نص كلمة السيسي في الكلية الحربية 13/7/2019

السلام عليكم،

أنا جيت النهاردة عشان أطمن على رجال مصر، وعشان كمان أطمنهم على مصر، بلدنا كلنا.

أنا عارف طبعا إن إنتوا بتبذلوا جهد كبير هنا، وعارف إن إحنا بنبني مهارات عظيمة جدًا جدًا لإعداد جيل جديد من القادة والمقاتلين الأشداء. الجيل ده جيل مسلح بـ، بكل ما تعنيه هذه الكلمة من القدرة في مختلف المجالات، سواء كانت القدرة البدنية، أو القدرة العلمية، أو المهارات الأخرى المطلوبة.

الدنيا بتتغير وبتتطور، وإحنا كمان بنتغير وبنتطور طبقًا للتغيير ده، عشان نبقى إحنا مواكبين للعصر اللي إحنا موجودين فيه. وأنا متأكد ومتابع كويس قوي كل الجهود وكل التدريبات والـ، والمناهج اللي موجودة في الكلية، وفي الكليات الأخرى..

فـ.. أنا سعيد بيكم، وسعيد بالمستوى اللي إنتوا موجودين فيه، وبتمنى لكم دايمًا التوفيق.

كمان أنا عايز أطمنكم على بلدنا مصر، إحنا الأمور الحمد لله رب العالمين، تسير بشكل جيد في كل المجالات. والحقيقة البطل في هذا الأمر هو الشعب المصري يعني.. وخليني من هنا بردو من الكلية الحربية، اللي هي رمز للعسكرية المصرية، إن أنا مرة تانية وتالتة وكل مرة، يعني.. أبعث للمصريين بتحية تقدير واحترام واعتزاز، لأن هم خلال الخمس سنين اللي فاتوا، دايمًا كانوا بيضربوا المثل العظيم في كل شيء. فكل الشكر ليهم.

الأمور الحمد لله رب العالمين، في.. بتسير بشكل أفضل، وإحنا مستمرين في برامجنا، سواء كانت الاقتصادية أو البرامج الأخرى، الهدف منها إن إحنا نضع الدولة المصرية في المكانة التي تستحقها مصر.

فـ.. مرة تانية، كل التحية والتقدير ليكم، وبتمنى لكم دايمًا التوفيق وبقول لكم إن دايما بقولها لكل الطلبة أو كل الظباط، أو كل الأجهزة المسؤولة عن أمن وسلامة مصر، بقولهم مصر أمانة في رقبتنا كلنا. مصر أمانة في رقبتنا كلنا. بكل ما تعنيه هذه الكلمة.

شكرًا جزيلًا متشكرين شكرًا.

القيت الكلمة في الكلية الحربية، وذلك خلال تفقد الرئيس لطلبة الكلية، ومشاركتهم نشاطهم الرياضي الصباحي.

خدمة الخطابات الكاملة للسيسي تجدونها في هذا الرابط