نص لقاء السيسي مع الإعلاميين ورؤساء تحرير الصحف 25/12/2019
إعلامي 1: النهاردة، في نهاية عام، بعد سلسلة من الإنجازات على مدار 5 سنين.. عايزين نوصل للشعب المصري إيه في النجوع وفي القرى؟ ونوصل رسالة للإقليم الملتهب الملتهب نقوله إيه؟
السيسي: يعني.. عايز أقول إيه، بالنسبة لل، هاقول الإقليم الأول.. الإقليم بتحدياته مستمر بقاله دلوقتي... يعني حتى لو افترضنا إن إحنا بدأنا 2011، على الأقل بقاله 9 سنين أو 10 سنين، لكن هو بدأ من قبل كده بشوية.
فـ.. يعني، إن الإقليم يستقر، يمكن ياخد وقت شوية. لكن أحد أهم عوامل استقراره مرتبط بينا إحنا، إحنا في مصر. طول ما مصر مستقرة، مصر ركيزة استقرار حقيقية، نقطة ارتكاز حقيقية لعودة الاستقرار لبقية المنطقة.
فإحنا دي الرسالة. والرسالة دي داخلية وخارجية، هاتلاقوني بكرر الكلام، مابغيروش. طب ليه مابغيروش؟ لأن دايما بقول إن التشخيص متغيرش، يعني المرض واحد، والتحدي والاستهداف موجود، وهايستمر.
طب علاجه إيه؟ علاجه إحنا، إحنا كدولة، إحنا كمواطنين، إحنا كمؤسسة مختلفة، طول ما الدولة مستقرة، هانقدر على المستوى الداخلي نحقق اللي إحنا عايزينه، وعلى المستوى الإقليمي اللي إحنا بنقول عليه إن هو مضطرب، هانقدر نستعيد دولة بعد دولة، تستعيد استقرارها، وبالتالي يعود الاستقرار للمنطقة بالكامل. يبقى للخارج الأمور تستقر، باستقرارنا، بإيه؟ آه باستقرارنا إحنا.
النقطة التانية اللي أنا بتكلم، اتكلمت فيها وبأكدها مرة تانية، إحنا، إحنا مصر، إحنا الداخل، إحنا الشعب، إحنا الإعلام، إحنا مؤسسات الدولة، طول ما الكلام ده، طول ما المؤسسات دي مستقرة، منتبهة للتحدي، منتبهة للحفاظ على الحالة دي.. ودايما أكررها أقول إيه؛ الموضوع ده مش نظام يا جماعة، ده مش نظام...
إعلامي 1: دولة.
السيسي: دولة.. إحنا مشينا بمراحل. قعدنا 4 سنين نثبت ونحافظ على إن الدولة ماتسقطش مننا، ثم ابتدينا بقى بخطة متكاملة مع بعضها، ناخد قطاع قطاع نـ إيه؟ نحل مشاكله.
خلصنا الكهربا لأنه كان حيوي وحساس جدًا على الناس ومصالحها وحياتها اليومية. وبعيدن دخلنا على قطاع النقل. طب تفتكروا قطاع النقل هاياخد كام مليار دولار عشان نقدر نـ إيه نعالج المشاكل اللي فيه؟ القطاع كله على بعضه 40 مليار دولار. يعني لو قلنا في 15، بنتكلم في 600 مليار جنيه، عشان تـ إيه؟ تستعيد وتتفرج على قطاع يليق..
إعلامي 1: بمصر.
السيسي: عادي يعني، مش بنتكلم على حاجة يعني، اللي هو القطاع، سكة حديد، سواء كان ركاب أو بضايع أو غيره، بنسبة أمان عالية، وكلام من هذا القبيل. إنت بتتكلم في 600 مليار جنيه.
لما نيجي نتكلم في قطاع زي الزراعة. القطاعات المرتبطة بالجماهير، فيها تحدي كبير، القطاعات اللي مرتبطة بالجماهير فيها تحدي كبير.. لأنك إنت عايز تتعامل مع الجماهير ديت بالشكل اللي هو يتناسب مع الثقافة والظروف والأحوال، كده يعني. وبالتالي ماتقدرش إنك إنت تطلب، يعني، إجراءات حادة، تمس، تمس الناس.
إعلامي 2: سيادة الرئيس، سيادتك تقدر تقول إيه للشعب مع الأسعار إنها ابتدت تتزن وابتدت تنخفض بالذات في السلع الغذائية. إحنا مابنقولش إنها انخفضت خالص، إنما في انخفاض ملحوظ اللي ينكره يبقى غير منصف.. حضرتك تقدر تقول إيه للناس وإحنا في مطلع عام جديد.
السيسي: (يتنهد) شوفوا أنا هاقول حاجة إيه، إن إحنا كل ما نتقدم، يعني السياحة بتتقدم، يبقى الدخل اللي جاي منها بيزيد والتشغيل اللي منها اللي جواها بيزيد. كل ما الدولار سعره بيبقى فعلا يعكس حجم الطلب عليه، وحجم العرض والطلب يعني، اللي هو سعره الحقيقي، يبقى إحنا بنقول إيه؛ النهاردة كان ب 18 وأكتر شوية، النهاردة داخلين في ال16 ويمكن يعني الأمر بردو يعني ينكسر أكتر من كده.
بس ده مرتبط زي ما قلت تاني، بإن إحنا، تعافي الاقتصاد. كل ما الاقتصاد بتاعنا يتعافى، كا ما إحنا نقدر نعمل سياحة كويس. نعمل زراعة كويس. زراعة كويس يعني إيه؟ وصناعة كويس يعني إيه؟ يعني أقدر أصدر. أقدر ألبي جزء كبير من مطالب الناس. لما ألبي مطالب كتيرمن مطالب الناس، ده معناه فاتورة الاستيراد اللي هي بتعتمد على الدولار تقل. مادام الدولار الطلب عليه يقل، يبقى سعره إيه؟
إعلامي 2: سعرة ينزل
السيسي: سعره ينزل.. وبعدين بيعكس قدرة اقتصادنا إن إحنا قادرين إن إحنا نصدر بدل مانقول 20 و25، لأ 30 و40 و50 وأكتر من كده كمان.
فهو ده اللي إحنا بنتكلم عليه. طب.. طب بعد قد إيه؟ إحنا بنجري على أقصى ما نستطيع. بس في ظل حالة اتشكلت على مدى 50 سنة. حتى في أداءنا، هو النهاردة ال51 مزرعة اللي كان بيتكلم عليهم زميلنا وزير الزراعة. ده راجل ماسك أول امبارح، مايتحاسبش على حاجة. لكن أنا عايز أقوله إن الموضوع مش في استعادة كفائتهم، الموضوع في إدارتهم، عشان يرجعوا، لأن هم لو اشتغلوا، النهارده لو كل مزرعة من دول فيها 2000 ولا 3000 راس، إنت بتتكلم في 150، 200 ألف، 300 ألف راس، رقم مش بسيط. خاصة إذا كان العمالة بتاعته موجودة بالفعل، وبيتم تحميل مرتباتها على موازنة الدولة، فيعني جزء كبير من اقتصاديات المشروع موجودة بشرط، إن إحنا نقدر ندير الأمر بشكل كويس.
فاللي أنا عايز أقوله على كل حال في نقطة ال، إمتى نرى أمر، يعني إيه، مش فكرة، ماهو الناس خلاص، الأسعار ابتدت تنخفض، لكن لسة في طبقة، طبقة كبيرة جدا من شعبنا، ظروفه صعبة، مهما كانت الأسعار بتنخفض، إنت بتقارنها بأنهي بأنهي، بأنهي سعر؟ بأنهي سعر؟ لمين؟ ليا وليك؟ وللطبقة المتوسطة؟ ولا للناس اللي هي، الطبقة اللي هي، يعني، محدودة الدخل، أنا بتكلم على محدودة الدخل، لأن أي حد هايقدر يلبي مطالبه، مطالب ولاده وبيته وحاله، يعني.. لكن الغلبان، هايعمل إيه يعني؟
إعلامي 3: سؤالي سيادة الرئيس، في العام المقبل لدينا 3 استحقاقات؛ مجلس الشيوخ، ومجلس النواب. هل نستطيع إجراء انتخابات المجالس المحلية في ظل هذه الانتخابات وفي ظل برنامج الإصلاح السياسي اللي الدولة ماشية فيه؟
السيسي: إحنا موضوع المحليات أمر مهم، يعني هو تحدي، تحدي إنك إنت تعمل التلت، ال3 استحقاقات دول في وقت واحد، أو في سنة واحدة حتى. طب ماتخلوا الموضوع عبارة عن نقاش مجتمعي مع المفكرين والمثقفين، يوصلوا لتصور ممكن ننفذه. يعني الموضوع مش مرتبط بإرادة، أنا إرادتي إن أنا أستكمل مؤسسات الدولة.
إعلامي 3: هل ده سعادتك هايحتم على الدولة المصرية الفترة القادمة إن يبقى في دعم للأحزاب السياسية؟
السيسي: أنا عايز أقولك هي الفكرة مش الدعم، يعني الفكرة مش فلوس..
إعلامي 3: مش دعم فلوس، ماقصدش دعم فلوس.. دعم سياسي..
السيسي: لا ماهو الدعم، الدعم السياسي موجود من الأول، ليه؟ أصل أنا مش طرف ضد، يعني أنا مش، ماعنديش حزب حاكم، وبالتالي هانجح على ضعف الآخرين، لأ، إحنا بنتكلم على منظومة سياسية تقدر.. شوفوا لما بنتكلم على السؤال اللي إنت سألته، استكماله إيه؟ استكماله إن إحنا عايزين مؤسسات تستطيع إن هي تمنع إن أي حد يستهدف الدولة ويسقطها. خلاص، فهاييجي الكلام ده إزاي؟ جزء منه الأحزاب السياسية الي إنتوا بتتكلموا عليها.
إعلامي 4: حضرتك شايف إن مصر تُحدث قفزة في الإصلاح السياسي تتناسب معه ظروفها الموجودة وتواكب ما يجري على الصعيد الاقتصادي، حضرتك شايف إن ده ممكن يتحقق...
السيسي: أصل الإصلاح السياسي مرتبط بحركة الناس، حركة الجماهير، حركة الأحزاب واستعدادها إن هي، يعني إحنا اتكلمنا كتير في الموضوع أكتر من 100 حزب، يا جماعة طب ممكن تبقوا، حتى مش هاقول كلهم ينخرطوا يعني، لكن ممكن يبقى مثلا 4، 5 كيانات منهم بالقوة الي هم يقدروا تقصروا علينا، المسافة اللي إنتوا بتقولوا عليها، المسافة الزمنية اللي إنتوا بتتكلموا عليها.
هو النهارده حد طالب الدولة بإن يكون شبابنا في الوزارة، النواب، من التنسيقية بتاعة الأحزاب أو في المحافظين؟ لأ، هي عبارة عن فكرة إن إحنا طب ما تعالوا معانا، مش تعالوا معانا عشان.. عشان ندي فرصة لنفسينا إن إحنا مانستناش نقول إيه طب لما العملية تُكتمل ونخش بقى فـ، لا لا لا، نيجي، البلد بلدنا كلنا.
إعلامي 5: الرئيس عبد الفتاح السيسي، كيف يطمئنا في عام 2020 على مصر وع الإقليم؟
السيسي: نحن قادرين بمفردنا إن شاء الله نجابه تحدياتنا باستقرارنا، بإيه؟
إعلامي 5: استقرارنا.
السيسي: خلي بالكوا من الكلمة دي كويس، بإيه؟
إعلامي 5: باستقرارنا.
السيسي: وكل اللي نال منكم وخد منكم حاجة خلال ال10 نين اللي فاتوا، خدها بعدم إيه؟
إعلامي 5: الاستقرار.
السيسي: عدم الاستقرار، لكن طول ما البلد مؤسساتها وهياكلها واقفة على، كده، وأنا بفكر، بفكركوا كلكوا.. إن إحنا في لقاءاتنا اللي كنا بنتكلم فيها، قلتلكم قطعوا الراس، مش كده؟ امتى؟ عشان بس ماحدش يـ..
إعلامي 5: في 2011
السيسي: آه، فبراير ومارس وإبريل ومايو... قلتلكم ده قطعوا الراس، والراس عبارة عن إيه؟ عبارة عن أذرع الدولة كلها بما فيها مؤسساتها التشريعية والدستورية.. هو الدستور لما تسقطه، إنت مافيش أساس تمشي عليه. طب لما نعمل دستور بقى.. لما إيه؟ مش ده اللي حصل؟
بغض النظر عن رضانا من عدمه، أحيانا تكون رضاك عن الموضوع 60%، لكن ال60% دول أحسن من إيه؟ من لا شيء. التنظيم وترتيب الأمور باستقرار، غير التنظيم وترتيب الأمور بعدم استقرار. اللي أنا أقدر أقوله للمصريين، اطمنوا، بإيه؟ باسقراركوا.. بتمساكّوا.. أي حاجة ممكن تتحل، أي حاجة، إحنا دولة مش قليلة، إحنا 100 مليون، وإمكانياتنا كويسة، في كل المجالات إمكانياتنا كويسة. بس إحنا مش شايفينها، مش حضراتكم، لا إحنا مش شايفين إمكانياتنا يعني. اتفضل.
إعلامي 6: حضرتك في منصة الحوار في أسوان أشرت عَرَضا وقلت تتصور حل سياسي في ليبيا خلال شهور، والوضع في ليبيا في غاية الخطورة وفي شرق المتوسط وتحديات ضخمة. هل في ملامح إن ممكن يبقى في تسوية سلمية حقيقية في الفترة المقبلة إن شاء الله؟
السيسي: المنطقة، منطقة شرق المتوسط، ومنطقة الشرق الأوسط اللي إحنا موجودين فيها، محل اهتمام كبير قوي من العالم. وأتصور إن الدول الكبيرة بتيجي دلوقتي بتشعر إن عدم استقرارها هاينعكس بالسلب على، مش على الدولة ليبيا ولا دولة مصر، لا على الإقليم كله. وبالتالي بقى في فهم، في إرادة، على إن يتم إيجاد صيغة، لإيجاد حل لل.. وده اللي أنا أسست عليه الرأي.
آه قد تكون الأمور في حركة شديدة من هنا ومن هنا، من الجيش الوطني، ومن الجانب الآخر. ماشي، ولكن على كل حال، ده كل ما الأمور قد، يعني، تزداد يعني صعوبة، قد يكون ده مفتاح لل، أو مخرج لإيجاد حل للموقف في ليبيا، وده اللي إحنا أسسنا عليه، وإحنا متحركين كده، إحنا مصلحتنا إن يبقى في استقرار في ليبيا، إحنا مصلحتنا إن يبقى في حكومة شرعية في ليبيا، إحنا مصلحتنا إن يبقى في وحدة في الأراضي الليبية، إحنا مصلحتنا إن إرادة الشعب الليبي هي تبقى الإرادة النافذة والحاكمة للموضوع في ليبيا.
إعلامي 7: الشعب عايز يطمئن على سير المفاوضات فيما يتعلق بسد النهضة.
السيسي: إحنا في الغالب اللي بنطلعه لكم كتصريحات، هو بيعكس المسار، عشان لا نفاجئكم، ولا كمان نخوف الناس بدون داعي، يعني مانفاجئكمش بإن إحنا في مشكلة، لا إحنا بنقول كل حاجة، واللي إنتوا بتسمعوه من تصريحات من المسؤولين في هذا الموضوع، هو بيعكس المسار الحقيقي.
إحنا التفاوض بيمشي بشكل كويس، لكن في الآخر إحنا عايزين، عايزين نصل إلى اتفاق يحقق لينا، لأن إحنا مش، المطالب الميه بتاعتنا مش مطالب تنمية...
إعلامي 7: حياة...
السيسي: حياة.. لكن مثلا لأشقائنا في أثيوبيا، دي تنمية، والفرق كبير بينهم، فإحنا بنحاول نوصل لحل، ويعني، موثق، اتفاق ملزم لينا كلنا، عشان يوصلنا لأقل الأضرار.
إعلامي 8: السؤال الأولاني هو فلسفة التعديل الوزاري اللي تم مؤخرا الحقيقة، وعملية الاستغناء عن بعض الوزاراء، وإحلال بعض الوزاراء الآخرين، فلسفة هذا التغيير، وتكليفات سيادتك لهذه الحكومة الجديدة مع مطلع العام الجديد.
السؤال التاني إلى أي مدى ترى سيادتك، وسيادتك أشرت لده النهارده في دور القطاع الخاص، دور القطاع الخاص في 2020 في التنمية ومشاركة الدولة والقوات المسلحة. شكرا جزيلًا.
السيسي: شوف عايز أقولك، أنا هابدأ بالنص الأخير، دور القطاع الخاص، دور معتبر ومقدر، وإحنا نشجعه، يا جماعة يا قطاع خاص، لو إنتم عايزين في كل اللي إنتوا شوفتوه ده، مشاركة، تعالوا، وبأكدهولك عشان تقوله باسمي.
تاني، يعني أنا بقوله أهو وإنتوا تقولوه للناس، إنت عايز، بتقول مافيش مجال؟ لا في مجال. أنا بديك مفتاح مشروع، مفتاح أهو، مش هاتاخد وقت، لا مع مؤسسة دولة، ولا مع المسار بتاع التعاقد ولا ده، وكل حاجة اتعملت بكفاءة كويسة، يعني حتى التعاقدات اللي اتعملت دي معمولة بأسعار مناسبة، مش مغالى فيها خالص.
فكل الكلام ده متاح لهم كقطاع خاص، سواء كان المسار الطبيعي الدولة حريصة جدا، وبالمناسبة إحنا قلنا إن دي مرحلة إصلاح إداري بما فيه الصناعة، لأن ده الهدف وده المستقبل للتشغيل، وإن إحنا نحسن من موقفنا الاقتصادي.
السؤال ال.. الجزء الأولاني للحكومة، لو إنتوا تابتعوا تطورات التشكيل الحكومي على مدى ال5 سنين اللي فاتوا هاتجد إن هو كل مرة كنا بناخد خطوة متقدمة في تحسين أداءنا.
الحاجة التانية إن إحنا طبعا في، أثناء أداء الحكومة على بردو مدى ال5 سنين دول، لقينا إن في أمور لازم، يعني، يتعاد تنظيمها، زي يعني، أو نستفيد بالخبرات الي اتوفرت، ماهو يعني اللي مسك مثلا السياحة والآثار، معني بالموضوع بشكل أو بآخر بقاله أكتر من سنة، وأكتر من كدة كمان، وبالتالي اتشكلت عنده خبرة كويسة، وإحنا كمان اطمنا من الأداء.
فممكن نخلي الإيه، القطاعين يشتغلوا مع بعض.. بالمناسبة إحنا التطوير مابينتهيش.. يعني طول ما إحنا عايشين، واللي بعد مننا هم إذا كانوا هدفهم الإصلاح، هايطور ويجيب الأفضل لصالح، لصالح مصر يعني، فربنا يوفقهم.
أجري الحوار في مدينة الفيوم بين الرئيس عبد الفتاح السيسي وعدد من الإعلاميين ورؤساء تحرير بعض الصحف، وذلك على هامش افتتاح مشروع الإنتاج الحيواني المتكامل، بحضور رئيس الوزراء، مصطفى مدبولي، وعدد من الوزراء.