نص تعليق السيسي على كلمة اللواء إيهاب الفار بافتتاح محطة بحر البقر 27/9/2021

اسمحلي يا إيهاب أتدخل عشان بس، الصورة واضحة، مش ليا، حتى الناس اللي بتسمعك. بس أنا عايز أقول في الجزء اللي هو الأخير ده... اللوا إيهاب لما قال 160 مليار يقصد يقول إيه، هو إحنا هانعالج الميه ليه؟ هانعالج الميه عشان هانستخدمها. مش كده؟ فعشان أستخدمها، الميه اللي هاتقدر تطلع، اللي هاتطلع من المعالجة دي، تكفي اللي هم زي ما قال يمكن وزير الري ووزير الزراعة حواليه، 500 ألف فدان، وخليني أقول رقم ممكن الناس تحفظه، فيعني إيه، مش هاتقيد كتير بال467 ألف، هاقول 500 ألف فدان.

طيب، يمكن كتير من للي بيسمعوني يقولك: 500 ألف فدان عشان توصل إنك إنت تزرعهم، تصرف 160 مليار؟ مش كده؟ صحيح، رقم كبير قوي.. بس عايز أقولكوا.. عرفتوا ليه إحنا بنتألم لما بنلاقي في تعدي عالأراضي الزراعية؟ لما يكون إنت النهارده تعدوا مثلًا في خلال 7، 8، 10 سنين، تاخدوا 700، 800 ألف فدان.. ده إحنا عشان نعمل نص مليون فدان جداد داخلين في 160 مليار جنيه... أنا بقول كده عشان تبقى الأمور واضحة.

طب هو واللوا إيهاب لما ييجي يتكلم في تفاصيل المشروع ده كله، الجزء الأولاني هايبقى مشروح وواضح، وحتى الجزء التاني، بس لازم تعرفوا إن أنا عشان أوصل لل476 أو ال500 ألف فدان دول، عايز شبكة طرق، وعايز شبكة ري، وعايز شبكة كهربا، وعايز نظم ري حديثة، وعايز إنشاءات للناس اللي هاتعيش عالكلام ده.

الكلام ده عشان يتعمل يتكلف مبالغ كتير.. ليه بقى؟ إنتوا، من غير ما أجيب أسماء دول.. مش كنتوا تسمعوا يقولك إيه: ده في دولة فيها 50 مليون فدان، طب ما اتزرعتش ليه؟ فيها 100 مليون فدان، طب ما اتزرعتش ليه؟ عشان زراعة الأرض المليون فدان، ممكن تدخل في 200 مليار جنيه، عشان تعملها صح، تعمل تشق ترع ليها، وتشق طرق ليها ومدقات، وتعملها مصارف، وتعملها شبكة كهربا عشان المكن أو المعدات الري الحديث الل بتستخدم، تستخدم.. هاتتكلف كتير.

يبقى بردو ليا حق ولينا حق إن إحنا نقول إن الترع اللي ربنا اتعملت من 200 سنة حرام علينا إن إحنا نهدرها ولا مش حرام؟

الفكرة هنا، أنا مش بتدخل في تفاصيل المشروع يا إيهاب.. أنا عايز أوصل رسالة للناس، إن إحنا عشان نصلح أو نزرع نص مليان، نص مليون فدان في سينا، داخلين في 150، 160 مليار جنيه.. 150، 160 مليار جنيه عشان بس نقول إيه، نبدأ نزرع بقى.

يبقى لو أنا عندي قدرات زراعة، أهدرها؟ يبقى إحنا كلنا كمواطنين، كدولة، نسمح إن إحنا نضيع شقانا، ونضيع مستقبل حاضرنا ومستقبل أولادنا بالتعدي؟ ده إحنا عشان نعمل النص مليون فدان دول، داخلين في 150، 160 مليار جنيه.

 واتعملت إجراءات كتيرة جدًا، الموضوع مش إرادة سياسية بس. الأموال ديت.. إحنا يعني بنبذل جهد وبنتكلم في.. يعني، إحنا خدنا من.. ومابقولش سر.. خدنا قروض من الصناديق العربية عشان نعمل الكلام ده يا دكتور مصطفى، فلازم بردو الناس تعرف كده يا إيهاب، إن الأموال دي، دي قروض من الصناديق العربية بفايدة ميسرة، ومدة سداد على بردو مريحة يعني.

فإنتم، يا مصريين، إحنا كلنا مع بعض في قارب واحد.. عشان نعمل 500 ألف فدان، إحنا بنتكلم في 150 مليار جنيه. بالمناسبة، ال150 مليار جنيه، إحنا مابنجيبهومش من جيبنا، ده إحنا بنستلفهم عشان نعمل، يبقى لو عندي حاجة تانية موجودة في ال، موجودة عندي في الإيد.. أضيعها؟

اتفضل يا إيهاب...

لا يا إيهاب ما إنت كده بتضيع جهدنا، لما تقول إزالة الحشائش.. إحنا معانا هنا، يعني.. يعني، الإعلام، ويمكن ضيوف لينا.. هي ماكانتش حشائش.. اللي إنتوا شايفينه ده، ده هو جايب حتت كمان، شكلها يعني، يعني كويس يعني، مش كدة يا محمد؟ (يضحك الرئيس) ده كان.. كده كويس قوي.. ده كانوا، بردو بقولهالكوا عشان تشوفوا، لما تجاوزنا ويبنا الكلام ده يتم، كانت بحيرة المنزلة دي كانت مليون فدان من 200 سنة، مش كدة يا دكتور محمد؟ محمد عبد المعطي، عبد العاطي، مش كان كده؟ كانت مليون فدان.. إحنا بقى لحقنا ال250 ألف فدان اللي فاضلين.. مش كده؟ كانت كام؟ مليون فدان.

لما الدولة ماخدتش دولة على مدى ال200 سنة من الكلام دوت، المليون فدان دول بقم 250 ألف فدان. ولما إحنا دخلنا، كان محافظة بورسعيد عايزة تستقطع حتة عشان تردمها، عشان تخليها أراضي.. أردم أراضي في البحيرة، وعندي أراضي في شرق بورسعيد وجوه في الشرق في سينا يا عادل يا غضبان أقدر أبنيها؟ لأ طبعًا. فقلنا لا لا لا لا، إحنا هانرجع المكان إيه، زي ماكان.

بقولكم عشان نرجع ده.. هات الصورة للي بعدها يا إيهاب ولا.. لا لا.. طب ماشي.. خلي الناس تشوف.. ده تعدي.. اللي موجود ده، ده تعدي وكان منه كتير. ده، اللي إنتوا شايفينه ده.. إحنا نقبل الناس بتوعنا تعيش كده؟ طيب، هات اللي بعده يا إيهاب. مافيش تاني؟ التالتة اللي هي، اللي وصلتوله، طيب.

 طيب على كل حال، أنا هاسبق الفيلم يعني وأقولكم إن ال250 ألف فدان دول، إحنا بفضل الله سبحانه وتعالى، شارفنا على الانتهاء إن إحنا نخليهم وكأنهم من 500، 600 سنة، مش كده؟

كل اللي انتوا شايفينه ده من حشائش وغاب وسافانا وأي حاجة تانية، كل ده اتشال، وبقت البحيرة بالكامل تم تكريكها، ال250 ألف فدان دول، بقالنا 4 سنين شغالين فيها، عشان نحولها إلى بحيرة تستطيع ال250 ألف فدان دول يبقى مزرعة سمكية حية، وناكل منها السمك اللي موجود فيها وإحنا إيه؟ مطمنين 10 على 10.. نصدر منه والعالم كله يقولك إحنا عايزين ناخد من الحاجة ديت.

الكلام ما اتكلفش قليل.. ده في طريق بيتعمل بنحزم بيه.. تخيلوا بنعمل طريق من بورسعيد لغاية الدقهلية.. عشان 80 كيلو ولا 83 كيلو.. هه؟ 80 كيلو عشان يبقى البحيرة خلاص بقت لها كورنيش ولها شكل محترم نمشي حوالين منها بالطريقة ديت.. اتفضل يا إيهاب.

ألقيت الكلمة في مدينة بورسعيد، بحضور الدكتور مصطفى مدبولي، واللواء إيهاب الفار رئيس الهيئة الهندسية، وعدد من الوزراء.

خدمة الخطابات الكاملة للسيسي تجدونها في هذا الرابط