، البطاطس، بيتعمل جنب منها مصنع عشان النقل وعشان ده، بدل ما ننقل بطاطس لمسافة 700، 800 كيلو، مش كدا؟

اللواء توفيق: تمام يا فندم.

السيسي: 700، 800 كيلو، بدل ما أنقلهم على، بعربيات، يعني خلال المسافة الطويلة ديت جزء منهم يهدر أو يتلف أو كدا، لا إتعمل مصنع جنب منهم، المصنع ده بياخد البطاطس دي بيطلع منها منتجات مختلفة، حتى، مش بتعملوا نشا كمان؟

اللواء توفيق: أيوة يا فندم في استخلاص نشا من...

السيسي: يعني المهم إن ما فيش فضلات ممكن تبقى مضرة بالبيئة أو ما يتمش استخدامها، ها يتم إخراجها. بعد كدا لما ينتج ده وينقل، يبقى النقل هنا اقتصادي، لأنك إنت عملت عليه تصنيع، أقصى حاجة ممكن تتعمل في التصنيع الزراعي.

طبعا أنا، يعني، سعيد قوي إن إنتم، إن إحنا الكلام اللي كان زمايل لينا قبل كدا من 20 سنة ولا أكتر، حلموا بيه، مش كدا؟ وبعدين ما تحققش، وبفضل الله سبحانه وتعالى كان لينا نصيب إن إحنا آآ نحققه.

 ده معناه إيه بس عشان.. الكلام ده معناه إن أي تخطيط الدولة بتعمله، بيتعمل بناس متخصصة، بناس إيه يا دكتور مصطفى؟ متخصصة. ومش معنى إن هو م وفقش من 20، 25 سنة، معناه إن التخطيط كان إيه؟ لأ، كان في حاجات أخرى، في عوامل أخرى منعت إن التخطيط ده يتم تنفيذه. لما تم التعامل مع هذه العوامل، دلوقتي أو خلال ال 4 سنين اللي فاتوا دول، المستهدف اتحقق. مش كدا يا توفيق؟

اللواء توفيق: تمام يا فندم، تمام.

السيسي: المستهدف اللي هم ال 700، 750 ألف فدان، إحنا رايحين لهم. يعني اللي قالوا الكلام ده من ساعتها، ما كانوش إيه؟ ما كانوش غلطانين. والتخطيط آآ جيد. والأرض اتزرعت. والأرض بتنتج. والنهارده إحنا بنتكلم على إن في نهاية ال، الكمية ال، العدد ال، أو حجم الأراضي اللي ها تنتج دي، إنت بتتكلم في مليون طن قمح، مش كدا؟ المليون طن قمح دول يساووا كام؟ وهم معملوين إيه؟ معمولين بنظم ري حديثة، يعني حجم الميه اللي بيستخدم فيهم هو الحجم الأمثل في الري، ويصلح لي وزير الزراعة الكلام ده، وبالتالي أنا بنتج المليون طن قمح دول بتكلفة اقتصادية في الميه اللي إحنا دلوقتي بنقول لا بد إن إحنا كل نقطة ميه نستفيد منها، ثم الفرصة بقى البديلة لما أنا أروح آآ أجيب الكلام ده آآ من، بحوالي 350، 400 مليون دولار، طبقا لأسعار القمح، مع الوضع في الاعتبار إن لو سلاسل التوريد حصل لها مشكلة، إحنا بندفع التمن هنا، كدولة يعني، سواء في تكلفة، أو يبقى في مشكلة، أزمة في الموضوع.

فـ.. أنا بشكركم، و، وأنا سعيد قوي بإن إحنا آآ يعني الإنجاز ده تحقق خلال فترة مش كبيرة قوي، خلال سنتين تلاتة أنا بتكلم، وإن شاء الله خلال السنة الجاية يبقى وصلنا للحد الأقصى في توشكى أو في شرق العوينات، ويتبقى الجزء اللي هو بتاع غرب، غرب شرق العوينات، عشان نزيـ، نضيف مزيد من ال(كلمة غير واضحة)

يتبقى إن الدولة يا دكتور مصطفى محتاجة تخطط كيف نجيب كثافة سكانية من الدلتا، من الصعيد، من كدا، عشان يبقوا موجودين معانا هنا والناس تبتدي تعيش وتشتغل، وأهي فرص العمل موجودة، ولا أنا بقول يا توفيق حاجة...؟

اللواء توفيق: لأ تمام يا فندم صح. اسمح لي يا فندم.

السيسي: إتفضل.

اللواء توفيق: توشكى يا فندم الإنتاج بتاعها بيزيد، بيتحسن عام عن عام، توشكى منطقة واعدة، أنا بقول يا فندم كلام، وطبعا في ناس متخصصة، توشكى مشروع ناجح، توشكى نجحت، الحمد لله يا فندم الإنتاج بتاعنا، السنين اللي، الأرض اللي إحنا زرعناها من 3 سنين، إنتاجها غير الأرض اللي إحنا زرعناها كل سنة. فتوشكى يا فندم أرض واعدة بإذن الله.

السيسي: طب أنا بس عايز أقول كدا لأن إحنا بردو دايما في كل مرة نفتتح حاجة زي كدا نقول إيه: رجال الأعمال والمستثمرين المهتمين لديهم الفرصة. المشوار الكبير اللي هو كان محتاج، والصعب زي ما الدكتور مصطفى بيقول كدا، إحنا خلصناه، دلوقتي بقت الكلام ده متاح. طب متاح بس بشروط، يعني إيه شروط بقى؟ إن إنت تحافظ على إن حجم الأراضي بالدورة الزراعية اللي بتخدم على المحاصيل الاستراتيجية هانـ إيه؟ ها نحترمها، هانـ، عشان ما يبقاش النهار د هال 700 ألف فدان اللي بنتكلم عليهم دول يتزرعوا بقى ب 20 ، 30 محصول مثلا على، خلال الموسم، لأ إحنا بنتكلم على حاجات محددة محتاجينها عشان آآ يتم الاستفادة منها للسوق المصري، أو كمنتج استراتيجي، قمح، إحنا بنستورد منه كميات ضخمة جدا جدا، وكل ما بنقلل في الفجوة ديت، كل ما بنأمن استخدامنا لهذا ال.. هذا المحصول الاستراتيجي المهم.

أنا بشكرك يا توفيق، متشكر جدا.

اللواء توفيق: العفو. شكرا.

السيسي: شكرا.

...

كل مرة نفتتح حاجة زي كدا نقول إيه: رجال الأعمال والمستثمرين المهتمين لديهم الفرصة.

50:26

المهندس محمد جمال: مهندس محمد جمال غريب، شركة مودرن فارمنج للاستثمار الزراعي، بالتعاون مع شركة مصر العليا لاستصلاح الأراضي، إحدى شركات جهاز مشروعات الخدمة الوطنية.

إحنا هنا يا فندم بمشروع وادي الشيح في محافظة أسيوط، تم زراعة ألف فدان بمحصول القمح، تم حصاد 200 فدان، وجاري الانتـ، استكمال حصاد 800 فدان. أي أوامر يا فندم.

السيسي: يا جمال.

المهندس محمد جمال: أيوة يا فندم.

السيسي: سامعني؟

المهندس محمد جمال: أيوة يا فندم سامع حضرتك.

السيسي: طب أنا، أنا بهنيكم على إن إنتو زرعتو في وادي الشيح، لأن وادي الشيح كان على مدى السنين اللي فاتت كان يصعب الزراعة فيه.. عملتو إيه؟

المهندس محمد جمال: هو كان تحدي كبير يا فندم، بس الحمد لله، بتوفيق ربنا ودعم سيادتك وجهاز مشروعات الخدمة الوطنية مع القطاع الخاص، قدرنا نتغلب على مصاعب الأرض من حجارة وصعوبة الأرض وعملنا أحدث شبكة ري باستخدام أحدث النظم في العالم بمحطات الأرصاد بأجهزة حساسات ميه في الأرض عشان نرفع كفاءة استخدام الميه ونحافظ على الميه يا فندم.

السيسي: إنت عارف يا جمال أنا بسأل السؤال ده ليه؟ عشان أقول للناس اللي نجحوا هنا في مزرعة وادي الشيح.. 10000 فدان مش كدا؟

المهندس محمد جمال: أيوة يا فندم.

السيسي:  ال 10000 فدان دول ده مستثمر مصري، هو اللي دخل بتقنية مختلفة، وقدر يقول إن أنا رغم إن الأرض دي قد لا تكون صالحة للزراعة، في أسيوط، لكن أنا ها أزرعها، مش كدا يا... وليد.. مش كدا؟

والحمد لله رب العالمين.. مش كدا؟ وزرع محاصيل تانية.. فأنا بهنيكو على المزرعة دي بالذات ليه؟ لأن هو الدلالة بتاعة الموضوع إيه؟ إن دايما ما دام في إرادة وفي إصرار، وحتى، والعلم دايما بيخدم على أمور قد لا تكون آآ نراها كثيرين إن هي، المزرعة دي بالذات أنا بتكلم تحديدا، 10000 فدان في أسيوط، على مدى سنوات طويلة، كانت الإجراءات اللي بتتعمل مش قادرة تنجح الفكرة، جه مستثمر قال أنا ها نجّح لكو الفكرة هنا، وأنا ها أزرعها، مش كدا يا.. توفيق؟

فأنا بهنيكو على ده يا جمال، وكملوا، لأن ده أولا فرصة عمل كويسة ل، لل، لشبابنا في أسيوط، إن هم يبقى في أراضي تضاف للعمل والناس تيجي تشتغل فيها، ثم زي ما بقول هي ما كانتش أبدًا من منظور إن هي تخش الخدمة وتشتغل. فأنا بهنيكو متشكرين يا جمال، شكرا جزيلًا.

المهندس محمد جمال: ربنا يخليك يا فندم.

السيسي: شكرًا.

المهندس محمد جمال: ألف شكر. (تصفيق)

...

 2:00:08

المهندس أحمد: سيادة الريس، مهندس أحمد عودة، شركة السويدي إلكتريك، نائب رئيس المجموعة، لمشروعات الانفراستراكشر. طبقا لتوجيهات سيادتك يا فندم لتوطين صناعة أجهزة الري المحوري، قامت شركة السويدي إليكتريك بالتعاون مع جهاز مشروعات الخدمة الوطنية بإنشاء مصنع على مسطح 120 ألف فدان، سوري، 120 ألف متر، في منطقة العين السخنة.

الكباستي بتاع المصنع يا فندم 2500 جهاز في السنة. السنة اللي فاتت نجحنا إن إحنا نعمل 10 أجهزة نجيبهم هنا شرق العوينات، ده جهاز منهم يا فندم. ال 10 أجهزة قعدوا موسمين زراعيين، الحمد لله اتطمنا على كفاءة الإنتاج وكفاءة التشغيل، بعد كدا ابتدينا الانتاج النمطي في المصنع، النهارده المرحلة الأولى من المصنع الحمد لله تمت بنجاح، ابتدينا الإنتاج النمطي على أساس توطين صناعة 65%، وإن شاء الله شغالين إن إحنا نزود هذه الصناعة بإذن الله.

بتوطين يا فندم صناعة أجهزة الري المحوري في مصر، إحنا وفرنا 6000 فرصة عمل، مباشرة وغير مباشرة، ووفرنا 150 مليون دولار، غير فاتورة استيرادات كانت بتدّفع في أجهزة الري المحوري.

ده جهاز يا فندم صنع بالكامل في مصر دلوتي، في 10 شغالين، والحمد لله دلوقتي عندنا في المصنع 500 شغالين للتوريد طبقًا للخطط المستقبلية للزراعة.

السيسي: آه بس، ال.. المطلوب، اللي مطلوب.. إنت بتتكلم في، في اكتر من 3000، 4000 (كلمة غير واضحة) خلال السنتين اللي جايين..

المهندس أحمد: تمام يا فندم..

السيسي: مش كدا؟

المهندس أحمد: إحنا الطاقة دلوقتي 2500، ها نوصل إن شاء الله ها نغطي السوق المحلي والخطة اللي جاية إن شاء الله الفائض للتصدير بإذن الله.

السيسي: طيب.. ال 35% دول، يكسبوا كام من تمن (كلمة غير واضحة) يعني؟

المهندس أحمد: 35 بردو يعني لو أنا بتكلم في جهاز (كلمة غير واضحة) مثلًا يعني، يبقى 65 مصري و 35 مستورد. إحنا سعادتك شغالين على الموضوع ده، بنتكلم على (كلمة غير واضحة) موتور، بنتكلم على السلبنكلر، شغالين إن إحنا نوطنه، والحمد لله نجحنا نزود شوية بس يعني خلينا نوصل إن شاء الله لكفاءة 100% نبلغ سعادتك بإذن الله.

السيسي: كويس.

المهندس أحمد: لكن في خطة إن إحنا نوطن الجهاز بنسبة لا تقل عن 75%، إن شاء الله.

السيسي: وإنتو اللي واخدين صيانته بعد كدا.

المهندس أحمد: يعني على حسب العاملين، يعني إحنا وردنا الحمد لله في وادي الشيح ووردنا في المنيا ووردنا في توشكى ووردنا وها نورد في الضبعة وهنا إن شاء الله بإذن الله.

السيسي: كويس.. كويس..

المهندس أحمد: تشغيل وصيانة سهل جدًا نعملها، وها نوفر كمان قطع غيار لما تم استيراده وتركيبه، ما فيش مشكلة خالص إن إحنا نورد له قطع الغيار بتاعته يعني.

السيسي: متشكرين.

المهندس أحمد: الحمد لله صنع في مصر وربنا يبارك يا رب.

السيسي: متشكر.

المهندس أحمد: إن شاء الله.

السيسي: متشكر، متشكر..

اللوا توفيق: يا فندم دي أول خطوة يا فندم في مشروع البطاطس، اللي هي زراعة التقاوي، المزروع دلوقتي حاليا تقاوي، الحصاد، عندنا معدتين، المعدة بتشتغل أفراد محتاجة أفراد نصف.. المعدة يعتبر نصف آلي، محتاجة أفراد، والمعدة الهارفستر دي مش محتاجة.. دي معدلها 10 فدان ودي معدلها 20 فدان.

السيسي: ده النص آلي؟

اللوا توفيق: ده النص آلي اللي محتاج أفراد تجمع البطاطس العادية. أما التانية يا فندم ففي بانكر بيعدي جواها. إحنا عندنا يا فندم 10 قطع و 10 قطع، يعني ممكن نحصد في اليوم 300 فدان، يعني إحنا عندنا الطاقة بتاعة المصنع مش محتاجين معدات تاني كدا، عندنا معدات الزراعة بتاعتنا وعندنا معدات الحصاد بتاعتنا.

أيضًا يا فندم إحنا بنعمل تجارب لمحصول الزيت. كنت بتكلم مع السيد وزير التموين إمبارح، إحنا زرعنا الكانولا ونجحت جدًا، وزرعنا فول الصويا وبنجرب فيه، وعباد الشمس وبنجرب فيه، بيتزرع 3 مرات في السنة. لكن إحنا عندنا المشكلة في وجه بحري فبنحاول نجرب أكتر من مرة للحصول على التوقيت المناسب قبل ما اتوسع في الزراعة.

السيسي: بس إنت عباد الشمس ها تجيب العسل أو النحل منين؟

اللوا توفيق: يا فندم في نوع، في نوع هجين.. إحنا عندنا عسل.. عندنا نحل..

السيسي: آه..

اللوا توفيق: إحنا عندنا.. بس كل فدان محتاج خلية.. إحنا عندنا، بس عايزين نرزع مساحات أكبر من كدا، وفي نوع هجين يا فندم بيبقى ممكن..

السيسي: ينفع من غير، مش كدا؟

اللوا توفيق: ينفع، ممكن ينفع، ينفع يا فندم.

السيسي: يعني إحنا ما أعرفش ال.. السيد وزير الزراعة ال، إن إحنا بنتكلم على موضوع ال، عباد الشمس بالذات، علشان هو ليه ظروفه، مش كدا؟

وزير الزراعة: عايز البيئة الحشرية في.. بس هنا كمان المساحة واسعة، ممكن نلاقي بيئة حشرية موجودة بتيجي من الزراعات المختلفة، بالإضافة إن إحنا بننسق مع سيادة اللوا بردو لأن هو عنده بعض الخلايا بننشرها وكدا يعني، وإحنا بنجرب معاهم...

السيسي: آه بس  إنت بتتكلم لو ها تعمل 50، 60 ألف فدان، 100 ألف فدان.. ها يبقى مشكلة..

وزير الزراعة: في، يعني، بيئة، يعني زي هنا كدا ممكن البيئة تبقى موجودة، وكمان لو شوفنا موضوع النخل والغابة الشجرية اللي هو عاملها بتبقى فيها بطبيعتها، فيها بعض الحشرات اللي بتنقل ال..

السيسي: اللي هو مش ال، مش ال...

وزير الزراعة: مش شرط العسل يعني..

السيسي: مش شرط النحل..

وزير الزراعة: يعني البيئة الحشرية بتبقى موجودة، فدي بتبدأ تساعد. إحنا بنجرب معاهم وفقًا لتوجيهات سيادتك...

السيسي: طب إنتو دلوقتي بالنسبة لتصدير البطاطس والحاجات دي، في مشكلة عندكم ولا..

وزير الزراعة: لا إحنا، إحنا السنة دي يمكن لو تسمح لي إن أنا أقول التصدير، إحنا لأول مرة نصل إلى 6.5 مليون طن بصفة عامة إنتاج زراعي طازج. السنة اللي فاتت كنا 5.6، رغم ظروف الأزمة الروسية الأوكرانية إحنا وصلنا ل 6.5، ده ب 3.3 مليار دولار. عندنا بردو تصنيع زراعي من منتجات زراعية حوالي 4.2 مليار دولار، يعني إجمالي المصدر من الناتج الزراعي سواء الطازج أو المصنع حوالي 7.5 مليار دولار. فيما يتعلق البطاطس، إحنا كل إنتاجنا في البطاطس إحنا بنزرع كل اللي بنزرعه حوالي 540 ألف فدان في التلت طرمبات. إحنا السنة اللي فاتت يمكن كنا صدرنا 870 الف طن، إحنا السنة اللي قبلها كنا 650 ألف طن، روسيا مثلا على سبيل المثال السنة اللي فاتت كانت واخدة مننا 270 ألف طن، السنة دي خدت 380 ألف طن. ففيما يتعلق بالبطاطس التصدير ماشي، ده يعتبر المحصول رقم 2 عندنا بعد الموالح في مجال التصدير. فإحنا أسواقنا موجودة، توجيهات سيادتك بردو بالنسبة للصحة النباتية والمعامل والحاجات دي كلها كويسة. فإحنا كل الأسواق بتاخد مننا والإجراءات ماشية كويس يعني إن شاء الله.

السيسي: يعني موضوع الأزمة الروسية ده...

وزير الزراعة: لا لا مش ها يأثر علينا لا، ده إحنا صادراتنا بتزيد.

السيسي: طيب.. متشكرين، متشكرين.

اللوا توفيق: أي أوامر يا فندم.

السيسي: شكرا.

...

ألقيت الكلمة في شرق العوينات بمحافظة الوادي الجديد، حيث شهد الرئيس افتتاح موسم حصاد القمح، ومصنع إنتاج البطاطس، وثلاجات تقاوي البطاطس، وذلك بحضور السيد القصير، وزير الزراعة، واللواء توفيق، رئيس مجلس إدارة الشرطة الوطنية لاستصلاح وزراعة الأراضي الصحراوية، والدكتور مصطفى مدبولي، رئيس مجلس الوزراء، وعدد من الوزراء.

...