نص كلمة وتعليقات السيسي خلال زيارته التفقدية لمقر أكاديمية الشرطة 22/3/2023
السيسي: سلامو عليكو.
الطلاب: وعليكم السلام يا فندم.
السيسي: كل عام وإنتو طيبين.
الطلاب: وحضرتك طيب يا فندم.
السيسي: كان مهم قوي إن إحنا نيجي النهار ده عشان نطمن عليكو، وعشان كمان نهنيكم بانتهاء فترة التدريب الأساسي ديت. والحقيقة ال.. من خلال المتابعة واللي أنا بلمسه ولمسته حتى النهار ده كدا، قد إيه في خلال مدة مش كبيرة قوي، 3 شهور من كتير الحقيقة، شوفوا حجم التغيير، وأنا بقول الكلام ليكو إنتو بقى، مش ليا أنا، ولا حتى لأعضاء هيئة الأكاديمية، أنا بتكلم لو إحنا بنتابع أنفسنا لو إحنا بنراقب نفسها، وقد إيه إن بالتركيز وبالمسؤولية وبالجدية ممكن يبقى يحصل تطور كبير وتقدم كبير في الأداء.
كل عمل يتم بإخلاص ويتعمل في تفاني ونبقى كلنا دايما على قلب رجل واحد زي ما بنقول دايما، ها تبقى النتيجة بالشكل ده. لسه المشوار قدامنا شوية كمان، لكن البداية الحقيقة اللي أنا شايفها بداية يعني موفقة جدا، وبتمنى لكو التوفيق، واستمروا وحسنوا دايما من أداءكم، التعليم، التدريب، كل شيء، كل شيء بتاخده هنا هدفه في الأول إن هو يطلع إنسان فاهم، جاهز، قادر إن شاء الله على إن هو يؤدي مهمة كبيرة جدا وهي حماية الوطن، حماية بلدنا يعني، زي ما دايما بنقول الكلمة دي.
ودي بالمناسبة هي أشرف مهمة يقوم بيها أي إنسان. حماية مصر، أو حماية الوطن، في أي بلد في العالم، هي أشرف مهمة يقوم بيها إنسان.
فـ.. بهنيكم، وبتمنى لكم كل التوفيق، وكل عام وإنتو طيبين، وأنا ها أقول لكم على حاجة مهمة قوي إن إنتم دايما وإنت بتـ.. وإنت بتدرب هنا، وإنت بتتعلم هنا، إنك تخلي بالك من نفسك ومن زميلك، وأيضا إنك إنت تبقى متباع كل حاجة وتبقى واعي قوي وفاهم و.. وما تسيبش حاجة تعدي عليك من غير ما، ما تعرفها كويس وتفهمها كويس.
في النهاية المدة ال، ال، يعني، سواء كانت سنة ولا اتنين ولا 4 ولا غيره، إن شاء الله الأيام بتمر وبتمر بسلام وإن شاء الله. وتبقوا، يعني، زي ما جينا كدا بنهنيكم، ها يبقى بردو في يوم تاني بنهنيكم وإنتو بتتخرجوا من الأكاديمية.
موفقين إن شاء الله، وأنا بشكركم وبشكر قيادة الأكاديمية، ووزارة الداخلية، وبتمنى لكم دايما كل التوفيق. كل سنة وإنتو طيبين.
الطلاب: وحضرتك طيب يا فندم.
السيسي: شكرا جزيلا، شكرا جزيلا.. سلامو عليكو.
...
السيسي: صباح الخير.
طالبة 1: صباح النور يا فندم.
...
السيسي: (لأحد الطلاب) بقالك قد إيه؟
طالب 2: بقالي 83 يوم يا فندم.
السيسي:إنت حاسبهم باليوم؟
طالب 2: آه يا فندم.
السيسي: (يضحك الرئيس) بالك لو خليناهم وزودناهم شوية؟
طالب 2: تمام يا فندم كلنا تحت أمر الوطن.
السيسي:طيب. أخبار الدراسة إيه؟
طالب 2: تمام يا فندم. الدراسة كل حاجة هنا تمام يا فندم. بنروح المحاضرات ونحضر محاضراتنا، وكل حاجة تمام يا فندم.
السيسي:بتعمل دراسات ولا.
طالب 2: آه يا فندم معانا دبلومة تجارة دولية.
السيسي: تجارة دولية.
طالب 2: آه يا فندم.
السيسي: ها تشتغل فيها يعني، مش كدا ولا..
طالب 2: آه، بس لسه يا فندم ما بدأناش امتحانات.
السيسي:أنا فاهم يعني ها تبدأ فيها يعني.
طالب 2: آه يا فندم.
السيسي: خلال السنتين دول.
طالب 2: بإذن الله يا فندم.
السيسي: مش كدا؟
طالب 2: تمام يا قائد.
السيسي: (كلمة غير واضحة) (...) الماجستير.
طالب 2: تمام.
السيسي: إنت منين؟
طالب 2: من قنا يا فندم.
السيسي: الناس بتوع قنا ناس طيبين.
طالب 2: شكرا يا فندم. شكرا يا فندم.
...
(صوت غير واضح)
السيسي: منين؟
طالب 3: من المنيا يا فندم.
السيسي: من المنيا، بقالك قد إيه؟
طالب 3: بقالي 3 شهور يا فندم.
السيسي: 3 شهور ولا 83 يوم؟
طالب 3: 83 يوم يا فندم.
السيسي: ال 3 شهور لسه فعلا لما نكمل ال 3 شهور.
طالب 3: تمام يا فندم.
السيسي: أخباركم إيه؟
طالب 3: الحمد لله يا فندم.
السيسي: إنت معاك إيه؟
طالب 3: بكالوريوس تجارة إنجليزي يا فندم.
السيسي: تقدير كام؟
طالب 3: جيد جدا يا فندم.
السيسي: بتدرس حاجة تاني ولا..
طالب 3: تمام يا فندم، قسم خاص.
السيسي: خاص، طيب، طيب.. مش عايز حاجة؟
طالب 3: شكرا يا فندم.
السيسي: شكرا جزيلا.
طالب 3: كان حلم حياتي إن أنا أقف قدام حضرتك يا فندم، واتحقق.
السيسي: حلم حياتك؟
طالب 3: حلم حياتي يا فندم.
السيسي: (يضحك الرئيس)
طالب 3: بجد مش...
السيسي: شكرا.
طالب 3: شكرا يا فندم.
...
طالب 4: (ًصوت غير واضح "ينطق اسمه")
السيسي: منين؟
طالب 4: من محافظة القليوبية يا فندم.
السيسي: تخصص إيه؟
طالب 4: إنتاج حيواني يا فندم، بكالوريوس علوم زراعية.
السيسي: ها تحضر دبلومة ولا تخصص بس؟
طالب 4: بناخد دبلومة يا فندم، هنا دبلومة أزمات وكوارث يا فندم.
السيسي: متشكرين.
...
السيسي: كل سنة وإنت طيب.
طالب 5: وإنت طيب يا فندم.
السيسي: إنت منين؟
طالب 5: من محافظة بني سويف يا فندم.
السيسي: طب معاك إيه؟
طالب 5: معايا ليسانس حقوق يا فندم.
السيسي: تقدير كام؟
طالب 5: تقدير جيد يا فندم.
السيسي: تقدير جيد ولا جيد جدا؟
طالب 5: تقدير جيد يا فندم.
السيسي: إنت بتدرس إيه دلوقي دبلومة؟
طالب 5: دبلومة تجارة دولية يا فندم.
السيسي: لسه، بدأتوا ولا ما بدأتوِش؟
طالب 5: بدأنا يا فندم.
السيسي: كويس، كويس.. مش عايز حاجة؟
طالب 5: لا يا فندم، شكرا يا فندم.
السيسي: شكرا.
طالب 5: شكرا.
...
7:56
السيسي: سلامو عليكو.
الطالبات: وعليكم السلام يا فندم.
السيسي: (صوت غير واضح) في التدريب بنعلم صح، وإحنا بنعل بنتلقى منكم، بنسمع منكوا رأيكم...
عارفين الكلام اللي أنا بقوله ده معناه إيه؟ معناه إن إنتم شوفتم النظام، وفكرتم فيه، وقلتو إحنا ممكن نطور فيه.. قلتوا كدا.. في إيه؟ في كل شيء؟ في كل شيء؟
طب حلمكو إيه؟ (لإحدى الطالبات) حلمك إيه؟
طالبة 6: حلمي وجودي في الأكاديمية يا فندم وبدأت حلمي الحمد لله، حلمي إن أنا أطور من نفسي، إن أنا هنا كل يوم بحمد ربنا إن أنا في المكان العظيم دوت.
إحنا فلسفة العقاب اللي كانت موجودة قبل كدا، إحنا طورنا فيها، مش عايزين نعاقب الإنسان قد ما عايزين نصلحه
السيسي: طب أنا ها أقولكو على حاجة. إوعوا تبطلوا كلام. ما تبطلوش كلام، بس الكلام يبقى موزون قوي. يبقى إيه؟
الطالبات: موزون قوي.
السيسي: موزون قوي، ها يتوزن إزاي؟ بالمعرفة والقراءة، بالحقائق. فلما تيجي تتكلم تبقى تتكلمي بموضوعية، وبتتكلمي بـ.. بأساس ممكن الناس تسمعك وتقدر اللي إنتي بتقوليه من طرح، من طرح لموضوع أو كدا.
طيب.. أنا كنت بسأل زمايلكم في ال.. المستجدين، عن مراكز الإصلاح. في حد من حضراتكم عنده خبر؟ حضرتك اسمك إيه؟
طالبة 7: ملازم أول نورهان ناجي يا فندم.
السيسي: يا نورهان. عارفة كام سجن كان عندنا الأول؟ تفتكري كان كام؟
كان عددهم قليل، وبعدين آآ عرفت إن بعد كدا في تطوير للسجون، وفي سجون تانية جديدة بتتبني في كذا مكان مختلف، عشان نبقى بنوسع السجون اللي عندنا، وفي نفس الوقت إحنا بنطور من الحاجات اللي موجودة في السجون، من إمكانيات وحاجات إن أنا أطور بيها من المسجون اللي بيدخل علشان أطلع شخص تاني نافع للمجتمع.
ده كلام صحيح. ده كلام صحيح. لكن الفكرة بتاعة المراكز ديت إن إحنا كبني آدمين، لما نخطئ، ما وصلناش لآخر الدنيا يعني. يعني الواحد ممكن يخطئ، طبيعي يعني.. بشر.
إحنا فلسفة العقاب اللي كانت موجودة قبل كدا، إحنا طورنا فيها، مش عايزين نعاقب الإنسان قد ما عايزين نصلحه، إحنا جايبينه هنا عشان نحمي المجتمع منه ونحميه من نفسه، مش كدا؟
طالبة 7: تمام.
السيسي: طب ما نعمل برامج لتطويره وتحسين أداؤه ومحاولة تغييره. كان عندي طريقي، الطريق الأولاني إني أحاول أصلح اللي موجود ده، أحاول أدخل عملية تطوير وإصلاح على الواقع اللي موجود. وأنا لقيته مش جيد، عشان كدا بقول لكو كلكو، دايما تفكروا، ما تسيبوش الدنيا على حالها كدا. اللي ها يفكر ها يقدر يوصل بفضل الله سبحانه وتعالى ل.. يعني، طالما في إخلاص وفي هدف للبنى والإصلاح، ها يجد إن ربنا سبحانه وتعالى دايما بيوفقه لفكرة كويسة.
طيب، عشان نغير.. لو تفتكروا لما جينا في المناطق ال.. الخطرة. الناس كانت فيها بتنام في الشارع. كان عندي بردو مسارين: إن أنا أحاول أحسن لهم حاجتهم، وإن أنا أعمل مكان جديد خالص. أنا اخترت التاني الأغلى، اللي أكثر تكلفة، بس قد يكون أكثر جدارة.
طب أنا عايز أغير، عايز أبني شخصية مختلفة، عايز أعمل إصلاح حقيقي للإنسان ده.. طيب، ما نخش نطور على اللي موجود، فقلنا لأ إحنا نعمل شكل تاني. فاتعملت المراكز ديت وابتدينا نخش نقول إن إحنا ها نغير حتى في الاسم، مش ها نسميه إيه، مش ها نسميه سجن تاني. ها نسميه مركز إصلاح وتأهيل، حتى الصورة الذهنية اللي موجودة في المجتمع عن السجن، تتـ إيه؟
الطالبات: تتغير.
السيسي: تتغير.. ثم جوة المراكز دي نعمل بقى برامج أخرى مختلفة خالص، من أول مبيت الناس لأكلها لطريقة التعامل معاها، وحيدت العامل البشري. عايزة تنجحي، حاولي تقللي، مش عيب في البشر يحتكوا ببعضهم، لكن حاولي تقللي احتكاك البشر مع الفكرة، عشان تنجح.
فقلنا إيه، هم كانوا بيحتكوا بال، في النظام القديم، في احتكاك مباشر وفي ثقافة اتشكلت، وفي حاجات كتير قوي غريبة جدا اتعملت أنا ما أعرفهاش. ولما تشوفوا حاجة، شوفوها بنظرة نقدية. يعني إيه نظرة نقدية؟ يعني مش انتقاد عشان الانتقاد، لأ، يعني نظرة فاحصة، شوف اللي إحنا عاملينه ده، ويمكن تضيفي حاجة، في النهاية ها تشكلي فهم للي إحنا ماشيين فيه، ممكن تضيفي فكرة أو تضيفي إضافة للموضوع.
في كل عمل ها تشتغلوا فيه لو ده موجود معانا دايما ها يبقى ديما إحنا بنتحرك وبنندفع للأمام. التطوير بالمناسبة مش مرتبط بمرحلة وبس، أقول ده اللي عملناه وده أحسن حاجة، ونفضل إيه.. لا لا.. إحنا نعمل نحسن ونشوف اللي إحنا عملنا هده نقيمه، ومش عيب إن أنا أعمل حاجة وبعد ما أعملها في تقييمي ليها ألاقي إن أنا محتاج أغير فيها.. غير.
السيسي: طب كل سنة وإنتو طيبين.
الطالبات: وحضرتك طيب يا فندم.
السيسي: متشكرين.. متشكرين.
...
16:17
السيسي: سلامو عليكو ( تصفيق وزغاريد) كل سنة وإنتو طيبين، واهلا وسهلا بيكو. خليني في البداية إن أنا أرحب بيكو مرة تانية وسعيد إن أنا ألتقي بيكم وأوجه لكم الشكر إن إنتم شجعتم أبناءكم إن هم يبقوا موجودين معانا هنا النهار ده في الأكاديمية. وده أمر آآ.. (تصفيق)
ها تشوفوا إن، إن خلال ال.. 3 شهور في الأجازتين تلاتة اللي إنتو جيتو هنا معاهم وشوفتوهم، شوفتوا الفرق قد إيه والتغيير قد إيه.
اتطمنوا عليهم وإحنا متطمنين معاكم، وبنهنيكم عليهم لأنهم حاجة شباب وشابات حاجة تفرح يعني، إحنا جينا بدري شوية بس عشان نقول لهم كل سنة وإنتو طيبين، لكن كل التدريبات اللي إحنا شوفناها كانت حاجة تطمن وتفرح فـ.. (تصفيق)
بشكركو مرة تانية و.. هم بيقولولي إنت اللي ها تنزلهم ولا ما تنزلهمش، فأنا مش عارف، إنتو عايزين تاخدوهم ولا؟ (تصفيق) (يضحك الرئيس) أنا حتى بقول لوزير الداخلية يعني هم الناس ها تيجي وإحنا ها نقول لهم آآ (يضحك الرئيس) لا مش تعليمات.. نعم؟ (يرد على إحدى الأمهات تتحدث عن عيد الأم) (يضحك الرئيس) طبعا طبعا طبعا، لا طبعا، هم نازلين معاكو إن شاء الله وكل سنة وإنتو طيبين يعني (تصفيق)
بطمنكم على ولادكم، وبقولكم خلي بالكو منهم ما تأكلهمش كتير في الأجازات. صحيح، ما تأكلهمش كتير علشان هم منظمين، إحنا منظمين، مرتبينهم يعني.
(أحد الحضور "ربنا يخليك يا ريس"9 ويخليكو.. ويخليكو، متشكر.. ربنا يكرمكو.. ربنا يخليك متشكر، متشكر.. (تصفيق) شكرا.. ال، ال.. ربنا يبارك فيك بس أنا ها أقول لك على حاجة ليكو كلكو.. ال، ده، اللي حفظ مصر وها يحفظها واللي كبرها واللي ها يكبرها، ربنا سبحانه وتعالى وإنتم، اللي هم الأسر اللي زيكم، الناس اللي ربت ولادها وكبرتها وبتقول وبتقدمها لمصر، إنتو، وأنا مش بجاملكو والله، بيكو إن شاء الله واللي عملتوه والباب والشابات اللي إنتم ربتوهم وأحسن تربية وجهزتوهم أحسن تجهيز وبعدين قلت اتفضل خد إحنا بنقدمهم لمصر، فـ.. لا إنتم، مش حد تاني.
فرببنا يحفظكم ويحميكم.. (أحد الحضور "تحيا مصر يا ريس") يا رب، يا رب تحيا مصر بيكو كلكو. (تصفيق)
المهم كل سنة وإنتو طيبين، بطمنكم على ولادكم، وبقولكم خلي بالكو منهم ما تأكلهمش كتير في الأجازات (يضحك الرئيس) صحيح، ما تأكلهمش كتير علشان هم منظمين، إحنا منظمين، مرتبينهم يعني.
فـ.. إن شاء الله تسعدوا بيهم و.. ينزلوا معاكم بالسلامة وييجوا إن شاء الله بعد أجازتهم بالسلامة، وربنا يحفظكو (تصفيق)
آآ.. بطمنكم علينا، على حالنا يعني، إحنا بخير، ودايما أقول الكلمة ديت لما أقابل آآ، أقابل أهلي، المصريين يعني، أقول لهم ما تخافوش، وما تقلقوش من حاجة خالص. ده إحنا مرينا بأيام صعبة قوووي، قوي قوي قوي في السنين اللي فاتت، وافتكروا.. افتكروا قد إيه إحنا، يعني، في تضحيات قد إيه يعني.. وربنا سبحانه وتعالى هونها علينا و.. ووفقنا بفضله وكرمه علينا والتضحيات الشباب والجيش والشرطة، وبقت مصر النهار ده في حتى تانية بفضل الله سبحانه وتعالى.
مين يا ناس زينا في اليوم ده؟ ده السيسي قاعد في وسطينا، لا بيشخط ولا بيتضايق، وبيسمع شكاوينا
فكل سنة وإنتو طيبين، واسمحوا لي إن أنا أعدي عليكو كدا، أنا شايف في ناس كبار موجودة، فلازم أسلم عليهم الناس الكبار قوي دول (تصفيق وزغاريد)
...
السيسي: أهلا وسهلا.. سلامو عليكو.. إوعي تأكليه كتير..
أم 1: لا إن شاء اللهأ
أب 1: إحنا بنفدي بيه الوطن، والله، كلنا فدى الوطن..
السيسي: ربنا يخليه ليكو ربنا يحفظوا يا رب ويخليه لكو..
...
أم 2: قالوا لي أوصفي شعورك بقدوم رئيسنا لينا، أنا قلت الهنا والفرح والسعد حلي ليالينا، مين يا ناس زينا في اليوم ده؟ ده السيسي قاعد في وسطينا، لا بيشخط ولا بيتضايق، وبيسمع شكاوينا، بيجازي المخطئ ويكافئ المُجد بينا، يا رب احفظه وبارك لنا فيه، ده هو الأمل لينا، ده هو زي الشمعة بتنور ليالينا.
السيسي: متشكرين، متشكرين..
أم 2: عايزة أتصور معاك..
السيسي: قوي قوي قوي قوي.. (زغاريد)
...
السيسي: والله لا تقعد (لرجل كبير في السن)
(صوت غير واضح)
السيسي: بفضل دعواتكوا الطيبة.
أب 2: يا فندم أسلم على حضرتك يا فندم والنبي
السيسي: كل سنة وإنتوا طيبين.
...
السيسي: دعواتك الطيبة
أم 2: يبعد عنك ولاد الحرام ويسترك، الله يصلح حالك، اله يوسع عليك، الله يكفيك شر المرض.
السيسي: آمين رب العالمين، آمين رب العالمين، آمين رب العالمين...
مبسوطة؟
أم 2: مبسوطة بيك والله العظيم ما انتصرنا إلا بيك يا ريس، الله يحميك.
السيسي: منورين الدنيا. والله العظيم شرفتونا.
..
أب 3: إنت أصيل.. إن إنت تكرم الرموز بتاعتنا، وما تسيبناش وكمل، وكمل، وكمل وإحنا وراك..
السيسي: ولا نتحرم من بركاتكو.
..
السيسي: ها تنزل أجازة النهار ده ولا إيه؟
طالب 8: إن شاء الله يا فندم.
السيسي: إن شاء الله آه ولا إن شاء الله لأ؟
طالب 8: بعد تعليمات سيادتك يا فندم.
السيسي: ما إحنا قلنا خلاص أهو.
...
أم 3: (...) وكل عدوينك يا رب تشوف لهم حاجة وحشة وإنت يفاديك في كل خطوة تمشيها، الله يفاديك في كل خطوة تمشيها، يجعل لك فيها ألف سلامة ويبارك لك..
السيسي: آمين يا رب، الله يسلمك. (لأحد الواقفين) سيبها تقول اللي هي عايزاه.
أم 3: الله يفاديك في كل خطوة تمشيها..
السيسي: (لآخرين) آه أمال إيه.. (لآخرين) أهلا وسهلا..
أم 3: ويجعل لحبايبك كلهم ألف سلامة..
السيسي: الله يسلمك. (لآخرين) حاضر، حاضر، حاضر.
أم 3: وولادك يبارك لك فيهم، ويبارك لك فيهم في كل خطوة يمشوها ألف و 100 سلامة.
السيسي: الله يبارك فيكي يا حاجة.
أم 3: ويجعله شهر مفترج عليك وعلى حبايبك.
السيسي: آمين يا رب.
أم 3: ورمضان كريم عليك يا رب.
السيسي: آمين يا رب. علينا كلنا.
أم 3: وعلى مصر كلها.
السيسي: آمين يا رب،
أم 3: وعليك وعلى مصر كلها.
السيسي: الله يخليكي يا حاجة.
أم 3: وما تشوفوش حاجة وحشة.
السيسي: اللهم آمين.
...
أب 4: (...) ويخليك لمصر. رفعت راسنا لفوق وقضيت على المحسوبية. أنا عن نفسي ما كنتش ها أعف أدخل ابني في الشرطة، لولا إن معاليك قضيت على المحسوبية.
السيسي: ربنا يخليك.
أب 4: شكرا يا معالي الرئيس.. شكرا يا معالي الرئيس.
...
أم 4: شرف كبير لينا يا فندم.
السيسي: الشرف لينا إحنا، أهلا وسهلا..
...
السيسي: (...) سوهاج والصعايدة الجدعان.
أب 5: (...) والله العظيم، (كلمات غير واضحة) عشقي في البلد دي، (كلمات عير واضحة)
السيسي: يا رب يعينا..
سلامو عليكو.. سلامو عليكو...
...
ألقيت الكلمة بمقر أكاديمية الشرطة، في القاهرة، وذلك بحضور اللواء محمود توفيق، وزير الداخلية، وطلاب الأكاديمية وأسرهم.
...