مصدر بـ"التعليم": نسبة كبيرة تحتاج درجات الرأفة للنجاح في الثانوية

انتهى مساء اليوم الخميس، تصحيح امتحانات الثانوية العامة، إلكترونيًا، لجميع المواد، لتبدأ بعدها وزارة التربية والتعليم مرحلة الإعداد النهائية لتجهيز وتجميع النتيجة قبيل إعلانها رسميًا الأسبوع المقبل، في وقت كشف فيه مصدر قيادي بالوزارة للمنصة، أن أعدادًا كبيرة من الطلاب تحتاج درجات الرأفة للنجاح هذا العام.

وقال المصدر إن درجات الرأفة جرى تحديدها بنسبة 5% كحد أقصى من إجمالي درجات المادة، "يعني المادة اللي من 60 لو الطالب جاب فيها 27 ومحتاج 3 درجات وينجح ياخدهم، أكتر من كده لأ.. ومش بياخدهم في كل المواد، لكن في مادة أو اتنين على أقصى تقدير".

وأضاف "دي أهم مرحلة بيحتاجها الطالب، لأنها مرتبطة بدرجات الرأفة اللي بنديهاله علشان يتحول من راسب لناجح، ودي هتكون موجودة بنسبة أكبر لزيادة عدد الناجحين، وهذا أمر قانوني جدًا، لكن الاختلاف هذه السنة مرتبط بأن هناك أعداد كبيرة تستحق درجات رأفة".

وبشأن آلية تطبيق درجات الرأفة، أضاف "عندنا السنادي طلبة ناجحين في كل المواد، لكنهم راسبين في مادة واحدة، والنجاح متوقف على درجتين وتلاتة، هنا إحنا بنديهم الدرجتين أو التلاتة، وبنحولهم من راسب في مادة لناجح في الكل، ودي اكتشفناها في أكتر من حالة، علشان كده بنطبق عليهم درجات الرأفة".

ولفت القيادي التعليمي إلى أن "الطالب من حقه التنازل عن درجات الرأفة"، مضيفًا "أنا عندي طالب مثلًا راسب في 3 مواد، وبكده لازم يعيد السنة، ممكن ألاقي مادة محتاج فيها درجتين وينجح، ويبقى راسب في مادتين فقط، ويدخل بيهم الدور التاني، لكن فيه طلبة بيكونوا عايزين نعيد السنة في التلات مواد، هنا من حقه يطلب التنازل عن درجات الرأفة في المادة اللي اترفع فيها، علشان يعيد السنة".

ويحق للطالب دور الثاني في مادتين فقط لكنه يحصل على نصف الدرجة فقط، أما لو رسب في 3 مواد فإنه يكون مجبرًا على إعادة السنة الدراسية في المواد الثلاث لكنه يستفيد من أي عدد درجات يحصل عليه.