نص حوار السيسي مع أفراد قسم شرطة مدينة نصر أول 9/4/2023
السيسي: سلامو عليكو
أفراد القسم: وعليكم السلام ورحمة الله.
السيسي: كل سنة وإنتو طيبين.
أفراد القسم: وإنت بالصحة والسلامة يا فندم.
السيسي: أخباركو إيه؟
أفراد القسم: الحمد لله يا فندم.
ضابط 1: سيادتك أنا المختص عن عرض النزلاء على النيابات والمحاكم المختصة، والمسؤول عن صرف الوجبات الغذائية المقررة لهم، بالإضافة سيادتك (صوت غير واضح) مع النيابات في تنفيذ قراراتها على المدار اليومي وعلى مدار الساعة. تمام يا فندم.
السيسي: الوجبات ممكن أشوفها ولا.. ولا خلاص وزعتوها؟
ضابط 1: لا يا فندم..
السيسي: (يضحك) يبقى نشوف الوجبات. إيه تاني.
ضابط 1: سيادتك ومباشرة أعمال النوبضجية وفحص بلاغات الـ(كلمة غير واضحة) وتوزيعها والعرض على السيد رئيس (كلمة غير واضحة)
السيسي: (لضابط آخر) بقى لك قد إيه؟
ضابط 2: أنا 25 سنة خدمة يا فندم، الأمين ياسر نجم يا فندم، قوة الاسم، أي تعليمات يا فندم.
السيسي: تعليمات إيه يا ياسر، أنا عايز أسمع منك.
ضابط 2: اتفضل يا فندم.
السيسي: الـ25 سنة دول..
ضابط 2: 25 سنة خدمة.
السيسي: آه ما أنا عارف.
ضابط 2: خدمت 10 سنين في السويس يا فندم. خدمت 5 سنين في شمال سينا.
السيسي: طب أفضل خدمة كنت فين؟
ضابط 2: أفضل خدمة يا فندم. السويس يا فندم.
السيسي: مش في شمال سينا؟! (يضحك الرئيس)
ضابط 2: السويس يا فندم؟
السيسي: ليه؟ ليه؟
ضابط 2: آآآ..
السيسي: بصراحة.
ضابط 2: خدمت في شمال سينا لما كنت لسه شباب.. لكن السويس يعني كنت كبرت شوية.
السيسي: ما كانش لسه في مشكلة، مش كدا؟
ضابط 2: تمام يا فندم.
السيسي: ما كانش في أي حاجة.
ضابط 2: لا ما كانش في حاجة يا فندم.
السيسي: كل سنة وإنتو طيبين.. عايز أشوف الأكل.
السيسي: كلوا عشان وأنا.. أنا بدردش معاكم عشان وإحنا بناكل نتكلم.. إنت كنت عايز تقول لي حاجة.
مواطن 1: أنا؟
السيسي: آه.
مواطن 1: لا والله مبسوط جدًا.
السيسي: وأنا مبسوط.
مواطن 1: وها أتصور مع حضرتك بعد الفطار.
السيسي: ها نتصور.. احكي لي بقى حكايتك..
مواطن 1: كان الله في عونك والله.
السيسي: اللهم آمين يا رب.
مواطن 1: أنا دكتور صيدلي.
السيسي: كويس.
مواطن 1: كنت جاي العربية بتاعتي الإزاز بتاعها نزلت لقيته مكسور، جاله سرطان، الإزاز اللي قدام، فقلت أعدي أعمل محضر قبل ما أروح الصبح عشان أوديها تتصلح عشان الإزاز باظ خالص يعني، فـ..
السيسي: ده عربية خاصة بيك.
مواطن 1: عربيتي آه بتاعتي.
السيسي: وإنت عايز تعمل محضر ليه؟
مواطن 1: علشان شركة تأمين، مأمن عليها في شركة تأمين، آه، فلازم إجراءات ورقية يعني.
السيسي: فاهم فاهم.
مواطن 1: آه.
السيسي: إجراء روتيني يعني.
مواطن 1: آه. فـ(جملة غير اوضحة) لو أعرف كدا كنت اتصلت أنا وجيت عشان أقابل حضرتك.
السيسي: إنت نفسك في إيه بقى؟
ضابط 3: نفسي أقدم رسالتي على أكمل وجه. إن أنا أشرف البلد وأشرف أهلي.
السيسي: (جملة غير واضحة)
ضابط 3: الحمد لله يا فندم أنا مدرسة فرنساوي وكان في (كلمة غير واضحة) كويس، (جملة غير واضحة) وكان كل هدفي إن أنا آخد المنحة وآخد الشهادة لأنها شرف للبلد برة، أنا هو ده مصري، أخلاقه، والسلوك والكلام ده كله، والانتظام في المواعيد، والانضباط عامة.. ونسيت إن أنا رايح (كلمة غير واضحة) أنا رايح طالب في كلية الشرطة المصرية (جملة غير واضحة) فكنت مركز في الموضوع ده جدًا. الحمد لله طلعت من الأوائل.
السيسي: طب إنت عندك وقت فاضي قد إيه في اليوم هنا؟
ضابط 3: سيادتك يا فندم هو إحنا بنشتغل في الطبيعي 8 ساعات، الرسمي، حتى لو اقتضى الأمر أكتر من ذلك، هنشتغل.
ضابط 4: في شغل سيادتك بيكمل.. يعني في شغل يقعد.. بيقعد..
السيسي: (يضحك الرئيس)
ضابط 4: زي ما سيادتك أمرت قبل كدا إن إحنا بالذات الشباب الصغير بنحاول ننقله تدريجيا، ما ينفعش طبعا يخش على (جمل غير واضحة) مرة واحدة. ولكن هو ال 8 ساعات ده بيبقى الأساسي بتاعه، لكن إحنا ممكن بتبقى في ساعتين أو 3 زيادة لو حالة العمل بتقتضي ذلك. طبعا حضرتك عارف إن (جملة غير واضحة) ما بيروحوش سيادتك.
السيسي: ما هو البيت ليه حق وصحتك ليها حق وحياتك ليها حق. بس يعني..
ضابط 4: بس البلد ليها حق أكتر، دي ها يتسئل عليها.
السيسي: صحيح. ضابط 4: وإحنا يا باشا قدها، وإحنا يا فندم قدها، وبنوعد سيادتك وبنطمن سيادتك على الحالة العامة، إن شاء الله حالة الأمن، إن شاء الله تبقى حالة.. (جملة يغر واضحة) الناس تبقى حاسة فعلا إن الأمن ليه، يعني، عودته قوية، وإنه بيحقق التوجيهات بتاعة سيادتك وتوجيهات الوزارة بتاعتنا. وإحنا بنطمن سيادتك يعني حالة الأمن بصفة عامة ومدينة نصر إن شاء الله بصفة خاصة إن شاء الله.
ضابط 5: استمر يا فندم وحضرتك قدوة لينا. وإحنا بإذن الله ها ننتهج نفس النهج. إحنا ممكن زي ما سيادتك قلت، ساعات العمل والضغط بتخلينا ننسى إن إحنا نهتم بصحتنا. كمان المشاغل من 8 الصبح لحد أوقات متأخرة من الليل، بننسى الجانب ده. فإحنا بإذن الله بفضل الله، وسيادتك قدوة لينا، ها نحاول نستقطع أي وقت، حتى لو نص ساعة في اليوم، الواحد ممكن يتريض فيها، أو يمارس أي..
السيسي: إنت لو اتمشيت من المكتب، من المكتب آآ لغاية البوابة دي، تبص عالولاد وتطمن عليهم، 10 مرات في اليوم، 50 متر في 10 بـ500 متر. أنا بتكلم جد.
السيسي: تنصحيني بإيه؟
ضابط 6: بنصح حضرتك إن (كلمة غير واضحة) تخلي بالك من صحتك، وتكمل حضرتك في اللي إنت ماشي فيه، لأن إحنا ورا حضرتك وها نقتضي بيك، وبشكر حضرتك طبعا إن إنت إديتنا فرصة كبيرة للسيدات إن هم يدخلوا كلية الشرطة بأعداد كبيرة، السنة دي، حضرتك إديت فرصة لطالبات كية الحقوق إن هم يخشوا بأعداد أكبر من أي سنة، فدي فرصة كبيرة قوي لينا إن إحنا نشارك بالمجتمع، ونأدي دورنا، ونحاول إن إحنا نكون على قد المسؤولية في الوظيفة اللي إحنا فيها بإذن الله.
السيسي: إن شاء الله.. وإنت عايز تنصحني بإيه؟ تنصحني بإيه؟
ضابط 7: آآآ.. العفو يا فندم طبعا..
السيسي: العفو ليه؟
ضابط 7: إحنا بنتعلم من سيادتك.
السيسي: لا لا لا..
ضابط 7: بنتعلم من سيادتك، وفعلًا شرف لينا تشريف سيادتك لينا، ده تاج فوق دماغنا والله.
السيسي: كتر خيرك.
ضابط 7: وسيادتك، إحنا، إحنا مبسوطين لكل الإنجازات اللي سيادتك قمت بيها، وده باين جدا يا فندم في كل حاجة. وما نسمعش سيادتك لأي معوقات تعيق المسيرة بتاعة سيادتك. فـ.. دي دي، ده اللي أنا عايز أقوله لمعاليك بس. سيادتك كدا إحنا سيادتك ماشي في الطريق الصحيح.
السيسي: كل سنة وإنتو طيبين، أنا سعدت بيكو النهار ده. ما كلتوش إنتو..
مواطن 1: (...) ننزل نتصور معاك.
السيسي: حاضر..
ألقيت الكلمة في القاهرة، حيث تفقد الرئيس قسم مدينة نصر أول، وتناول الإفطار مع ضباط وأفراد القسم، وعدد من المواطنين.