نص كلمة الرئيس السيسي في جلسة الأولى من "العدالة الاجتماعية والصحة" في إطار مؤتمر "حكاية وطن" 2/10/2023
31:37
السيسي: ممكن يا خالد تسيبني أنا أحكي الحكاية دي؟ (يقصد التبرع بالبلازما)
وزير الصحة: اتفضل يا فندم.
السيسي: بسم الله الرحمن الرحيم، وأنا وزير للدفاع فكرت في المشروع دوت، وكانت الدولة المصرية فكرت فيها قبل كدا يا خالد وما نجحتش، وطوال المدة ديت إحنا كنا بنتكلم في مجلس الوزرا النهار ده وبقول، حط الهدف وإفضل مُصر وتلف حوالين منه، لغاية لما إيه؟
وزير الصحة: يخلص.
السيسي: يخلص ويتحقق. الموضوع ده كان كدا. إحنا من.. من ساعة 2012 وأنا بحاول المشروع ده يطلع للنور. في الوقت ده، كل الشركات العالمية اللي لها آآ اسم، ممكن يستخدم، ما.. ما اتعاونتش معانا.. ما إيه يا خالد؟
وزير الصحة: ما اتعاونتش.
السيسي: ما اتعاونتش.. لغاية لما، وإحنا مصرين، نتصل بهنا ونتصل بهنا، ونجيب ونتكلم، ونقول ها ندي كل حاجة بس نعمل المشروع ده، نعمله على أسس، على أسس اللي إنتو اتعمل عليها، إن ده يبقى شراكة والشراكة دي تحمل اسم الشركة العالمية، وهي تبقى معانا في كل الإجراءات عشان يبقى في المصداقية الكاملة للاسم اللي إحنا ها نتحرك فيه.
الحقيقة، لغاية 2019 يمكن و20، ما أمكناش، ما إيه يا خالد؟
وزير الصحة: ما أمكناش.
السيسي: ليه ما أمكناش؟ مش مهم، بس هو ده اللي حصل. لكن إحنا أصـ، مصرين على إن نعمل كدا، لغاية لما جات كورونا بتأثيراتها، فعملت تغيير، عملت إيه يا دكتور مصطفى؟ عملت تغيير في الفكر العالمي للموضوع ده، فكانت الفرصة إيه؟
وزير الصحة: متاحة.
السيسي: إذن لما تيجي تجد تغيرات عالمية بتحصل حوالين منك، إوعى يفوتك تستفيد منها، إوعى يفوتك إيه يا خالد؟
وزير الصحة: تستفيد منها.
السيسي: في الوقت ده قدرنا لقينا إن الناس بتفكر في تشكيل خريطة مختلفة شوية، وكانوا مستعدين على دولة زي مصر إن هم يشتغلوا معانا، وتم عمل الـ.. الاتفاق، ويمكن خلال الـ.. يعني إحنا كنا عايزين إن إحنا المصنع يكون في خلال 24 أو آخر حتى 25، ولكن أول 26؟ مش كدا؟ ها يكون المصنع ده شغال هنا في بلدنا.
أنا عايز أقول إيه، في.. أنا ها أقول كلام مهم قوي دلوقتي يا خالد، الموضوع ده أنا اعتبرته إنه جزء من تصحيح العادات للمصريين لو قدرنا نخليه مشروع قومي لإنتاج البلازما، طب ليه؟ لأن المعايير المستخدمة في قبول العينات واستمرارها، صارمة جدا، صح كدا؟
طيب، يعني أنا عملت مركز في أي جامعة، يبقى أنا كل الشباب والشابات اللي موجودين في الجامعة اللي لو حبوا يخشوا يتبرعوا بهذا الـ.. في هذا المركز، لازم ها يحافظوا على إن هم المسار الصحي والعادات الصحية، ها تبقى إيه؟ تصور. لأن هو مش، لو، أي خلل مش مقبول، ومش ها يتقدم تاني.
في مقابل، في إيه يا خالد؟ وأنا دايما بستفيد من اللقاءات دي عشان إلقاء الضوء على أكبر حاجة ممكنة. النهار ده دخل المتبرع كـ.. كتقدير وشكر من المراكز، لو ها يتبرع مرة في الأسبوع، كام في الشهر؟ بلاش تقول؟ طيب. طب لو مرتين؟ بلاش تقول؟ طيب، رقم معتبر.. ممكن يتقدم في مصر ملايين يا خالد؟
وزير الصحة: أيوة يا فندم.
السيسي: الحلم كان ملايين. الحلم اللي عندي إن هم يبقوا إيه؟
وزير الصحة: ملايين.
السيسي: ملايين. يبقى أنا قدرت أجيب دخل من فكرة تحسن صحة الناس، وتخليني أتـ.. يعني أتمكن من إن أنا الألبومين والحاجات الأخرى اللي بتنتجها هذا الـ، هذه البلازما، تبقى موجودة في مصر صناعتنا إحنا، بـ.. بلازمتنا إحنا، بـ.. وتؤثر على الصحة العامة للكتير من الناس، لأن ها يبقى مسار آآ صحي محترم.
هي دي قصة الـ.. البلازما. (تصفيق)
إحنا عملنا.. 8 مراكز لغاية دلوقتي؟
وزير الصحة: 8 يا فندم والمستهدف 20 إن شاء الله.
السيسي: ده 20 في المرحلة ديت. 20 و50 و100. إيه يا خالد؟
وزير الصحة: أيوة يا فندم.
السيسي: طب، إنتو ها تشوفوا معايير للدول المتقدمة إزاي بتتعامل مع الشأن الصحي، أنا بقول كلام مناسب؟
وزير الصحة: مظبوط.
السيسي: الشأن الصحي، بشكل إحنا ها نتعلم منه كتير. لأن الكلام ده بيتم اعتماده من الشركة الأسباني، وبتشرف عليه إشراف دقيق جدا، وصارم جدا، إحنا بعادتنا يعني مش، مش بنهتم بالطريقة ديت.
أنا بس حبيت أقول الكلمتين دول، مش عشان آخد الكلمة منك.
وزير الصحة: لا يا فندم العفو.
السيسي: عشان أقول حاجة تانية.. إوعوا تشوفوا، خالد بيقول إن إحنا محتاجين 1.3 تريليون، هو بيتكلم على الناس اللي هي متوسط الدخل مش بيتكلم على الناس أو الدول اللي مرتفعة الدخل، يعني إنت عشان تتكلم في 105 مليون، عايز لك مثلا 3، 4، 5 تريليون جنيه، طب هم مش ممكن ها يبقوا موجودين دلوقتي. أنا بقول للناس اللي هي بتخش مستشفى ما تعجبهاش، يقول لك إيه ده؟ هي فين البلد دي؟ البلد ها تجيب لما يكون معاها، وعشان يكون موجود معاها، لازم تعمل إيه يا خالد؟
وزير الصحة: تشتغل.
السيسي: تشتغل إزاي؟
وزير الصحة: ليل نهار.
السيسي: آه. تشتغل إيه؟
وزير الصحة: ليل نهار.
السيسي: ليل نهار. شكرًا يا خالد. (تصفيق)
39:54
السيسي: يا خالد ما تعديش الموضوع كدا. أنا بديك الوقت ده عشان ده منبر موجود تنقل فيه الفكرة للناس وتقول، إنت بتتكلم في 29 وراضي عنها.. وأنا أرضى عنها ليه؟ وترضوا عنها ليه يا مصريين؟
إذا كنا بنقول إن إحنا ها نعلم.. أنا بقول كلام لـ.. ها نعلم إزاي الناس تكشف على نفسها، أنا بقول كلام مظبوط؟
وزير الصحة: صح يا فندم.
السيسي: طيب لو الكلام ده موجود، سواء كان المسح اللي إنتو بتعملوه المتكرر أو إن إحنا بنعلم آآ بنعلم بناتنا يعني إن هم يخلوا بالهم من الموضوع ده، ليه؟ عشان ما تتجرحش، عشان ما يتكسرش خاطرها، لأن هو أي حاجة من دي طالما عرفناها مبكرا جدا جدا، خلاص علاجها، مش بنتكلم في تكلفة هنا، إحنا بنتكلم في الأثر الناجم عنها، وده اللي خلانا عملنا المبادرة دي يا خالد.
فإنت عندك فرصة تقول وتشرح، عشان الـ29 كتير، الـ29 اللي إنت شايفهم من 70 يعني نجاح ونمو، طب ما إحنا ممكن نخليها صفر، بإن النهار ده بدل ما نلح على آآ أرجو إن الكلام ده ما يزعلش الناس اللي حاضرة ولا اللي بتسمعني في مصر، بدل ما نقعد نلح بإن المطبخ في الـ4 قنوات كل شوية مطبخ مطبخ مطبخ، حد يلح في الموضوع اللي إنتو بتقولوا عليه ده (تصفيق)
ما فيش برنامج شوفته بيتكلم عن عادات صحية، وعادات رياضية، تساهم مساهمة كبيرة في اللي إنت بتقول عليه ده يا خالد. ما حدش بيتكلم فيه خالص. فإنت لما جيتوا للأستاذة أمل بتديك 15 قلت لك خد لك 50، ليه؟ عشان الناس كلها دلوقتي تقريبا ممكن تكون بتسمعنا، فلما تسمعنا تحكي تقول اعملوا في دي كدا، واعملوا في دي كدا، واعملوا في أطفالكو كدا، قبل الجواز اعملوا كدا، عشان إيه؟ عشان مش عشان إحنا مش قادرين نعالج، عشان اللي بيتئذي بيتألم، وإحنا مش عايزين حد يتألم. (تصفيق)
48:39
السيسي: لأ هو مش كرم يا خالد، هو مش كرم، ده حق الناس وحق العمل، أنا عارف إن الموازنة بتاعة الحكومة ليها حدود، واللي أنا بجيبه بجيبه من بردو عشان الناس تبقى سامعة وفاهمة، أنا بجيب مثلا من وعاء زي وعاء تحيا مصر يا خالد.
وزير الصحة: وقناة السويس يا فندم.
السيسي: أنا ما أنا ها أقول يعني ها أقول، بردو ده لما بوضحها للناس، فرصتنا دلوقتي الناس تعرف ليه إحنا حريصين على إن إحنا يبقى عندنا صناديق الصناديق دي نقدر يعني نجمع فيها أموال، والأموال دي تستثمر، والعوائد بتاعتها يستفاد منها في موضوع زي اللي إنت عرضته عليا من كام شهر وقلت لي محتاج مليار، وقلنا من تحيا مصر، وقلنا من صندوق هيئة قناة السويس.
كتير بقى قالوا إيه الصندوق بتاع هيئة قناة السويس ده؟ إزاي يعني؟ مش كدا يا دكتور؟ يا جماعة، أنا، يعني، هي أفكار، لو قلت لو أنا إديت الفلوس كلها للدكتور معيط، ولاااا... ولا قد كدا عشر مرات (تصفيق) مش كدا يا دكتور؟ والله صحيح (يضحك الرئيس) اللي ها أديهوله، خلاص، طب ما هو لو كان بيدي كان إداك.. هو بيديك اللي ليك يعني.
فـ.. فالفكرة كلها إن إحنا يا خالد، وبقولها للناس في مصر، حتى للناس اللي هي بتسمعنا دلوقتي، أنا عمري ما اتكلمت على الصندوق ده، وقلت للناس إذا كنتو عايزين يعني تقدموا آآ حاجة لبلدكم، الصندوق ده بيقوم بدور كبير قوي، بس إحنا ما بنتكلمش عنه كتير، صندوق تحيا مصر، بيقوم بدور يعني في أي حاجة بيتم نتزنق فيها، نقول إيه، خدوا من الصندوق مليار أو اتنين.
بالمناسبة، الفلوس اللي موجودة في الصناديق دي تحت إشراف مباشر لمين؟
وزير الصحة: الجهاز المركزي.
السيسي: لااا.. أنا.. (يضحك الرئيس) (تصفيق)
ألقيت الكلمة في القاهرة، بقاعة الماسة بالعاصمة الإدارية الجديدة، حيث شهد الرئيس عبد الفتاح السيسي جلسة "العدالة الاجتماعية والصحة" في إطار مؤتمر "حكاية وطن"، وذلك بحضور الدكتور مصطفى مدبولي، رئيس مجلس الوزراء، والدكتور خالد عبد الغفار، وزير التعليم العالي والبحث العلمي والقائم بأعمال وزير الصحة والسكان، وعدد من الوزراء.