نص كلمة السيسي خلال حفل تخرج دفعة جديدة من طلبة أكاديمية الشرطة 29/9/2024

2:28:10

السيسي: لو سمحت اللوا محمد أبو الخير، اعمل جنبًا سلاح، اتفضلوا استريحوا، خمس دقايق بس لو سمحتوا، اتفضلوا.

اللواء محمد أبو الخير: طابور الخريجين، جنبًا سلاح!

السيسي: بسم الله الرحمن الرحيم، اسمحوا لي في البداية إن أنا أوجه التحية للأسر أس ال.. الطلبة، وأسر الخريجين، وأهنيهم على تخرج أبناءهم (تصفيق)

وأشكرهم أيضا على إن هم، يعني، أعدوا أبناءهم وبنـ.. أبناءهم وبناتهم علشان يبقى كلامنا دقيق يعني، وجهزوهم بشكل جيد جدًا، وبعدين قدموهم آآ هنا لبلدهم مصر عشان يشاركوا في حماية أمنها واستقرارها، فأنا بشكرهم وبهنيهم، وإن شاء الله نشوف أبنائهم دايمًا في أفضل الحالات.

واسمحوا لي إن أنا أشكر الخريجين وطلبة الأكاديمية والقائمين على العملية التعليمية والتدريبية في الأكاديمية، على الجهد وعلى الأداء المتميز اللي تميزت بيه الكلية خلال، مش بس المر.. التخرج واحتفالات ال.. التخرج انهارده، لكن الحقيقة أنا يعني بتيجي لي فرصة إن أنا آجي مرات، وبطمن على الكلية والأداء الموجود بشكل يعني بسيط خالص خالص من غير ما نعمل آآ، يعني، عشان أبقى مطمن إن الأمور ماشية بشكل كويس، والحقيقة كل مرة بنيجي وبنطمن وبنسعد بالمستوى، ولسه، لسه في  أكتر من كده، ولسه في جهد أفضل من كده عشان يبقى دايمًا إحنا زي ما إنتوا قلتوا في شعاركم العلم وإعداد الخريج أو ظابط وظابطة شرطة، قادر على إن هو يقوم بمهامه بشكل آآ محترف، وشكل علمي جيد، بأحدث أساليب العصر.

أنا يمكن آآ مش هتكلم كتير أوي، لكن أنا بس عايز أقول إن زي ما اتقال كده أثناء كلمة السيد وزير الداخلية إن المنطقة والعالم بتمر بظروف صعبة جدًا، وإن إحنا حرصنا في مصر إن إحنا تبقى سياستنا سياسة متوازنة جدًا، في ظل هذا الاضطراب الخطير اللي موجود، وإحنا حذرنا منه، وقلنا إن استمراره، و.. يعني هيبقى هيؤدي إلى عواقب آآ خطيرة في منطقتنا، ويمكن في العالم، وبالتالي محتاجين في بلدنا مصر إن إحنا نبقى متفهمين لده، ونبقى متمسكين بثوابتنا، ثوابتنا إن إحنا حريصين على إن إحنا نكون آآ بنمارس سياسة تتسم بالتوازن والاعتدال والموضوعية.

وده اللي إحنا ماشيين عليه بقى لنا سنين، والحقيقة إحنا في ظل الظروف اللي موجودة، يعني، على حدودنا ال.. الغربية والجنوبية و.. ودلوقتي بقى لنا سنة تقريبًا على حدودنا الشرقية، والتطورات اللي بتحدث، وإنتوا طبعًا متابعين كل حاجة.

هل ال.. هل ده يعني يجعل، أو يخلي شعب مصرنا إن هو يبقى شعب مصر قلق؟ بدون شك، لازم نبقى قلقانين عشان التطورات اللي بتحدث خطيرة جدًا، وممكن تؤدي إلى يعني توسع أو اتساع رقعة الصراع في المنطقة بشكل يؤثر على الاستقرار في المنطقة، وإحنا يعني بقى لنا تقريبًا آآ قناة السويس تقريبا أكتر من 50%، 60% من دخلها إحنا فقدناه، أكتر من 6 مليار دولار خلال الـ 7، 8 شهور اللي فاتوا.

مش عايز أطيل عليكوا في النقطة دية، لكن عايز أطمنكم إن إحنا بخير، والأمور بفضل الله سبحانه وتعالى مستقرة، ومن، ومن.. يعني من جيد أو من حسن لأحسن، طول ما إحنا في مصر، طول ما إحنا في مصر ثابتين ومستقرين ومتحدين جميعًا، إيدينا في إيدين بعض، ومتطمنين على إن إحنا بندير أمورنا بشكل آآ يحفظ بلدنا، ويحفظ المنطقة ما أمكن، ما أمكن، دون التورط في يعني.. آآ.. في أمور ممكن تؤثر على الأمن والاستقرار في المنطقة وفي بلدنا.

طول ما إحنا كمصريين متماسكين، ومتحملين، حابب أقولها بالطريقة دية "متحملين"، بس في نقطة هضيفها في الآخر خالص كده أقول: من فضلكم، من فضلكم انتبهوا جدًا، لأن طبعًا في الفترة دية، ويمكن خلال الشهور اللي فاتت، حجم الكذب، وحجم الإفك، وحجم الافتراء، وحجم الشائعات كان ضخم جدًا جدًا، ما هو انتبهوا إن إنتو، إنتو اللي واقفين دلوقتي، يا مصريين.

مش عايز أزيد في الكلام كتير، لكن المفكرين والمثقفين والإعلام، واضح المهمة بالنسبة له، وواضح الخطر بالنسبة له. عملية ال.. ال.. الكذب زي ما بقول كده والشائعات اللي.. بتطلق، هنا وهنا، و.. اتهامات، مش.. ليس لها والله أساس من الصحة، كلها، يعني، هقول إيه بس، يعني، بيقولوا كلام كتير مش مظبوط، وأنا صريح معاكم وصادق معاكم دائمًا، وهفضل كدا آآ طوال ممارستي لل، للمهمة هنا.

مرة تانية بهني الأسر، وبهني الخريجين، وبقول لهم خلو بالكم من نفسكم، وتعاملوا مع أشقائكم وأبنائكم، أبناء مصر، بما يليق باللي إنتوا اتعلمتوه من القيم دية. لا شك إن التعامل يعني مع ال.. ال.. الرأي العام، ومع الشعب، ومع الناس، بيبقى يعني له، له محاذيره يعني. ولكن صبركم واللي إنتو اتعلمتوه في التعامل، مهم أوي أوي إن هو يبقى دائمًا قدام عينيكم علشان تبقى العلاقة القوية اللي إنتو بتجروا وبتحاولوا إن إنتم تعززوها مع شعب مصر، اللي هم أهلنا كلنا، تستمر وتزيد.

خلي بالكم من نفسكم، وخلوا بالكو من أسركم، وإن شاء الله موفقين دائما، وربنا يوفقكو، شكرا جزيلا... (تصفيق)

مش عارف لو قلت النصيحة دي ها تـ.. خلوا بالكو من حاجتين: وزنك.. وزنك والسجاير، حتى في الأفلام كلها اللي بتيجي يجيب ظابط الشرطة السيجارة في بؤه، خير يعني؟ هو ظابط الشرطة ما يعرفش يفكر إلا بالسيجارة ولا إيه؟ ها يا محمود؟ خير خير إيه الكلام دوة؟ لا لا (يضحك الرئيس) لأ، لأ، السيجارة والوزن. ربنا يديكوا الصحة ويوفقكو ويحفظكو إن شاء الله، شكرًا جزيلًا. (تصفيق)

ألقيت الكلمة في مقر أكاديمية الشرطة، بالقاهرة الجديدة، حيث شهد الرئيس عبد الفتاح السيسي تخريج دفعة جديدة من أكاديمية الشرطة، وذلك بحضور اللواء محمود توفيق، وزير الداخلية، والدكتور مصطفى مدبولي، رئيس مجلس الوزراء، وعدد من الوزراء.