شلل مروري في المعادي.. ونصيحة من رئيس الحي: افتحوا Google Maps

شهدت شوارع وميادين حي المعادي جنوب القاهرة تكدسات مرورية كبيرة، الأحد، خلال ساعات الذروة المرورية وبالتزامن مع عودة الموظفين من أعمالهم، وذلك في اليوم الأول لغلق كوبري شمال طرة، المقرر استمرار غلقه 120 يومًا، لتنفيذ مشروع تطويره وربطه بمحور حسب الله الكفرواي.

وعلى أثر تلك التكدسات، شهدت المداخل الرئيسية لمنطقة المعادي من طريق كورنيش النيل وتفرعاتها مرورًا بميادين الفاروق والحرية زحامًا مروريًا شديدًا، اضطر خلاله قائدو السيارات من مرتادي المنطقة وسكانها لقضاء أكثر من ساعة ونصف الساعة انتظارًا في مسافات قصيرة، على نحو عكسته بوستاتهم على فيسبوك.

وتعليقًا على الأزمة، قال رئيس حي المعادي، اللواء طارق البحيري، إن "الأزمة جات من إن الناس أخدت المسارات المرورية الخطأ، لأننا نوهنا على كل الصفحات وعملنا لافتات إرشادية على الطرق إن كوبري شمال طرة هيتقفل، وعملنا طرق بديلة، منها الشارع الموازي ليه اللي كان فيه مبنى محافظة حلوان القديم ومعهد الأمناء، واللي اتجهز كله من أوله لآخره واتفتح علشان يكون بديل ليه".

وأضاف البحيري لـ المنصة "إحنا فتحنا كمان أمام الحركة المرورية كوبري العاشر اللي جاي من مصر القديمة ومتحف الحضارات اللي بينزل عند الكورنيش وبالتالي فممكن الناس تاخده".

"دي مش أزمة مرورية نتيجة وجود خلل في أعمال إدارة المرور في منطقة المعادي وطرة ولا ناتجة عن وجود حفر ماسورة مياه مكسورة ولا ماسورة صرف ولا كابل كهرباء معطل الشارع"، قالها البحيري موضحًا أن الأزمة سببها "إنشاء مشروع قومي هو محور امتداد شمال طرة".

وأكد البحيري أن الأزمة كانت لساعات مساء أمس وانتهت، موضحًا "النهارده الحمد لله أنا جاي وبراقب الطريق ما فيش فيه أي حاجة خالص وفيه سيولة مرورية كاملة، لأنه خلاص الناس اللي جاية من على امتداد محور حسب الله الكفراوي ومن الأوتوستراد ومن الكورنيش عرفت الطرق البديلة لما كتبت على جوجل، وبالتالي ما بقاش فيه أي تكدسات، فكدا اللي داخل المعادي هما أهالي المعادي".

وقال "إحنا بنّوه بقالنا 15 يوم على قفل كوبري شمال طرة، وفيه لوحات إرشادية من ناحية الكورنيش والأوتوستراد".

وردًا على شكاوى بعض السكان في محيط كوبري شمال طرة من تصاعد أصوات عمليات الهدم التي تنفذها الحفارات، قال البحيري "الناس لازم تشتكي، لما جه يتم تطوير منطقة مصر الجديدة اللي أنا من سكانها الناس قعدت تشتكي لطوب الأرض، النهار ده هات لي واحد في مصر الجديدة مش مبسوط من التطوير اللي تم، أنا كل ما أوصل بيتي في 10 دقايق أو 15 دقيقة بقعد أدعي للي عمل الكباري وعمل الطرق دي، وطبيعي إن التطوير له ضريبة، هنعمل إيه؟!".

وأشار البحيري إلى عقده لقاءات مع عدد من سكان المعادي، موضحًا "الناس على علم بالتطوير اللي بيحصل، المشكلة عندي في اللي جايين لي من القليوبية ومن الطريق الدائري ومن امتداد محور حسب الله الكفراوي، وعايز يروح الكورنيش وفجأة جه عند الكوبري تاه مش عارف يمشي إزاي".

ونصح رئيس حي المعادي "اللي مش عارف يمشي إزاي يشغل Google Maps هيدلكم على الطرق البديلة".

إلى ذلك، اتفق الضابط بمرور المعادي، العقيد عصام رزق، مع رئيس الحي، في أن الأزمة المرورية نجمت عن "جهل المواطنين بالطرق البديلة لكوبري شمال طرة"، مستبعدًا تكرار الأزمة على مدار الأيام المقبلة في ضوء تكثيف الخدمات المرورية بمداخل المعادي.

وأضاف رزق لـ المنصة أن الإدارة العامة لمرور القاهرة أوصت بتعزيز الخدمات وتوعية المواطنين بالطرق البديلة من خلال زيادة اللوحات الاسترشادية.

وكانت محافظة القاهرة أعلنت غلق كوبري شمال طرة أمام حركة السير (سيارات - مشاة) لاستكمال توسعات محور حسب الله الكفراوي، على أن تكون الطرق البديلة شارع عبد المنعم رياض وشارع كوتسيكا بمنطقة طرة.

وقررت المحافظة تشغيل كوبري العميد إبراهيم الرفاعي، كوبري العاشر سابقًا، وذلك بعد إنشاء كوبرى جديد لتسهيل الربط مع محور الحضارات ومنطقة الفسطاط.