اسمحولي في البداية ان أنا اتوجه ليكم جميعا للشعب المصري بالتحية والتهنئة وكل عام وأنتو طيبين.
وأتوجه للإخوة الأشقاء المسيحيين بالتهنئة بعيد القيامة وكل عام وهم طيبين.
وكمان أتوجه بالتهنئة لكل العاملين، عمال مصر، بعيد عمالهم اللي احتفلنا بيه من كام يوم.
وكان مهم قوي ان أنا كمان أهني الشباب اللي رفع اسم مصر خلال الأيام اللي فاتت. أنا هقولهم بالاسم عشان الحقيقة دا حاجة تشرف وحاجة تفرحنا كلنا اننا بجهد فردي نتحصل على اللي أنا هقول عليه ده.
الأستاذة نور الشربيني ودي حصلت على طبعا بطولة العالم في الاسكواش للسيدات، والاستاذ محمد الشوربجي اللي حصل على بطولة العالم في الاسكواش.
فريق كرة اليد اللي حصل على الدورة الأفريقية وتأهل للاولمبياد.
الاستاذ ايهاب عبد الرحمن تاني العالم في الرمح
الاستاذ عمرو الجزيري بطل العالم في الخماسي الحديث.
الاستاذ حسام بكر تالت عالم في الملاكمة
الاستاذ محمد ايهاب تاني عالم في رفع الاثقال
الاستاذ رمضان درويش تالت عالم في الجودو
وأخيرا الاستاذة هداية ميلاد تالت عالم في التايكوندو
اسمحولي ان احنا نوجه لهم التحية ونهنيهم ونفرح بيهم.
الحقيقة كلمتي معاكو النهاردا هتكون كلمة مختلفة شوية
كلمة مختلفة شوية عن الكلمات السابقة اللي انا كنت بتكلم بيها
وأنا في اسكندرية من كام يوم كدا كنت ماشي على الكورنيش، بدون ترتيب.. خالص! فـ لقيت اوتوبيس للنقل العام من العادي خالص دا، فـ لقيت الناس اللي فيه وقفوا وبعدين ابتدوا يحيوني.. وبعدين قالولي كلمة غريبة أوي. لقيت حد فيهم بيقوللي متخافش! احنا معاك. إيه دا؟ قالولي متخافش احنا معاك.. (هتافات) استنوا بس.. اسمعوا كلامي بس.. من فضلكم.. طب اسمعوا كلامي لو سمحتم. خلوني أقول الكلمتين اللي أنا عاوز اقولهم لكل المصريين من خلالكم.. لو سمحتوا ماتقاطعونيش.
ف أنا توقفت كثيرا أوي.. ليه هما قالولي كدا.. احنا معاك متخافش.. ف أنا معرفتش أرد عليهم ساعتها لأن مكانش فيه فرصة لدا.. بس انا قلت هرد عليهم هنا.. ليهم من هنا ولكل المصريين. شوفوا..
اللي يقف يوم 3 /7 مبيخافش.. خالص.
انتو مش واخدين بالكو.. انتو مش واخدين بالكو
مش المصريين اللي مش واخدين بالهم لا. قوى الشر كلها.. اللي يقف في نوفمبر 2013 ويدعو لحوار مع النظام في الوقت دا مبيخافش.. اللي يقف في الكلية الحربية في يناير ويقول ان مصر تدخل في نفق مظلم نتيجة السياسات دي مبيخافش.. اللي يقف ويقول بادي مهلة 7 أيام لانهاء الأزمة مبيخافش.. اللي يدي 48 ساعة أخرى مبيخافش..
خلي بالكو.. خلي بالكو.. أنا بقول الكلام دا لية؟ عشان أطمنهم هما الأول.. أطمن كل مصري ممكن يكون من كتر زحمة الأحداث مش واخد.. يعني قِلِقْ.. أو اتهيأله ان أنا……. (صمت)
أنا خدت 2000 قرار في السنتين ونص اللي فاتوا دول، واللي ياخد القرار ميخافش. اللي ياخد القرار ميخافش.
أنا حبيت اطمنهم بس الناس اللي أنا.. البسطاء جدا اللي موجودين وأطمنهم على مصر كمان.
واحنا مكناش بنتكلم قبل كدا عن اللي احنا بنعمله في بلدنا.
اسمحولي أنا هتكلم عليه بتفصيل معقد لأن أنا ناوي ان شاء الله في شهر 6 القادم يبقى لينا لقاء مع كل المصريين بكشف حساب بكل اللي تم تنفيذه خلال السنتين دول.
أنا عاوز أقولكم اللي تم تنفيذه بدون مبالغة، وانا هتكلم معاكو فيه دالوقتي، غييير مسبوق… غيير مسبوق.
ويصعب جدا على أي شعب تنفيذه في المدة اللي أنا بتكلم فيها دية.
هتكلم الأول على مشروع المليون ونص فدان.
أنا كنت قلت مرة قبل كدا ان الهدف منه كان اننا نعطي فرصة لمجتمع عمراني زراعي جديد بالشكل اللي انتو شفتوه دا.. كنا ممكن نعرضه وقتها من سنة على ماكيت يعني ونقول هو دا المشروع اللي احنا ممكن نعمله حتى بعد ما طورنا الفكرة. لكن احنا قلنا لأ. احنا عاوزين نقول لكل المصريين اللي هما المستفيدين منه هي دي الحياة اللي انتو هتشوفوها، هي دي الحياة اللي انتو هتعيشوها انتو وابنائكم. في البيوت دية، في المياة دية، بالكهربا دية، بالصرف دا، بالزرع دا. كل المطلوب منك انك انت تيجي تشتغل.
أنا كدا حليت مسائل كتير جدا جدا من البيروقراطية. للفساد. اللي كانت ممكن تجابه العملية دية لو أنا سلمت الأرض للناس. كان ممكن عشان يعمل بير ياخد موافقات تاخد سنتين تلاتة، عشان يعمل بير واحد عشان يقدر يوصل للي احنا فيه دا - دا لو قدر يوصله - ياخد عشرة خمستاشر سنة.
أنا بقولكو كدا لأنو احنا مش حاسين احنا بنعمل ايه. كان مهم أوي الناس تغني كنا هنبني وأدي احنا بنينا السد العالي!
افتكروا الكلام دا كويس.. دا حاجة.. دا مشروع قومي واحد.. مشروع قومي واحد!
لما يتقال النهاردا واحنا بنتكلم معاكو دالوقتي ان فيه ألف بير ع الأقل تم الانتهاء منهم يعني معناه ان أنا جاهز أزرع دالوقتي، أسلم الأرض وتزرع يا مصري دالوقتي، ٤٠٠ ألف فدان.
كنا بنخلصهم في قد ايه قبل كدا؟ في سنة.. في اتنين.. في خمسة.. في عشرة؟
احنا المفروض نبحث عن الكلام دا.
نتكلم فيه كلنا مع بعض.
أنا عشان أطرح دا دالوقتي للناس شركة الريف المصري اللي موجودة تقدر تقول للناس تعالوا آدي النموذج اللي انت ممكن تاخده وتسنثمر فيه وتشتغل وانت لن تتحمل أي أعباء إدارية بمجرد التعاقد معاك هتاخد مني عقد أخضر للأرض اللي أنت خدتها دي وتشتغل فيها. لا هتخش مع الحكومة - مع التقدير للجميع - ولا مع الإداريات ولا المحليات ولا مع أي حد عشان تبقى عندك الأرض دي وتشتغل بالطريقة دي.
طب دا اتكلف كام وهيكلفنا كام؟ عشان أعمل الكلام اللي انتو شايفينه دا. عشان أعمل الكلام اللي انتو شايفينه دا. وأسلمه المليون ونص فدان لو أنا عايز أخلصهم كلهم أنا محتاج ٦٠ مليار جنيه على أقصى تقدير عشان أعمل كل اللي انتو شايفينه دا.
يبقى فيه عملت مليون ونص فدان وأتحتهم للمستفيدين، مستثمر كان أو مزارع يعني صغير بس اديته حياة كاملة واختصرتله اجراءات لا يمكن تتصوروها.
يعني لما اقول النهاردا أننا في خلال ٤ سنين نكون أنجزنا المشروع دا بالكامل وبقى موجود على أرض مصر مليون ونص فدان بالشكل اللي شايفينه دا، يا تري دا مشروع قومي ولا مش مشروع قومي؟
خلي بالكو
المشروع القومي التاني اللي هتكلم معاكو فيه هي الشبكة القومية للطرق
الشبكة القومية للطرق أنا بتكلم اللي تم انجازه بالفعل حتى الآن ٥ آلاف كم. كان بيتم دالوقت عرض بيقول أن الفرافرة تم ربطها شمالا وشرقا وغربا.
الشبكة دية عملت ربط لمصر بالخمس آلاف كم دول. لما جم طرحوا المشروع ده او اتكلمنا فيه كان المشروع.. قلتلهم نعمل متوسط لسعر الكيلو بالأعمال الصناعية، ١٠ جنيه، مليون جنيه، يعني لما أعمل ٥ آلاف بخمسين مليون جنيه.
ويتعمل معاهم حتى الآن ١٣٥ كوبري، حتى الآن، ينتهوا آخر السنة دي ١٥٠. المتوسط
٢٠٠ مليون جنيه للكوبري يعني ٣٠ مليار، يعني ٨٠ مليار.
قولولي يا مصريين كنتو بتحطوا للطرق كااام مليون جنيه كل سنة عشان تعملوا ده في سنتين؟ هو أنا لما أعمل شبكة الكباري دية مبرحمش الناس؟ مبارفقش بكل انسان بيتحرك من محافظة لمحافظة يعدي مزلقان او ينزل ميدان، مبرحموش؟
لما أعمله شبكة طرق بالطريقة دية مبساعدش على ان احنا نربط مصر بشكل كويس ونساهم في التنمية ونقول للناس اللي عايزة تيجي تعمل استثمارات في مصر لدينا.. لدينا.. بنية أساسية متطورة تليق بدولة.
أنا بتكلم في 80 مليار. لو كانت الدولة هتحط 8 مليار كل سنة كانت هتعمل دا في 10 سنين.
لا دا لسة فيه 2000 كيلو في سينا كمان. يعني احنا لسة كمان هنعمل 2000 كيلو في سينا
المشروع التاني هو تنمية سينا
المشروع القومي التالت هو تنمية سينا
احنا مكناش بنتكلم كتير في الموضوع عشان أهل الشر.
لكن عايز أقولكم بيتصرف على سينا النهاردا - مش هيتصرف، بقول اتصرف وبيتصرف- أكتر من عشرين تلاتين مليار جنيه.. أكتر من عشرين تلاتين مليار جنيه.
أنا بتكلم سينا متكلمتش على أنفاق. شبكة الأنفاق أي حد هيعملها في الدنيا كان يعملها في 12 - 13 سنة.. يا خسارة.
كنت عشان أعمل النفق دا أعلن ع الشركات وآخد الإجراءات اللي بتتعمل تيجي الشركات تقدملي العروض بتاعتها والدراسات، آخد لي سنتين ثم أعمل معاهم مناقصة عشان آخدلي أحسن حاجة، آخد لي 6 شهور كمان أتعاقد، يعني عقبال ما نبتدي أول نفق يتحفر ياخد له 3 سنين.
أنا لسة بتكلم على سينا. معملناش كدا. إحنا قلنا هنعمل وعملنا بالفعل.
أول مكنة اتجمعت وتشتغل شهر 6 - الشهر الجاي - لحفر أول نفق، تاني مكنة بتتجمع وتشتغل في تاني نفق شهر 8، تالت مكنة وصلت وبتتجمع وتشتغل في شهر 10، رابع مكنة بتشتغل في شهر 12.
المشروع اللي هياخد 18 سنة و80 مليار جنيه 70 مليار جنيه بيتعمل ان شاء الله في سنتين. ان شاء الله في سنتين.
انتو كل كلمة بتقولوها بتقولوا عاوزين نهتم بالحاجة الفلانية. هي كلمة بتتقال لكن عشان يبقى اجراء تنفيذي على الأرض دا قصة كبيرة أوي. قصة كبيرج وجهد كبير بيتعمل.
وأنا بكلمكم ده عشان بس أربط سينا بمصر مش هي غالية علينا؟ وأرضنا اللي بنحبها؟ لابد ان احنا نعمل ده عشانها.
وأنا بكلمكم ده بتتعمل في سينا مزارع سمكية، 15 مصنع رخام، اتنين خط أسمنت، ومناطق صناعية أخرى، وأراضي زراعية تضاف مش أقل من ٢٠٠ ألف فدان. وأنا بكلمكو بيتم العمل دالوقتي لانشاء محطتين معالجة مياة كل محطة محطة منهم مليون لتر في اليوم عشان زي ما قال السيد وزير الري مفيش نقطة مياة ميتمش منها الاستفادة القصوى.
المحطة التانية لصالح ترعة السلام. المشروع اللي احنا كنا محتاجين نشتغله ونخلصه عشان نوفر مياه حقيقية تبقى سليمة او صالحة بنسبة ١٠٠٪ طبقا للمعايير للزراعة في سينا. بالاضافة لكدا، انا بتكلم على سينا، التجمعات الزراعية لأهل سينا.
يبقى بتكلم على شبكة أنفاق تربط، بتكلم على مواني، بتكلم على مطارات، بتكلم على مصانع للرخام، بتكلم على مصانع أو مصنع للأسمنت. دا مش مشروع قومي تالت ولا إيه؟
بكام؟ أنا بقول بكام وبقول كدا ليه؟
الراجل اللي قاللي، الناس اللي طلعوا م الشباك وقالولي متخافش، أنا اللي بقولهم أنتو اللي متخافوش. انتو متخافوش أبدا.
صحيح انتو اللي متخافوش.
شوفوا، طول ما المصريين موجودين ودايما على قلب رجل واحد، ودي نقطة دايما بأكد عليها، لازم كلنا نبقى دايما مع بعض، ونخلي بالنا ان فيه ناس دايما متحفزة وبتشتغل على أن هي تخلينا دايما مختلفين. خلي بالكم.
أرجع تاني للمشاريع.
أنا اتكلمت كدا في ٣ مشاريع، هتكلم على المحور الاقتصادي أو محور تنمية قناة السويس كمحور اقتصادي
واحنا بنتكلم دالوقتي خلاص الشركة اتعملت. كان المحور مفرداته قناة السويس اللي اتعملت في سنة.
أنا كنت قاعد مع مسؤول غربي كبير في زيارة من إحدى الزيارات، وهقولكو اللي قالهولي وتوقفوا عنده كويس. قاللي ادارتكو للأمور في مصر مثيرة للانتباة. إدارتكم للأمور في مصر والعمل في مصر مثيرة للانتباة. قلتله دانتو ناس متقدمين جدا عننا، وبتشتغلوا أفضل مننا بكتير، قاللي لا.
أنا مش بقول كدا عشان حاجة. بقول قناة السويس التوسعة دية كلها على بعضها الأموال اتدبرت من المصريين، والمصريين اللي اشتغلوا فيها، كلها خلصت في سنة.
بالمناسبة، من حوالي شهر ونص كدا فيه مركب كانت شايلة برادة حديد وحصلها عطل في القنال، وجزء من ال.. المركب شحطت نتيجة عيب مش من عندنا يعني. الموضوع دا اتعالج في أكتر من شهر. اتعالج في أكتر من ايه؟ من شهر.
الخسائر المتوقعة لو كانت القناة اتقفلت، علاوة على الآثار الأخرى، كان مليار و٦٠ مليون.
ولا حد حس بينا.. ولا حد حس بينا.. الملاحة ماشية لأن احنا عندنا حركة هنا وحركة هنا فمعندناش مشكلة. ان حصل لا قدر الله مشكلة الملاحة تمشي بنفس الريتم اللي كان.
أنا بقولكو كدا ليه؟ لأن بردو سمعت حد بيقول إيرادات القنال قلت. لأ طبعا. ولما أقولكو لأ طبعا يبقى دا كلام مسؤول. وإلا يبقى مفيش… لأ طبعا وزادت. واحنا بنتكلم في سنة مش حاجة تانية.
بالاضافة لكدا طبعا احنا بنتكلم عن المناطق الصناعية اللي شغالة دالوقتي. مينا شرق التفريعة اللي شغال دالوقتي. اللي كان ممكن أوي نتكلم في خمس ست سبع سنين وميكونش حد مد إيده فيه.
مينا السخنة اللي شغال دالوقتي اللي كان ممكن نقعد خمس ست سبع سنين ومحدش مد ايده فيه.
إحنا بنتكلم على فلوس كتيرة أوي أوي بيتم إدارتها لتحقيق الكلام اللي أنا بقوله دا. فدا المشروع الرابع لقناة السويس.
المشروع الخامس اللي عاوز أكلمكم عليه، هو مشروع الإسكان الاجتماعي
أنا كنت لسة بسأل السيد وزير الإسكان بقوله إجمالي الطلب لغاية دالوقتي كام؟
احنا مبقالناش أكتر من ١٥ يوم أتحنا دا للمواطنين يعني.. قاللي ٣٧٠ ألف.
احنا بنتكلم على مشروع إسكان اجتماعي ع الأقل ل٦٠٠ ألف مواطن بنقول ان احنا نسلم الجزء الأكبر منه في أبريل القادم. واحنا بنكلمكوا دالوقتي شركات المقاولات نزلت المواقع عشان تشتغب عشان تعمل دا.
هو دا مش عشان خاطر المواطن البسيط والعدالة الاجتماعية للانسان اللي مش قادر؟
وأنا بكلمكم بيتم النهاردا تنفيذ خطة لمعالجة العشوائيات الخطرة ع الأقل ب50 ألف وحدة سكنية.
بكام؟
أنا مش بتكلم دا عشان آاا أنا عاير اقول للمصري اللي بيقوللي أو المصريين اللي بيقولولي احنا خايفين أو بيقولولي متخافش بقوله لا. أنت اللي متخافش.
المشروع الخامس اللي عاوز اتكلم معاكو فيه، اتكلمنا دالوقتي على مشروع محطات معالجة المياة
وقالوا ان احنا عندنا محطات معالجة تكفي تقريبا ل٢٠ مليار متر، احنا بنتلم في مشروع قومي آخر هيبقى بين ال ٣،٦ مليار إلي ٧ مليار متر مكعب مياة في السنة. يعني لو عملنا ١٠ محطات هيبقى ٣،٦ في السنة وان عملنا ٢٠ محطة هيبقوا ٧ مليار.
أنا بقولكو الكلام ده عشان تعرفوا ايه اللي بيتعمل وأنا جمعته باختصار شديد جدا عشان بس أحطكم يا مصريين في الصورة وأطمنكم. المياة دي بتتعالج معالجة ثلاثية تخلي المياة زي المياة اللي بتنزل من الحنفية وممكن أفضل كمان.
الكلام دا احنا شغالين فيه بالفعل عشان بلدنا، وعشان الناس، وعشان الناس البساط. اللي هو الكتلة الكبيرة من المصريين اللي احنا بنتكلم عليها.
هكلمكم على مشروع تاني، المشروع القومي للكهربا. المشروع القومي للكهربا
أنا بذكره لكم عشان تعرفوا المشروع ده احنا ضاعفنا ضاعفنا الكهربا، يعني اللي كنا بندي ٢٦ - ٢٧ ألف ميجا احنا بنهاية المشروع دا هنكون ضاعفنا انتاجنا من الكهربا.
في قد ايه؟ بكام؟ بكام؟ أقولكو بكام؟
ب٤٠٠ مليار جنيه.
بكام؟
ب ٤٠٠ مليار جنيه. احنا بنتكلم على دولة مش بنتكلم على حاجة تانية. والدولة دي عشان تقوم وتقدر تتكلم.. في.. مع العالم، وتقوم من كبوتها، كبوتها اللي استمرت فترة كبيرة وتعاظمت الأحداث بتاعة ال٤ سنين اللي فاتوا كان لابد الجهد والعمل والقرار يكون بالمستوى ده.. يكون بالمستوى ده.
احنا بنعمل تقريبا ٦ مدن جديدة ودا السابع. المشروع القومي السابع
مدينة في شرق بورسعيد، مدينة الإسماعيلية الجديدة، مدينة السويس الجديدة، مدينة العلمين الجديدة، العاصمة الإدارية الجديدة، مدينة الجلالة.
بكام؟
بس أنا هقولكم كلمة واحدة تطمنكو. المدن اللي أنا ذكرتها دي فيها مليار متر أرض. مليار متر أرض. ألف مليون متر. لو المتر بجنيه - آسف.. لو المتر بألف جنيه أنا بتكلم في ألف مليار جنيه. أقول تاني؟ لو المتر بألف جنيه أنا بتكلم في تريليون جنيه.
دي الكلام اللي أنا بتكلم فيه دا، دا بدأ وشغالين فيه. ان شاء الله في شهر ٨ هنكون بنفتتح مزرعج سمكية على ٢٠ الف فدان في بركة غليون في كفر الشيخ. وخليني اتكلم في دي عشان تعوفوا الفكرة جاية ازاي؟
احنا كنا اتكلمنا مرة قبل كدا عن مدينة دمياط للأثاث. طب أنا النهاردا بعمل ال ٢٠ - ٢٥ ألف فدان مزارع سمكية بتقنية متقدمة بكل الصناعات المطلوبة ليها. اذا كانت عايزة مصنع علف يتعمل، اذا كانت عايزة مصنع تلج يتعمل، اذا مانت عايزة مصنع فوم يتعمل.. كل المطالب لاقامة هذه آاا المزرعة يعني.
ثم بعد كدا آجي أقول يا شباب، ياللي عايز تستثمر تعالى خد، حوض اتنين تلاتة. أنت مش هتتعب خالص. مش هتعمل أي إجراء غير انك أنت تاخد وتشتغل. العلف أهو، التلج أهو، التعليب أهو، النقل أهو، اشتغل أنت بس.
يا ترى أنا رحمته ولا عذبته؟
يا ترى أنا دخلته في البيروقراطية والفساد ولا أنهيت البيروقراطية والفساد؟
الكلام دا هيتعمل ان شاء الله في ٨ نفتتح المزرعجة بتاعة كفر الشيخ، في ١٠ نفتتح المزرعة بتاعة اللي هي ممر شرق التفريعة على حوالي ٢٥ ألف فدان.
اللي أنا بكلمكم عليه دا تكلفته اجماليها مليار و٣٠٠ - آااا تريليون و٣٠٠ مليار جنيه.
أنا مبخافش.. أنا مبخافش. لو خفت.. لو خفت ولا حاجة من الكلام اللي أنا بتكلم فيه دا تتعمل لا دالوقتي ولا بعد ١٠ سنين.
اللي أنا بكلمكم فيه دا لا تخلص لا دالوقتي ولا بعد ١٠ سنين.
الكلام دا كل جنيه فيه، كل جنيه فيه، أنا كنت موجود معاه عشان أضمن ان هو بيتحط في مكانه السليم. كل جنيه فيه في خلال السنتين اللي فاتوا دول، مسيبتش حاجة واحدة فيهم.
يقوم المليار دول أو التريليون آسف اللي أنا بقول عليهم دول، ينزلوا من تريليون و٤٠٠ مليار لـ تريليون و٤٠ مليار. يا ترى أنا كافحت فساد ولا مكافحتش؟
أنا حبيت أقول الكلمتين دول في المناسبة الجميلة دية اللي هي بتدي أمل للناس أن فيه بكرة، بكرة أحسن وأفضل.
فيه مشروع قومي آخر أنا متكلمتش فيه ومش هقدر أتكلم فيه
لأنه قصة تانية.. قصة تانية. الدولة دي لازم تبقى دولة حقيقية.. دولة حقيقية.. احنا مش في دولة حقيقية. خلي بالكم، طلوا على بلدكوا صحيح، دي أشباه دولة مش دولة حقيقية.
احنا بنتكلم على دولة دولة قانون، دولة مؤسسات، دولة بتحترم نفسها والعالم بيحترمها، واوعوا تفتكروا ان الكلام دا هيتعمل والناس هتسيبنا، لأ.
الناس مش هتسيبنا. بقولكو تاني الناس مش هتسيبنا. وكل ما هتنجحوا أكتر كل ما أهل الشر هيدوروا على مكايد أكير وهيعملوا تخطيط أكتر فخلوا بالكو.
أنا حبيت أرد على الناس البسطاء اللي قابلوني في اسكندرية وقالولي (مقاطعة من القاعة) لو سمحتو لو سمحتو.. انا بس عايز اقولكم على حاجة.. اسمعوا اسمعوا..
اسمعوا من فضلكم. تحيا مصر بالناس، تحيا مصر بكل أهلها، ولازم نخلي بالنا من النقطة دية، تحيا مصر بكل أهلها.. كل أهلها.. ولازم نكون كلنا كدا كلنا كدا، ولو سمحتو احنا مش.. لا يمكن أبدا نسمح بالاختلاف بيننا وبين بعض.
وانتو كمان لا تسمحوا بالاختلاف أبدا. مصر هتبقى قوية مش بيا أنا. مصر هتبقى قوية بيكو انتو، بعملكو انتو، بوحدتكو انتو، باصراركو انتو، بفهمكم.. تبقوا عارفين ايه اللي بيتعمل ليكو يا مصريين، كل المصريين.
أنا بشكركم، وبشكر كل من ساهم في عمل للبناء وللتعمير في مصر وإعطاء أمل لكل المصريين وأرجو أن شركة الريف المصري اللي احنا النهاردا منتظرين بقالنا خمس شهور اجراءات طرح المشروع. عندكم فرصة أنكم تجيبوا الناس ييجوا هنا يشوفوا ومن خلال اللي احنا شفناه النهاردا والاعلان عنه نبتدي نطرح على المستفيدين من المشروع المليون ونص فدان بحيث أن احنا خلال سنة تبقى المليون ونص فدان زي كدا.
أرجو أن احنا منتأخرش أكتر من كدا.