نص كلمة السيسي خلال افتتاح عدد من المحطات البحرية بالمنطقة الاقتصادية لقناة السويس 17/11/2025
السيسي: شكرًا يا كامل و... شكرًا، شكرًا يا كامل، واسمحوا لي إن أنا، يعني، في البداية إن أنا أوجه التحية والتهنئة ليكو جميعا على الإنجازات اللي إنتو بتتكلموا عليها.
واللي أنا عايز أقوله إن اللي اتعمل ده ما اتعملش بـ.. يعني إلا بينا كلنا يا كامل، بينا كلنا يا دكتور مصطفى، مش حد لوحده (صوتا: طبعًا)، لأ ده بينا كلنا، كلنا، التوجيه، مافيش توجيه، هو الموضوع كله كان لدينا فرصة في منطقتنا بموقعنا الجغرافي، بوجود هيئة قناة السويس، ممر ملاحي عالمي زي ده، وإحنا ماكناش... وكان فيه خطة موجودة من، من 2000 وقبل كده يمكن على إن الاستفادة من الموقع ده، وإحنا كل اللي إحنا عملناه إن إحنا اتحركنا، وربنا سبحانه وتعالى وفقنا، وفقنا ربنا، ثم أيضًا جهد الناس كلها. الحلم اللي إحنا بنتكلم عليه...
كامل الوزير: أنا قلت يا فندم هو جهد حكومة طبعا...
السيسي: طيب يا كامل بس اسمع بس...
كامل الوزير: ولكن لولا.. قدام الناس يا فندم كل واحد ياخد حقه، لولا توجيه سيادتك وتقوية سيادتك لقلبنا، وانا شخصيًا في هذه الموضوعات وخاصة في مينا شرق بورسعيد ومينا السخنة، إحنا ماكناش وصلنا للي إحنا وصلنا ليه النهارده، انا قلت لحضرتك إحنا جينا باللودر غرزنا في الأرض، وسيادتك كنت مصمم إن إحنا ننجح...
السيسي: يا كامل.. أبدًا.. الفكرة كلها لما إحنا اتكلمنا في الموضوع ده في 2015 يا دكتور مصطفى، كنا بنقول فيه تحديات والتحديات دي قابلت، قابلت ناس كتير قبل مننا، ويمكن هو ده السبب اللي خلى الأمور مامشيتش طبقًا للتخطيط، فإحنا قلنا لأ، إحنا هنـ.. يعني هنحط إيدينا في إيدين بعض ونشجع بعض ومانخافش، حتى لما إنت بتتكلم على مينا السخنة أو مينا أبو قير الجديدة أو كلام من هذا القبيل، هو الفكرة كلها إن إحنا لدينا فرصة، مش في كل حاجة إحنا عندنا فرصة يا كامل، عندنا فرص في بعض الأمور، وبالتالي إحنا بنحاول إن إحنا آآ نستفيد منها، نستفيد منها، عشان التشغيل وعشان آآ الدخل وعشان ناخد مكاننا الطبيعي بين الدول في هذا المجال، النقل واللوجستيات. دي نقطة.
النقطة التانية، أنا بس عايز أقول لكم، يعني، أنا بقول الكلام ده لينا كلنا ولشركة ميرسك أنا بشكركم، لأن إنتم كنتم على قدر التحدي وعلى قدر المسؤولية، وكل الموضوعات اللي إحنا اتكلمنا فيها مع بعضنا خلال الشهور والسنين اللي فاتت إنتم كنتم أوفياء في تعهداتكم أو ملتزمين بتنفيذ تعهداتكم وإحنا بنشكركم على كده، وأرجو إن إحنا يعني نوجه لهم التحية لو سمحتم (تصفيق)
بس إحنا، إحنا عشمانين في أكتر من كده من كل المستثمرين اللي موجودين وكل الشركاء اللي شغالين معانا، إحنا هنقدم على أد ما نقدر كل التسهيلات اللي تساعد على إن إنتو استثماراتكم تنجح وتجيب النتايج المرجوة، ولكن إنتم كمان اتحركوا معانا، يعني لما بسمع 2030 رغم إنها ممكن حد يقول دول 5 سنين، لأ إحنا ماعندناش وقت أكتر من كده، حتى في المعدلات اللي انت يا كامل طارحها في عدد الأرصفة أو عدد الكيلومترات أو ال.. لا إحنا ماعندناش إن إحنا نستنى 4، 5 سنين لو أمكن، وإحنا نساعد بده ونسند، لأن إحنا كل ما بناخد فرصة بشكل، بدليل، إنت بتقول لي إيه، إحنا لما كنا بنتكلم على مينا السخنة، قلت إن يعني نعمل على مرحلتين، طب لما خلصنا المرحلتين، تكلفتها دلوقتي لو إحنا خدنا القرار ده دلوقتي، دلوقتي، تكلفتها هتبقى كام؟ ثم هفقد فرصة للناس اللي هي، اللي هي التسويق المبكر، الناس بتشوف إن فيه حاجة موجودة فتيجي زي ما إنت بتقول دلوقتي فيه إقبال على الكمية كلها، يعني إنت المفروض تقول إيه، إحنا بندور على أو بنفكر في حاجة أخرى عشان آآ نعزز من قدراتنا.
مش هطول عليكم، أنا سعيد إن إحنا آآ بنحقق ده، وبقول للمصريين إوعوا تفتكروا إن في عمر الدول، المدد اللي إحنا بنتكلم عليها مدد كبيرة، يعني، إن تقريبا، تقريبا كل الكلام اللي اتقال إن تم مضاعفة خلال ال 10 سنين الأرقام، مش كده يا كامل؟ تقريبا مضاعفتها يعني، عدد السفن وكده، بس خللي بالكم، المعدلات دي هتزيد السنين اللي جاية بنسب أكبر من كده، طب ليه؟ لأن إحنا كل ده كنا بنحاول ننجز، دلوقتي إحنا في نهاية الإنجاز، مش كده؟ يعني خلاص المواني ابتدت تبقى موجودة، السكة الحديد ابتدت تبقى موجودة، الطرق والمحاور ابتدت تبقى موجودة، الطاقة بقت موجودة، الحمد لله.
فأنا عايز أقول إن إحنا ماشيين بشكل جيد ومعدلاتنا ونمونا إن شاء الله هيزيد أكتر من كده، والتحدي ده اللي إحنا كنا فيه وما زلنا موجودين فيه، ما نجحناش فيه إلا بالله سبحانه وتعالى وأيضا دعم المصريين، دعم المصريين.. دعم المصريين، وتحملهم وصبرهم، وأنا عايز أقول إن هي بلادنا محتاجة مننا كده، إن إحنا نبقى مستعدين للبذل والتضحية يمكن، عشان في يوم من الأيام نحقق إنجازات تعود بالنفع علينا وعلى الأجيال القادمة.
مرة تانية انا بشكر كل اللي شارك في العمل اللي بيتم ده، اللي تم خلال السنين اللي فاتت واللي إحنا بنفتتحه النهار ده، وإن شاء الله خلال ال.. الشهور والسنين القادمة مزيد من النجاح ومزيد من الإنجازات، شكرًا جزيلًا، وربنا يوفقكم.
(تصفيق)
ألقيت الكلمة في محافظة بروسعيد، حيث شهد الرئيس عبد الفتاح السيسي افتتاح محطات بحرية باقتصادية قناة السويس بميناء شرق بورسعيد، وذلك بحضور كلٌّ من كيث سفندسن، نائب الرئيس التنفيذي لمجموعة موللر ميرسك، والرئيس التنفيذي لمجموعة محطات موللر، وأوليفييه دي نوراي رئيس مجلس إدارة شركة قناة السويس لتداول السيارات والرئيس التنفيذي لموانئ إيه جي إل، وطارق فتحي رئيس مجموعة شركات سكاي بورتس المصرية، ووليد جمال الدين، رئيس الهيئة العامة للمنطقة الاقتصادية لقناة السويس، والفريق كامل الوزير، نائب رئيس مجلس الوزراء للتنمية الصناعية ووزير الصناعة والنقل.