نص كلمة ومداخلات السيسي مع الأهالي خلال تفقده مشاريع حياة كريمة بقرية المعصرة 2/3/2023
السيسي: إزيك.. إزيك؟ أخباركو إيه؟
الأطفال: تمام الحمد لله.
أخبار المدرسة إيه؟
طفلة 1: زي الفل، يا ريت كل المدارس تبقى كدا.
(يضحك الرئيس) طيب.
السيسي: صباح الخير.
الأطفال: صباح النور.
السيسي: إزيكو؟
الأطفال: كويسين.
طفل 2: ممكن أطلب منك طلب؟
السيسي: هااا؟
طفل 2: ينفع تحضني؟
السيسي: أحضنك يا حبيبي تعالى. (يضحك الرئيس)
السيسي: صباح الخير.
الأهالي: صباح الخير يا ريس.
السيسي: ده يوم جميل جدًا.. (هتافات) متشكرين. لا متشكرين صحيح. (هتافات) طب خلوني أقول لكم حاجة جميلة كدا، لأن أنا، يعني، بكل الحب والله بشكركو على الجهد اللي إنتو بتعملوه، والحقيقة ده حاجة تشرف وتفرح إن شباب مصر يعني دي تالت محافظة أدخل فيها، ألاقيهم موجودين، طبعًا كل محافظة بتقدم شبابها يعني، بيبقوا موجودين وبيعملوا العمل الخير الجميل ده. الحقيقة حاجة، حاجة تسعد وكمان.. المفروض إنتو كمان تبقوا سعيدين جدًا باللي بتعملوه، وفخورين جدًا باللي بتعملوه، لأن إحنا سعداء بده وفخورين بالعمل اللي إنتو بتعملوا التطوعي ده.
شوفوا.. ما تحرموش بقية شباب المحافظة، وحتى الشباب الصغير، والشابات الصغيرين، فهموهم إن ده جميل قوي إن إحنا كلنا نعمل حاجة حلوة لبلدنا، ونشتغل عليها.
شوفوا المنظر بقى عامل إزاي بيكو؟ شايفين المنظر بقى عامل إزاي بيكو؟ ونقدر نعمل أكتر من كدا بكتير. متشكر جدًا، مش باسمي بس، باسمي وباسم كل المصريين. متشكرين، وبردو باسم المحافظة بنشكركم، شكرا جزيلا. (هتافات) (يضحك الرئيس) شكرًا جزيلًا. متشكرين.
السيسي: سلامو عليكو.. (هتافات) شكرًا.. متشكرين. شكرًا والله، شكرًا، شكرًا شكرًا. (هتافات).
السيسي: صباح الخير.. كل سنة وإنتو طيبين، ومبروك، ألف مبروك.
الأهالي: الله يبارك في حضرتك.
السيسي: اتفضلوا.
طفل 3: مجموعة المعدات ديت ممكن تكون غالية شوية، بس إحنا هدفنا إن الطفل المصري يكون بيفكر ويعمل اللعبة بنفسه، وعلى طريقته الخاصة، مش إن هو يروح يشتري عربية ويلعب بيها، لأ، إحنا إيه، يخترع العربية، ويتسلى بيها وفي نفس الوقت تبقى الحاجة اللي هو عايزها.
السيسي: طب بردو تتكلف كام يا محمد؟
طفل 3: تتكلف يعني...
مواطنة 1: إحنا الصراحة جابولنا المعدات ب 56 ألف جنيه من التحول الرقمي.
طفل 3: جابولنا المعدات من التحول الرقمي.
السيسي: طيب (يضحك)
طفل 3: بس بتحتاج معدات أكتر من كدا كتيييير، علشان عدد التكنولوجيا وكدا.. بس إحنا جمعنا شوية معدات وعملنا منها.. (تصفيق)
ألقيت الكلمة في قرية المعصرة مركز ملوي بمحافظة المنيا، حيث تفقد الرئيس مشاريع حيا كريمة بالقرية والتقى بالأهالي.