نص كلمة السيسي خلال افتتاح مشروع الدلتا الجديدة التنموي المتكامل 17/5/2026
السيسي: بهاء، يا بهاء..
العقيد بهاء الغنام، المدير التنفيذي لجهاز مستقبل مصر للتنمية المستدامة: أمر سيادتك يا فندم.
السيسي: أنا مش عايزك تستعجل.. ال.. ممكن تكون انت عارف، وبعضنا عارف، لكن إحنا فيه زملا موجودين معانا كتير، و.. إعلاميين، وحتى مستثمرين، فـ.. ارجع للخريطة اللي فاتت من فضلك.
بهاء الغنام: لو سمحت عودة لمرئية الأمر الصناعي..
السيسي: خليها كده بس.. وابتدي بالراحة، قول للناس إيه الشمالي، وإيه الشرقي، عشان.. هو إحنا مش بن.. بنقول ده عشان آآ.. عشان نخلي المصريين يبقوا سعدا بنفسهم، لأن اللي اتعمل فضل من ربنا كبير، ومش هيتعرف لو إحنا جينا على جزء زي ده، ده معاك وزارة الري دفعت مليارات، ومعاك وزارة الكهربا دفعت مليارات، والزراعة، والدنيا كلها شغالة.
فلو انت دخلت على الحفر وكلام من هذا القبيل من غير ما نشرح بالراحة كل آآ يعني المصدر ده جاي إيه وبيعمل إيه والمصدر ده جاي بيعمل إيه.. ثم انت بتتكلم على مساحة أرض ضخمة جدًا، اتعملت فيها ترعة واتعمل فيها، أو مسارات ميه يعني، واتعمل فيها مسارات كهربا، واتعملت فيها مسارات طرق، واتعـ.. حاجات كتير يعني، بس ادينا الملامح الرئيسية.
أنا مش هعجلك في الـ20 دقيقة اللي هم مخصصينهالك، بس على الأقل خلـ.. أنا.. يعني هو ده الحكاية، هي دي.. أنا لما بقول كده للـ.. لينا كلنا وإحنا بنـ.. مش عايز أقاطعك بقى تاني، بقول كده لكل ال.. سامعينا، وبيشوفوا الكلام ده، آآ.. بقول عشان تفرحوا مش بـ.. مش ببهاء، بيكم، بنفسكم، ببلدكم، لأن الكلام ده مكانش ممكن أبدًا يتعمل بإيد المصريين يعني، وتضافر الأجهزة مع بعضها.. اتفضل.
بهاء الغنام: تمام سيادتك.
شرح مطول من العقيد بهاء الغنام لمدة 18 دقيقة.
السيسي: هاتلي بقى الخريطة ال.. مرة تانية لو سمحت. الخريطة اللي أنا كنت قولتلك..
بهاء الغنام: الخريطة لو سمحت.
السيسي: أيوة من الأول.. آه.. لا اللي هي ال.. اللي عليها المراحـ.. أيوة.. لا اللي عليها الـChart بتاع ال..
بهاء الغنام: هات، أيوة..
السيسي: أيوة هي دي آه..
بهاء الغنام: هي دي أيوة كمل لو سمحت.
السيسي: آه.. الدكتور هاني.. دكتور هاني (وزير الري هاني سويلم).. أنا بس عشان آآ.. يعني حضرتك وال.. والدكتور آآ محمود عصمت (وزير الكهرباء)، هتكلمونا باختصار يعني، لأن مهم أوي إن الناس تعرف إن المشروع ده عشان يتعمل، ده مشروع آآ مشروع كبير أوي، وطبعا آآ.. بهاء اكمنوا هم حددوله 20 دقيقة فعايز يلم الموضوع كله ف كلمتين ويـ.. فـ.. ففرصة لحضرتك ولـ.. والدكتور محمود عصمت يكلمونا باختصار عن المحطات وعن الشبكات اللي اتعملت وال.. والمسارات وكده، و.. والدكتور محمود يكلمنا عن شبكة الكهربا والمحطات اللي اتعملت والمحولات اللي اتعملت عشان يبقى هنا فيه 2 جيجا، وممكن تقولوا برضو جزء من التكلفة، ممكن تقولوا جزء من التكلفة يا دكتور، لأن الناس ممكن لو سمعت، يعني.. اتفضل.
وزير الري: طيب يا فندم هو بالنسبة لل، الدكتور بهاء يمكن اتكلم على مسارين للمياه، فيه عندنا المصدر الشمالي وده آآ القدرة بتاعته 7.5 مليون متر مكعب في اليوم من المياه، والحقيقة هي ميه تجميع كل الميه الصرف اللي كانت بتطلع...
السيسي: الزراعي..
وزير الري: الصرف الزراعي..
السيسي: الزراعي..
وزير الري: الصرف الزراعي اللي كان بيطلع للشمال الحقيقة تجميع ومعالجة ثلاثية متقدمة بتطلع ميه نظيفة جدًا بيتم استخدامها في بعض الأجزاء، ودي حضرتك فيها 13 محطة رفع، الحقيقة ده مشروع عملاق يمكن من أكبر المشروعات الزراعية في العالم، إلا إن مسار نقل المياه هو أكتر من 170 كيلو بيتم نقلها من الشرق إلى الغرب، والجزء التاني من المشروع الحقيقة يمكن هو اللي كنا بنتكلم عنه دلوقتي أنا بتكلم عن المشروع الرئيسي مبتكلمش على التفاصيل الداخلية للمشروع، هو مسار تاني خالص عبارة عن 50 كيلو متر طولي في آآ 6 محطات رفع رئيسية ويمكن فيه محطات داخلية طبعًا والبوسترات اللي بتوزع على الأراضي يمكن هقول إن كل محطة من دول فيها ما يزيد عن 13 طرمبة ميه ودي أرقام ضخمة جدًا الحقيقة لأن إحنا هنا بنتكلم على رفع ما يزيد عن 9 مليون متر مكعب من المياه يوميًا علشان المسارين مع بعض يكملوا زراعة 2.2 مليون فدان في الصحرا الغربية.
السيسي: طب أنا هكمل يعني برضو عشان نثري بس الموضوع دوة. أنا عايز أقولكم إن إحنا عشان ناخد ميه الصرف الزاعي للمصدر الشمالي اللي قال عليه الدكتور هاني، إحنا بنجمع الكلام ده في تقريبًا أكتر من 150 كيلو مسار تم حفره وتجهيزه عشان ياخد الميه دي وينقلهالنا إلى محطة 3 يوليو؟، مش كده؟
وزير الري: الدلتا الجديدة، محطة الدلتا الجديدة 7.5 مليون متر مكعب في اليوم.
السيسي: اللي هم.. اللي هي الميه دية.
وزير الري: بالظبط.
السيسي: أنا بس بقول إن الميه دي كانت قبل كده، والكلام ده أنا قولته، لكن اسمحولي أقولهلكم تاني.. الميه دي إحنا كنا قبل كده كانت بتنزل في البحر المتوسط، اه كان استخدمت مرة قبل كده في الزراعة وكانت بيتعملها برضو معالجة عشان تستخدم عدة مرات، ولكن إحنا قولنا حتى بده بعد معالج.. بعد استخدام الميه دية، نجيب كل الصرف الزراعي اللي موجود، وناخده ونجمعه عكس اتجاه الجاذبية يا دكتور مصطفى، ونجمعهم، فعشان نعمل ده ده مشروع كبير أوي، مشروع كبير أوي.
نجيب، تقريبًا تقريبًا مساره حوالي 150 كيلو، وفيه أكتر من 13، 14 محطة رفع، كل محطة حكاية كبيرة أوي، لو إحنا النهاردا يا بهاء، قدمنا المشروع بالطريقة دية، انت بتبخس نفسك وبتبخس شغل الدولة، لإن ده إحنا نجيب محطة واحدة فقط، ونوريكم صورتها عاملة إزاي، وانتو تعرفوا إن المحطة دية لما تتعمل منها 13 محطة أو 15 في جزء واحد شمالي، وزيهم في الجزء الجنوبي، مع حفر وتبطين مسار طوله 150 كيلو آآ.. في جزء واحد، الشمالي، وتقريبًا زيه تحت في ال.. في الشرقي؛ يعني إحنا بنتكلم في تقريبًا تقريبًا مسار طوله 300 كيلو، كـ إيه؟ يخش عالمحطات، ثم بعد كده تتعمل شبكة تنقل الميه دي داخل الـ2 كيلو الـ2.2 مليون فدان، وتتعملهم شبكة كهربا أيضًا لل.. للمحطات بتاعة الرفع، ثم شبكة كهربا داخلية اللي هو قال عليها أكتر من 100 ألف آآ برج كهربا أو عمود كهربا لصالح المكان ده.
إحنا بنتكلم في رقم كبير أوي، انتو لو قولتوا النهاردا إن الفدان بنيته الأساسية هنا، هنا.. اتكلف 350، 400 ألف جنيه، يبقى انت بتتكلم في 800 مليار جنيه، للناس اللي قاعدة بتسمع الكلام. عشان توفر فرص عمل، لو قولت إن كل فدان من دول هيشتغل فيه إنسان واحد، انت بتتكلم في مليون ونص لـ2 مليون انسان يشتغلوا على مدار السنة، يعني انت وفرت فرص عمل لـ2 مليون انسان. إحنا كده مبنقدمش المشروع بالشكل اللي يليق بيه يا جماعة.
انت بتتكلم في مشروع عالأقل 800 مليار جنيه على بعضه بقى ال.. كل وزارة قدمت اللي قدمته، الكهربا، ال.. فيه كلام كتير بقالنا 3 سنين شغالين عليه عشان المشروع ده يطلع بالطريقة دية.
وأنا مقصدش وأنا بشرحهولكوا بالطريقة دية إن أنا يعني نقول إن الحكومة اشتغلت كويس، أو الدولة اشتغلت كويس، أنا بقولهولكوا كده عشان تعرفوا إن عملية التنمية في أي دولة محتاجة جهد وعمل وإخلاص من كل أجهزتها، وإن الدولة لازم يكون عندها زي ما اتقال كده الأمل وال.. والعمل.
مش أمل بس، إنك تقول إن أنا عايز أعمل مليون فدان، وبعدين مايـ.. هيتعملوا إزاي؟ كل آآ.. عشان يتعمل الكلام دوة في العصر الحديث اللي إحنا فيه، لما جم في آآ من 200 سنة ولا أكتر حبوا يعملوا ال.. ال.. يعني.. النظم اللي اتعملت أيام آآ محمد علي.. أنا قولت الكلام ده قبل كده برضو.. هو استخدم مسار آآ طبيعي خالص في.. لل.. لشق الترع والمصارف، مبنية على ال.. تدرج طبيعي أو انزلاق طبيعي للميه من العالي للواطي، مكنش محتاج أبدًا لكهربا ولا محتاج حتى أي معدات ترفع الميه للـ.. في مسارها، لكن إحنا اضطرينا، لأن مفيش تاني، مفيش أماكن تاني نقدر نعمل فيها غير الأماكن اللي إحنا بنتكلم عليها دية، فاتحركنا واشتغلنا عكس القوانين بتاعة الطبيعة، من الواطي للعالي، نجيب الميه من، بعد ما توصل لإسكندرية والمكس وكلام من هذا القبيل، ثم نجيبها عند المصدر الشمالي عند محطة المعالجة، تعالج الميه دية وتنزل بقى بعد كده برضو بمحطات تانية توصل لغاية ما تعمل الجزء اللي إحنا بنتكلم فيه، حوالي 450 أو 450 لـ500 ألف فدان.
الناحية التانية دية، نفس الكلام، بنرفع الميه من ال.. من ال.. من النيل، ثم نضخها بمحطات رفع على امتداد خط السير 14، 15 محطة، بالطول اللي أكتر من 120، 130 كيلو.
ده كلام آآ كلام كبير أوي عشان في الآخر أقول إن أنا عندي 2 مليون فدان قابلين للزراعة، ومعاهم إيه بقى.. معاهم إيه؟ معاهم فرص عمل مستقرة، مش عمالة مؤقتة، فرص عمل مستقرة، الشركات اللي شغالة هنا، كام شركة يا بهاء؟
بهاء غنام: ألف شركة يا فندم.
السيسي: لا أنا بتكلم للزراعة.
بهاء غنام: الزراعة سيادتك أكتر من 150 شركة.
السيسي: أنا بتكلم إن إحنا اوعوا تفتكروا إن اللي بيقوم بالزراعة هنا حد تاني غير شركات القطاع الخاص، كل شركة واخدة لها ألف ألفين حسب قدرتها، وحسب التعاقد معاها، هي اللي بتقوم في إطار خطة زراعية متكاملة.
أنا موقفك كده يا هاني؟ طب أقعد استريح، استريح.. استريح يا هاني (وزير الري).
في إطار خطـ.. يعني إيه دورة زراعية متكاملة؟ يعني في إطار إن إحنا مش النهاردا آه فيه مستثمرين معانا صحيح، ولكن إحنا بنقولهم من فضلكم إحنا هنزرع في المساحة بتاعتنا دية حجم معين من المحاصيل، ونوع معين من المحاصيل، تجود في الأراضي الصحراوية، تجود في الأراضي الصحراوية، ويبقى إنتاجها أفضل منها لو تُنتج في الأراضي ال.. الطينية.
مثال: لو أنا النهاردا بقول، وبقول الكلام ده دلوقتي عشان الناس في مصر تسمعه، وعشان إخوانا الفلاحين يعرفوه، انت لما تزرع البنجر في أي أراضي الدلتا القديمة، إنتاجك تقريبًا، يمكن 50% من إنتاجها في الأراضي الصحراوية. طيب. وفي القمح برضو العكس، إنتاجي هنا من القمح آه أنا زرعت هنا أكتر من 500 ألف فدان ولا أكتر، لو هنا وهنا وتوشكى، بنتكلم في مليون فدان. آه ده بينتج بنحاول نحل المسألة، لكن عايز أقولكوا إن أنا لو بنتج القمح في الأراضي الطينية، ويردني وزير الزراعة وتردني يا هاني، إنتاجها أفضل من إن أنا.. ولا أنا بقول كلام آآ.. أفضل من إن أنا أنتجها في ال.. الأراضي الصحراوية.
إذًا، لو أنا عملت تغيير، إحلال، خليت البنجر هنا، وخليت القمح في الأراضي الطينية، يبقى أنا عظمت من المنتج، خليت الإنتاج اللي طالعلي من القمح في الأراضي الطينية أكتر، وخليت البنجر اللي طالعلي في الأراضي الصحراوية أكتر، وحاجات أخرى.
إذًا لما إحنا جبنا المستثمرين معانا هنا، إحنا جبناهم وقلنالهم إن إحنا هنزرع واحد اتنين تلاتة عشان نعظم من حجم الإنتاج بتاعنا ما أمكن، ولكن فيه بعض المحاصيل الاستراتيجية هنضطر إن إحنا نزرعها، وقد يكون إنتاجها يعني مش آآ عالأقل في المرحلة الأولانية، مش زي ما إحنا عايزين، زي القمح مثلًا على سبـ.. أو الدرة وكلام من هذا القبيل. آه بنطلع إنتاج وإنتاج كويس، لكن لا يقارن لو أنا عندي 1000 فدان بزرعهم في الأراضي الطينية، أو الأراضي القديمة بتاعة الدلتا بالقمح أو بالدرة، إنتاجها أكيد أكتر من اللي موجودة في الأراضي الصحراوية.
يبقى التـ.. الـ200 شركة ولا الـ150 شركة اللي موجودين معانا، اشتغلوا معانا في إطار دورة زراعية عشان ننمط الإنتاج بتاعنا طبقًا لرؤية الدولة محتاجاها، وتقدمها آآ تحقق بيها آآ متطلبات لصالح الدولة وصالح مواطنيها.
يتبقى جزء منهم لازم نتكلم فيه، إيه هو؟ إن.. اوعوا تتصوروا إن ممكن فيه دولة يبقى عندها اكتفاء ذاتي كامل في إنتاجها الزراعي، عالأقل في دولة زي مصر، يعني عشان أكون منصف، مش عايز.. فيه دول تانية ربنا سبحانه وتعالى حباها بأمور مختلفة، وبالرغم من كده برضو هي معندهاش اكتفاء ذاتي لكل المحاصيل عشان فيه دورة ميه ودورة مناخ وكلام من هذا القبيل قد لا تتيح.
لكن إحنا، أنا بتكلم على بلدنا هنا، مهما عملت، لا يمكن أبدًا أحقق اكتفاء ذاتي. طب أنا بقوله ليه؟ بقوله لأن أنا دايمًا بتكلم على الوعي بينا وبين بعضنا. إحنا أبدًا أبدًا بنتكلم عشان نعرف ونفهم الحكاية، مش ممكن أبدًا، لو حطيت كمان 2، 3 مليون فدان زيادة، فوق اللي إحنا الـ4 وشوية اللي إحنا بنتكلم عليهم دول، ما إنت.. هل تقدر تكفي اكتفاء ذاتي لـ110 مليون إنسان؟ صدقوني يعني يعني أنا أتمنى، بس ده مش، مش.. بقول كده ليه؟ عشان بلاقي مثلًا مقالة في الجرنان حد من إخوانا الإعلاميين بيتكلموا، فيبقى ييقولك كده.. لا إحنا مش هنقدر نحقق اكتفاء ذاتي، لأن إحنا معندناش أراضي ومعندناش ميه تكفي إن إحنا ننتج كل.. كل طلباتنا.
مثال: هو انت النهاردا لو انت بتيجي تتكلم مثلًا عايز تجيب درة عشان حاجتين: علف لل.. للماشية، وعلف للدواجن، انت بتتكلم في كام مليون طن؟ بتتكلم في ملايين الأطنان، 17؟ لأ كام؟ يعني الدكتور مصطفى بيقولي من 14 لـ17 مليون طن. طب أنا لو حطيت ده جنب القمح جنب ده جنب ده، مفتكرش الأراضي بتاعتنا مجملها على بعضها بدورتها الزراعية على مدار السنة ممكن تلبيلك طلبك، أو تلبي الطلب اللي إحنا محتاجينه.
فا.. لو أنا آآ فلما نيجي نـ.. حد يتكلم يقول إيه: إحنا بالطريقة دي إن شاء الله هيبقى عندنا اكتفاء ذاتي، أو رايحينله.. لأ.. طب لأ ليه؟ لأ عشان نبقى عارفين. وبرضو، يعني حد يقولي إيه: متى نشعر بثمار آآ.. الثمار هو.. ثمار التنمية هو عمل دائم، والتنمية لا تنتهي.. التنمية لا تنتهي، والطموح لا ينتهي. الدولة اللي هي حققت إنجاز ثم إنجاز ثم إنجاز، وتستمر الدولة تنجز كده حتى في أجيالها اللي بعد كده واللي بعد كده، مفيش توقف.
إذًا مشروع الدلتا اللي إحنا بنتكلم فيه، هنا مثلًا مثلًا يعني اتعمل 500 ألف طن آآ صوامع عشان إنتاج القمح اللي يطلع ده غير اللي كان قبل كده، وإحنا الكلام ده افتتحناه السنة اللي فاتت يا بهاء مش كده؟ عشان القمح اللي يطلع نحطه في الصوامع دية. ثم بقى منتجات أخرى معمولة تطلع من هنا تتـ.. يتم عمل آآ يعني آآ تصنيع زراعي لها لتعظيم الاستفادة في الصوب اللي موجودة، في حاجات أخرى كثيرة جدًا جدًا، أتمنى إن يبقى فيه فرصة أكتر في الكلام عنها بتفاصيل، لأن المشروع الحقيقة يعني إحنا اتكلمنا هنا فقط عن الجزء اللي موجود في المنطقة دية، لكن مثلًا متكلمناش على المنيا وبني سويف، متكلمناش على كوم امبو، متكلمناش على توشكى وشرق العوينات، اللي هناك دول مليون فدان، متكلمناش على الـ500 ألف فدان اللي في سينا عشان نقول يعني هل ده ال.. ال 4.2 ولا 4.4 مليون فدان هو ده لو لقينا فرصة ف حتة تانية، بنسكت؟ إحنا عملنا طريق هناك، يعني، 200 كيلو، في أصعب ظروف، عشان ندخل نشوف، نشوف، الميه اللي موجودة في اللي هناك ممكن نزرع بيها 700، 800 ألف فدان مياه جوفية، من المياه الجوفية.
أنا حبيت أقول كده لـ.. لـ.. لناسنا اللي موجودين، و.. إحنا كلامنا قليل، و.. تقديمنا للشغل بتاعنا محتاج مننا آآ عناية أكتر لأن إحنا مش قادرين نقول للناس إن دولة فيها 120 مليون عشان تقدر تلبي مطالبهم في كل شيء، ده أمر ليس باليسير، وده مش معناه إن إحنا كـ.. كحكومة أو كدولة آآ عايزه تـ.. إحنا جزء من البلد، إحنا جزء من الناس، إحنا واحد، بس بنقول إن اللي بيتعمل، وأختم بيه الكلام، ده فضل كبير من ربنا.. ده فضل كبير من ربنا. (تصفيق)
والله العظيم، والله العظيم، والله العظيم، ميتعمل إلا بفضل من ربنا. شكرًا. (تصفيق)
ألقيت الكلمة في محور الشيخ زايد بمحافظة الجيزة، حيث شهد الرئيس عبد الفتاح السيسي افتتاح مشروع الدلتا الجديدة التنموي المتكامل، وذلك بحضور رئيس مجلس الوزراء مصطفى مدبولي، والقائد العام للقوات المسلحة، وزير الدفاع والإنتاج الحربي الفريق أول عبد المجيد صقر، والعقيد دكتور بهاء الغنام، مدير جهاز مستقبل مصر للتنمية المستدامة، وعدد من الوزراء وكبار رجال الدولة وممثلي الشركات المساهمة والقطاع الخاص.