نص تعليقات السيسي على أصحاب المشاريع أثناء تفقد معرض تراثنا 9/10/2021
تعقيب السيسي على الفائزين بجائزة أفضل 3 مشروعات حرفية وتراثية
وزيرة التضامن: إحنا بمناسبة معرض تراثنا، عملنا مسابقة لمبادرة حياة كريمة، بنحفزهم إن هم يشتركوا معانا، فتقدم 20 مشروع من القرى المستهدفة لمبادرة حياة كريمة في المسابقة.
اختارنا أحسن 3 مشروعات من اللي سيادتك تفقدتهم. حرصنا إن إحنا وإحنا بنختار إن إحنا نميزهم من خلال القدرات التنافسية للمنتجات. المحافظة على التراث الإنتاجي للقرية. ارتفاع درجة الاعتمادية على العمالة لعملية التصنيع، بما إن هو سيادتك حرفي.
فسيادتك فاز معانا 3. الأولى السيدة عبير سالم، وهي متميزة في تصنيع اللوحات الزيتية، من محافظة الفيوم. التانية السيدة جميلة، متميزة في تصنيع المشغولات اليدوية، محافظة سوهاج. الثالث أحمد وليد مختار، من محافظة الغربية، وهو ده شاب خريج فنون جميلة، ما زال لسه حديث التخرج، ولكن استغل اللي هو اتعلمه في إن هو يبقى صاحب مشروع.
وأنا هاستأذن حضرتك، بعد إذن حضرتك إن إحنا هانديهم 3 جوائز مقدمة لمساعدتهم في استكمال مشروعاتهم.. بعد إذن سيادتك.
الفائزة الأولى ب 50 ألف جنيه
وزيرة التضامن: شيك بـ50 ألف.
السيسي: (ناظرا إلى الفائزة) خمسين بس؟
وزيرة التضامن: خمسين.
السيسي: (مبتسما) خمسين بس؟
وزيرة التضامن: (تضحك) عينينا (تصفيق) طب قولي لفخامة الرئيس إنتي ناوية تعملي بيهم إيه؟
الفائزة الأولى: في قرية جنبنا، قرية تونس، قرية سياحية جميلة، نفسي أفتح فيها ورشة عمل وأساعد بيها كل القرى اللي أنا عايشة فيها. وأي حد عايز يتعلم نطور ونكمل أفكارنا بعضينا، ونبقى إيد واحدة، ونساهم في إن إحنا نساهم في المشروعات الصغيرة، دي أنا بحيي كل واحد بيعمل حاجة بإيده، يعني، وبحيي حضرتك بمبادرة حياة كريمة الجميلة، اللي نورت الصعيد كله ونورت القرى الريفية كلها.
وبحيي كل واحد شغال في هذه المبادرة والصندوق وتنمية المجتمع والجهاز كله وقف معانا حضرتك وساعدنا إن مشروعنا يخرج للنور.
يعني حضرتك فتحت لنا طاقة أمل في الريف المصري إن إحنا يبقى في تواصل بينا وبين الناس وفي حاجات جميلة قوي بتحصل. مبادرة حياة كريمة دي عملت فرحة في كل الريف المصري، إن كل واحد يطلع عارف حاجة يعملها، يعملها. عايزين نقضي على البطالة نشتغل من جوة بيوتنا، يعني نقدم حاجة للبلد، نساعد.
السيسي: أنا بشكرك.. بشكرك.. وإحنا..
الفائزة الأولى: شكرا لمقابلتك جدا جدا جدا، أنا سعدت بمقابلة حضرتك جدا جدا جدا.
السيسي: لا لا، أنا اتشرفت بيكي، لا لا لا.. كتر خيرك.
الفائزة الأولى: والله أنا ماكنـ.. يعني مش هاوصفلك سعادتي قد إيه.
السيسي: لا لا لا.. إحنا هانعملك المركز التاني اللي هي عايزة تعمله ده، وإنتي..
الفائزة الأولى: أنا عايزة ورشة عمل في تونس حضرتك.
السيسي: حاضر هانعملهالك.. هانعملهالك إحنا.. حاضر.. حاجة تاني؟
الفائزة الأولى: شكرا شكرا شكرا جدا. (تصفيق)
...
الفائزة الثانية ب 30 ألف جنيه
السيسي: إنتي عندك.. إنتي معاكي 4 يتيمات؟
الفائزة الثانية: آه
السيسي: 4 يتيمات..
الفائزة الثانية: 4 يتيمات وفيهم واحدة يتيمة الأم والأب واخدة 3 دبلومات، وواحدة واخدة خدمة اجتماعية، وأرجو من حضرتك إنك تعينها، والتانية واخدة كلية لغة عربية.
السيسي: الـ4 دول ولادك؟
الفائزة الثانية: الـ3 ولادي، ودي بنت أختي، أنا خدتها.. أمها وأبوها اتوفوا.
السيسي: الله يرحمهم.
الفائزة الثانية: ودولا اخوات بعض هما الـ4
السيسي: طيب، إحنا هانديلها كام؟ 30؟
وزيرة التضامن: 30 (ألف جنيه)
السيسي: لا لا لا، مش هاينفع 30.. هانديكي.. هانضاعف المبلغ ده.
الفائزة الثانية: أشكرك خالص.
السيسي: لااااا لا...
الفائزة الثانية: ربنا يبارك فيك.. ربنا يبارك فيك.. ربنا يبارك فيك يا رب، ويبارك لمصر فيك يا رب، ويبارك فيكم كلكم.
السيسي: متشكر.. كل سنة وإنتي طيبة.
صاحب مشروع 1 (من ذوي الهمم):
صاحب المشروع: فكرت إن أنا أعمل تدريبات لذوي الهمم إن إحنا نعلمهم شغل الخيامية وشغل الهاندميد وشغل الخشب، بحيث إن هم يبقى ليهم دخل خاص بيهم. وبدأنا نجيب مدربين ونشغلهم، ونسوق لهم كمان المنتجات بتاعتهم.
ونفسنا إن إحنا يا فندم إن إحنا نعمم الفكرة ديت على مستوى الجمهورية كلها، بحيث إن هم يبقوا معتمدين على نفسهم. حضرتك طبعا وعدتنا من 2018 بحاجات كتير وبتنفذها لنا و... وماكانش موجود قبل كدة...
السيسي: اطلب وماتتكسفش، قولي عايز كذا كذا كذا، نعمل...
صاحب المشروع: أولا تسهيل بطاقة الخدمات المتكاملة بالنسبة للمرحلة التانية. تاني حاجة المدينة تبقى مدينة متكاملة للصناعة لدمج ذوي الاحتياجات الخاصة في المجتمع بصورة أفضل وتتعمم على مستوى الجمهورية، ويكون في كل مكان مكان قريب ليهم، عشان أغلبيتهم مابيقدروش يتحركوا ولا يوصلوا للمكان، حتى نوصلهم المواد الخام للأماكن اللي هم قاعدين فيها، ونسوّق لهم الحاجات ديت. فده حلم كل ذوي الهمم، وأنا، يعني، نيابة عنهم...
السيسي: لا وإحنا.. وإحنا تحت أمركوا.
صاحب المشروع: الله يخليك يا فندم.
السيسي: آه أومال إيه... تحت أمركم حاضر.
صاحب المشروع: وإنت حضرتك أب لينا، وبنبقى سعداء بوجودنا مع حضرتك.
السيسي: أنا اللي سعيد بيكوا ومتشرف بيكوا، وإحنا معاكوا إن شاء الله.
صاحبة مشروع 2 (من ذوي الهمم):
السيسي: إنتي تطلبي اللي إنتي عايزاه.. إوعي تزعلي.. أبدا.
صاحبة المشروع: شكرا.
صاحب مشروع 3:
السيسي: (لوزيرة التضامن) إحنا عايزين ناخد فرصة إن هو يبقى في التلفزيون المصري، يتكلم...
وزيرة التضامن: حاضر.
السيسي: (لصاحب المشروع) تحكي الحكاية وتقول إحنا هانقدر نساعد الناس إزاي، وتشرح لهم الإمكانيات المتاحة..
وزيرة التضامن: حاضر.
السيسي: (لوزيرة التضامن) يعني مش على قد اللي إحنا شوفناه دلوقتي..
وزيرة التضامن: حاضر، حاضر.
السيسي: آه لازم يعني.. متشكرين.
صاحبة مشروع 4:
السيسي: السلام عليكم.
صاحبة المشروع: أهلا بيك يا فندم، وعليكم السلام ورحمة الله وبركاته... إحنا من الفيوم يا فندم، بنشتغل سجاد يدوي وسعداء جدا إن إحنا شوفنا حضرتك النهارده والله، و.. مش عارفة...
السيسي: أنا اللي سعيد بالشغل الجميل دوت.. ولو إحنا، لو إنتوا محتاجين مننا حاجة في القرية نعملهالكوا إحنا مستعدين.. إحنا بنتكلم على إن إحنا على كل الصناعة في القرية اللي عندك، عشان ناخد.. يعني نطور فيها.
صاحبة المشروع: والله يا فندم إنتوا شايفينا كويس قوي، يعني أنا وصلت هنا عن طريق الجهاز يعني، يعني أنا في قرية صغيرة قوي، فأنا إيه اللي يجيبني هنا يعني، غير إن الناس فعلا شغالة ونشيطة جدا.
السيسي: متشكرين.
صاحبة مشروع 5:
الشغل ده شغلنا إحنا كتراث نوبيين، السيدات عندنا بيعملوا بالشغل الخرز ده، سواء صغيرين أو كبار. فأنا بحاول أساعد السيدات دي، باخد منهم أسوقلهم، وأنا بشتغل بردو الشغل ده.
وعندنا بردو زي التابلوهات، حاولنا نعمل شوية الدفوف بتاعتنا. بنحاول نعمل عليها بعض الرسومات النوبية، وشغل الخوص ده شغل دقيق جدا بردو.. نفس الشغل بتاعنا، بنحاول نحافظ على التراث بتاعنا، وبننزل المعارض علشان خاطر الناس تتعرف على النوبة وعلى شغلها.
السيسي: طيب قوليلي، عايزاني أساعدك إزاي؟
صاحبة المشروع: عايزين معارض، ونفسي نبقى برة، يعني إيه الناس تشوف شغلنا ده عشان يعرفوا تراثنا.
السيسي: صحيح...
صاحبة المشروع: وكل بلد من البلاد لو حافظت على تراثها، يعني إحنا نبقى في مكان تاني يعني.. وده بيفتح لينا باب رزق لسيدات كتير ليس لهم عائل وأرامل، بيشتغلوا لاشغل ده، لما بينزلوا معارض أو حد بيسوقلهم، بيبقى عندهم عائد كويس جدا.
فأنا من النوع اللي بحب أعمل المساعدات دي. ومش عارفة بقى.. وبشكرك على المبادرات اللي حضرتك بتعملها للمرأة، ومبادرة الـ3% دي أنا عايزة أستفاد بيها ومش عارفة أستفاد، عشان كبرت..
السيسي: لاااا
صاحبة المشروع: ما أنا عديت بقى.
السيسي: (لرئيس الوزراء) النوبة، النوبة تستثنيها من الحكاية دي.. (لصاحبة المشروع) النوبة هانشيلها من السن خالص.
صاحبة المشروع: ينفع؟
السيسي: آه ينفع (يضحك الرئيس)
صاحبة مشروع 6:
السيسي: أنا طبعا واخد بالي قوي.. آه طبعا، طبعا، لأن أنا أفهم في الكلام ده كويس.. الشغل كويس قوي، أنا شايف الحاجات اللي معمولة ديت، وشايف الشغل دوت، ما شاء الله عليكي، اللي إنتي عايزاه كله... ده إحنا اللي نقولك من فضلك، وإحنا اللي نجري عليكي، وإحنا اللي نساعدك، وده دورنا...
صاحبة المشروع: أنا نفسي جدا يا فندم أتعامل معاكم و...
السيسي: لا يا فندم، حاضر، حاضر.. القرض ومش بس كدة، المدرسة اللي اتكلمتي عليها..
صاحبة المشروع: يا ريت.
السيسي: أنا هاقولك، أنا ماعرفش مكانك فين...
صاحبة المشروع: أنا عندي ورشة في بولاق الدكرور، وعندي شركتي وعندي...
السيسي: يعني عايز أقول إيه، إنتي النهارده، المدارس الفنية اللي موجودة هناك كلها، تتمنى الولاد اللي هناك.. ما أنا هاقولك... الموضوع بييجي إزاي؟ إن أنا، يعني إيه، إحنا مش كل حاجة ممكن نعملها..
صاحبة المشروع: طبعا.
السيسي: إحنا ممكن نوفر القرض، نوفر أي إجراءات أخرى للدولة لكم.
صاحبة المشروع: تمام.
السيسي: لكن مثلا مثلا موضوع زي إن إحنا نشجع الناس.. أنا هاروح هناك في المدرسة الفنية ديت اللي موجودة جنبك، وأقول إيه: أنا عايز أختار من عندكم 10 أولاد، أو 10 ولاد وبنات، زي ما إنتي عايزة يعني..
صاحبة المشروع: تمام.
السيسي: ييجوا عندي بعد الظهر لمدة أسبوعين تلاتة أربعة..
صاحبة المشروع: ماعنديش مانع.
السيسي: ما أنا هافهمك بس.. هايجيلك، هاتبدي توريهم، هاتجدي بعضهم عنده موهبة. بس عايز إيه؟
صاحبة المشروع: عايز يتعلم وأشتغل معاه، مافيش مشاكل.
السيسي: عايز يتعلم، وعنده استعداد، تقومي تاخديه.
صاحبة المشروع: تمام.
السيسي: هنا بالطريقة ديت يبقى أنا إيه، أنا اللي قمت بعملية الفرز، أنا، أنا كصاحبة عمل، عايزة ناس كويسين، لأن إنتي مش عايزة حد يوجعلك قلبك يعني..
صاحبة المشروع: آه..
السيسي: ما أنا بفهمك..
وزيرة التضامن: ماحدش هايبقى عنده استعداد.
السيسي: ماهو عنده استعداد..
صاحبة المشروع: أنا كمان عندي استعداد أروحلكم أعلمكم عادي. (تضحك)
السيسي: بس، فإنتي لما هاتقولي كدة، هاتبصي هاتلاقي الولاد دول جم وهاتديهم حاجة.
صاحبة المشروع: تمام.
السيسي: وإحنا ممكن قوي في المرحلة الأولانية نساعدك بإن إحنا ندعم المصروفات ديت..
صاحبة المشروع: مافيش أي مشاكل، أنا مع حضرتك جدا.
السيسي: لأ.. بس.. جنب ال، إحنا مع وزارة التربية والتعليم..
وزيرة التضامن: حاضر.. أهو (مشيرة إلى وزير التربية والتعليم) الدكتور طارق..
السيسي: والناس بتوع المدارس الفنية القريبة من الأماكن ديت، يبقى نتيح لهم فرصة إن هم يتقابلوا مع الناس. لما يتقابلوا مع الناس نقولهم إيه.. طيب، مين عايز؟ مين من الولاد عايز؟ يقولك أنا، أنا مستعد أهو.. تعالى.. مين من البنات عايزين كذا؟ ويبقى في مسؤولية مشتركة، بين صاحبة العمل..
وزيرة التضامن: زي بروتوكول أو حاجة...
السيسي: حاجة كدة يعني.. حاجة بس كدة.. وهايجيلك الناس، هاتعلميهم، هاتجدي منهم اللي بينفع وبيمشي معاكي، ويجيد، واللي بعضهم مش هايجيد يعني... القرض طبعا وأي حاجة تانية تحت أمرك، لازم هانعمله، لأن ده شغلنا.. حاضر..
صاحبة المشروع: ميرسي جدا يا فندم.
السيسي: لا يا فندم، لا، تحت أمرك.
أقيم المعرض بمركز مصر للمعارض الدولية، بمحافظة القاهرة، بحضور الدكتور مصطفى مدبولي رئيس مجلس الوزراء، والدكتورة نيفين القباج وزيرة التضامن الاجتماعي، وعدد من الوزراء، وأصحاب المشاريع بمعرض تراثنا.