نص كلمة السيسي خلال استعراض إمكانيات الدولة في مجابهة الأزمات والكوارث 7/7/2026
السيسي: بوجه الشكر لـ.. آآ دولة رئيس الوزراء والوزرا والوزرا والقوات المسلحة على الجهد الكبير اللي اتعمل خلال السنين اللي فاتت. الكلام ده مش وليد.. آآ، يعني إحنا كلامنا على إدارة أزمة أو محاكاة لأزمة ده اتكلمنا فيه من سنتين تلاتة مع إن هم يتعد اللي إحنا بننفذه دلوقتي، إن إحنا نعد ونعمل محاكاة لأزمة، والأزمة دي يتم تكرارها بعد كده كل 6 شهور مرة ولا حاجة عشان ننشط مراكز إدارة الأزمات على مستوى المحافظات ومراكز جمع المعلومات وحاجات كتير قوي، وحتى المعدات المستخدمة في الموضوع.
فأنا بقول إن النهاردا أقدر أقول بمنتهى القوة إن إحنا أطلقنا عمل الهيئة القومية لإدارة الأزمات والكوارث، وأنا بس عايز أأكد على إن إحنا لكل زمايلي المحافظين اللي بيسمعوني دلوقتي ودي فرصة. الـ.. الـ.. لو المحافظ عنده كل يوم شكل من أشكال المتابعة مع.. آآ.. محافظته في العناصر الهامة جدًا والتي تؤثر على أمن وسلامة واستقرار المحافظة. يعني أتصور محطات الميه اللي موجودة في المحافظة، تؤثر.. أتصور إن محطات الكهربا اللي موجودة، تؤثر.. أتصور إن محطات الصرف الصحي، تؤثر.
لو أنا النهاردا كل يوم بعمل لمدة نص ساعة الصبح بنشط كل العناصر اللي موجودة وبتطمن على إن الـ.. كل المحطات دي بتعمل ومفيش عندها مشكلة، ولو فيه مشكلة أعرفها ساعتها وابتدي أتصدى لها عشان أحلها، الكلام ده هيخلينا نتعلم كتير قوي إن إحنا ميبقاش عندنا مشكلة ولا يحصل عندنا أزمة ونبقى بنديرها بشكل آآ.. يعني.. مش.. مش علمي قوي.
اللي هو إيه؟ التواصل المستمر فيما بيننا على مستوى المحافظة، وعلى مستوى مجلس الوزرا والمحافظات. وده من خلال المركز.. إدارة أو الـ.. هنا المركز الرئيسي بتاعنا في إدارته مع.. يبقى فيه معانا اتصال يومي أو مرة أو مرتين الصبح وآخر النهار عشان نتطمن إن كل الأمور مستقرة آآ.. في الدولة المصرية.
مهم قوي وإحنا بندير أي أزمة إن يكون الـ.. البعد القانوني.. آه.. موجود عندنا، عشان ميبقاش فيه تجاوز للإجراءات القانونية في التعامل مع الأزمات، لأن إحنا بنـ.. بنتكلم على أزمة متعددة يمكن، مركبة يمكن، وبالتالي البعد القانوني لازم يبقى حاضر لأن فيه كتير مننا وإحنا بنتعامل مع الموضوع طبعًا بيبقى هدفه الـ.. احتواء الأزمة والسيطرة عليها، ولكن ممكن وهو بيعمل ده، مياخدش باله إن البعد القانوني متمش وضعه في الاعتبار.
أنا عايز أقول وإحنا بنعمل الكلام ده إحنا قابلتنا أزمات كتير قبل كده، وهفكركم بأزمات سيول البحر الأحمر وجنوب سينا، والأزمات دي في الـ7، 8 سنين الـ.. دكتور هاني، وزير الري. وكان ساعتها تكلفة رفع كفاءة طريق شرم الشيخ بتتعدى 800 مليون جنيه، ولو كنا عملنا سدود لحجب الميه من الجبال اللي بتسقط منها تتكلف 800 مليون جنيه، تصوروا؟ وكل سنة، وكل سنة كنا إحنا.. آآ.. أنا آسف يعني.. نعالج السبب، لأ نعالج الضرر، ومنعالجش السبب. الكلام ده طبعًا إنتو مش حاسين بيه دلوقتي، أنا بكلم الناس اللي بتسمعني في مصر. لأن تم عمل خطة كبيرة جدًا للدولة المصرية خلال الـ7، 8 سنين اللي فاتوا. وكل.. تقريبًا.. فاضل جزء بسيط يا هاني في الـ.. جنوب سينا. يا هاني.
وزير الري: (...) دلوقتي إحنا انتهينا من 1650 عمل لحماية من السيول في مناطق...
السيسي: لا، بس استنى يا هاني. قول الرقم كويس عشان الـ.. الناس في مصر تسمع.. جهد.. محدش ياخد باله منه قوي، لكن بتشوف آثاره لما انتهت، محدش عرف الآثار دي انتهت ليه. اتفضل.
وزير الري: بالضبط يا فندم. هو طبعًا لما الحمد لله بتمر السيول من غير ما حد بيسمع حاجة زي ما حضرتك بتقول، يعني، الناس مبتشعرش قوي بحجم العمل اللي تم. 1650 عمل للحماية من السيول في محافظات شمال سينا وجنوب سينا والبحر الأحمر والصعيد مصر، صعيد مصر ناله الحقيقة لو تفتكروا كان في أسوان بتحصل سيول وبيحصل انهيارات لمنازل ومشاكل كتيرة في السنوات السابقة. الحمد لله بقالنا كام سنة دلوقتي معدناش بنسمع، ومرسى مطروح كمان كان لها نصيب كبير من الحماية من السيول. والحمد لله الوضع مستقر، بيجيلنا السيل دلوقتي.. طبعًا السيول بتتغير مع التغيرات المناخية، ولكن الحمد لله في الفترات السابقة بيجيلنا السيل بيتم توجيهه.. يا إما للبحر في المناطق القريبة من البحر الأحمر، وفي بعض الأماكن الميزة اللي كان سيادتك وجهت بيها إن الميه دي يتم الاستفادة منها. فإحنا بيتم عمل سدود تخزين للمياه بنشحن بيها الخزان الجوفي، وفي بعض الأماكن بنتركها لأهالينا اللي موجودين في الريموت إيرياس أو الأماكن البعيدة زي المناطق البدوية وغيره، بيستفيدوا منها في الشرب للماشية، أو في الزراعة. فالحقيقة الوضع اتغير تمامًا، ويمكن كنا عرضنا قبل كده عدد من الأماكن اللي كان، يمكن ثابته في ذاكرة المواطنين، إن كان حصل فيها انهيارات ومشاكل، والحمد لله النهاردا الوضع اتغير تمامًا على الأرض وإن شاء الله بنراجع على الكلام ده مع التغيرات المناخية، وعاملين خريطة على مستوى الجمهورية للأماكن الخرط..الخطيرة، والأماكن الخطيرة جدًا، وبنقدر نجدد ونحدث الخريطة دي مع مرور الوقت عشان لو احتاجنا في المستقبل منشآت جديدة، طبعًا بنرجع لسيادتك وسيادتك مبتتأخرش علينا...
السيسي: أنا شايف الدكتور إسماعيل، محافظ جنوب سينا. ما تسيبش الموضوع بتاع ال.. السدود اللي ناقصاك، وامسك في وزارة الري وامسك مع دولة الرئيس لغاية لما حاجتك تخلص. اتفضل.
محافظ جنوب سيناء: تمام يا فندم إحنا شغالين سيادتك في الموضوع يا فندم، وبطمن سيادتك، إحنا (كلمة غير واضحة) من آآ عدد المنشآت اللي تمت في الفترة اللي فاتت حوالي 510 منشأة، والحمد لله يا فندم الفترات اللي فاتت جميع الـ.. السيول اللي جات الفترة اللي فاتت كلها تم السيطرة عليها وتخزينها، وزي ما أشارت سيادتك قبل كده، إن كان (كلمة غير واضحة) حوالي 3 مليون متر مكعب ميه في جنوب سينا، وبتستخدم في الزراعة. فيعني إحنا فاضلنا جزء بسيط جدًا، وبنتابع يا فندم مع معالي وزير الري ومعالي دولة الرئيس في هذا الموضوع.
السيسي: شكرًا يا دكتور إسماعيل.
محافظ جنوب سيناء: أوامر يا فندم.
السيسي: أنا بعتبر إن يمكن يبقى فيه ملاحظات كتير جدًا جدًا في إدارة الموضوع النهاردا، وده أمر طبيعي إن إحنا أول مرة نتكلم ونعمل إجراء على مستوى الدولة بالطريقة دي. فده يعني اعتبره حاجة آآ.. إجراء.. يعني جيد جدًا، بغض النظر عن الـ.. إن إحنا معملناش حاجة بشكل عملي.. على الأرض، وده اللي إحنا هنعمله.. في المرات القادمة إن شاء الله. إن إحنا وإحنا بنعمل ده هنبتدي نعمل ونعلن للناس إن إحنا في يومين تلاتة حسب ما إنتو هتحددوا.. ونبتدي نعلن ده للرأي العام إن هيتم إدارة أزمة، ونشرح بعض النقاط عليها، ثم ننفذها بشكل عملي عشان نبتدي، تبتدي أجهزة الدولة بالكامل، مؤسساتها المختلفة بتشتغل بقى بشكل، وبتنسيق كبير قوي قوي في واقع افتراضي مفيش حاجة على الأرض الحمد لله، ولكن عشان نطور من إجراءاتنا وجهدنا في هذا الأمر.
في المرة الجاية لما اتكلمت على موضوع المستجدات دي، وإحنا بنعمل.. مثال لوزارة النقل، بيتكلم على المواني اللي موجودة عنده، بيتكلم على محطات الـ.. النقل، السكة الحديد اللي موجودة عنده، وبيتكلم على الخطوط اللي موجودة عنده، فهيضيف على الـ.. السيناريو الخطوط الجديدة اللي تم تنفيذها خلال المدة الـ.. اللي فاتت. يعني لو إحنا النهاردا بنعمل إجراء، مطرحناش فيه موضوع خطوط السكك الحديدية اللي هي الشبكة اللي هتفتح آخر السنة دي يا كامل؟
وزير النقل: تمام يا فندم؟
السيسي: مش كده؟ طب إحنا لما هنيجي نتكلم في أي سيناريو تاني هنقول حطوا بقى في اعتباركم إن فيه 400 كيلو ولا 600 كيلو...
وزير النقل: 660 بالظبط.
السيسي: طيب يعني أقصد أقول إن إحنا في آآ متابعة استمرارنا لعمل السيناريوهات بنطور تقديراتنا، وبنطور مستجداتنا، عشان السيناريو يتطابق مع الواقع اللي موجود على الأرض بالفعل.
أنا بس عايز أقول على نقطة بردو مهمة، إن يا جماعة، إحنا بنتكلم على أزمات الكبيرة والمركبة. لكن إوعوا تغفلوا الأزمات البسيطة والفردية، وإن الأزمات دي ممكن لما تتراكم يبقى ليها تأثير سلبي جدًا على الرأي العام في مصر. إذن النهاردا إحنا كدولة لما منتصداش لأزمة بسيطة أو فردية، نعتبرها موضوع فردي يعني ما.. ما تدققوش عليه.. لا، أي أزمة لو كل المسؤولين في الدولة، في الداخلية.. في آآ في المحافظة.. في مجلس الوزرا.. بصوا على الـ.. الـ.. المشكلة الفردية دي واتعاملوا معاها.. لن تتراكم الأزمات وتستغل بعد كده في إجهاد، إجهاد الرأي العام وتقليبه.. تقليب الرأي العام.
متستهونوش بالحكاية دي.. متستهونوش بالحكاية دي، لأن إنتو مسؤولين عن أمن واستقرار الدولة بالعمل. فأرجو إن إحنا الـ.. الـ.. الأزمات البسيطة والفردية منغفلهاش ومعالجتها أكنها أزمة كبيرة بردو.
مهم هنا وإحنا بنتكلم إن يبقى.. ما دام إحنا اشتغلنا في الموضوع ده وابتدينا نطرحه على إن الدولة بتعمله مش على قد كل محافظة بشكل منفصل، إن إحنا يبقى ننشر وعي جمعي لدى المواطنين في التعامل مع الأزمات المختلفة. وزي ما قلت كده يبقى الـ.. في.. وأنا اتكلمت هناك قلت يا ترى إحنا بندرب في المدارس كويس ولا لأ؟ في الجامعات كويس ولا لأ؟ في المصانع، في التجمعات اللي فيها.. سكان كتير أو عدد من البشر كتير، يا ترى متدربين بيعملوا بروفات كل شهر، كل 3 شهور.. على الـ.. إخلاء المباني بتاعتهم؟ الولاد الصغيرين اللي في المدرسة يعرفوا يتحركوا من تحت إشراف المدرسين اللي موجودين.. لا قدر.. لو حصلت حاجة.. زلزال حريق، أي أي أزمة محتملة يعني.. يقدروا يتعاملوا فيها.. وينفذوا الكلام ده؟
لو دربناهم.. لو دربناهم.. صدقوني هتبقى.. آآ.. ربنا ميجيبش حاجة، ميجيبش شر يعني، ولكن ده هيخلينا قادرين على إن أي أزمة تيجي نتعامل معاها نكون.. من غير ما يكون ليها أي تأثير، وهنا بتكلم على الوعي الجمعي للـ.. للمواطنين.
يتبقى التدريب.. التدريب هنا بتكلم فيه تدريب على مستوى التخصصات المختلفة، فني.. يعني المعدة اللي موجودة دي بولدوزر، لودر.. أي معدة تانية، سلم كهربائي الحاجات اللي بتستخدم يعني.. فده تدريب فني متخصص، إن الأطقم اللي شغالة على المعدة دي قادرة على إن هي تقوم بتنفيذ العمل بتاعها.. فده موضوع إحنا محتاجين نبقى مطمنين عليه إن هو بيتم بشكل مستمر، وبنقيس مستوى التدريب ده سواء كنتم عايزين تعملوه تدريب مجمع، تقولوا النهاردا كل الأطقم اللي هتشتغل بالمعدات التقيلة دي، تيجي تاخد دورة لمدة شهر أو اتنين، ونبقى في نهاية الدورة إحنا اتأكدنا إن هم قادرين على إن هم يعني.. تبقى الـ.. مش معقول يبقى عندي معدة.. ومعدة كويسة قوي يمكن.. وبعدين بنشغلها بنص الكفاءة بتاعتها، أو مش عارفين حتى. فده محتاج مننا إحنا برامج التدريب الخاصة بهذه المعدات، ثم برامج التدريب بقى لما المعدات دي تشتغل مع بعضها البعض. أنا بس قلت أشير بردو إلى نقطة الـ.. التدريب اللي بتكلم عليها دي.
إنتو اتكلمتوا هنا على الجهد الأهلي، وأنا بقول إن الجهد الأهلي للجمعيات الأهلية والجمعيات الخيرية المختلفة، أمر.. وإحنا عندنا حصر في وزارة التضامن لده.. ويمكن المرة الجاية يبقى عندنا فرصة إن إحنا نشاركهم بشكل أو بآخر معانا في الـ.. المحاكاة أو التدريب القادم إن شاء الله.
أنا مش عايز أطول عليكم أكتر من كده، أنا عارف إن اليوم كان طويل، لكن أنا بشكركم جميعًا و.. وإحنا بنقول لنفسنا إن إحنا خطوة على طريق دولة حديثة بتتعامل بشكل علمي، وبشكل.. وبإجراءات وبإمكانيات، يعني عشان تقدر تجابه لا قدر الله أي تحدي ممكن يقابلها على مستوى الـ120 مليون في آآ.. في الدولة المصرية.
فـ.. مرة تانية بشكركم، وإن شاء الله نلتقي مرات في مشاريع أو تدريبات بهذا المستوى، ويمكن تكون أعمق من كده، عشان كمان.. بس بشكل عملي على الأرض أكتر، عشان نحسن دايما من قدرتنا على مجابهة أي أزمة لا قدر الله محتملة يعني. شكرًا جزيلًا.
ألقيت الكلمة في مقر القيادة الاستراتيجية بالعاصمة الجديدة، حيث شهد الرئيس عبد الفتاح السيسي تفقد واصطفاف المعدات واستعراض إمكانيات الدولة لمجابهة الأزمات والكوارث، وذلك بحضور رئيس مجلس الوزراء الدكتور مصطفى مدبولي، والقائد العام للقوات المسلحة وزير الدفاع والإنتاج الحربي الفريق أول عبد المجيد صقر، ووزير الموارد المائية والري الدكتور هاني سويلم، إلى جانب عدد من الوزراء وكبار قادة القوات المسلحة والمسؤولين.