نص كلمة السيسي لرؤساء تحرير الصحف والإعلاميين 23/1/2021
السلام عليكم، كل سنة وإنتوا طيبين وسعيد إن أنا ألتقي بيكم.
خليني أقول النهاردة، بتواجدكم معانا النهاردة، إنتوا شوفتم إحنا بنتصدى لكل شيء، ده أمر محتاج الناس يوصلها، كل الناس، الناس البسطا جدا، والناس اللي هي بيـ، يعني قطاعات الشعب المختلفة بفئاته المختلفة، يعرفوا إن إحنا مش سايبين موضوع، بنركز في حتة وسايبين، لا لا، إحنا شغالين في كل قطاع بأعلى معدلات ممكن نعملها، يعني ده أقصى طاقة ممكن الدولة المصرية تنفذها بيها، في كل شيء.
أنا المهم اللي انا عايز أقوله في المشروع بتاع القرى المصرية، وأنا يعني، من خلالكم، قدمنا للناس ببساطة اللي هايتعمل، لكن اللي إحنا بننشده إن إحنا نغير وجه الريف المصري، بشكل متكامل، يعني مانقولش إيه، طب هانشوف القرى الأكثر احتياجا ونشتغل فيها، أو نشوف القرى اللي الصرف الصحي بتاعها طبقا للخطة.. لا لا لا. إحنا داخلين نقول الـ 50 مركز دول، الـ 22 محافظة دول، بالـ1400 قرية تقريبا، لا إحنا هانخش فيهم ونخرج وهم مش محتاجين حاجة تاني، هم وإيه؟ والتوابع بتاعتهم.
إنما القضية المهمة إيه؟ يمكن كتير مننا يقولي طب يعني إزاي التكلفة المالية بتاعة الكلام ده إنتوا هاترتبوها إزاي؟ التكلفة المالية مخططة ومدبرة كالآتي: بمنتى البساطة يعني، إحنا بنقول إيه؟ إنت قطاع الكهربا كمحطة أرقام لصالح كهربة الريف، وزيه زي الري زي الصرف الصحي وزارة الإسكان يعني وهيئة المجتمعات، كل واحد حاطط مخطط، والصحة والتعليم، وكدة، حاطين أرقام في الموازنة خلال الـ3 سنين اللي جايين، هانصيغ نفسنا ومواردنا وصرفنا بحيث إن هو نحشده ونخلص بيه من حالة واحدة، مرة واحدة.
إحنا بنتكلم في 3 سنين، بنتكلم في 3 سنين على الإيه؟ على مش الـ1500 قرية، على الـ4500 قرية، ده أمر، أنا بس حبيت إن أنا أقولكم عليه. في فرصة لمصانعنا، ولقطاع الصناعة في مصر؟ طبعا. كل الكلام اللي إحنا بنتكلم عليه ده، بنتمنى إن مستلزماته نجيبها منين؟ من مصر، من مصر، آه من مصر. مواسير صرف، كابلات كهربا، محطات معالجة بطلمباتها، أي حاجة ممكن تستخدم في صالح هذه الأشغال، تبقى تنتج فين؟ في مصر.
هنا مابقاش في ضغط على الدولار، وفرصة للصناعة ديت إن هي تاخد قوة دفع ضخمة، وخد واشتغل وهات، ونبتدي نعمل ونحرك الاقتصاد. أي حاجة داخل ال1500 قرية دول، مخططين إن إحنا ندخل ونخرج منها بتوب تاني خالص.
طب أهلنا في الريف يساعدونا في إيه؟ هايتعمل أعمال حفر عشان تمد مواسير للصرف الصحي. استحملوا بقى الإيه.. يعني استحملوا شوية اللي إحنا هانعمله عشان نخلص في أسرع وقت ممكن، عشان ندخل على المرحلة التانية.
أنا متفائل جدا بالله سبحانه وتعالى، لكن عايز أقولكم إن إحنا هانبدأ من بكرة إن شاء الله بردو حملة التطعيم على باللقاحات، بكرة هانبدأ بالأطقم الطبية إن شاء الله، ثم الناس اللي هي يعني عندها اه يعني أمراض مزمنة، ثم كبار السن، وهلم جرا.. كل سنة وإنتوا طيبين، تحياتي ليكم جميعا، ومن خلالكم لمصر.. اللهم آمين، متشكرين، كل سنة وإنتوا طيبين، شكرا جزيلا، شكرا جزيلا.
ألقيت الكلمة في مدينة بورسعيد على هامش افتتاح مشروع الفيروز للاستزراع السمكي، بحضور عدد من رؤساء تحرير الصحف والإعلاميين.