نص كلمة السيسي خلال لقائه عددًا من طلاب الأكاديمية العسكرية 30/9/2024
ألف مبروك، وإن شاء الله يعني نفرح بيكم، بتخرجكم، وإن شاء الله تبقوا إضافة كبيرة جدًا للقوات المسلحة بالجهد اللي اتعمل خلال فترة إعدادكم في الكليات وال.. خلال ال.. السنين اللي فاتت، وإن شاء الله توفقوا في حياتكم العملية.
إحنا لينا ثوابت في سياستنا الخارجية، الثوابت دي تتسم دائمًا بالاعتدال والتوازن في معالجة قضايا، سواء كانت القضايا دي على مستوى الإقليم اللي هو منطقة الشرق الأوسط، أو على مستوى العالم، وبيكون دايمًا دورنا دور إيجابي، آآ يعني لإنهاء الأزمات وحلها، مش لتصعيدها.
دي ثوابت إحنا ماشيين بيها في سياستنا الخارجية، والحقيقة دي مقدرة من دول العالم كلها، إن يبقى يحسوا إن مصر لها دور إيجابي في إن هي ما بتقومش أبدًا بالعمل على صراعات أو إزكاء صراعات أو التآمر على الآخرين أو التدخل في شؤون آخرين، الدول يعني أنا بتكلم.
طيب، إحنا بنحاول زي ما قلت اللي هو سياسة متزنة شديدة الاعتدال ما أمكن، ومحاولة إن إحنا نمارس دور إيجابي في إنهاء الأزمات على مستوى العالم.
منطقتنا بتمر بمفترق طرق خطير جدًا، وده يتطلب مننا كلنا إن إحنا ننتبه لده وللعمل على إن إحنا نوجد زي ما قلت حوار استراتيجي فيما بيننا كلنا، للوصول إلى حالة من التفاهم تجاه مصالحنا اللي أكيد مش متقاطعة مع بعضها البعض.
بنبذل جهد كبير جدًا، والجهد ده حقق أهدافه، أو حقق جزء من أهدافه من الدول دية ودول أخرى.
وهنا، حياة كريمة، إحنا كنا عاملين لها 3 مراحل يا أحمد، كام مرحلة؟ تلت مراحل، كل مرحلة 1500 قرية، كام؟ 1500 قرية في كل مرحلة، والتوابع، التوابع بتاعتهم حوالي 38، 40 ألف تابع لل4500 قرية دول، كام؟ حوال.. احفظهم 40، 40 ألف تابع يعني إيه؟ اللي هي شوية البيوت اللي حوالين القرية في.. هنا وهنا وهنا وهنا، ماشي؟ وبدأنا المرحة على إن إحنا التكلفة المالية اللي محطوطة للموضوع دوة هتتكلف 600 مليار جنيه.
( صمت يعقبه تنهيدة)
لما نزلنا على الأرض يا أحمد، الحجم، حجم حجم المطلوب ضخم جدًا، وكان لازم نعمله في المرحلة الأولى، إحنا قربنا نخلص، فبدل ما كنا عاملين حسابنا إنها تاخد سنة، سنة ونص، خدت 3 سنين، وخدت.. خدت بدل 200 مليار جنيه، حياة كريمة المرحلة الأولى داخلة في 400 مليار جنيه المرحلة الأولى. طب المرحلة التانية هتبقى كام؟ أكيد الرقم زي ده إن ما كانش أكتر، والمرحة التالتة كمان زيها.
طيب، إحنا بدأنا بأنهي قرى يا أحمد؟ إحنا بدأنا بالقرى الأكثر تضررًا، الأكثر حاجة، وقلنا، يعني كان العملية مش عملية إيه، جينا آآ.. لأ ده إحنا درسنا إيه القرى اللي إحنا ندخل فيها، وإديناها أولويات، المرحلة الأولى دي هي القرى الصعبة أوي، ثم القرى الـ 1500 التانيين، هتبقى الأفضل شوية، وثم المرحلة التالتة والأخيرة إن شاء الله كده. طب الرقم كام؟ الرقم زي ما قلت لك كده المتوقع للمرحلة التانية 400 مليار.
طبعًا الظروف اللي إحنا فيها ظروف صعبة يا أحمد، وأنا بقولها، لكن لا يمكن، لا يمكن وأنا بأكد لك ده إن شاء الله، إن إحنا هنتوقف على الخطة دي، خطة آآ حياة كريمة، لا يمكن، إنما عايز أقول لك إيه، أنا، أنا فقدت في ال.. في الكام شهر اللي فاتوا دول من موارد قناة السويس بس أكتر من 300 مليار جنيه، اللي هم إيه؟ حوالي 6، 6 ونص مليار دولار، 600، 700 مليون دولار شهريًا في المدة دي كلها، ولسه، فده يعني خلاني بنشـ.. بننهي المرحلة الأولى، لكن و.. ابتدينا نخش بـ.. على استحياء في المرحلة التانية، لكن الخطة ماشية. يمكن قوة الدفع بتاعتها أقل شوية نتيجة الظروف اللي بحكي لك عليها، اللي بتمنى من الله سبحانه وتعالى إنها تنتهي.
في في الرقمنة بتتولد مليون فرصة عمل جديدة على الأقل في هذا المجال كام؟ مليون فرصة عمل، وفي الحقيقة إن فرص آآ يعني إن يتولى أو حد يلتحق بهذه الوظايف مش كتير أوي، ليه؟ لأن مستوى التعليم المطلوب لممارسة هذه الوظايف آآ مش كتير، وهنا على السبيل في مصر في بلدنا، إحنا مهتمين جدا بالموضوع دوة، بإن إحنا يبقى موضوع الرقمنة والحاسبات ونظم المعلومات وكل الشغل المرتبط بالذكاء الاصطناعي، كل العلوم المرتبطة بيها، إحنا محتاجين نضخ فيها شباب وشابات أكتر كتير من الأعداد اللي بتخش، ونخلي مستوى التعليم اللي بياخدوه مستوى تعليم متقدم جدًا، لأن ده الفرص العمل بتاعته موجودة، وموجودة من البيت، إنت معاك الحاسب بتاعك، ممكن تشتغل وتخاطب العالم كله، وتقدم مواهبك وهم يطلبوا منك، ويبقى في اتفاق ويبعت لك المقابل بتاع الشغل اللي إنت هتعملهوله. تخيل؟ تخيل إن ده متاح دلوقتي ومتاح بآلاف الوظائف بمستويات مختلفة؟
وأنا كنت اتكلمت في الموضوع ده قبل كدة كتير، وقلت إن إحنا في مصر لكل آآ يعني أسر، الأسر المصرية، انتبهوا وعلموا أولادكم تعليم ياخدوا فيه فرصة حقيقية للعمل، وعمل إيه، ذو عائد، ما عندكش فكرة، كل ما يكون يعني الحاصل على المؤهل سواء كان شاب أو شابة متقدم جدًا في تعليمه، كلما زادت فرص إنه ياخد.. أنا بتكلم على النظم وعلى ال.. هندسة الحاسبات وعلى الذكاء الاصطناعي، وعلى كل ما هو كل المجال ده، كل ما يكون المستوى التعليم متقدم جدًا جدًا، كل ما بيبقى عنده فرصة إن هو يشتغل وياخد عائد مجزي جدًا جدًا جدًا.
أنا عايز أقول لك من غير ما أذكر دول، في، في دول المواطن فيها ياخد 3000، 4000 دولار في الشهر، وفي دول تانية ياخد 30، 40 ألف دولار في الشهر. ده حاسبات ورقمنة، وده حاسبات ورقمنة، ولكن مستوى التعليم ومستوى التأهيل ومستوى ال.. الإجادة، مختلف.
كام؟ 30، 40 ألف دولار في الشهر، و 50 ألف دولار في الشهر كمان. طب ده معناه ده متاح لأبناء وبنات مصر؟ طبعًا، بشرط إن هم يلتحقوا وبسرعة في هذا التعليم، والأهالي في مصر تحطه هدف. الأهالي في مصر تحط هذا الموضوع هدف، وأنا اتكلمت فيه كتير، والمفروض إن كل أجهزة الدولة كانت تشتغل لإلقاء الضوء عليه، وللإشارة ليه، ولمساعدة الناس إنها تاخد التعليم ده.
أنا قلت قبل كدة الأهالي بتاخد أبناءها وبناتها يروحوا بيها المدارس، أو يروحوا بيها مراكز ال.. الدورس يعني.. لو هم حطوا الجهد ده في الموضوع اللي بقول عليه، اللي هو ال، العلوم دية والكليات دية، وإحنا متوسعين فيها بشكل كبير جدًا، بس يهتموا بيهم وإن هم في الـ 4 سنين بتوع الدراسة يشتغلوا معاهم بشكل قوي جدًا، بحيث إن هم يبقى مستواهم يحقق المعايير اللي بقول لكوا عليها، إنتوا هتجدوا فرص عمل ليهم، وعوايد كويسة لمصر.
(...) عربية رغم إن هي فيها إمكانيات كويسة، بسعرها.. بس الكلام ده يا جماعة آآ مش صح، الموضوع ده مش صح، وترتب عليه الفكرة دي نفسها لما الدولة ما عملتهاش بشكل متعمق في دراسة، الناس اللي.. اللي كان إحنا بنستهدف إن إحنا نساعدهم بظروفهم اللي ربنا سبحانه وتعالى آآ يعني اتحطوا فيها، اتضروا، إحنا فوجئنا بإن ما يقرب من 160 ، 200 ألف عربية دخلوا في خلال سنة ونص، ال.. ال.. ال.. الجمارك بتاعتهم 20 مليار جنيه، وتقريبًا اللي خدوا العربيات دية 10، 12 % من المعاقين، والباقي يا إما ورق مش مظبوط، يا إما إدوا للمعاق حاجة، وخد منه يعني بطاقته وخد منه كده، وراح جاب العربية.
الكلام ده مش هيحصل تاني، أنا مش بقول كده عشان إنت ما تعملوش، لأ، إنت المفروض ما تعملش كده.
أنا متصور إن الاختبار خلال الـ 10، 12 سنة اللي فاتوا، رغم كل الظروف الصعبة دي، هو متماسك ومتفاهم، وأنا بقول له، يعني بسجل لك ده، والتاريخ هيسجل لك ده، إنك إنت قدام كل الإجراءات اللي اتعملت وكل الظروف الصعبة اللي مرينا بيها فيها، صامد ومستقر، ولازم نستمر في صمودنا واستقرارنا حتى نحقق بفضل الله سبحانه وتعالى اللي إحنا بننشده من خير وتقدم وازدهار لبلدنا.
الشعب المصري هو محور ارتكاز استراتيجي للدولة المصرية. الشعب المصري محور ارتكاز استراتيجي للحفاظ على الدولة المصرية، وبالتالي هو اللي بيحاول يعبث، اللي بيحاول يحرك، بيشتغل على ده، وزي ما قلت كده، في زيكم شباب كتير جدًا دلوقتي موجود بقى عنده 20 و25 وأقل شوية، ده ما حضرش الحالة اللي إحنا كنا موجودين فيها، وحجم الخراب اللي إحنا عشناه.
هل بعضكم يعتقد إنه يقول يعني هل هذا الموضوع هو المهم؟ أنا عايز أقول لكم هذا الموضوع هو الأهم، هو الفهم، هو ده اللي هيخليك تصمد وتستحمل معايا، لما ظروفك الاقتصادية تبقى صعبة هتستحمل، هتبقى عارف إن الموضوع ما فيش حد، وأنا قلت الكلام ده قبل كده، على في مكاني يعني، أو أي مسؤول حتى، عنده فرصة إنه يساعد الناس اللي عنده وما يعملش.
كل سنة وإنتو طيبين، وألف مبروك، وسعيد بيكم وسعيد بأسئلتكم، وفرحان بيكوا. متشكرين، خلي بالكم من نفسكم، حافظوا على نفسكم، حافظوا على أسركم، لما تتخرجوا بالسلامة إن شاء الله قريبًا، أف ألف مبروك لكم ولأسركم.
ألقيت الكلمة في القاهرة، بالأكاديمية العسكرية المصرية، أمام خريجي الأكاديمية، الدفعة 118 حربية وما يعادلها.