نص كلمة السيسي خلال استقباله لوفد من رجال الأعمال المصريين 18/10/2022
سعيد بلقائكم. كل الدعم لكم. والدعم ده وجهدكم إحنا محتاجينه، آه. نجاحكم إحنا محتاجينه وزيادة.
أنا بكلمكو النهارده في، في البداية ديت.. أنا عارف طبعا رجال الأعمال دايما والمستثمرين، يعني، بيفكروا طبعا في أشغالهم وأنا معاهم، ومصر محتاجاهم.
إحنا نقدر نتكلم بتواضع شديد دلوقتي إن الدولة قادرة على الانطلاق بجد، قادرة على الانطلاق بجد. يبقى يتبقى إيه؟ إن إحنا كدولة معاكم. أولا إحنا واثقين فيكو جدا، وده بردو كلام مش معنوي.
طب إحنا محتاجين إن إحنا ندعم ده؟ طبعا. نشجعه؟ أيوة. نكبره؟ أيوة. إحنا مركب واحدة وبنحقق توازن في، في الطرح. لكن ما يبقاش الموضوع كله تحديات ومشاكل وده أمر إحنا نسمعه. لكن أيضا أفكار، أفكار لحلول مسائل.
طب مصر فيها فرصة؟ طبعًا. مصر فيها فرصة؟ طبعًا. مصر عندها فرصة للنمو؟ أيوة. وسط كل اللي إحنا فيه ده؟ صحيح. المشكلة بتاعة كورونا والأزمة الروسية وتأثيرها. بردو بقول تاني، بردو هانعبرها أو هانعديها.
فبلد زي مصر فيها فرص نجاح هايلة، باللي إحنا بفضل الله سبحانه وتعالى جهزناه لها وجهزناه لكم، مش بنية تشريعية فقط، ولكن أنا عايز أقول خلال سنتين، يعني إحنا هانكون مواني مصر، مواني درجة أولى على البحر المتوسط والبحر الأحمر. وأنا لا أبالغ، واللي يعرف ويشوف إحنا بنعمل حاجتنا إزاي يعرف إن الكلام اللي أنا بقوله ده، مش بقول كمان 5 سنين، لأ، آخر السنة الجاية يا دكتور مصطفى ولا؟ مش كدا؟ أبو قير ودمياط وإسكندرية والسخنة وجرجوب خلصت وبرنيس خلصت، ومواني درجة أولى. ثم شبكة الطرق.
الخلاصة يعني، إن السوق المصري سوق كبير، إحنا حريصين على إن إحنا، إنتم يعني تنموا وتكبروا أكتر. مش إنتو بس، وكل من رجل أعمال في مصر عايز يشتغل.
وأنا عايز أقولكو على حاجة، كان الكلام خلال الشهور ويمكن السنين اللي فاتت اتكلموا وقالوا حجم الاقتصاد الخاص، وأنا بقول 75، 75% من اقتصاد مصر في إيد القطاع الخاص، مش قطاع الدولة.
وبالمناسبة، وأنا الكلام ده قلته قبل كدا وبقولهولكو تاني، وقولوه عني لكل الأشقاء رجال الأعمال. إحنا عايزين رجال الأعمال تدخل أكتر في الاقتصاد بتاع الإيه، الدولة. بجد. طبعا في المؤتمر الاقتصادي بردو هايبقى فرصة إن إحنا يبقى في نقاش أكتر من كدا وكلام أعمق من كدا من الناحيتين، من جانب المسؤولين ومن جانب رجال الأعمال ومن جانب الاقتصاديين والمعنيين بالموضوع دوت، ونطرح حلول ونطرح مسار ممكن يبقى ده خارطة عمل، إن شاء الله في ال، في نهاية المؤتمر.
فأنا برحب بيكم أهلًا وسهلًا.
...
ألقيت الكلمة في القاهرة بقصر الاتحادية، خلال استقبال الرئيس لوفد من رجال الأعمال والمستثمرين المصريين من القطاعات الصناعية المختلفة، وذلك بحضور الدكتور مصطفى مدبولي رئيس مجلس الوزراء، والسيد القائم بأعمال محافظ البنك المركزي، والسادة وزراء الطاقة المتجددة والكهرباء والبترول والثورة المعدنية والتخطيط وعدد من الوزراء.
...