نص كلمة وتعليقات الرئيس السيسي خلال قيامه بجولة تفقدية لعدد من المناطق بمحافظة القاهرة 28/4/2023

2:07

السيسي: بص يا هشام، بص يا أحمد.. إحنا اللي عاملينه ده، اللي إحنا عاملينه ده، عبارة عن نموذج اختباري.. نموذج إيه؟

هشام: اختباري يا فندم.

السيسي: اختباري، يعني مش دي فقط المخطط بتاعنا.

أحمد: تمام.

السيسي: لكن إحنا قولنا إيه، بدل ما نفتح ونعمل الكلام دوت ونـ، إحنا كلامنا فيه إن إحنا بنقول إيه، إحنا ما بين الجملة في سوق العبور، أو في الأسواق الرئيسية يعني، وما بين التجزئة اللي تحت خالص، فحطينا حاجة في النص بين الاتنين، تكلفتها تبقى على المستهلك تكلفة أقل من ال.. مش زي الجملة صحيح، لكن كمان مش زي التجزئة العادية.

فده ها يخلي الناس بتوع التجزئة بردو تنظم أسعارها شوية. طب إحنا عشان نعمل كدا عملنا إيه؟ اختارنا الـ5 نماذج دول، اخترنا إيه، الخمس نماذج دول، هانعملهم وها نفتتحهم.. إنتو في شهر 6 مش كدا؟

هشام: إن شاء الله يا فندم في 30/ 6 إن شاء الله.

السيسي: مش كدا يا.. هه.. إنت بالنسبة لك إنت.. أنا بس عايز أفكرك يا هشام إن ورا منك هنا في سوق على الأرض.. عارفه؟ السوق اللي وراك، اللي هنا، الأمل.

أحمد: أيوة يا فندم. في سوق..

السيسي: المفروض إن إحنا بعد ما ها نعمل ده، ها نبقى بنفضي السوق ده، ونخليه جزء من ال إيه، جزء من السوق بتاعنا، ليه؟ علشان الوضع اللي هو فيه. أنا عارف السوق ده كويس. ماشي.

فاللي إحنا بنعمله هنا هو اختبار، لو نجحنا فيه هانـ إيه؟ ها نعمم، لأن الموضوع ده ما بينا وما بين الناس بتوع الجملة، اللي هم اتفقوا معانا إن إحنا نعمل لهم حاجة زي كدا ونوفرها لهم، وهم يقدموا أسعار قريبة من الجملة، قريبة إيه يا هشام؟

هشام: قريبة من الجملة يا فندم.

السيسي: فاهم يا أحمد؟

أحمد: تمام سيادتك.

السيسي: قريبة من الجملة، إن عملوا كدا معانا هم ها يسمعوني دلوقتي وأنا بتكلم، ها نكمل ونعمل آآ في بقية الجمهورية اللي إحنا، بقية المخطط. لأن سوق زي كدا على سبيل المثال، ده ما يغطيش مدينة نصر، وال، وال، عند نادي الشمس ما يغطيش مصر الجديدة، لأ طبعا، إنت بتتكلم في ملايين من البشر عايزين يخشوا يشتروا ويجيبوا حاجتهم. لكن لو نجحت الفكرة ولقينا إن هي فعلًا التكلفة بتاعة الأسعار فيها، فعلًا، تكلفة والجمهور حس بالفرق، طبعا ها نعمل. هانـ إيه؟ ها نكمل. حاجة تاني؟

هشام: لا يا فندم.

السيسي: حاجة تاني يا هشام؟

أحمد: شكرا يا فندم.

السيسي: كل سنة وإنتو طيبين، متشكرين، متشكرين، سلامو عليكو.

...

4:33

السيسي: اللي أنا شايفه ده، ها يخلص إمتى؟

محمد: إن شاء الله يا فندم خا نخلص إن شاء الله في 30/ 6 وواجهات إن شاء الله يا فندم 15 /7  ونهو المشروع بالكامل إن شاء الله يا فندم 30/ 11 بإذن الله يا فندم.

السيسي: يعني على شهر 12. إنت عارف ده ها يعمل نقلة كبيرة جدًا للمنطقة هنا، مش كدا؟

محمد: إن شاء الله بإذن الله يا فندم. بإذن الله.

السيسي: متشكرين يا محمد.

محمد: أوامر يا فندم.

السيسي: كل سنة وإنت طيب.

...

6:28

السيسي: أنا بس عايز أقول هنا، وإحنا فرصة إن إحنا موجودين، المحلـ.. إحنا مش عملناها أسواق فقط، لأ إحنا عملنا المحلات دي عشان إيه، علشان نقول للناس اللي موجودة هنا في المقطم والمنطقة المحيطة بالكامل، عندكو فرصة لأشغال مشغولات فنية أو حرف يدوية، وغيرها.. إحنا ها نخلص إمتى؟

محمد: إن شاء الله يا فندم إحنا ضاغطين عشان نكون ملتزمين بكلامنا مع سيادتك إن شاء الله 30/7  بإذن الله.

السيسي: 30/7

محمد: بإذن الله.

السيسي: كله باللاند سكيب بـ..

محمد: إن شاء الله إن شاء الله بإذن الله يا فندم.

السيسي: بالمباني ال..

محمد: إن شاء الله يا فندم.

السيسي: طيب.. هل في تواصل دلوقتي مع الناس بتوع العبور عشان النص جملة اللي إحنا عاملينه ده؟

محمد: أكيد يا فندم.

السيسي: أنا بقول كدا عشان، لو جينا في شهر 7 نقوم نلاقي الدنيا شغالة.

محمد: إن شاء الله يا فندم بإذن الله.

أحد المشرفين: سوق عمار بن ياسر يا فندم على مسطح 9 فدان. السوق يا فندم بيتكون من جزئين..

السيسي: يعني قول 45 ألف متر..

أحد المشرفين: ده حاجة كبيرة جدًا يا فندم.

السيسي: آه طبعا.

أحد المشرفين: منطقة السوق يا فندم التجاري، ومنطقة النادي الإجتماعي، المنطقة يا فندم طبعا اتعملت عشان يبقى فيها، يبقى متنفس لسكان المقطم، سواء النادي الإجتماعي، في أنشطة رياضية وتجارية..

السيسي: يعني إحنا عاملين كدا 2 نادي، يا محمد، مش كدا؟ واحد في عمار بن ياسر،مش كدا؟ وواحد هنا، غير المناطق اللي أنا قلت عليها المناطق اللي هي..

محمد:التنموية.

السيسي: التنموية الموجودة على المحور، مش كدا؟ اتفضل.

أحد المشرفين: عندي يا فندم إجمالي عدد المحلات 151 محل بأنشطة مختلفة، بداية من الأفران ومحلات الخضار والفاكهة والدواجن واللحوم والحرف اليدوية، عندي مبنى إدارة السوق، عندي يا فندم دي كافيتيريا.

السيسي: طب بردو أنا دايما بسأل السؤال ده لل، لما نكون في منطقة، بقول لهم، الناس بتعمل شغل، بقول لهم بصوا، إنتو من خلال احتكاكم بالمواطنين، إيه المطلوب ممكن نعمله، نسهل، نحسن، سواء كان في الحركة أو في مطالب الناس. هه. فلو في عندكو حاجة آآ...

أحد المشرفين: يا فندم هو كان في تكدس مروري في المنطقة، إحنا راعينا ده في التصميم إن إحنا عملنا باركات يا فندم كتير زي ما سيادتك شايف، سعة 200 سيارة، ده هايخفف يا فندم التكدس المروري في شارع عمار بن ياسر، وشارع اللي تحت يا فندم اللي هو شارع المقطم، ده اتجاه شارع 9، اللي ها ييجي يشتري حاجة يا فندم ها يلاقي في أماكن انتظار سيارات.

محمد: نفس الكلام يا فندم السوق هنا فيه أكتر من انتظار سيارات متوزع، إجمالي مساحة السيارات يا فندم 127 سيارة.

السيسي: 127. ربنا يا رب يوفقكو.. متشكرين يا محمد.

المشرفين: تحت أمر سيادتك يا فندم.

السيسي: كل سنة وإنتو طيبين.

المشرفين: وحضرتك طيب يا فندم.

...

9:07

أحد المشرفين: مساحة السوق 5.7 فدان.

السيسي: 5.7.. يعني قول 6 فدان.

أحد المشرفين: إن شاء الله يا فندم. الموقع يا فندم في شارع صبحي حسين على بعد 1 كيلو من شارع 9. مكونات السوق يا فندم عندنا 95 محل، وفي عندنا 30 محل على الطريق بإجمالي 151، لأن عندنا هنا يا فندم في منطقة النادي في 20 محل على الشارع الرئيسي ده سيادتك.

السيسي: همم.. طب ها نخلص إمتى؟

أحد المشرفين: كان المخطط سيادتك إن إحنا نخلص 30 /10  بس إن شاء الله 30 /8  بإذن الله يا فندم.

السيسي: طب أنا ها أقول لك على حاجة، على عشان السوق ده أبقى متطمن عليه، إنتو محتاجين كل الأراضي على شهر 8 أو 9 وقت ما ها تخلصوا المشروع، تكون كل المحاور اللي رايحه ليه تكون اتوسعت واتسفلتت.

أحد المشرفين: أوامر.

السيسي: خدت بالك؟ مع شوارع المقطم كلها.

أحد المشرفين: أوامر يا فندم.

السيسي: ماشي يا محمد؟

أحد المشرفين: تحت أمر سيادتك.

السيسي: كل سنة وإنتو طيبين. شد حيلك. متشكر يا محمد.

...

10:48

السيسي: أنا بس عايز أوضح هنا إن محور عبد المجيد محمود ده، ده قصة تانية كبيرة جدا جدا، ها يعمل نقلة كبيرة جدا للحركة من محور الحضارات، مش كدا؟

إيهاب: من محور الحضارات يا فندم ومن شارع صلاح سالم ومن كورنيش النيل..

السيسي: لغاية..

إيهاب: يوصل لغاية مدينة نصر وممكن منه للقاهرة الجديدة ومنه للعاصمة الإدارية الجديدة.

السيسي: مش كدا؟

إيهاب: فده ها يعمل نقلة كبيرة جدا يا فندم في السيولة المرورية في المقطم وفي الحركة المرورية في القاهرة الكبرى كلها يا فندم.

السيسي: لأن أول مرة نطلع نعمل كدا.

إيهاب: أيوة يا فندم.

السيسي: أول مرة نخلي المقطم عبارة عن عقدة مواصلات، مش كدا؟

إيهاب: أيوة يا فندم.

السيسي: طيب.. إحنا ها نخلص إمتى؟

إيهاب: إن شاء الله يا فندم المنطقة اللي إحنا فيها ديت 10 أيام ها تكون خلصانة. المحور بالكامل إن شاء الله يا فندم، يعني آخر شهر 7.

السيسي: بصوا على شبكة الطرق العرضية اللي بتربط ما بين 9 وهنا وياسر رزق، عشان نعملها بالمرة يبقى كدا الحركة بقت متيسرة جدا جدا، سواء كان على المحاور الرئيسية دي، أو للناس اللي موجودة جوة ال، المناطق دي يعني.

إيهاب: تمام سيادتك يا فندم، فعلا طبقا لتعليمات سيادتك يا فندم إحنا بندرس حاليا وها نعرض على سيادتك وبالإضافة لكدا سيادتك كنت أمرت إن كان في مشكلة في الصرف الصحي في المقطم نفسه، وزارة الإسكان بتعمل خط صرف صحي جديد من المقطم لغاية الجبل الأحمر.

السيسي: إنتو متابعينه يا إيهاب؟

إيهاب: متابعينه يا فندم وإن شاء الله طبقا لتعليمات سيادتك ها يخلص في شهر 10.

السيسي: السنة دي.

إيهاب: إن شاء الله السنة دي يا فندم.

السيسي: ده كلام كويس قوي.

...

ألقيت الكلمة والتعليقات في محافظة القاهرة، حيث قام الرئيس بجولة تفقدية لعدد من المناطق والتي شملت مواقع الأسواق الرئيسية الجديدة التي تنفذها الهيئة الهندسي للقوات المسلحة في حي مدينة نصر، أسواق أحمد فخري وكذا حسن المأمون، وبحي المقطم أسواق عمار ابن ياسر وكذا سوق المقطم بمحور عبد المجيد محمود، وغيرها من الأسواق. وقد ناقش الرئيس القائمين على تنفيذ الأسواق والمشروعات.

...