نص مداخلة السيسي على قناة cbc مع الإعلامي عمرو خليل 21/3/2022
عمرو: طيب، يا ست محروسة خليكي معايا، خليكي معايا.. معانا على التليفون دلوقتي السيد الرئيس عبد الفتاح السيسي رئيس الجمهورية.
خط الرئاسة: سيادة الرئيس يا فندم.
عمرو: مساء الخير يا فندم... طيب، هايكون معانا حالًا السيد الرئيس عبد الفتاح السيسي، الحقيقة، وأنا الحقيقة يعني بشكر سيادة الرئيس شكرًا جزيلًا يعني على الاستجابات الإنسانية، ودايمًا بيبقى لينا الشرف يعني إن يتم الاستجابة للسيدات المصريات الفضليات، يعني من خلال متابعة السيد الرئيس لهذه الحالات، واحدة منهم الست محروسة، وأنا بقولك يا حاجة محروسة والله، والله أنا بقولهالك، أنا.. يا رب.. طيب، السيد الرئيس عبد الفتاح السيسي معانا، مساء الخير يا فندم. ألو... ألو...
خط الرئاسة: اتفضل يا فندم.
عمرو: ألو.
السيسي: سلامو عليكم.
عمرو: وعليكم السلام ورحمة الله وبركاته يا فندم.
السيسي: ماهو مش ممكن أبدًا إن هي، يعني، أقول الست محروسة، أو أقول اختي، أو أقول بنتي.. تقول، يعني إنها نفسها إن أنا، إن أنا يشرفني إني أكلمها، ده أنا اللي يشرفني إن أنا أكلمك يا بنتي. وبعدين...
محروسة: ربنا يخلي سعادتك يا سيادة الريس.
عمرو: يا ست محروسة اتكلمي.
محروسة: أنا، أنا بسمع سعادته والله.. بسمع معاليه.
السيسي: خليني الأول إن أنا أهنيكي وأقولك يا بنتي ربنا يجبر خاطرك ويعينك ويوفقك ويطرح البركة في جهدك، وتشوفي ده في أولادك، وفي (جملة غير واضحة) إن شاء الله.
واسمحيلي إن أنا، يعني، إن أنا كل اللي إنتي بتتمنيه، إن أنا كبنت ليا، إن أنا أقف جنبك يعني، وأقولك، والله، الست المصرية دايمًا مثل عالي وراقي، ونموذج محترم، وأنا متشرف إن أنا بكلمك دلوقتي والله. متشرف بيكي وبجهدك.
محروسة: أنا اللي، يعني، أنا اللي الدنيا مش سايعاني يا سيادة الريس إن أنا بسمع حضرتك دلوقتي وبكلم معاليك، ومش عارفة أقول لحضرتك، والله العظيم أنا حاسة إن قلبي هايقف من كتر الفرحة...
السيسي: ربنا يديكي الصحة.. لا لا.. لا..
محروسة: وماكنتش متخيلة إن أنا، إن إنا أوصل وإن أنا أسمع صوت معاليك.
السيسي: لا ده أنا تحت أمرك.
محروسة: والله العظيم بجد يعني ربنا يجازيك مليون خير، ربنا يجازيك...
السيسي: ربنا يجازيكي الخير.
محروسة: محروسة يا سيادة الريس.
السيسي: أنا عارف، أنا عارف.
محروسة: ربنا يجازي معاليك ألف خير.
السيسي: وأحمد و.. مش كدا؟
عمرو: ونورهان، أحمد ونورهان يا فندم.
السيسي: مش كدا ولادك؟
محروسة: معايا، معايا نورهان وأحمد.
السيسي: آه، ربنا يخليهملك، وتفرحي بيهم مهندسة..
محروسة: ويخلي معاليك.
السيسي: وتفرحي بيه إن شاء الله ظابط قد الدنيا.
محروسة: في حياتك.
السيسي: بأمر الله. المهم أنا عايز..
محروسة: في حياتك، في حياتك يا سيادة الريس..
السيسي: آه، وأنا لما قلتلك...
محروسة: ربنا يبارك في معاليك يا رب، ربنا يبارك فيك.
السيسي: ويبارك فيكي، ويبارك فيكي.. وأنا عايز أقولك على حاجة بقى.
محروسة: ربنا يباركلنا في معاليك.
السيسي: إنتي كمان، إوعي تحرمينا من دعواتك الطيبة، إوعي تحرمينا من دعواتك.
محروسة: والله بدعي لمعاليك، ربنا يبارك فيك يا رب، ربنا يباركلك في معاليك يا رب.
السيسي: يا رب يقبل، آمين، يا رب يقبل.
محروسة: ربنا يبارك معاليك.
السيسي: ربنا يتقبل منك ويباركلك.
محروسة: ربنا يبلغ معاليك رمضان وحضرتك في أحسن صحة وحال يا رب.
السيسي: جميعًا، جميعًا، جميعًا.. المهم أنا سعيد و..
محروسة: يا رب، يا رب..
السيسي: وبهنيكي وبقولك إنتي نموذج جميل لكل ست مصرية والله.
محروسة: ربنا يخلي معاليك يا سيادة الريس يا رب، ربنا يخلي معاليك.
السيسي: بجهدك وعملك وأصلك، أصلك الكريم..
محروسة: ربنا يخلي معاليك يا سيادة الريس.
السيسي: وأسمحيلي أقولك إن كل شيء إن شاء الله يعني، آآ إحنا هانعمل كل شيء مطلوب حاضر.. حاضر.
عمرو: متشكرين جدًا يا فندم.
السيسي: لااا...
محروسة: جازاك الله كل خير يا سيادة الريس، ربنا يبارك في معاليك وفي أسرتك الكريمة، وربنا يدي حضرتك الصحة والعافية يا رب ويبلغك رمضان..
السيسي: جميعًا، جميعًا، جميعًا.
محروسة: ويبعد عنك كل حاجة وحشة يا رب.
السيسي: آمين يا رب جميعًا، جميعًا.
محروسة: يا رب، يا رب يكفيك شر كل حاجة وحشة يا رب.
السيسي: جميعًا، جميعًا، جميعًا.
محروسة: يا رب ويجازيك ألف خير، ومش عارفة ، يعني، يا رب يـ.. يعني، بجد والله أنا سعيدة جدًا إن أنا كلمت معاليك، وهافضل، يعني، أنا.. أنا هافضل مكالمة حضرتك دي بيتهيألي هاتفضل على طول، على طول معايا كدا مش هاعرف إن أنا أنام ولا أقعد ولا أعمل أي حاجة من كتر الفرحة يعني.
السيسي: لا لا (يضحك الرئيس) إحنا عايزينك، عايزينك تنامي وتصحي وترتاحي وكل حاجة، إنتي بتشقي يا بنتي، بتشقي، وربنا يعوض عليكي.
محروسة: ربنا يبارك في معاليك.
السيسي: يا رب يعوض عليكي، يعوض عليكي.
محروسة: ربنا يبارك في معاليك يا رب ويجازيك. ربنا يجازك خير. والله العظيم أحلى، أحلى حاجة سمعتها، عايزة إن أنا أطمن على معاليك وإن أنا أتواصل بمعاليك بس والله، والحمد لله، الحمد لله، ربنا يجازي معاليك.
السيسي: الحمد لله، رضاكوا يا بنتي هو ده، هو ده الأمل اللي عندي إن أنا أقدر أكون سبب في إرضاء الناس، وإسعاد الناس.
محروسة: ربنا يرضى عنك ويراضيك يا سيادة الريس ويجازيك ألف خير يا رب.
السيسي: آمين يا رب.
عمرو: الحقيقة يا فندم...
السيسي: ربنا وحده اللي يعلم، يعني، هي دي الأمنية اللي عندي، وده الحلم وربنا.. وده يعني ليس على الله بكثير يعني، وهو عليه هين يعني، ربي يعينا على ذلك، يا رب يعينا على ذلك. مش عايز أطول أكتر من كدا...
عمرو: الحقيقة هي كان طلبها إن هي تبعت الرسالة...
السيسي: نعم؟
عمرو: هي كان كل طلبها بس إنها تبعت لحضرتك الرسالة وإنها تتواصلك مع حضرتك.
السيسي: لا لا.. هي تطلب وتؤمر وإحنا ننفذ.. تطلب وتؤمر وإحنا ننفذ.
محروسة: ربنا يكرم معاليك يا رب.
السيسي: ربنا يخليكي.
محروسة: ربنا يكرم معاليك يا رب، ربنا يكرم معاليك، ربنا يكرم معاليك يا سيادة الريس.
السيسي: ربنا يخليكي.
عمرو: كنت بسألها يا فندم إن هي نموذج في الاجتهاد وفي التعب وإنها تتحمل هذه المسؤولية..
السيسي: صحيح..
عمرو: فبقولها دي رسالة، فأكيد بردو أنا عايز من حضرتك رسالة نوجهها للناس، فكرة إن الناس تتحمل مصاعب الحياة، وإنها تشقى عشان خاطر تأدي المسؤولية والأمانة اللي عليها.
السيسي: أنا اسمحلي أقولك، يعني أنا، يعني أنا مش، يعني مش هازيد أكتر من كدا عليها، لأن هي.. الرسالة واضحة..
عمرو: مظبوط يا فندم.
السيسي: الرسالة واضحة، يعني إنسانة تحدت ظروفها الصعبة، وتحدت، تحدت تحديات كبيرة في حياتها، في زوجها المريض، في ولادها اللي بتتعلم، في ظروفها هي الشخصية حتى، وأقبلت على الدنيا بإرادة طيبة. وربنا سبحانه وتعالى وفقها وخلاها ترضى، خلاها تبقى راضية، وخلي بالك الرضا ده، يعني أنا سامع لما كانت بتقول بتاكل ال، يعني كلت، يعني.. يعني وكان الأكل اللي بتاكله ده رغم إن هو بسيط، لكن كان زي الشهد. طبعًا. لأن اللي بيعمل ده كله، صاحب الوجود..
عمرو: مظبوط يا فندم.
السيسي: هو اللي بيخلي الناس تبقى متنعمة بالقليل، أو متعذبة بالكتير.
عمرو: صحيح. صحيح.
السيسي: بس هي طبعًا.. فـ.. هي الرسالة واصلة، واصلة لكل الناس أفتكر، مش محتاجة مني إن أنا أقول حاجة لحد. شوفوا واتفرجوا.
عمرو: أكيد يا فندم.
السيسي: يعني أنا بقول للناس كلها، ولنفسي، اتفرج وشوف. ربنا يا بنتي يحميكي ويكرمك ويعينك ويسترك ويراضيكي، ويعوض عليكي. وإحنا تحت أمرك، تحت أمرك.
محروسة: الحمد لله، ربنا يجازيك خير يا سيادة الريس يا رب ويكرم حضرتك.
السيسي: كتر خيرك، كتير خيرك.
عمرو: متشكرين جدًا، متشكرين جدًا لوجود حضرتك، وشرف لينا.
السيسي: ودعواتك الطيبة لينا من فضلك يعني.
عمرو: الله يخليك يا فندم.
السيسي: دعواتك الطيبة من فضلك.
محروسة: طبعًا أكيد يا سيادة الريس، ربنا يبارك في معاليك يا رب، ربنا يبارك في معاليك يا رب.
السيسي: طيب، طيب يا ست محروسة، إن شاء الله محروسة إن شاء الله.
عمرو: متشكرين جدًا لحضرتك يا فندم، شكر جزيل السيد الرئيس عبد الفتاح السيسي رئيس الجمهورية، متشكرين جدًا يا فندم لوجود حضرتك معانا.
السيسي: كل سنة وإنتوا طيبين.
عمرو: وحضرتك بخير يا فندم وبصحة وسلامة.
السيسي: طيب، طيب.
عمرو: متشكرين لسيادتك.
السيسي: سلامو عليكو.
عمرو: وعليكم السلام ورحمة الله وبركاته، مع السلامة يا فندم.
عمرو: يعني واضح النهارده كمان يوم سعد، الرئيس عبد الفتاح السيسي الآن وإحنا بنكلم حضراتكم استجاب لطلبات الست جيهان منصور. يا ست جيهان.. يعني إحنا كنا بنعيد المداخلة اللي السيد الرئيس استجاب فيها لطلبات الست محروسة، ودلوقتي كمان والله، وأنا بقولك إن شاء الله طلباتك تكون وصلت.. دلوقتي حالًا عرفنا وبُلِّغنا إن الرئيس عبد الفتاح السيسي بيستجيب لطلبات الست جيهان.. يا ست جيهان، يعني ألف مبروك.
جيهان: نعم.
عمرو: ألف مبروك الرئيس استجاب إن شاء الله لطلبك.
جيهان: الله... نفسي نكلمه.
عمرو: نفسك تكلمي الريس؟
جيهان: نفسي نكلم الريس.
عمرو: مش عارف بإيدي دي ولا لأ (يضحك)
جيهان: إن شاء الله.
عمرو: نعم.. يا ست جيهان (يضحك)
جيهان: نعم؟
عمرو: طب مبدئيًا، طب لغاية ال، مش عارف، بس مبدئيًا طلب حضرتك بُلّغنا إن إحنا نقول لحضرتك إن شاء الله مبروك وطلبك مجاب في الوظيفة أو الشغل يعني بدل شغلانة الكاوتش، محل الكاوتش اللي إنتي شغالة فيه. يعني مبدئيًا كدا، رأيك إيه؟ (يضحك)
جيهان: عايزة حاجة تريحني.. بس، عاوزة حاجة تريحني من المرمطة، ونفسي نكلم الريس عبد الفتاح السيسي.
عمرو: بردو مُصرّة، لازم تكلمي الريس..
جيهان: والله أنا عالهوا وبنقولك نفسي نكلم.. نفسي نكلم الريس.
عمرو: طيب، أنا كمان والله، بس يعني، بس.. طيب.. طيب.. مرة تانية برحب بالسيد الرئيس عبد الفتاح السيسي رئيس الجمهورية، مساء الخير يا فندم مرة تانية.
خط الرئاسة: اتفضل يا فندم.
عمرو: مساء الخير يا فندم مرة تانية.
السيسي: لا أهلا وسهلا.
عمرو: أنا آسف والله.
السيسي: لا ليه؟ ليه؟!
عمرو: أنا آسف.
السيسي: ليه؟ يا رب ال.. طبعا الست جيهان لما تقول عايزة أكلمه لازم أنفذ.
عمرو: ياه ربنا يبارك في حضرتك يا رب، ويجبر بخاطرك.
السيسي: لا، لا، لازم...
جيهان: أهلا بيك يا سيادة الريس.
السيسي: أهلا بيكي، وبعد كل اللي إنتي عملتيه..
جيهان: أهلا بيك يا سيادة الريس ومنور.
السيسي: اتفضلي، اتفضلي، اتفضلي، اتكلمي.
جيهان: سيادة الريس، أنا بشكرك بشكرك بشكرك بشكرك، إنت يا سيادة الريس معيشنا في أمن وأمان..
السيسي: ده أنا اللي بشكرك بشكرك بشكرك على اللي إنتي عملتيه.
جيهان: أنا بشكرك بشكرك لن أنا ده إنت معيشنا في أمن وأمان، ونفسي يا سيدة الريس إن أنا نلاقي مشروع نرتاح من المرمطة الشاقة اللي أنا فيها دي يا سيادة الريس.
السيسي: على عيني حاضر.
جيهان: سيادة الريس أنا ماعادش قادرة، إن البيت اللي أنا فيه بالإيجارات ومافيش أي دخلات عندي يا سيادة الريس.
السيسي: على عيني حاضر.
جيهان: نتمنى، أنا معايا بت يتيمة، معايا بت يتيمة، اللي أخويا سابهالي.
السيسي: على عيني حاضر، على عيني حاضر.
جيهان: تسلم عينك تسلم عينك يا سيادة الريس..
السيسي: حاضر، حاضر..
جيهان: تسلم عينك يا سيادة الريس.
السيسي: ماتشيليش هم..
جيهان: وربنا يخليك ويبارك فيك.
السيسي: وعايز أقولك على حاجة..
جيهان: نعم..
السيسي: اللهم آمين اللهم آمين اللهم آمين. عايز أقولك على حاجة.
جيهان: ربنا يخليك ويبارك فيك ويحميك.
السيسي: جميعًا، جميعًا، بدعواتكوا الطيبة إحنا عايشين. المهم أنا عايزك ماتشيليش الهم، وبشكرك على اللي ربتيهم واللي جوزتيهم، واللي بتربيها، و.. أجرك كبير قوي قوي عند ربنا، وعشان كدا أي حاجة بتطلبيها ربنا بيستجيب، وكان صعب عليا قوي إني أسمعك بتقولي عايز أكلمه وما.. ما أقدرش، ما أقدرش.. حاضر، وليا الشرف، وليا الشرف.
عمرو: هي ال.. الست جيهان مش عارف يا فندم إذا كانت سامعانا لسه ولا لأ.. سامعانا يا ست جيهان؟ طيب، بنخلي ال.. طيب، طيب لحينه يا فندم أنا بس حضرتك إذا أذنتلي يعني عندي سؤال، أنا يوم الجمعة اللي فات حضرتك كان في حرص إن حضرتك تسمع من السيدات، من ست يعني، والدة.. (يتحشرج صوته) آسف.. (يشرب من كوب الماء)
السيسي: ألو..
عمرو: أيوة يا فندم.. عفوًا يا فندم.. أنا آسف يعني..
السيسي: لا لا أبدا اتفضل.
عمرو: الحرص يا فندم على السماع من الناس، في حرص عند سيادتك دايمًا بده.
السيسي: طبعًا.. ليه..
عمرو: آه.. اتفضل يا فندم.
السيسي: أنا مسؤول عنهم، وعشان كدا ما أقدرش أبدا أغفل أو يعني أتجاوز أي حاجة بتيجي قدام عيني، ما أقدرش، عشان هاتحاسب، هاتحاسب من ربنا سبحانه وتعالى، يقولي شوفت وطنشت، شوفت وسكت، ما أقدرش. طب هل في مشاكل أكتر من كدا؟ أكيد. هل في بيوت كتير وناس كتير في مصر عندهم مشاكل كتير؟ أكيد بس عالأقل اللي أشوفه، أساعد في حله، وأتمنى إن إحنا كلنا، كمصريين يعني، وكمسؤولين، تبقى يعني كلنا بنبقى، يعني نبقى عارفين إن اللي هايخفف عن حد ربنا هايخفف عنه. وهايجي علينا يوم نقف قدام ربنا، ويمكن كلمة وشفاعة من، من أخت زي ال..
عمرو: الست جيهان.
السيسي: جيهان، أو..
عمرو: محروسة، الست محروسة.
السيسي: الحاجة محروسة، أو أي حد تاني، ممكن تكون دي يعني، تبقى شفاعة طيبة، تقول والله يعني، لما شافنا ما.. حاول يحل، وحاول يساعد. فربنا رب، لكن أنا والله، ربنا وحده اللي يعلم، أتمنى إني أعمل كل ده مع الناس كلها، بحيث مافيش حد محتاج، ولا حد محووج، بس إحنا ظروفنا صعبة قوي، وخلوا الناس الطيبة تدعي إن ربنا يفرجها علينا، ولما يفرج علينا هانفرج عالناس كلها، مش هانسيب حد، إحنا ماوراناش غير كدا.
فـ.. الحاجة جيهان وغيرها، كتير، عشرات الألوف ويمكن مئات الألوف، إحنا مش شايفينهم، ويمكن صوتهم مابيوصلناش، لكن ربنا يعلم إن أنا شايفهم وحاسس بيهم وبجري على قد ربنا ما يقدر.
عمرو: عشان كدا يا فندم كانت توجيهات سيادتك النهارده في الاجتماع بمراعاة ده في الموازنة الجديدة بالنسبة لأهلنا، أهلنا يعني من محدودي الدخل والظروف الصعبة دي، والتخفيف عن الناس في الظروف دي.
السيسي: شوف أنا عايز أقولك على حاجة.
عمرو: اتفضل.
السيسي: إحنا، يعني، يعني جهد الدولة.. جهد الدولة ده أقصى ما يمكن عمله، ولكن أقصى ما يمكن عمله غير كافي.. غير إيه؟ غير كافي.. أنا اللي بقول. ماهو إحنا، عايزين نكون أمناء مع نفسنا ومع قضيتنا.
عمرو: صحيح.
السيسي: قضيتنا إحنا مواردنا ودخلنا مش على قد ال، حجمنا، مش على قده خالص، وأنا قلت..
عمرو: العدد يعني.
السيسي: آه طبعا، طبعا.. ثم حتى، حتى مرتبات الناس ودخلهم مايتناسبش مع حياة كريمة للأسر وللبيوت، والدنيا أهي ماشية، لكن.. إحنا بنبذل أقصى جهد وربنا وحده اللي يعلم، عشان نحاول نحسن أوضاعنا، ويبقى في شغل في البلد.
لكن صدقني، عدد سكانا طول ما هو بيزيد بالطريقة ديت، المشكلة هاتبقى دايمًا صعبة، وإيجاد حل ليها عايز توفيق كبير من ربنا.
أنا يمكن لما بتكلم على، مع الناس في الشارع وبكلمهم وكدا، مابعرضش أبدا النقطة ديت عشان مش وقته، حد بيشكيلي همه مش هاقوله بقى أولادك قد إيه ولا، مش هاينفع.
عمرو: صحيح.
السيسي: فبسمعهم وأخفف وخلاص. لكن إحنا بنتكلم على دولة بنظام الدولة، ما إحنا عندنا تكافل وكرامة، داخلة في 3.7 مليون أسرة.
عمرو: مظبوط.
السيسي: يعني ده الرقم اللي بديهولهم مش كبير، لكن لما تيجي تشوفه على بعضه حوالي 19 ونص مليار جنيه. وبنحاول نزود أكتر.
عمرو: مظبوط يا فندم.
السيسي: شريحة أكتر، وبنحاول إن إحنا في إجراءات هاتُعلن خلال اليومين اللي جايين، خاصة بـ، يعني، بإجراءات تنمية اجتماعية أخرى، عشان نواجه التطورات اللي بتحصل في العالم. واللي يهمنا هنا إن التطورات دي مش بإيدينا إحنا، لكن تأثيرها علينا إحنا.
عمرو: طبعا.
السيسي: يعني هي تطورات مش بإيدينا، لكن تأثيرها علينا. النهارده بنتكلم في أسعار قمح وبنتكلم في أسعار وقود وبنتكلم في حركة تجارة متلخبطة، بنتكلم في أزمات كبيرة، العالم مابقاش لوحده، مابقاش منفصل، العالم متصل ببعضه.
عمرو: مظبوط يا فندم.
السيسي: وتأثيرات الأمور دي كلها بتبقى على الكل. فإحنا يعني، وكورونا لسه خارجين من كورونا، وقلنا يمكن نخرج من كورونا نبتدي بقى نتحرك عشان نحسن أوضاعنا..
عمرو: صحيح، صحيح.
السيسي: لكن ربنا سبحانه وتعالى شاف إرادته إن يبقى في أزمة تانية، وربنا يا رب يعديها على خير. لكن اللي انا عايز أقوله للناس يعني.. إحنا بخير، والأمور ماشية كويس، وعندنا يعني الأساسيات المطلوبة متوفرة ومتوفرة كويس.. بعدد شهور مناسب، أنا وده أمر أنا حرصت عليه خلال السنين اللي فاتت إن دايمًا يكون موجود عندنا احتياطي مناسب يكفي 3 ، 4 شهور على الأقل، عشان نجابه بيه أي تطور، ونقدر نعمل الإجراء المناسب في الفترة اللي هي يعني إيه، مابين ال 3 ، 4 أشهر، عشان لو في إجراء نعمله خلال ال 3 ، 4 أشهر.
عمرو: صحيح، صحيح.
السيسي: فالحمد لله مافيش عندنا نقص في السلع، لا أساسية.. أي نقص.. لا زيت ولا رز ولا سكر ولا شاي ولا..
عمرو: مظبوط يا فندم.
السيسي: ولا أي حاجة، الحمد لله.
عمرو: لولا صوامع القمح يا فندم ما كناش نقدر نخزن في وقت أزمة زي دي، اللي هو مشروع الصوامع.
السيسي: آآ.. يعني أنا عايز أقول على حاجة، يعني الموضوعات دي هاييجي علينا وقت نتكلم فيها بشكل..
عمرو: أكيد..
السيسي: يعني أكتر مع بعض يعني.. شوفوا.. إحنا لما جينا نجري نتحرك في المشروعات القومية ديت، كتير من الناس كانت بتقول لازمته إيه يعني؟ إنتوا بتصرفوا كتير قوي في الكلام ده.. لكن عايز أقولك إنك إنت الصوامع ديت كانت بتحافظ على من 15 ل 20% من الفاقد سنويا. فإنت لو كنت بتتكلم في 16 ، 17 مليون طن، فلما تيجي تقول 10% منهم يعني كام؟ يعني حوالي مليون و700 ألف.
عمرو: مليون و700 ألف طن.
السيسي: بكام؟ فلما عملنا ده أولا حاجة آدمية، لا فيه قوارض ولا فيه حشرات تأثر عالحاجة ديت.
عمرو: صحيح.
السيسي: ولا في فساد.. يعني، لأ، فالحمد لله إحنا عندنا كمية حوالي 5.7 مليون طن، وشغالين بردو، يعني إحنا بنعمل صوامع تاني.
عمرو: مظبوط.
السيسي: آه، هانعمل تاني، وبنعمل يعني إجراءات للتوسع في زراعة القمح.
عمرو: مظبوط.
السيسي: هاتزيد خلال السنتين اللي جايين دول بمعدل مليون فدان. عشان نحاول نقلل ما أمكن من الاعتماد على الخارج. لكن يبقى نقطة، يعني، هو يعني إذا كنتوا، يعني، هل النقطة هي فقط توفير ال، السلع الأساسية للناس؟ ولا تحسين حياة الناس؟ أتصور إحنا محتاجين نعمل الاتنين: السلع الأساسية، وحياة الناس.. في التعليم وفي الصحة وفي الإسكان وفي كل شيء من مناحي الحياة اللي إحنا فيها.. في التشغيل.. فإحنا حتى المشروعات اللي إحنا شغالين فيها دلوقتي، الهدف منها إن هي تدي فرص تشغيل لكل الناس، يلاقي حاجة آخر النهار يخش بيها على ولاده. فحجم العمل اللي موجود، يعني، البلد هو اللي أتاح الفرصة إن أنا أضخ أموال لناس أنا مش هاشوفها، مش هاقدر أوصلها، بوصلها من خلال الشركات اللي معينينها وبتجيب ناس تشتغل.
مش عايز أطول عليكوا أكتر من كدا عشان ما أسهركمش. لكن...
عمرو: لا إحنا متشكرين يا فندم وآسفين للإطالة.
السيسي: لا أبدًا أبدًا أبدًا.. فـ.. صدقني والله أنا مابـ.. على عيني اللي إحنا فيه.. وربنا وحده اللي يعلم..
عمرو: ربنا يقوي سيادتك يا فندم.
السيسي: يقوينا جميعا إن شاء الله.
عمرو: يا رب إن شاء الله ربنا يقوي سيادتك يا فندم ويحفظك.
السيسي: شكرا يا أستاذ عمرو.
عمرو: متشكر جدًا لحضرتك يا فندم، كل الشكر، كل الشكر لسيادتك.
السيسي: كتر خيرك، تصبح على خير.
عمرو: وحضرتك من أهل الخير.
السيسي: شكرًا، سلامو عليكو.
عمرو: كل الشكر لسيادة الرئيس عبد الفتاح السيسي، وعليكم السلام ورحمة الله وبركاته.
تمت المداخلة التليفونية من الرئيس عبد الفتاح السيسي في برنامج الإعلامي عمرو خليل على قناة cbc حيث لبى الرئيس نداء كل من السيدة محروسة والسيدة جيهان.